Post: #1
Title: الشعب الفضل والعقوبات الكورية! العام 2022 بقلم أحمد الملك
Author: أحمد الملك
Date: 10-07-2017, 05:02 PM
04:02 PM October, 07 2017 سودانيز اون لاين
أحمد الملك-هولندا
مكتبتى
رابط مختصر
بعد خمسة سنوات من رفع العقوبات الامريكية
تضاعفت الاسعار عشرة الاف مرة ونزلت قيمة الانسان عشرة الاف مرة
يجلس رئيس جهاز الأناطين والمخابرات الوطني متأدبا في حضرة الكوز الاعظم
مسح الكوز العظم على (كرشه) الضخم بيده وقال بدون إهتمام:
كيف أحوال العباد في الخارج!
الناس ماشة في الشوارع زي مظاهرة بتاعة سكارى، كل زول ينضم براه!
وليه ما جلدتوهم حد السكر عشان يعرفوا حاجة!
جلدناهم لامن فترنا، مافيش فايدة جلدهم بقى تخين! الا رصاص حي يخليهم يحسوا شوية!
وما قلتوا ليهم يصبروا شوية! العقوبات دي ليها تلاتين سنة، دايرة ليها
اقل شئ تلاتين سنة تاني عشان الاحوال تتصلُح، وكمان لغاية تظهر نتائج
البرنامج التركيزي التاسع والتسعين ونخلص من اعادة ترتيب الاولويات! بعد
ما (مقلبنا) الامريكان ورفعوا العقوبات ! وكسروا الدش في يدنا!
لكن الناس بيقولوا إعادة ترتيب الاولويات دي طوّلت شوية! ليها زي خمسين
سنة كدة ومافي اي شئ (إترتّب) غير اوضاع ناس الحكومة!
المشكلة كل سنة الاولويات بتتغير كلما جزء ينفصل وكلما تقوم حرب جديدة!
وكلما عملنا مفاصلة جديدة!
في السنة الاولى قلنا ليهم يصبروا شوية الامريكان رفعوها لكن كوريا
الشمالية عملت علينا عقوبات! فترنا ذاته، دة يرفعها ودة (ينزّلها) ! قلنا
ليهم (الابتلاءات ما وقفت) كلما بلاء يترفع، ينزل بلاء أكبر منه! قلنا
ليهم صلّحوا علاقتكم شوية مع السماء عشان الأرض تتصلّح! واحد من مساخيط
الفيس قال: كلما نصلّح علاقتنا مع السماء نلقى (الارض) تحتنا إتباعت!
بدل تتصلّح!
الناس قرّبت تكفر!!
والحل شنو؟
الناس عدمت الصبر، قدر ما نعيد صياغتهم سعادتك، قدر ما بليناهم بالمرج
والكوليرا والمجاعات مافي فايدة، بدل الشعب الفضل مفروض يسموهم الشعب
اللايوق!
قالوا شنو على العقوبات الكورية!
قالوا نحن مالنا ومال كوريا، نحن دايرين عيش ودوا! ورفعوا يافطة مكتوب
فيها في المظاهرة: دايرين عيش ودوا، ما دايرين صواريخ باليستية!
والمظاهرة مشت لياتو قصر؟
القصر القديم الحمدلله بعناه، والصيني أجّرناه! كلما المظاهرة تصل قصر
تلقاه إتباع! في النهاية فتروا اتفرقوا! قصة القصر القصر حتى النصر دي
بقت ما جايبة حقها! حتى الانقلاب الاخير بعد استلموا القصر الجمهوري
ودايرين يذيعوا البيان جوهم الصينيين قالوا ليهم اطلعوا لينا برة نحن
القصر دة مشترينه لينا خمسة سنين!
وناس المظاهرة كلهم اتفرقوا؟
ما كلهم لكن الجنجويد قاموا بالواجب.
نعل في ناس ماتوا؟
شوية، زي خمسمية ، اصلا هم ميتين وماشين! مظاهرة بتاعة ناس ميتين ما
عارفهم دايرين بالحكم شنو؟. العنده ملاريا والعنده كوليرا والعنده
انيميا، النصيح عنده اسهالات مائية. أهو ارتاحوا من هم الدكاترة والحقن
الزيتية والادوية منتهية الصلاحية! دة غير هم العيال، دة عنده ملاريا ودة
ضرسو متاورو، ودة طردوه من المدرسة عشان ما دفع الرسوم! دي فعلا ثورة
الانقاذ سعادتك، إنقاذ نهائي! بدل البهدلة دي، نسّهل للزول طريق الجنة،
في زول نصيح يابى الجنة! بدل العذاب دة!
وقلتوا شنو لناس حقوق الانسان وناس الاتجار بالبشر؟
نحن هسع متعاونين في مكافحة الارهاب، قلنا ليهم مش قلتوا الشعب دة
ارهابي؟ خلاص نحن بنكافحه ونريحكم! ناس الاتجار بالبشر قلنا ليهم نحن
شغالين ضد الهجرة غير الشرعية، شغالين في برنامج الهجرة الى الله! عمرك
شفت ليك زول ميت هاجر؟
وبعد (مكنة) العقوبات الكورية دي ما (قسّمت) حتقولو ليهم شنو؟
قلنا ليهم في عقوبات جاية من بوركينا فاسو وعقوبات تانية من الصومال ومن
غينيا الاستوائية! قلنا ليهم العقوبات بقت اليومين ديل بالجُملة عشان
مافي زول يقول لينا دي دول كحيانة زينا ما بتقدر تعمل حاجة ! وعشان لو
ناس الواتساب طلّعوا اشاعة قالوا العقوبات اترفعت نقول ليهم الباقية
سارية، عشان ما نتمقلب زي ما اتمقلبنا وكت الامريكان رفعوا العقوبات وما
عرفنا نكضّب تاني نقول شنو!
للحصول على نسخ بي دي اف من بعض اصداراتي رجاء زيارة صفحتي
https://www.facebook.com/ortoot؟ref=aymt_homepage_panel
|
|