فرحة عيد (من دفتر قديم ) بقلم الحاج خليفة جودة

09:07 PM August, 21 2018

سودانيز اون لاين
الحاج خليفة جودة -
مكتبتى
رابط مختصر

فرحة عيد
بنحلم نحن بي جيتك
وصدفة جميلة يوم عيدك
صباح عيدنا
ولاقيتك
وتتحقق أمانيننا
شروق وجها
يضوي الحلة بالأفراح
من عينيك تتفتح ورود لايلاك
وفل وأقاح
أنفاسك بترشح نسمة الصندل
ننسي همومنا والأتراح
نغم همسك
قصيدة حب
وغنوة ريد
تزيل أحزان
تداوي جراح
ويسكر شوقنا خمر مباح
ونتسالم كما الأغصان
في الإيدين
وبالأحضان
ويا جنيات
تتحقق أمانيكم
ويا أطفال
في أحلامنا ترتارات
بنوت دلقون
وكوم لعبات
وتملو صدورنا بالبهجة
وبالضحكات
ويا أخوان
ويا جيران
ويا أصحاب
ويا خلان
يدق الفرحة في الأبواب
تدب العافية جوه الحوش
وتتفضل
في شارعنا يمشي أمل
نفرح نحن حد الشوق
وشوقنا بحر
عشمنا السمحة تلبس توب
وتطلع فوق
شموس العز
وللأفضل
وفي الديوان
شية ونسة جمرية
شطة ذكري منسية
ضحكة تملح الساعات
جبنة وشاي وحنية
كشاتينكم
وخمسينكم
تمارينكم
حجاويكم
غلبتونا
وبنغلبكم
ونسقيكم رحيق الود
محاية إلفة تنجيكم
من الفرقة البقت في الدم
من الغربة المشت للروح
بسأل ربي يهديني
ويهديكم
الحاج خليفة جودة - امدرمان - ابو سعد