توللوبوت ..جانا حرامي بقلم د.أمل الكردفاني

11:56 PM November, 22 2019

سودانيز اون لاين
أمل الكردفاني-القاهرة-مصر
مكتبتى
رابط مختصر

في جوف الليل الدامي
جانا حرامي..
تلب
شاف الحلة..
ولقمة..
ونص للبلة...
وكيس العيش..
وعراقي وهدمة..
فتح الحلة
واكل اللقمة
وشرب النص...
وشال العيش
ولبس العراقي...
وفتح القران
وختم الختمة.. وفرا..
.
.
وفي اليوم التاني
جانا حرامي...
لقى فد شبشب
وطرقة كسرة
وباقي ملاح البصرة
غمت الشبشب في كرعيهو
وعجن الكسرة
بباقي البصرة
وقبل يغادر
قرالوا بيانا أول
وسبح بي عدل الكون
وحام اتجول
وغادر فرا...
.
.
وتاني تلب لينا حرامي..
ما لقى شي
حفر وحفر
وطا ودنقر
دب وصنقر
وصرخ محتج
قال بيركب راس السونكي
وبيطلع يقلع حقو الضايع..
رفع السونكي
وجاهو حرامي الحلة الأول
وجاهو حرامي الشبب برضو
وتحت رعاية دولة غاغا
عقدو المؤتمرات الحلوة..
بدلة صوف
وجزمة أصلة..
وكرفتة عليها المهلة
وضحكوا واكلوا وشربوا وفرطوا
ونحن نشوف واقفين في السهلة...
قالوا
سلام وعدالة ..وقلبة وعدلة
ليكم يا جهلة...
فرحنا..رقصنا .. ملينا العطلة...
ختو الحلة ونص الكاس
وفكو الجرقاس
ولبسو شباشب اولاد الناس
وقالوا خلاص
وقلنا خلاص...
.
.



*_كردفاني_*