Post: #1
Title: تـــــاني.... امــوت مكنكِش.....في ... العنـــب المكرمِش
Author: سجيمان
Date: 12-23-2003, 09:28 PM
Parent: #0
قال لي ماشي امريكا...... خلاص يا فردة...مهاجر... لكن ما عارف هناك اسوي شنو؟...واشتغل شنو؟...... قلت لو بسيطة.... لا تشتغل ولا حاجة...............شوف لك عجوز لازم يكون عندها سكري وضغط..ومرض قلب...وروماتيزم...وحبذا لو عندها سيلطان..... ومغندلة..بعد داك ااتلزم واتحزم وحبها..حب للطيش.....يعني اول ما تحاول ترميها في شباكك... شوف المحل البتتردد عليهو...والبت لها هناك..واول ما تجي جنبك.... نط قدامها.فنترررررررروب.... هي حتتخلع وتقول ....اوه ماي قارد..... ماي قارد دي ترجمتها...وب علي.... باقي انت يخربك في الانقليزي.... رفع حواجبيك وعضي شلوفتك التحت... ودخل ايديك في جيوب بنطلونك... وارفع كتف وارخي كتف.... وقول لها.. اموت مكنكش في العنب المكرمش......طبعا في اللحظة دي هي حتقيف وتعاين لك.... استغل الفرصة وعرفها بي نفسك....وقول لها.... نحن بتاعين رقاد الحوش....وشراب الشاي بالقرقوش....يا غزال يا ما بتحس ارحمني قبل ما تتلحس........بعد شوية هي حتعمل فيها تقيلة وتمشي قدامك... انت هنا قولها.......آآآآآآآخ انا من البيتاتو يتاتو متل جنا الوزين...وخليك مراقبها لو غيرت مشيتها لي مشيت اغراء....خليك ثابت ما تطرطش... طوالي ادي من النوع التقيل...وقول لها...احب نيفاشا وخم القروش بالمكشاشة....اموت انا في الحليب قصير الاجل..كامل الدسم....واياك ثم اياك تبدل قصير الاجل دي بي طويل الاجل... تقوم انت تموت والناس كلها تموت وهي لسه حايمة....وتتاتي.........
بعد الزواج ركز تركيز شديد..انو حكويك تكون عن الموت...وسيرة ناس ماتو وشبعو فيهو....عشان تكرهها في الحياة.. وتوحي ليها انو الموت لذيذ...وحقا في الرقاب....
وماتنسى تدلعها......و طول بالك اتذكر انو دي فترة انتقالية .... ولو كانت النوع العندو كلب...وبيحب كلبو داك...الكلب برضو دلعو........ حميهو...وشامببو...ونشفو...وكل ما تشوفها هي جات اقع في الكلب بوس.....وحاول تضحكو وتكلكلو....وانضم معاهو...ولو في طريقة تجضمو؟....جضمو بس بي دلع شوية......ولو سالتك بتحب الكلب دا؟ قول لها دا كلامك؟... الكلب دا بحبو قبل ما اعرفو.....واي حاجة انتي تحبيها انا بحبها...واريدك اريدك واريد الناس البريدوكي ويريدو كلبك.....مناي ابقى عضُم ابقي لحمة..... ابقى شخت ابقى شحمة..بس يعضيني كلبك ويبلعني جب....و....جب
ساعة النوم...ما تنسى تجيب كباية فيها موية ... عشان تخت فيها طقم اسنانها...وجر عليها البطانية..وبوسها في جبهتها.... خلي بالك الجبهة دي هي الفيها القروش.... ما شفت الناس الباقين عشرة في الجبهة بقو كيف؟....وتندن لها قبل النوم......انت يا الابيض ضميرك صافي زي لبن الربيع..و..لاّ..... الاوصفوك.....لو انصفوك
خشمك خلااااااااااااااااااا
خشمك خلا
كفاية تبلع من غير تلوك
لو بالبصيرة تاملوك
وفي الحقيقة بادلوك
شكلك عروس
وكلك فلوس
وماليا.. البنووووووووووووك
......... يا حليو
ربنا يوفقك وتلاقي عجوز من النوع........ قصير الاجل كامل الدسم
|
Post: #2
Title: Re: تـــــاني.... امــوت مكنكِش.....في ... العنـــب المكرمِش
Author: دباش
Date: 12-23-2003, 10:25 PM
Parent: #1
دكتور سجيمان
لك كل الود
ولو العجوز دى اتلحست
وبعد كده اكتشفت انو كل قروشها
كاتباها فى وصية للكلب ود الكلب ده!!!!!
انا اعمل شنو؟
|
Post: #3
Title: Re: تـــــاني.... امــوت مكنكِش.....في ... العنـــب المكرمِش
Author: bint algazeira
Date: 12-24-2003, 12:13 PM
Parent: #2
سجيمان كيف حالك
قلت لي وليداتنا المشوا امريكا اتاريهم حارسين العجائز
لكن ماقلت لينا اها بنياتنا الماشات امريكا يعملن شنو
يديك العافيه يادكتور والله ضحكت كما لم اضحك من قبل
والعجب الغنيه خطيره حقوا تديها لفنان صاعد زي مابيقولوا يلحنها ويغنيها
|
Post: #5
Title: Re: تـــــاني.... امــوت مكنكِش.....في ... العنـــب المكرمِش
Author: سجيمان
Date: 12-24-2003, 08:21 PM
Parent: #3
بنت الجزيرة........تسلمي
قلتي لي الغنية اديها فنان صاعد يغنيها؟............هم ديل بينتظرو لحدي ما يدوهم؟............ ديل قاعدين يلفحو عدييييييييييل كدي
|
Post: #4
Title: Re: تـــــاني.... امــوت مكنكِش.....في ... العنـــب المكرمِش
Author: سجيمان
Date: 12-24-2003, 07:34 PM
Parent: #2
دباش......... يا اخي خليك متفائل...وبعدين الكلب مش عاوز زول يرعاهو بعد نفوق العجوز؟...........ز خلاص يعني انت فيها فيها
|
Post: #6
Title: Re: تـــــاني.... امــوت مكنكِش.....في ... العنـــب المكرمِش
Author: MUNA OBIED
Date: 12-25-2003, 04:32 PM
Parent: #4
اها يا سجيمان يعنى الواحد لمان اجي امشى امريكا اسوي ليهو كورس بخصوص كيفية التقرب ومصاحبة الكلاب..
بنت الجزيرة انتي ناويا علي امريكا؟
|
Post: #7
Title: Re: تـــــاني.... امــوت مكنكِش.....في ... العنـــب المكرمِش
Author: سجيمان
Date: 12-26-2003, 00:48 AM
Parent: #6
منى عبيد
شكرا للزيارة
انتي ناوية .. تغربي......لو ناوية يلزمك كورس في الكلاب والكدايس.... وانواعن....وشوية علم نفس فيهن.....صدقيني دا حينفعك اكتر من الشهادات... الما معروف يقبلوها ولا ما يقبلوها
|
Post: #8
Title: Re: تـــــاني.... امــوت مكنكِش.....في ... العنـــب المكرمِش
Author: HOPEFUL
Date: 01-18-2004, 06:15 AM
Parent: #7
شجر العنب يا ناس زايد عناقيدووووووووو
|
Post: #9
Title: Re: تـــــاني.... امــوت مكنكِش.....في ... العنـــب المكرمِش
Author: khider
Date: 04-20-2004, 11:09 PM
Parent: #1
up
|
|