يوماً ..... ما

تنوية:

اتمنى ان لا تصنف مادة هذا البوست كمادة دعائية او اعلانية.

و ان صنفت كمادة دعائية او اعلانية؛ فاتمنى ان اجد من يتوسط لدي

عندما يحين وقت العقاب و تنفيذ المواد القانونية؛

و ان تجدوا لي مخرجاً حينها؛

و لو بالواسطة.

قبال اسبوعين؛ قريت في الجريدة؛ انو فرقة ساورا طلّعت شريط جديد؛

اسمو " يوماً .... ما " و انو شريط ظريف و انو أغنية " يوماً .... ما "

تأليف محمد عبدالخالق و تلحين طارق ابوعبيدة.

المهم طوالي مشيت امدرمان؛ المحلات الورا السينما؛

طبعاً اي دكان ورا السينما بقى شركة انتاج اشرطة كاسيت.

اول دكان كا بتاع واحد هندي كدا؛

سألتو: عندك يوماً ... ما .

عاين لي باستغراب؛ و قال لي مافي.

الشركة التانية كانت شركة كابلي؛ سألتا الشباب:

يا اخوانا عندكم شريط ساورا الجديد بتاع يوماً .... ما؟

رد المعلم؛ لا ابداً؛ ما سمعنا بيهو حتى.

و بينما انا متشاغل بالنظر في الاشرطة التي لديهم

سمعتا حوار جانبي بين المعلم و احد العاملين بيقول ليهو:

انتا ساورا عندها شريط جديد؛ قال ليهو ايوا؛ سألو انتاج منو؛

قال ليهو انتاج ناس السناري.

مرقتا؛ و مشيت للدكان التالت؛ طلع ياهو ذاتو شركة السناري.

ارجح ان يكون محمد عبدالخالق؛

هو صديق عادل عبدالعاطي الذي حدثنا عنه كثيراً؛

و شقيق زميلتنا في البورد الاخت الهام ( ام جعفر)

و ارجح ان يكون طارق ابو عبيدة هو طارق ابو عبيدة.

يعني خدر يا جماعة.

اها ناس السناري قالوا لي؛ ايوا كيف؛

طبعاً عندنا الشريط.

و حينها يبدو انني لم استطع ان اكتم سروري؛

لانو الزول قال لي:

و الله فعلاً شريط سمح ....

فأجبته - في سري - سمح و لا ما سمح؛

برضو حأشتريهو.

المهم بقت ونسة مع الزول؛

قال لي سمعت الشريط قبال كدا ؟

قلت ليهو لا ..... لكن الملحن صاحبي.

غايتو لو كان كتر معاي و قال لي صاحبك من وين؛

و قلتا ليهو صاحبي من سودانيز اون لاين؛

كان استغرب زي الهندي الاولاني داك.

و طبعاً الناس الماجربت خوة سودانيز اون لاين ما بتقدر

تعرف و لا تقدر الحكاية دي.

بس الحمد لله ما كتر .....

Quote: و طبعاً الناس الماجربت خوة سودانيز اون لاين ما بتقدر تعرف و لا تقدر الحكاية دي.

خوتك بنعرفها يا ملاسي في عدد الكاسيتات الإشتريتها.

العنوان في بريدك الخاص

و الله لحدي اسه اشتريت شريط واحد بس يا اسماعيل؛

بس سمعتو 1200 مرة.

اقصد سمعتا "يوماً ... ما " 1200 مرة؛


تنتهي؛ اعيدها تاني ..... و هكذا.

Quote: فأجبته - في سري - سمح و لا ما سمح؛ برضو حأشتريهو.

خوف ولا زوق
البايع كانتونا1 ولا شنو!
جني

لو البايع كان كانتونا يا جني؛

كنتا رهنتا الساعة و الحزام؛ و اضفتهم لما عندي؛

لشراء اكبر كمية من الاشرطة.

يا زول صاحبك دا الله ما يرمي زول في مدى يسراهو.

______

ما شاء الله تبارك الله

يوما ما ...

شعر : محمد عبدالخالق
الحان : طارق ابوعبيده
توزيع : ابراهيم الماحي

يوما ما
يوما ما
سيغني اطفال العالم لحنا واحدا
يتردد من غابات الامازون الي ناميبيا
يطوق خصر فرينادا ... يوما ما
يتراءي في الرؤية طفل انغولي
يقبل ريتا طفلة يافا
فاطنة السمحة
ترمي شليلا في الكاريبي
يوما ما
سألقاك وتلقاني
يعزف قلبانا لحنا إنساني
يوما ما
سألقاك وتلقاني
يتردد لحنا إنساني

ملاسي
خدر صحبك ده مع الجماعة ديل

Quote: الناس الماجربت خوة سودانيز اون لاين ما بتقدر

وكان كده خدر إلا يرسل لي شريطو ده... إن شاء الله بالإيميل.. عشان خوة www.sudaneseonline.com

قلنا مبروك...

ليوماً.... لا.. يريكم إلا الفرح...

يوماً... ما..

Quote: وكان كده خدر إلا يرسل لي شريطو ده...

كدي خلينا في الاول نسألو يا عبدالرازق؛

و لو هو ذاتو ما عندو؛ نرسل ليهو واحد؛

يمضي لينا فيهو و يرجعو.

و بعد داك نشوف نرسل ليهو واحد تاني هدية و لا ما نرسل.

شكراً يا تنقو على ايراد الكلمات؛

غايتو كلمات عضم بس؛

و البيلحنها يمكنه ان يلحن اي صفحة من دليل الهاتف.

على ذكر شركات الانتاج و المحلات المتخصصة في بيع

شرايط الكاسيت؛ خلوني احكي ليكم الحكاية دي:

مرة قبل شهر و شوية؛ جابو في تلفزيون النيل الازرق؛

اقصد قناة النيل الازرق؛ لقاء مع الفنان حمزة سليمان؛

كان لقاء خيالي؛ و غنى فيهو حمزة اغاني خيالية؛

و كان كل ما يجي زول ماشي و انا بتفرج؛ اناديهو؛

و اقول ليهو : بالمناسبة حمزة دا صاحبنا

و بيكتب معانا في البورد.

المهم بعد مشاهدتي للحلقة امتلأت طرباً؛

و من فوري توجهت للمحلات اياها الورا السينما.

المهم في الموضوع؛ اول دكان - شركة - دخلتو سألتهم:

يا اخوانا عندكم شريط لحمزة سليمان.

قام واحد اطرش كدا سألني: هو في فنان اسمو حمزة سليمان‍‍‍‍‍

قلت ليهو و انا اميز من الغيظ:

نفترض انك ما بتقرا سودانيز اون لاين و دا مؤكد؛

و نفترض انك ما بتشوف تلفزيون النيل الازرق و دا احتمال ضعيف؛

ما معقول ياخي ما تكون سمعتا بي فرقة عقد الجلاد في الفترة التي

تلت عهدها الذهبي؛ او عهدي - انا - الذهبي كمستمع متابع لعقد الجلاد.

و لاخفف من غيظي الكظيم؛ سألتا اخونا الاطرش دا:

طيب عندكم هاجر كباشي.

قال لي: الله كيف؛ طبعاً.

قلت ليهو : طيب يا شاطر اديني بجي بجي.

و من هنا اناشد اخونا حمزة انو ينزل اعمالو

في السوق؛ لكي نطرب كما طربنا يومذاك.

لانو ما لقيتها في اي مكان في العاصمة المثلثة.

Quote: قلت ليهو : طيب يا شاطر اديني بجي بجي.

يا شاطر دي شفيتها من اخونا كوستاوي؛

لذا فحق ملكيته لها لا يدانيه شك.

Quote: فأجبته - في سري -

وفى جهرك اجبته كيف؟؟





طبعا مستلفة طريقتك فى دخول البوسات يا معلم...


والبادى اظلم..

لكن الجابنى حقيقة ...حسة الشريط ده نلقاه كيف ...نحن كهاربين من الوطن ومحتميين بالعواصم الامبريالية؟

و ياااااااا للفداحة

_________

الشريط دا هدية مني ليكي؛

ما عليكي الا انك تمشي لناس ادم؛

و تقطعي تذكرة للسودان؛

و اي عدد من النسخ انا مستعد يا تماضر.

اها؛ اول ما اشتريت الشريط طوالي فكيتو؛

و قعدتا اقرا في اسماء الاغاني و السماء الملحنين؛

عشان اطمئن انو اسم طارق ابوعبيدة موجود.

اغرب حاجة لقيت انو اغنية "يوماً .... ما" و على الرغم

من كونها عنوان الشريط؛ الا انها موجودة في الوجه التاني؛

و ليس الاول.

طبعاً استغربتا؛ و لحسن الحظ انو الدكان يا هو ذاتو الشركة

المنتجة؛ قمتا سألتا الزول المسؤول و قلتا ليهو:

ياخي ما دام اسم الشريط "يوما ..... ما" ليه ما ختيتو

الاغنية دي كأول اغنية على الوجه الاول؟

قال لي كلام كدا ما مقنع؛ غايتو القدرتا افهمو انو طول الاغاني

هو الخلاهم يرتبوا الاغنيات بالشكل دا.

طيب ما يرتبوها بنفس الترتيب بس الوش التاني يجيبوهو بالاول.

المهم؛ طبعاً ما حبيت اكتر معاهو يقوم يقول لي يا زول ما دايرين نبيع ليك؛

و اخد خازوق؛ قصرتا الكلام و شلتا الشريط و مرقتا.

عندي لسه باقي كلام ما قلتو في البوست دا.

شكرا ملاسى
على الاعلان الجميل
للذهاب خلف السينما
وحليل السينما
وشكرا مرة اخرى
للشريط
غالبا بكرة يكون عندىنسخة
وساحاول ان اسمعه 1500مرة
عشان موضوع الرقم القياسى وكده


سلام

Quote: طيب عندكم هاجر كباشي. قال لي: الله كيف؛ طبعاً. قلت ليهو : طيب يا شاطر اديني بجي بجي.

شاطر صحي صحي...

اوعا "صحي" دي تتفهم غلط زي بتاعت سبيل... وتنهال السباب الجندرية علينا