الساحة: شعر- علي أحمد تولي

07:09 AM June, 24 2019

سودانيز اون لاين
علي تولي-USA
مكتبتى
رابط مختصر

غدرونا فيك
يا الساحة يا أم سماح
غدرونا شان
سامرنا بالوطن العظيم
غدرونا فيك
في ليلة ما جاها الصباح
جوها الكجر والجنجويد
شوف كم شموس غابت ضحى
عِزَّة نفوس
يا وطني ما أبلغ قصايدك وافصحى
والساحة هي
لوحات تغازل في الجدار
حين فارق اللون الطروس
يا ساحة زي خدر العروس
مَجْلوَّة للزفة القريبة
محفوفة بي عناية الطبيبة
مفجوعة في غيبة العريس
ساحة المغنين والموسيقى
عالية المتاريس والنشيد
يا مادة أسباب العشق
في كل قلوب الثائرين
نهواك بي مليون طريقة
ذهب المحبُّون الكبار
والناس نيام
حين جاتِك أفواج التتار
عِزَّ الصِّيام
فاق احتمالك وانت حي
فاق احتمال الساحة دمك يا شهيد
لا هي موية النيل هي موية
والنيل نبيل
لفَّ حزنو وانفجر جواهو واتفجَّر دموع
ردَّدت كل المناسيب الغريقة معا العويل
يا ساحة بان فجرك قريب
يا ساحة يا راجية القصاص
في الجوك بالساحق وبالماحق
وبالأمر العصيب
بكرة المشانق والمقاصل ما بتخيب
فيك بنعدِل كرسي العدالة
لي كلِّ ظالم مستبد
ضد النزالة
ضدْ كل كوز شايل القباحة
ضد ارتزاق كل العمالة
يا ساحة يا واحات مدنا الفاضلة
والزمن الجديد
يا روضة صبا الجايين
مسافات الحزن
والجايي في الفرح البلوَّح ما بعيد
يا مسرح رؤانا الضائعة
في الزمن الضباب
ضمتنا فيك همتنا
كم شدينا فيك وتر الوطن
شادينا دوزن للرباب
يا ساحة يا واحات مدنا الفاضلة
والزمن الجديد
يا روضة صبا الجايين
مسافات الحزن
والجايي في الفرح البلوَّح ما بعيد
يا ساحة يا
باحة حنين إلفتنا
حين لمتنا فيك أمَّ الشهيد