حردان التكريتي

Post: #1
Title: حردان التكريتي
Author: Hussein Mallasi
Date: 11-11-2004, 02:49 AM
Parent: #0

اتقدم باجمل التهاني و احسن التبريكات للسيد ود قاسم

بمناسبة عيد الفطر المبارك اعاده الله عليه بالخير و السعادة

و سعة الصدر .......

و كل عام و انتم بخير

Post: #2
Title: Re: حردان التكريتي
Author: ودقاسم
Date: 11-11-2004, 03:10 AM
Parent: #1

حسين
تكريتي دي عرفناها ، بس إنت لسة حردان ؟
مش اتصالحنا أنا والاخت بيان ؟
تاني موضوعك شنو ؟
اتصلت على تلفونك ولقيتو بيرد : مجموعة شركات ..... وما عرفت أسوي شنو ,إنت ما اتصلت ،،
وبعدين عرفت إنك مشيت السودان ،،
أنا ذاتي قربت أمشي ،،
ونتلاقى هناك ،
وكل سنة وإنت طيب ،،

Post: #3
Title: Re: حردان التكريتي
Author: bayan
Date: 11-11-2004, 03:24 AM
Parent: #2

Quote: مش اتصالحنا أنا والاخت بيان ؟
تاني موضوعك شنو ؟

Post: #4
Title: Re: حردان التكريتي
Author: Hussein Mallasi
Date: 11-11-2004, 04:30 AM
Parent: #2

ما دام الحكاية فيها سعة صدر؛ فساتخلى عن استعمل لقب "السيد"

و اعود لاستعمال "الاخ" مرة اخرى.

الاخ ود قاسم

سلامات

كيف ياخي ما عرفتا تسوي شنو!

مش الرسالة كانت بتقول ليك: ادخل التحويلة مباشرة؛ او صفر للمساعدة

ليتك ادخلت الصفر ....

المهم؛ نتلاقى هناك دي اهم حاجة؛ و من اسع انا عازمك في

الريفيرا .....

لمن تجي الخرطوم؛ امشي بالله دار عزة للنشر؛ شارع الجامعة؛

امام وزارة الصحة - و تحديداً القمسيون الطبي القديم -

و اسأل من كتاب اسمو اوراق سودانية؛ كاتبو واحد اسمو شوقي ملاسي

و حتقرأ فيهو حاجات عجيبة ......

لولا ضيق الوقت - و خشيتي مما قد يثير - لانزلت اجزاء منه في

البورد ... و ربما افعل ان تيسر الوقت؛ حتى و ان لم تتبدد الخشية.

Quote: مش اتصالحنا أنا والاخت بيان ؟
تاني موضوعك شنو ؟

هو بالله انتو اتصالحتو ..... طيب يا اخوانا ما كنتو تكلمونا.

و لو اتشاكلتو تاني برضو كلمونا؛ لاكن على اهبة ...

مش صلاح احمد ابراهيم بيقول:

فأنا و الله على اهبة .... الخ

Post: #5
Title: Re: حردان التكريتي
Author: bayan
Date: 11-11-2004, 04:38 AM
Parent: #4

ملاسى
راجع الهوت ميل

Post: #6
Title: Re: حردان التكريتي
Author: تاج السر حسن
Date: 11-11-2004, 04:50 AM
Parent: #5

يا ملاسى و العزيز ودقاسم، تحياتى وكل سنه وأنتو طيبيين.
أهنئكم على هذا (الأنجاز) لكن برضو ما احسن من أنجازالهلال !!!!!
والمقدرة العاليه على النسيان والسكون للمرافئ، والروح المسالمه المنحازه للتصافى.

تخريمه:-
(الشكل) (الهظار) بتاع ناس الجامعة الأهليه ده ما بنفع معانا؟؟ نحنا ناس (دواس) كان شاكلنا لن نشبع حتى فى رمضان.
ما تزعلوا بالمناسبه ام الحسين، من ناس الجامعه الأهليه (مش محطة التلفزيون الأهليه)!!!

Post: #7
Title: Re: حردان التكريتي
Author: Hussein Mallasi
Date: 11-11-2004, 05:08 AM
Parent: #6

يا زول انت قايل دواسك دا دواس ...

ارح معاي بيت البكا - فراش عمك المرحوم دريدا -

و انت تشوف الدواس على اصولو .....

تحياتي للحسين و امو و جميع ناس الاهلية .....

Post: #8
Title: Re: حردان التكريتي
Author: تاج السر حسن
Date: 11-11-2004, 05:18 AM
Parent: #7

تعرف يا ملاسى أنا ناس (دريدا) ديل من زمان عند راى فيهم وفى أساميهم العجيبه دى، ديل دواسهم ما دواس وكلامهم ما بشبه كلام الناس (هسه أختفها أوسلى ذى - قلق - ) ، نحن من قوم لو غضب الواحد منا قال لى اخوهو (طالعنى الخلا)... هسه دريدا ده تطالعو الخلا ولا تعزمو دسكو ؟؟؟
طبعا أنا اقصد انه رائى فيهم بمثلو (الثقافة الأرستقراطيه) التى تناقش قضايا راقيه ، لكنها لا تحل مشاكل رجل الشارع اليوميه ، ذى (بترول السودان) الما بظهر على مظهر (قفة الملاح)!!!
أنا بقصد (على مظهر ) مش (على مظهر).
أقصد (الهيت) (مش الهيت)!!!

Post: #9
Title: Re: حردان التكريتي
Author: ودقاسم
Date: 11-11-2004, 04:02 PM
Parent: #1

حسين
عليك الله نزّل كل المقتطفات التي يقع عليها اختيارك من كتاب الأستاذ شوقي ملاسي ، وانا لو تذكر سبق وسألتك عنه ،،
وشايف بيان عملت كوت من خبر المصالحة التاريخية ،، يعني عايزة تقول أن لا رابط بين حرد حسين وما حدث بيني وبينها من مشادات ،،
ويا بيان والله كل ما حدث سببه كلمة واحدة كتبتيها لي مرتين ،، وهي كلمة
ignored

وأنا إن شاء الله عازم على السير في خط التصالح مع الآخرين مهما كانت التبعات ،، بس طبعا الناس الما بريدهم أنا ما مجبور عليهم وكل سنة وحسين وبيان وتاج السر بخير وعافية ،،

Post: #10
Title: Re: حردان التكريتي
Author: mohamed osman bakry
Date: 11-11-2004, 04:16 PM
Parent: #9

ذكــي يـمــانــي....

Post: #11
Title: Re: حردان التكريتي
Author: bayan
Date: 11-11-2004, 09:22 PM
Parent: #10

اوكى يا ود قاسم اخوى معليش ومتـاسفة جدا على الاقنوردات
انا كتبتها ليك عشان انت هاجمتنى بدون مبررات وكتبت لى قصة انثى الضفدع.. انا بعد زعلت عجبنى تعليق روضا عليها.. وعرفت جد انه انثى الضفدع زولة متفردة شديد..اها القصص كترت لما جات لحدى العندو
لكن اسع خلاص انا عافية ليك كل حاجة وانا زولة مبدئية جدا
اذا قلت ليك متاسفة ابقى جد قاصداها واذا قلت ليك نسيت كل الماضى جد بنساه.. واتمنى اقابلك فى السودان عشان تعرفنى معرفة حقيقية
من اسع عازماك عشاء فى حتة اسمها البيت النوبى فى شارع الحلفايا
انت والاخت فوزية فى مارس القادم ان شاء الله ( لكن توصلونى اهلى بعد العشاء).. وحاعرفك بالوالد
الذى هو صديق عمر عزيز للمرحوم ملاسى الاب رحمه الله رحمة واسعة منذ الستينات الاولى حيث جمعتهم مهنة التدريس.. وصرنا نلتقى ونتفرق
مع هذه الاسرة طيلة طفولتنا..وحسين كابر عن كابر اسرة مستنيرة ومتعلمة ولها فضل فى التعليم فى السودان اذ كان جده لامه عميد معهد التربية شندى خرج الاف المعلمين ولوالده اسهام كبير فى الثقافة السودانية اذ انه اول من اخرج فيلم روائى فى السودان
الا وهو فلم آمال واحلام.. المهم الان نقلب صفحة جديدة..

حسين يا ريت ينزل مذكرات شوقى.. عشان يصحح التأريخ الامدرمانى
والناس تعرف فضل االاسر الناضلت و دفعت ثمن فى تحرير السودان..
من غير ناس ام درمان..
وياريت برضو ينزل اى حاجة عن ثورة اللواء الابيض واسماء الناس الشاركت فيها..

وشكرا لكم جميعا ومحبتى التى لا املك غيرها لكم
وكل سنة وانتم بالف خير

Post: #15
Title: Re: حردان التكريتي
Author: Hussein Mallasi
Date: 11-12-2004, 01:30 PM
Parent: #11

Quote: عشان يصحح التأريخ الامدرمانى

تعرفي يا بيان؛ انا عندي جملة دايما برددا؛ و هي ان:

"تاريخ السودان؛ يكتبه الامدرمانيون؛ عن الامدرمانيين؛ لكل العالم"

Post: #14
Title: Re: حردان التكريتي
Author: Hussein Mallasi
Date: 11-12-2004, 01:26 PM
Parent: #10

Quote: ذكــي يـمــانــي....

ذكي جدا يا منقا .....

Post: #12
Title: Re: حردان التكريتي
Author: محمد سر الختم
Date: 11-11-2004, 10:34 PM
Parent: #1

كل سنة وأتنو التلاتة طيبين وما متشاكلين
حقيقي بوست مفرح

Post: #13
Title: Re: حردان التكريتي
Author: Hussein Mallasi
Date: 11-12-2004, 01:03 PM
Parent: #12

Quote: ،، يعني عايزة تقول أن لا رابط بين حرد حسين وما حدث بيني وبينها من مشادات ،،

دي بالغت فيها يا ود قاسم ....

بخصوص المقتطفات؛ ان شاء الله في الايام الجاية انزل بعض المقتطفات من

كتاب اوراق سودانية؛ بس حأكتب في مقدمة البوست؛ مسؤولية المكتوب

تقع على المؤلف؛ و مسؤولية النشر - في البورد - تقع على حسين

و ود قاسم مناصفة.

Post: #16
Title: Re: حردان التكريتي
Author: Hussein Mallasi
Date: 11-12-2004, 01:41 PM
Parent: #12

Quote: كل سنة وأتنو التلاتة طيبين وما متشاكلين
حقيقي بوست مفرح

قد يكون مفرح يا محمد سرالختم؛ الا انه يماثل الاكل المسلوق؛

صحي؛ بس ما عندو طعم....

البوست في الاول جاب دخل؛ الناس كانت قايلاهو بوست قرانوف؛

و بعدين لمن لقوهو زي كدا؛ خاب ظنهم و انصرفوا عنه ....

Post: #17
Title: Re: حردان التكريتي
Author: jini
Date: 11-12-2004, 01:44 PM
Parent: #1

كل سنة والجميع بخير وعلى رأسهم احمد الريح

ملاسي
إزيك يا سلسيون

زمتن كان في أوضة نوم العروس في كرسى واحد مع بقية الأثاث
وكان الناس بيطلقوا عليه من باب السخرية كرسى الحرد
يعنى الزول الحردان بيقعد فيهو ولا يعود إلى قواعده سالما غلا بعد ترضيته
عشان كده البوست حقك دا اي واحد حردان يجى يقعد فيه حتى ...
جني

Post: #18
Title: Re: حردان التكريتي
Author: Hussein Mallasi
Date: 11-12-2004, 01:53 PM
Parent: #17

كيفك يا جني؛

تتذكر نكتتك ديك الكان غالبني اضحك عليها - ياخي ديك الكانت على

مسؤليتك انت و بكري - اسع عليك امان الله؛ بضحك عليها زي المافي

حاجة؛ و بملء شدقي ......

شوفت الرجالة دي كيف ....

و كل سنة و انت طيب

Post: #20
Title: Re: حردان التكريتي
Author: jini
Date: 11-12-2004, 02:05 PM
Parent: #18

ملاسي

أول مرة أسمع ضحك باثر رجعي
خوفي تكون ضحكت مع هلال شوال
عشان كنا مصفدين
جني

Post: #19
Title: Re: حردان التكريتي
Author: AnwarKing
Date: 11-12-2004, 01:59 PM
Parent: #1

حسين ملاسي والروح العالية...
يديك العافية والله وكل عام وانت بخير يا زول يا سمح...
الله يمرقني انا من جنينة الحيوانات وIgnored دي...

دعواتك...

أنور

Post: #21
Title: Re: حردان التكريتي
Author: Hussein Mallasi
Date: 11-12-2004, 02:09 PM
Parent: #19

سلامات يا انور؛

ان شاء الله بتمرق؛ الموسم اصلو موسم المسلوق؛

و في الايام المباركة المفترجة دي ان شاء الله تاني ما تعرتر ليك

اي Ignored.

بالمناسبة انا نسيت اقول ليك انو بكري الشايقي و سمية كانوا

زملائي في الجامعة - في الاسكندرية زمان - شفت اخوك عجوز كيف.

Post: #23
Title: Re: حردان التكريتي
Author: AnwarKing
Date: 11-12-2004, 02:15 PM
Parent: #21

Quote: بالمناسبة انا نسيت اقول ليك انو بكري الشايقي و سمية كانوا

زملائي في الجامعة - في الاسكندرية زمان - شفت اخوك عجوز كيف.

لا لا لا...............ترا را را....فى بكري الشايقي معناها عجوزاً ليك شيب أصلي ولا التقليد...
وطبعاُ فى حالة سمية فهي صغيرة .

لا كان كدا يا حسين بقينا أسرة واحدة...
على فكرة ناظر المدرسة فى الأهلية المتوسطة- بورتسودان كان أستاذ ملاسي عليه رحمة الله.
وولدو حسين ملاسي صديق لي فى بورتسودان رغم فارق السن بينا..ناس نادي سواكن...
الناس ديل دحين ما أهلكم؟

أنور

Post: #24
Title: Re: حردان التكريتي
Author: Hussein Mallasi
Date: 11-12-2004, 02:23 PM
Parent: #23

كيف ما اهلي يا انور ياخي ...

المرحوم ملاسي ياخي عمي لزم؛ شقيق الوالد؛

و حسين اصغر ابناء الاعمام ....

و نادي سواكن دا بتاعنا عديل كدا ....

يبقى في الحالة دي طلعنا قرايب عديل كدا

Post: #27
Title: Re: حردان التكريتي
Author: AnwarKing
Date: 11-12-2004, 02:49 PM
Parent: #24

أها شفت بيت ناس راجاخان الملاصق لي نادي سواكن بى ورا دا؟
تعرف عمك أحمد حسين معتوق؟ أكيد بتعرفوا...
خالي عبد الرحمن متزوج بتو الكبيرة نجلاء...
اها طلعنا أهل ولا لا؟

طبعا من المرحوم ملاسي عمك لزم...معناها أحنا أكتر من أهل...لازل صدى كلماته فى أذني والله ( ليس هذا من عاداتنا وتقاليدنا)...

والله يا حسين لما الزول يشوف أحنا عايشين فى بورتسودان كيف...ما يصدق انو فى حرب فى السودان قايمة وقاعدة بسبب العنصرية!
أنور

Post: #30
Title: Re: حردان التكريتي
Author: bayan
Date: 11-13-2004, 03:21 AM
Parent: #21

حسين يا عزيزى
Quote: ان شاء الله بتمرق؛ الموسم اصلو موسم المسلوق؛

فى امثلة كدا ما مذكراها كويس لكن بذكر فيها كلمات كدا

خربشة و جريوات
وتانى واحد فيهو يلدغ جحر والمؤمن
وتالت واحد
غنيلو وشر..ز

طبعا الكبر دخل والمخ شتت
ما قادرة اذكر ضيغتها لكن دى ذى بقت امثلتى المفضلة

كل سنة وانت بالف خير والاسرة كلها بالف خير

Post: #22
Title: Re: حردان التكريتي
Author: ودقاسم
Date: 11-12-2004, 02:11 PM
Parent: #1

حسين
بيان
وبقية الحرادى ( جمع تكسير يمكن أن يجمع على عدة صور )
كل عام وأنتم بخير ، وعساكم من عواده ،،
سألبي كل الدعوات وسألتقيكم في السودان إن كان لينا عمر ،، وبيني وبينكم لم تعد لدي المقدرة على الشكل ، والحرد ،، خلونا نصفيها ( مش مريسة حبوبتي أم العندو ) أقصدالحالة بتاعة الشكل والحرد ،، ونرجع اخوان ، فالدنيا تسعنا كلنا بلا شك ..
والتحية للأخ أحمد الريح ، وأساسي ، وابنتي بنت الأحفاد،، وكل الناس الحلوين الذين صمدوا في هذا المنبر رغم كل المناكفات ،، وحقيقة هؤلاء كانوا ملح المنبر ،،
والثابت عندي أننا كلنا أبناء الوطن مهما تعددت أصولنا ، ودائما أقول أن الشعب السوداني بكل فئاته له اسهاماته في صناعة الوطن وفي نضالاته المختلفة عبر السنين ولا أستثني أحدا من ذلك وكثير من المساهمين أسقطت إسهاماتهم عن تاريخنا المكتوب لكن ذاكرة الأجيال تتناقل أخبارهم ، وتثبتها ،، ولابد أن يأتينا يوم نكتب فيه تاريخ السودان بكل تفاصيله ،،

Post: #25
Title: Re: حردان التكريتي
Author: اساسي
Date: 11-12-2004, 02:25 PM
Parent: #22

والتحية موصولة لي ولدكين

Post: #32
Title: Re: حردان التكريتي
Author: Hussein Mallasi
Date: 11-17-2004, 00:28 AM
Parent: #25

Quote: والتحية موصولة لي ولدكين

و لهوبفول من بعد.

Post: #26
Title: Re: حردان التكريتي
Author: ابو جهينة
Date: 11-12-2004, 02:28 PM
Parent: #22

حسين
بيان
ود قاسم

أي تصالح خارج إطار الشرعية ( الجهينية ) سنعتبره تصالحا منقوصا و لن نكون ملزمين بإدراجه ضمن أضابير الإتفاقات الرسمية ..
لذا يا إبن ( أستاذي الديناصور ملاسي ) .. قدم أوراق إعتمادك ..

التحية لكم جميعا و كل عام و أنتم حرادى و متحابين
أخوكم جلال إبن عطبرة المدينة النائمة في عباءة الحزن

Post: #29
Title: Re: حردان التكريتي
Author: bayan
Date: 11-12-2004, 06:10 PM
Parent: #26

العزبز ابو جهبنة

كيف يا اخى ما مختوم بختمك الجهينى.. يا زول انت تأمر ونحن ننفذ
عندنا كم جلال..

كل سنة وانت بالف خير واسرتك الكريمة

Post: #33
Title: Re: حردان التكريتي
Author: Hussein Mallasi
Date: 11-17-2004, 00:44 AM
Parent: #26

الاستاذ جلال سمبويا - او سمبويو ان كان سمبويا خطأ -

تحياتي و كل سنة و انت طيب

لا تصالح خارج مظلتكم؛ و هذا التصالح ما كان له ان يكون لولا مبادرتكم التي اصلحت ما بين ود قاسم و بيان ...

خشيت ان فاتني قطار المبادرة ان يصيبني ما اصاب التجمع الوطني
الديمقراطي؛ و او على اسوأ الفروض؛ ما اصاب قوات التحالف...

و اكثر ما كان يفزعني ان يأتي احدهم
- بعد ان يفوتني القطار و اتشرزم - و يقول لي بأنني لا اقوى
على قيادة ثلاثة من الاغنام - او الماعز ان كانت الاغنام خطأ -

فأبدأ حينها في اكل نفسي؛ حتى اصبح معدة كبيرة؛ دون رأس او اطراف.

لذا كان لزاماً عليً ان الحق بركب مبادرتكم الكريمة؛
فموطئ القدم؛ مقدم على ما سواه.

Post: #28
Title: Re: حردان التكريتي
Author: bayan
Date: 11-12-2004, 06:08 PM
Parent: #22

Quote: خلونا نصفيها ( مش مريسة حبوبتي أم العندو

مافى مشكلة خلاص صفيناها.. مش مريستى المشكلة

يا ريت لو تفرد بوست لبتنا بت الاحفاد.. فأنت اب تعرف كم
يكن البنات حساسات فى مثل هذا العمر للاحراجات..

اما انا من اكلت الكسرة ما قريب والحاجات دى ما بتأثر على كثير

وعليه نعلن اننا قد صفينا كل الخلافات معكم(الجمع لتعظيم)
والعفو العافية وكل سنة وانت بالف خير وسارتك الكريمة..

الله يديك عمر ويدينا عم عشان نتلاقى ونصفيها بالسيخ....

السيخ المعنى دجاج بالسيخ او كفتة.

Post: #31
Title: Re: حردان التكريتي
Author: معتز تروتسكى
Date: 11-13-2004, 07:51 AM
Parent: #1

صرخه00
جميعنا نقف على حنين وذكرى00
و
عندما نقف على الاطلال يشتعل فينا الحنين بلهب الذكرى 00
*المشوار والاختيار كثيرا مايبدو صدفه وحقيقه عندما يتسع الافق تضيق العبارة فالموقف اكبر من ان تحصره كلمات00
كل عام وانتم بخير والسنه دى قبل الجايه تتحق امانيكم00 Hussein Mallasi

اخبار الكوبى بسيت مع الحردان والعيد والتكنولجيا مافى جديد00
عارف دلوق بضحك كيف بسمع فى اغنية يلاك ياعصفور 00
لقيتها كلها بتكلم عنك 00

بديك منها جزء وبجيب ليك الباقى وكت تانى00
اسمع...
يلاك ياعصفورى انا لى (حسين ) مغرم وبغير عليهو00
.....الخ
قول حكم الاوصاف وانا من عيونو بخاف00
لووووووووووووووول 00
شفت كيف ياحسو 00
ارجع اسمعها بتلاقاها كلها ملاسى وحسين مع القافية تك00
يلا فتك بعافية00

Post: #34
Title: Re: حردان التكريتي
Author: Tarig Sidahmed
Date: 11-17-2004, 00:55 AM
Parent: #1

للجميع التحايا والإحترام والتقدير

والكل بألف خير بمناسبة العيد

كل يوم أدخل أقول يمكن الراجل نزل أجزاء الكتاب فيا سيدي ما زلنا منتظرين ... منتظرين ... منتظرين

طارق ع الأحمدي

Post: #35
Title: Re: حردان التكريتي
Author: Hussein Mallasi
Date: 11-17-2004, 01:55 AM
Parent: #34

Quote: ( ليس هذا من عاداتنا وتقاليدنا)...

تعرف يا انور؛ لو كنت جيت الخليج كان تسمع الجملة دي
لامن بطنك تقلب ...

مرة كنت بسمع في اذاعة ال اف ام و كان في برنامج اسمو استفتاء على الهواء؛ المهم؛ سؤال البرنامج الاساسي الكان مطروح على الاستفتاء هو:

- هل توافق على ان تترشح المرأة او تقوم بالانتخاب في انتخابات المجالس البلديةالمزمعة؟

احد المشاركين ذكر بانه لا يوافق على ذلك جملة و تفصيلا؛
فسأله المذيع عن اسباب رفضة المطلق؛ فاجاب المشارك محتداً:

- و هل انت ترضى - يقصد المذيع - ذلك لزوجتك او اختك ؟؟

فحار المذيع و لم ينبس ببنت شفة....

ملحوظة:
المذيع مصري و اسمو احمد حسني.

Post: #36
Title: Re: حردان التكريتي
Author: Hussein Mallasi
Date: 11-17-2004, 02:04 AM
Parent: #35

و بمناسبة بكري الشايقي يا انور؛ مرة واحد سألو:

من وين انت في الشايقية؟

فرد بكري: انا ما شايقي؛ انا جعلي - او عمرابي لا اذكر تحديداً -

فقال له السائل مستنكراً : ما شايقي و اسمك الشايقي!!

فرد بكري : و هل كان الشريف حسين الهندي هندياً؟

___

الغريبة اول امس قابلتا واحد رباطابي اسمو الجعلى عابدين

Post: #37
Title: Re: حردان التكريتي
Author: Hussein Mallasi
Date: 11-17-2004, 02:12 AM
Parent: #36

كل سنة و انت طيب يا تروتسكي؛

ياخي قدر ما نحتا ذهني اني القى اغنية فيها حاجة قريبة من تروتسكي - حتى ارد تحيتك باحسن منها - ما لقيت.

الكوبي و البيست حنرجع ليهو؛ بس بعد شوية كدا؛ شوية بس
لحدي ما اروق و اقدر اركز (اركز مش اركز يا سر الختم .. )

Post: #39
Title: Re: حردان التكريتي
Author: Hussein Mallasi
Date: 11-17-2004, 02:19 AM
Parent: #37

سلامات يا احمدي و كل سنة و انت طيب

اجزاء الكتاب سافرد لها بوست قائم بذاتو و حأسميهو اوراق سودانية
- على اسم الكتاب -

بس هنا ممكن انزل ليك التقديم الاخير الوارد في الصفحة
الاخيرة لكتاب - رواية - امير تاج السر " مرايا ساحلية"

بس خليني ارجع البيت و اجيب الكتاب؛ عشان ما اكتب من الذاكرة؛
عشان بعدين لمن اعلق على المكتوب مايجي زول و يقول لي الكلام ما دقيق و كدا.

اها نشوفك لحدي الوقت داك

Post: #38
Title: Re: حردان التكريتي
Author: Ana Zaty Omdur
Date: 11-17-2004, 02:19 AM
Parent: #1

حسين ملاسى كل سنه وأنت طيب
عايزه أسالك عندك عم فى السعوديه؟؟؟

Post: #40
Title: Re: حردان التكريتي
Author: Hussein Mallasi
Date: 11-17-2004, 02:23 AM
Parent: #38

اعمام يا امدر ياخي ( المقصود اختي طبعاً )

Post: #41
Title: Re: حردان التكريتي
Author: Hussein Mallasi
Date: 11-17-2004, 11:07 PM
Parent: #40

اها نرجع لموضوع رواية امير تاج السر " مرايا ساحلية - سيرة مبكرة"
الصادر عن الشركة العالمية للطباعة و النشر في ياناير 2003

فقد وردت في الصفحة الاخيرة للكتاب الغلاف ؛ بعض التقديمات
و التعليقات من بعض الكتاب كجمال الغيطاني "المصري"؛
مجلة الاهرام العربي؛ فاروق يوسف "العراقي"
و هاشم كرار " السوداني".

و الذي لفت نظري؛ هو ما كتبه هاشم كرار؛ فقد كتب الاتي:

أمير تاج السر .. أعظم الروائيين السودانيين على الاطلاق.

Post: #42
Title: Re: حردان التكريتي
Author: Hussein Mallasi
Date: 11-20-2004, 01:25 AM
Parent: #41

كتب طارق الشريف؛ في جريدة الصحافة الصادرة صباح اليوم
السبت 20 نوفمبر 2004 الاتي نصه:

الفنان معتز صباحي ظهر في قناة النيل الازرق " شاقي شعره"
فأكد أنه لا يحترم نفسه و لا يحترم المشاهد و لا يحترم العادات السودانية و اكدت القناة التي استضافته انها قناة فوضوية
الفنان يا سادة نموذج للاجيال الناشئة.

انتهى
_______

Post: #43
Title: Re: حردان التكريتي
Author: AnwarKing
Date: 11-20-2004, 03:12 AM
Parent: #42

الفنــــــــــــــــــان...

Post: #44
Title: Re: حردان التكريتي
Author: Hussein Mallasi
Date: 11-20-2004, 04:34 AM
Parent: #43

اظن طارق شريف كان بيقرا معاكم يا انور في الاهلية ...
Quote: ( ليس هذا من عاداتنا وتقاليدنا)...

Post: #45
Title: Re: حردان التكريتي
Author: Hussein Mallasi
Date: 11-20-2004, 04:37 AM
Parent: #44

"للاسف" الصورة الوحيدة العالقة بذهني لجوزيف لاقو؛

هي صورته و هو "شاقي شعرو"

Post: #47
Title: Re: حردان التكريتي
Author: AnwarKing
Date: 11-20-2004, 06:03 AM
Parent: #44

طارق شريف!
الاسم ما غريب...
انا دفعة 91-93 فى الاهلية يا جدو ملاسي...

Post: #46
Title: Re: حردان التكريتي
Author: بلدى يا حبوب
Date: 11-20-2004, 06:02 AM
Parent: #1

ملاسى
ولك انت والرجل المنبر ودقاسم عيدية سودانية على صينية تقليه وسمنه بلديه
تحياتى

Post: #49
Title: Re: حردان التكريتي
Author: Hussein Mallasi
Date: 11-22-2004, 05:24 AM
Parent: #46

Quote: صينية تقليه وسمنه بلديه

يعني الزول يجهز حبوب "الزنتاك" و كدا يا حبوب

Post: #48
Title: Re: حردان التكريتي
Author: siddieg derar
Date: 11-20-2004, 01:36 PM
Parent: #1

حسين

الحمد لله على السلامة اللى وصلت بلدك

عقبال ما نصل بلدنا ولو إنه دى ما بتكون إلا نشيل ناس

وكيف الآهل كلهم

بعدين بديته تراجعوا فى التاريخ ما قلنا ليكم

وأنور كنج دا بقى مع صورته بتاعة التخرج من الأكاديمية

وقد أعجبنى فى أنه قد ألقى كلمة الخريجين

وأكيد أنا درسته فى بورتسودان الأهلية أو جاء بعدى

حيث كنت وملاسى وحسن حامد رحمهما الله

يعنى برضه من تلاميذنا ويحق لنا أن نفخر بهم

أما والد نجاة ووالد حسين فهم أساتذتنا

درسونا ورعونا فى الحياة وفى التدريس

سلام حسين لك والعائلة

وعندك الإى - ميل

ونزل صورتى

أخوكم

صديق ضرار

وأستاذكم يا أنور أها

Post: #50
Title: Re: حردان التكريتي
Author: Hussein Mallasi
Date: 11-22-2004, 05:27 AM
Parent: #48

و الله و حشتنا يا صديق رغم قصر المدة
Quote: ونزل صورتى

المشكلة انا ذاتي صورتي اتلحست

بس كدي خلي العدة تصل؛ و بعد داك خلى الباقي علي.

Post: #51
Title: Re: حردان التكريتي
Author: Hussein Mallasi
Date: 11-23-2004, 11:02 AM
Parent: #50

يا ربي؛ اخونا الكتب عن الفنان "الشاقي شعرو"؛

يكون رأيو شنو عن الفنانين "البيحلقو شنباتهم"؟

Post: #52
Title: Re: حردان التكريتي
Author: عشة بت فاطنة
Date: 11-23-2004, 02:43 PM
Parent: #51

الحبايب ملاسي وود قاسم وست الحبايب نجاة ، والله مبروك عليكم بوست الصفاوعلينا كمان وصافية لبن والعيد مبارك عليكم والعفو والعافية ، ويا بورد ما دخلك شر وعقبال بقية المتخاصمين عشان كلنا نغني يا سلام لمن نسالم نبقى شوق طاير معربد .نستحيل شلال عوطف في قليب عاشق مغرد..
وبالله يا ودقاسم لمن ترجع السودان ما تنسى تشركنا معاك في مزرعة الحملان وطبعا ملاسي ونجاة عشان نبقى حملان في الحيشان ..وانا ونجاة عايزين لينا وهمبريب هباب وعصي ما تخافوا مافي ضرب لزوم النقاش والنقة ..