يا يُمَّة ما تبكِي ... بناديك وليدك بابكر بقلم الدكتور الشاعر محمد بدوي مصطفى

05:38 PM January, 26 2019

سودانيز اون لاين
محمد بدوي مصطفى -Germany
مكتبتى
رابط مختصر

يا يُمَّه مَا تبكِي
بناديك وليدك بابكر
لا تشيلي هم ... لا تشوفي غم
أمسكي وِردِك والذِكِر
٭٭٭
ما تقولي وينو جنايا عاد
برجع بتين ... قبل المعاد؟
ما تقلقي ... وما تحزني
لو جاك "مشير" شايل خبر
قال ليك وليدك ذنبهم ... ما ذنبنا
لأنو للإنقاذ ... وللكيزان كفر
قوليلو:
كلام كضب ... قولا كُتُر
يا ربي جازيو بالكُفُر
وليدي مات بالليل شهيد
واقف بسدراً من حديد
بعفتو يخفف جروح
صابر مع الثوّار يسوح
ولدي الطبيب
ولدي الحبيب
وزمنك إنت زمن فقر
روّح ميعادو مع النحيب
مع انتهاكات العروض
من بعدِ صلوات الفروض
من بعد كتلك لضنانا ولي النسيب
كل الشوارع شمرت
أيدينا لي فجرا قريب
لا خوف من الرصاص
لا من كتايب الظل المريب
يا يمّة شوفي الارتزاق
ضربو الشَعَب ضربا غريب
ما بفرقو لو كان بعيد
أو حتْ قريب
ما خلو لا شيخ لا شبيب
لا أم، لا صبية ولا حبيب
قوليلو أخجل يا عجيب
فالظلم ليو ربا حسيب
زمنك فظيع زمن الفقر
زمن دهماك والرجرجة
زمن فضائح محرجة
زمن وساخة ... زمن غَدُر
قرّب نهايتو مع الفَجُر
بنعانق الحارات ليالي ولي الضُهر
ويوم النصر عيد النضال ولحن العُمُر
٭٭٭
يا يُمَّه مَا تبكِي
بناديك وليدك بابكر
لا تشيلي هم ... لا تشوفي غم
أمسكي وِردِك والذِكِر
٭٭٭
في تسعة ثانيات أو عَشر
كان حكمهم من غير نُذُر
رصاصة، إتنين أو عشر
فَتَحَن قلبي وقُلتْ حباب
من البطن حتى السَّدُر
رحبت بيهن بِي بسالة وبي صَبُر
لِي وطني دمنا والعُمُر
٭٭٭
يا يُمَّه مَا تبكِي
بناديك وليدك بابكر
لا تشيلي هم ... لا تشوفي غم
أمسكي وِردِك والذِكِر
٭٭٭
يا أهلي هوي
أنا بابكر وبقول لكم
أنا روحي جات من دمكم
ما تسمعو الكضب الكتير
كان البشير ... أو حتى أركان أو مشير
قضية السودان مصير
ومشكل السودان عسير
بقينا قاعدين علْ الحديد
عِدِمنَا للبوش ... للمديد
وما بهمهم
إن متّنا شايلين غَمّهم
ما بهمهم
يطنقعوا وظاهرين عيان
ما بهمهم
للشعب صار واضح بيان
ما بهمهم
دِيك يا بيوت ... وديك يا جنان
ما بهمهم
ديك يا حسابات في ماليزيا وفي عمان
من السفير وحتى الغفير
ناهيك سعادات الوزير
ما بهمهم
من صغاروهم والكبير
شايلنو من حق مستجير
ما بهمهم
ورغم دا ... عاملين نفير
على البلد ولقمة فقير
ما بهمهم
نهب عجيب
ونهب خطير
بقولوا ... لله والوطن
٣٠ سنه عهد الوساخات والعفن
ما بهمهم
كضب كتير
وتبرير هبنقة أو عوير
وما بهمهم
٭٭٭
يا يُمَّه مَا تبكِي
بناديك وليدك بابكر
لا تشيلي هم ... لا تشوفي غم
أمسكي وِردِك والذِكِر
٭٭٭


كل الحروف باسم الأحد
وهدر دماء باسم الصمد
صبرا عليكم فِي اللّحد
لا رتبة تنفع لا عدد
لا طه لا قوش لا سعد
وما بفيد صيام يوم الأحد
كل الصفاقة إلى الجحيم ... إلى الأبد
لا تقوى زايفة ولا سبحة عدد
يوم الحساب عند الأحد
ما فيش وساطة ولا سند
باب الزقوم ما عندو حدّ
تقعد براك زي أيّ حدّ
ما بفيد تنادي على وداد أو أي وغد
ما بفيد تبرر موقفك
في وقفتك وتقول:
كان كلو من شان البلد؟
٭٭٭
يا يُمَّه مَا تبكِي
بناديك وليدك بابكر
لا تشيلي هم ... لا تشوفي غم
أمسكي وِردِك والذِكِر
٭٭٭
قلنا وفترنا
عقود صبرنا
وهم تمام ... نايمين قفا
ولحقوقنا فاقدين الوفا
أضان، أضان حامل ... طَرُوش
نفوس دَنَس ومَلي الكُرُوش
وعيون، عيون زولا ضرير
وبلدنا معدوم المصير؟
ما بهمهم ... ما بهمهم
يا ثقل روحهم ودمّهم
ما بهمهم
كان مات شهيد في حيّهم
أو دمو خاض في حجرهم
ما بهمهم ...
على العموم
شلنا الهموم
تلاتين سنة
ولسه هم في نهبهم
ولسه هم في كضبهم
وما بهمهم
٭٭٭
يا يُمَّه مَا تبكِي
بناديك وليدك بابكر
لا تشيلي هم ... لا تشوفي غم
أمسكي وِردِك والذِكِر
٭٭٭
قاعدين علينا زي الحصير
وربّونا بي كضبو الكتير
وعود وعود
ونقض عهود
وضرب جلود
وبيوت أسود
لي أمنهم يبنو السدود
حكمك عسير
يا دا المشير
العيش معاك حنضل مرير
إمّا الشهادة مع القدر
إمَّا الركوع لي من كفر
شايلين مصرينا إلى القبر
ما بهم كلام ما بهم عُذُر
تسقط خلاص ... بس انتظر
تسقط خلاص وما بهمنا
تسقط خلاص ... بس انتظر
٭٭٭
يا يُمَّه مَا تبكِي
بناديك وليدك بابكر
لا تشيلي هم ... لا تشوفي غم
أمسكي وِردِك والذِكِر
٭٭٭