يسقط المجلس- شعر- علي تولي

09:31 PM July, 30 2019

سودانيز اون لاين
علي تولي-USA
مكتبتى
رابط مختصر

يسقط المجلس- شعر- علي تولي

فليسقط المجلس
وليسقط المجلس
**********
يا مجلس القتلة
زمن التفاوض راح
دي بلدنا نحن اهلا
وعقولنا فيها نصاح
يا مجلس الجُهلا
ضابط الخلا الرحراح
محسوب من الدخلا
فليسقط المجلس
*************
سيب النفاق والذل
اسكت كفاك انطم
سارق حقوق الكل
كل يوم تعبي تخُم
يا الارزقي الشحاد
كفاك خلاص اتلم
ضاقت معاك بلاد
بقّيتا قدر السَّم
**********
ضابط الخلا النقنقاق
شوف ليك حمار جزو
قالوا بنشذ آفاق
قدامنا كم فزوا
فليسقط المجلس
*********
رافعين مطالنا
لا غلطنا لا عبنا
سارقين مطايبنا
دُورنا وملاعبنا
فليسقط المجلس
*********
غربان نذير الشُّوم
مجلس خليج بالدَّس
زارعِنُّوا في الخرطوم
فليسقط المجلس
*************
الشدرة مقلوعة
قلعوها في أبريل
ما كان علي طوعا
قام مدَّ ايدو عديل
نافع لحس كوعا
فليسقط المجلس
*********
يا مجلس الخرفان
كباشي والحاشي
خمُّوا الكضب كيمان
بين مرتشي وراشي
مجلس عدو الإنسان
جيش جنجويد برهان
فليسقط المجلس
***********
حمدان مع سجمان
الجاي من الصَّي
بالدوشكا والبمبان
شاقِّين شوارع الحَي
ضارب رصاصك حَي
فليسقط المجلس
حلَّق شهيدنا الحي
فليسقط المجلس
يصمت كلامو الني
فليسقط المجلس
***********
ما فيش سلام لا كلام
يسقط فقط يسقط
ثورتنا لي قدام
كل يوم وراه خطط
وثَّقنا كل إجرام
ما فيش سطر بنفط
فليسقط المجلس
وليسقط المجلس
**************