سيد الاسم ... وكيف جمعت رأسين مختلفين بامريكا في الحلال. كتب صلاح الباشا

01:00 PM November, 08 2018

سودانيز اون لاين
صلاح الباشا-السعودية
مكتبتى
رابط مختصر

سيد الإسم ... رائعة صديقنا الشاعر الرهيف كامل عبدالماجد ... والتي تغني بها الراحل احمد الجابري .. كان لها اثرا كبيرا في تأسيس قصة حب عجيبة بين مهاجر سوداني وفتاة امريكية يهودية يمنية الاصل.
فتحولت كراهيتها للطريفي العامل السوداني في متجرهم الي قصة عشق واعجاب ثم زواج .
فلنقرأ قصة مافعلته (سيد الاسم ).. وفق ماوردت الينا غبر الوسائط.
هل للأغاني اسرار لدرجة ممكن تغير حياة انسان رأسا على عقب للتحول الى 180 درجة؟
أحد السودانيين المهاجرين الى بلاد العم سام روى حكاية واقعية أقرب للخيال عن أحد الشباب الذي قطعوا دراستهم وهاجروا الى أمريكا في بداية حياتهم ليبداو من الصفر هناك وبكثير من المعاناة.
الشاب اسمه الطريفي. حتى الاسم من الأسماء السودانية البحتة التي تنتشر في الوسط والتي تغنيك عن كثير من الوصف والصفات ورسم الشخصية بالحروف..
قطع الطريفي دراسته الجامعية من بدايتها وهاجر وبعد عناء معتاد وجد فرصة عمل كعامل في أحد المتاجر المتخصصة في الملابس الجاهزة المصنوعة من الجينز..المتجر تمتلكه أسرة يهودية من أصول يمنية.. بنتهم اسمها دانييل مديرة المعرض والمشرفة على الطريفي مباشرة.. سنها قريبة من سنه وهي جميلة جداً😉والطريفي كان معجب بل (مكسر فيها) وفي المقابل هي كانت تكرهه شديد بل معذباه بالعقوبات والخصومات ..
يوم من الأيام تأخر الطريفي عشرة دقايق بس. وهي بعد أن سمعتو كلمتين خصمت من راتبه نصف ساعة..
الطريفي زعل لكن كتمها في حنانو.. ولا ارادياً كتب على واحدة من كراتين الجينز التحت يده (مرات أقول أديه كلمة تزعلو )
لاحظت ليه يكتب شكّت وقالت نوع من السحر (أكيد اليهود هم أهل السحر يؤمنون ويعملو بيه أكتر منا) ولأن العبارة مكتوبة بالعربي وهي ما بتعرف عربي. شالت قطعة الكرتون في غفلة من الطريفي لعمال سودانيين غشان يفسروا ليها المكتوب..
جماعتنا ما قصّروا سمعوها الأغنية كاملة وترجموها ليها سطر سطر.
خلونا نسمعها نحن كمان عشان نعرف سر الغنا الجد
*****************

ســـ الاسم ــيد 🎶🎶
محبوبي وكتين يبتسم
الدنيا ياناس تنقسم
الفرحه تملاهـا وتزغـرد فيهـا والشـوق يرتسـم
مــرات اقــول اديـه كلمة تـزعّلو
حبة عـذاب وكـلام عتـاب انـا عارفـو مابتحملـو
علشان اشوف خده الحريـر الدمعـة جاريـة تبللـو
لكنى قبال ابدا بي لحظات اقيف اتاملو
الضحكة واللفتة البتاخد من عيونى النوم شهور وتجفّلو
وأنسى العتاب الكنت نـاوى اقولو وارجـع منهـزم
الدنيا ياناس تنقسم
الفرحه تملاهـا وتزغـرد فيهـا والشـوق يرتسـم
انا فى العيون ببنيلـو داريـن مـن مـودة ومـن منـي
بضمو فى قليبـى إنبسـاط ومحبـة فياضـة وهنـا
مـاردت غيـرو ولاهو راد زولا سـواي ابداً انا
نظراتو كيفـن اوصفـا دى الفي عيوني مدوّنة
همساتو تحنـان القمـارى الراجعة للعُش والجنـا
وتــضـــوّى والــلــيــل يــنــهــزم
وكــتــيــن يــبــالــغ ويـبـتــســم
الــدنــيــا يـــانـــاس تـنـقــســم
الفرحة تملاهـا وتزغـرد فيهـا والشـوق يرتسـم

قال ليك لمن وصلوا للمقطع 👇:
انا فى العيون ببنيلـو داريـن مـن مـودة ومـن منـي
بضمو فى قليبـى إنبسـاط ومحبـه فياضـه وهنـا
مـاردت غيـره ولاهو راد زولا ســواى ابـداًانــا
نظراتو كيفـن اوصفـا دى الفـى عيونـي مدونـة
همساته تحنـان القمـارى الراجعـة للعـش والجنا.
وترجموه ليها فما كانةمنها إلا ان تدخل في حالة من البكاء (وما عرفوا يسكتوها).. وبعدها تغيّرت نظرتها ناحية الطريفي.. وبارك أهلها العلاقة وهم ايضا قد احبوا الطريفي لحبها له وتغيرت حياته واصبح يواصل دراسته بالمساء ليكمل تعليمه .. وقد اترقى في الوظيفة ليحتل مدير مبيعات في تلك المؤسسة التجارية... ثم لم يلبث ان يتزوجها.
أكيد توجد تفاصيل كتيرة في هذه القصة حتى وصلت الي هذه النهاية السعيدة .
لكن ما أدهشني حد الاندهاش هو سر الغنا الـذي يحدث نقطة تحوّل بهذا العنف ويقلب الكراهية الى حب.

هههها
هسى لو لاقينا الطريفى و سألّناهو و قال الكلام ده ما حصل
تقبّل وين يا باشا