قصيده بعنوان مانفيستو الكمه بقلم عوض خضر احمد

00:29 AM April, 18 2019

سودانيز اون لاين
مقالات سودانيزاونلاين-USA
مكتبتى
رابط مختصر

من الصباح
تصحي وفي بالك
ثورتك ماتذهب أدراج الرياح
شاي الحليب لونو العجيب
وسك سك مع الكجر الفتر
وريحة هدومك إنتصار
والدنيا كتمه وإجتياح
والفي الزنازين المقابلين
الألم بكل ثبات
روعة عنادهم والدموم
وخبر الطريق لمن يعرفوا الكتمه كيف
والإنشراح
وصاحبك الجرحو الرصاص
فرحان بيهتف في السرير
والحاجه لمن تتلفت وترسم علامة
النصر فيك تسقط حكومة الإنبطاح
واحد بعيد بيسال عن الكتمه ويفيض
وعن زول سرق حلم الوليدات والبنات
ودشن أناشيدو القباح
خبر الشوارع والبيوت
وزغروده واعده في صنقعت
ناس الصحافه المسرفين
في الإهتياج ناس بري
رواد الصمود والإندياح
الكتمه في جيهة المزاد
والشجره ترّست الطريق
وفي جبره ترشف حرقتك
لمن تدّمع وتستعر
في جتتك عدوي الصياح
وشمبات تودر في الكجر
حيطه وزقاق لمة رفاق
وبنات مصاقرات الهتاف
ولون الطريق حنة عريس
طرحة بنيه مغردها
والفجر لاح
شوقك إلي الفصل الأخير
أعلامك المستنيه العركه وترفرف دون سكون
والبوهيه واللون البتكتب بيهو صاح
وفي عز مسيرك واللهيب
تلفت خواطرك زقزقه
غمز الحبيب في رساله
جات بالليل شديد وماكت متاح
البت مسربله بالحنين
النوم شرد من عندها
ماقادره تنسي الهرجه
والناس والصياح
وترجع تعود لقعدتك
رشفاتك السارحات بعيد
ضل الضحي الهمدان سعيد
وامك تمازحك بالبنيات
البقالدن ريحة البمبان نصاح
من الصباح
وترتب الحاجات هميم
في كم كمامه في الشنطه المعاك؟
الخرطه في راسك وضوح
وعزمك سليط وجماعتك الخبروا الهتاف
بيتناطوا قدامك رماح
وهاتف بيصور كل شي
ورزمة ورق وبيان
فصيح وشعار محبب وإنفتاح
زولتك معاها الخل كتير
ومعاها بسمه بتدفعك لأقصي
حالات الكفاح
مسكونه بالهم الكبير
وبتبكي كلما يجيبوا سيرة
المات عذاب شان
الوطن مايستباح
لازم تذاكر حرقتك
ويقود مشاويرك عشم
اصلو الوجع ضد الخمود
خليهو في ضراعك لقاح
ومن العدم تستنبط الهرجات نشيد
وكيفن تجربوا كل يوم تكتيك جديد
وكسر الحصار ولون البيوت
مفتوحه في وش المضادين السلاح
وأصحابك البعثوا الرصيد
لزول بعيد شان يلحق العركه
و يجوط واللمه والحضن المتقب بالسماح
وعودتكم اخر الليل كتار
ورم العيون والصوت مضعضع بالتعب
ولون الأمل في كل زول
وكيفن غرقتوا مع المزاح
والموعد التالي الجديد
والجدول المليان وعيد
والأمنيات تبرق حكايات في العيون
والإرتياح