جايي ليك.. شعر-علي تولي

01:14 PM March, 30 2019

سودانيز اون لاين
علي تولي-USA
مكتبتى
رابط مختصر

جايي ليك
شعر/ علي تولي 30 مارس .. فينيكس - أريزونا

الجَايِي مِنِّكْ جَايِي ليكْ
وَالأَصلُو مِنِّكْ
جَايِي ليك
يا حُرَّة ثُوَّارِك كُتَار
بُكْرَة فِي إيْدنَا القَرَار
نَجِيكْ نَجِيكْ
يَا حُرَّةَ الدَّم والدِّيَار
عَالَم يَبُق
جُوَّانَا نَار
نَفتَدِيك
أنفَاسْ شَرَار
ليلك نشُق
وُكَلام كُبَار
جُوَّانَا تَاريْخنَا النَّضيف
جُوَّانَا مَمْلَكَة القَرَار
مَا نِحنَ ثُوَّار مِنْ قَدِيم
مَا نِحنَ يَا قِيَمَ الكُبَار
نِحنَ أحلامَ الصُغَار
الجَايِي مِنِّك جَايِي ليك
وَعْدَ المَنَافِي مَعَ المَوَانِئ
وِكتين تَبِيْنْ فِي العَتْمَة
يَا ضَوَّ الفَنَار
وَأشْوَاق كَتِيرَة مَعَ السَّوَاحِل
تَغْتَسِلْ
وُعيُونْ مَعَ السُّهْدَ المِطَوِّلْ
تِكْتَحِلْ
يَكْفِينِي حُضْنِكْ
يِنْطَفِي الشُّوقَ البِحَرِّقْ مِن سِنِينْ
لَمَّا تَنْزِلْ مِنْ عُيُوْنِكْ دَمْعَتِكْ
وَأنَا أصلِي مِيْن
كِمِّينْ مِنَ أْجْيَالَ الحَنِين
وَألوَانْ فَرَح
بِتْرِفْ جَنَاحِين النَّوَارِس
حِين تَغَازِلْ كُلْ بَرَاءاتَ الطُّفُولَة
وُكُلِ أشْكَال المَرَح
جَايِي مِنِّك جَايِي ليك
طَربَان يِرَاقِص…
جِيش خَوَاطِر شُوقِي شُوقِك
فِيكِ أحلامِي المَهُولَة
رِيْشَة تَرسُم لِي مَلَامْحِك
شَمْسِ تَشْرِق
بِالصَّبَاحَات الجَمِيلَة
شَان تَقَبَّل ضَيْ وَشِيك
وَالأصلُو مِنِّك
جَايِي ليك
جَايي ليك