عاجل من الخرطوم لفيصل محمد صالح

سلامات يا فيصل؛

اقرأ صحيفة الاضواء متي ما تيسرت لي؛

الا انني لا افوت عدد يوم الثلاثاء من كل اسبوع؛

حيث اتابع ما يكتب معز؛ سجيمان و شيري.

الا انني اجد صعوبة في القراءة نسبة لصغر الخط المستعمل.

و دي مشكلة مقدور عليها؛ الا انو المشكلة الكبيرة؛ هي في تلوين

اسفل الصفحة برسم يميل للون الاحمر؛ مما تتعذر معه القراءة تماماً.

لذا و اذا تكرمتكم؛ فأرجو ان يتم استعمال خط اكبر؛ مما قد يستدعي

اختصار بعض "المقالات" في كلمات اقل؛ و التوقف تماماً عن تلوين

اسفل الصفحة باللون المائل للحمرة.


و تقبل التحايا و التهنئة على المستوى المتطور للجريدة.

مقالات معز و سجيمان نجدها في البورد بعد - او قبل -

صدور العدد؛ بينما لا نجد اثر لما تكتب شيري؛

على الرغم من ان الحيز الذي تكتب فيه هو اكثر المناطق

" الحمراء" تأثراً ....

ربما كان من الانسب ان يكون العنوان:

عاجل من الخرطوم بحري ........

احتمال الاخ فيصل يشوف البوست دا في

الويك اند ......

ملاسي؟......شفت صورتي؟

اها لقيتني كيف؟


بس اوووووعى تفرشو الصفحة وتاكلو فوقا الفول....والزيت ينقط فوق صورتي ويبوظ البدلة.... بشتكيك


لكن انت يا ملاسي..... صورتك اللابس فيها النبلة ديك وينا؟

لقيتك تخلع يا سجيمان؛

غايتو الزول قدر ما كان يحاول يتخيل شكلك كيف؛
ما كان حيتخيل "هكذا" و جاهة ....

اما بخصوص اكل الفول؛ فأن الصفحات الاول من الصحف اليومية
هي الاجدر بشرف الزيت؛ فكما تتكفل الصفحات الاولى بتطليع زيتنا؛
فاننا نتكفل بتطليع الزيت فيها .....

اما صورتي ديك - بت ام نبلة - فبعد ان استولى عليها الهكر؛
و سرقها من البورد- كما سبق التنويه اليه - فانني رأيت
ان اشارك بهذه الصورة؛ و ذلك كمرحلة انتقالية؛ بين بت ام نبلة؛
و ود اب عمة؛ التي ستأتي لاحقاً ....

الاخ حسين ملاسي

عااااااااااجل من الخرطوم دي
ماركة مسجلة باسم النجار الاسكندنافي
صــــــــــــانع المناضلين من فليين
....
ومن ثم انتقلت الي العدوى
ليست صناعة المناضلين ولكن محاربة السوق السوداء في النضال

كيفك يا شمهروش؛

فعلاً؛ السبق و الريادة لا بد ان تكون مسجلة بأسم
الاخ خضر عطا المنان؛ فهو اول من ادخل "هام و عاجل من الخرطوم"
في هذا البورد.

ثم كان ان استعملت انت نفس هذا العنوان المبتكر؛

ثم كان ان استخدمه بكري شخصياً - او الادارة - في بوسته عن صور
ضحايا مجزرة بورتسودان .....

و اخيراً اتى دوري لاستخدمه؛ دون مجهوداو ابتكار ....
فهي العدوى كما ذكرت .... بس برضو موضوعي للاخ فيصل كان عاجل؛
و كان من الخرطوم ......

_______

قلت ليك؛ لو الواحد جا موقف جبرة؛ ما بلقى ليهو سحبة كدا
مجاناً؛ ساعة ساعتين

حسين ملاسي

كيفك و ازيك ضحكتك بمزاج احلي حاجه

السؤال هو الخط صغير و لا النظر!!!!!

انا ما شفت الجريده لكن الجماعه قالوا دي ما المشكله!!!!!

تصدق انا زمني دا كلو قايلاك في امريكا ليه ما عارفه...

سلامات يا اماني؛

اولاً؛ مبروك الكيبورد العربي .... و شكرا يا معز

Quote: السؤال هو الخط صغير و لا النظر!!!!!

اتخيلي بالله لمن الخط يكون صغير؛ و النظر* "كبير" ....
مش مدرسة بالله.

Quote: ضحكتك بمزاج احلي حاجه

تعرفي؛ الصورة دي كانت في الاحتفال الذي اقامه لي الزملاء

- كدت اكتبها الزملاء/ات الا انني تداركت** - في جدة بمناسبة

عودتي النهائية للسودان قبال 3 شهور. و غايتو ما عارف الزول كان

بيضحك من نفسو او عليها ..... و الشهور القادمة هي التي ستحدد.



بالله تحياتي لكل من احمد و اميرة و الانجال؛
اما الموجودين في السودان فسأقوم بايصال
تحياتي لهم بنفسي ان شاء الله.


_____

* النظر = صاحب النظر
** طوال العقدين الماضيين لم احظ بوجود زميلات في العمل؛
و لا في الاحلام ( جاتنا نيلة في حظنا الهباب)

شكرا يا حسين ملاسي
والإخوة المتداخلين
وملاحظاتك يا حسين على العين والرأس
والمشكلة مش اللون بس ..لكن في الطباعة عموما
نحن مطبعتنا متعطلة وبنطبع في مطبعة تانية من حوالي تلاتة أسابيع عشان كدة الطباعة ما كويسة ونأمل أن نتحول لمطبعتنا بعد الصيانة خلال أيام قليلية
وبالمناسبة شيري بتكتب في العدد الأسبوعي يوم السبت أيضا

وانا ذاتك كنت قايلك في اريكا ..زليه ما عارف..احتمال عشان الصورة
بالمناسبة أنا درست في الأهلية بورتسودان وكان ناظرنا الرجل والاستاذ العظيم ملاسي حسين ملاسي

فيصل محمد صالح

اخي الغالي الاستاذ فيصل

زمن طويل من ايام مفكرة جريدة الخرطوم

عليك الله يا استاذ فيصل ترسلي الايميل بتاعك عشان عندي حاجات للاضواء وشوية مشاورات معك في هذا الخصوص

اخوك

رحيم [email protected]

سلامات يا فيصل؛

و شكراً على الاهتمام بالرد؛

فعلاً في مشكلة كبيرة في الطباعة؛
لانو مرات بتلقى في الصفحة الواحدة عدة
مقاسات و انواع من الخطوط.

تعرف؛ في حاجة كدا محيراني جداً؛ و لم اجد لها مثيل الا في
الصحف السودانية؛ و هي انو لمن الزول يمشي المكتبة بيلقى
صفحات "النص" منفصلة عن بقية الصفحات؛ في كل الجرايد السودانية
بلا استثناء؛ و لم اجد لذلك تفسير !!

و النهاردة اشتريت عدد يوم البست الاسبوعي؛ لافاجأ
بانو يحى فضل الله كاتب فيهو صفحة كاملة الدسم؛ و بالطريقة دي؛
الزول بعد شوية حيشتري الجريدة يومياً

اما ملاسي حسين ملاسي؛ فهو شقيق الوالد الذي يصغره مباشرة
- رحمها الله - و بالمناسبة نهر "ملاسي" الفي الاهلية؛
مسمى على حسين ملاسي - الجد - حيث كان من المؤسسين للمدرسة
مع الدرديري محمد عثمان و اخرين سنة كم و اربعين.

و تقبل تحياتي و احترامي

Quote: وبالمناسبة شيري بتكتب في العدد الأسبوعي يوم السبت أيضا

آن لسجيمان ان يعترض و يتمرد.

فهو الذي بلغ من العمر عتياً؛ يخصص له عمود وآحد يوم الثلاثاء؛

بينما شيري؛ تكتب مرتين في الاسبوع؛ احداهما في العدد الاسبوعي ...

عزيزي فيصل محمد صالح ..
السلام بالكوم و الشوق مطر لشخصكم العزيز ...
تمنياتي أن تكون مبسوط و هاني البال (أمنية صعبة و الله) ..
تحياتي لكل الأخوة الأعزاء طرفكم ... و حتما سنلتقي ..

ٍسلام مربع

حسين ملاسي


ليهم حق ناس بيتنا يقولوا لي " اضواء شنو البتكتبي فيها انتي ؟؟"

وانا اشيل واحلف .. اتاريكم ياملاسي بتاكلوا علينا الفول والطعمية
..؟
كل شيء هين ،بس اتمنى انو الناس تبتعد عن ملاح البامية وملاح الاسود
والله اتلومتي معااااي .
لكن عندي خطة شريرة اوي اوي ، شوف اضع صورتي التي كنت اخذتها
يوما وانا مدبرسة وشعري منكوش مثل شيطان الكوشه..
وكدي النشوف حد يلف بصفحة عكس الريح طعمية ولا حتى سمك
هاهاهاهاه
يا استاذ فيصل مافيش تدابير امنية على قولة على عثمان محمد طه

دا بوست فعلا مفيد بالله الاضواء دي وين يا ملاسى بس عاجل اعكس الصور خاصة صور ناس الثروة الحيوانية ، اصلو عندنا تار مع ابو الحصين بالله عاجل بسارق ليك اميلي بالرقراق ..
وغايتو يا شيري كان شيطنتيها صورتك ولا خليتيها ما عندكطريقة نحن بنقرأ الجريدة مواعيد الغدا ولنهاية اليوم غايتو بتكون كلها اتقرت نرفع صحن صحن ونقرا حتى صحن الشطة وهكذا الحال لحدي ما نمصمص العضيمات والحمد لله ونكرفسن في الجريدة وبعد داك يا كافي البلى على الكوشة بس بالله مش كوشة الاليكترون كانت احسن .

إزيك يا حسين يا حبيب،

والله مشتاقين جداً جداً جداً..

بالله سلم لي سلام شديد على حبيبنا سيف محمد صالح
وقول ليه أخبار البساتم الخمسة شنو.. وهو حا يفهم

وشكراً على متابعتك لصفحتنا مع ناس فيصل الرايعين والرايقين..

مقالات شيري بتلقاها في الموقع بتاعي في عكس الريح صباح كل ثلاثاء وعلى مدار الأسبوع على العنوان ده:

www.drmoiz.com

لك السلام والتحيات النواضر

معز

Quote: بس عاجل اعكس الصور خاصة صور ناس الثروة الحيوانية ، اصلو عندنا تار مع ابو الحصين بالله عاجل بسارق ليك اميلي بالرقراق ..

يشهد الله يا عشة؛ لي يومين ما فهمتك قاصدة شنو؛ الا اسه وقع لي كلامك



هو التار دا اصلو ما بينتهي .....

قالو لو الزول جا شايل في ايدو كفن ابيض؛

سيد التار بيخلي ليهو تارو ....

بس ما اظن صاحبنا يجي شايل ليكي الكفن الابيض؛

و ما اظن انك حتعفي ليهو حتى لو جا شايل الكفن ...

سلامات يا شيري؛

تعرفي؛ حكاية صعبة جداً انو الزول يكون بيكتب في

جريدة واسعة الانتشار؛ و ما يكتب اسمو الحقيقي؛

و اكيد في ناس بيعرفوكي و بيقروا ليكي و ما عارفين

انو دي انتي؛ غايتو كخطوة اولى كتبتي "شيري الامين"

لكن الافضل - و ربما الاريح - انك تكتبي اسمك و بين قوسين "شيري"

عشان ناس العرس ديلاك؛ لمن يقروا الجريدة يعرفوا انو دي انتي

و بعدين الاضواء دي الجريدة الوحيدة الممنوعة من اللف و الفرش؛

لانو؛ و بعد فراغي من قراءتها؛ اتركها متاحة للجميع؛ سواء في البيت

او المكتب؛ و اول ما يجي زول يقراها؛ اقول ليهو:

تصدق - يا زول - انو الناس البتكتب في الجريدة دي من "جماعتنا"

سلامات يا معز؛

Quote: بالله سلم لي سلام شديد على حبيبنا سيف محمد صالح وقول ليه أخبار البساتم الخمسة شنو.. وهو حا يفهم

ياخي من ما قلتا لسيف حكاية البساتم الخمسة دي و هو بيضحك لحدي اسه؛
ما تورونا الحاصل شنو


تعرف يا معز؛ القراءة و الكتابة في المنتديات خربت طبع الزول؛ و انا شخصياً
بقيت اجد صعوبة شديدة في قراءة الجرايد.

كل ما اقرا موضوع في جريدة؛ افكر طوالي اعمل "اقتباس" و اعلق على الكلام المكتوب؛
و طبعاً الكلام البيحتاج "للاقتباسات" في الجرايد اكتر من الهم على القلب؛
و لعدم وجود خاصية الردود؛ بنقطعوا في بطنا و بنسكت ...

و بالمناسبة موقع عكس الريح من المواقع التي اطالهعا بصفة مستمرة
و يزداد اعجابي بها يوم بعد يوم ....

و لك السلام و الاحترام