آخر المضحكات المبكيات: السوداني راعي كسلان! بقلم فيصل الدابي/المحامي

03:36 PM May, 05 2016

سودانيز اون لاين
فيصل الدابي المحامي-الدوحة-قطر
مكتبتى
رابط مختصر

قال لي مغترب سوداني بغضب: ياخي ما سمعتا الزعيم السابق للحركة الاسلامية في السودان المرحوم الدكتور حسن الترابي قال شنو في الحلقة الثالثة من شهادته على العصر في قناة الجزيرة القطرية؟! قلت له بفضول: لا ما سمعتا ، قال شنو؟! ردالمغترب السوداني: الترابي قال انو السودانيين رعاة وكسالي ويكرهون الاعمال اليدوية والصناعية ، ياخي الراجل دا حي وميت ما مريحنا نسوى معاهو شنو؟! بعدين ياخي الجماعة بتاعين الحركة الاسلامية في السودان ساكتين ساكت على كلامو ده وما انتقدوه لانو ما عندهم مفهوم النقد الذاتي والمراجعة الذاتية ودا قبول وإقرار ضمني من الحركة الاسلامية السودانية بتثبيت تهمة الرعوية والكسل وكراهية العمل اليدوي والصناعي على كل الشعب السوداني والموقف دا فيهو تثبيت للشائعة التي يروجها بعض المصريين الخبثاء ويصدقها بعض الخليجيين حول كسل المواطن السوداني والتي يقصدون من وراء تروجيها تهميش السودانيين في سوق العمل الخليجي ، بالله عليك الله في زعيم سياسي فاهم ومسؤول يقول كلام مقدد وفارغ زي دا؟!!
قلت له بهدوء: ياخي الترابي الآن في ذمة الله ونرجو له الرحمة والمغفرة ، خلينا ننقد القول دا بعيداً عن شخص قائله ، اولا: الادعاء بانو السودانيين مجرد رواعية كسلانين دا ادعاء مرفوض نهائياً لأنو التعميم من أخطاء التفكير فعلى سبيل المثال انا لا أقبل هذا التوصيف التعميمي من أي بشر فأنا شخصياً اشتغلت عامل نظافة بالسكة حديد بمدينة كسلا واشتغلت حداد بالمنطقة الصناعية كسلا ، واشتغلت بتقطيع الحديد في مدن خشم القربة، القضارف والفاو، واشتغلت عامل بناء وساهمت في بناء مطاحن الغلال بمدينة عطبرة وبناء كثير من المنازل في مدينة كوستي ومدينة كسلا وانا اعتز كثيراً بكل تلك الأعمال اليدوية والان رغم عملي كمحام في دولة قطر الا انني اشتغل في الدوام المنزلي كعامل نظافة وحداد فكيف أقبل أن يصفني أي بني آدم سوداني أو غير سوداني باني راعي وكسلان كمان؟!! ثانياً: بعدين ياخي الحاجة البتزعل في الكلام دا مش وصف راعي فكل انبياء الله سبحانه وتعالى كانوا رعاة ، الحاجة البتزعل هي الصاق تهمة الكسل بكل السودانيين دون وجه حق ودون دليل في لقاء تلفزيوني وفي فضائية عالمية ، ياخي والله حرام في صمة خشمنا يطلعونا رواعية كسلانين!!!!
فيصل الدابي/المحامي


أحدث المقالات

مبادرة كرام ولئام الشخصيات الوطنية بقلم صلاح شعيب

عودة الوعي!! بقلم صلاح الدين عووضة

الصهد والأنس أمام الباب بقلم أسحاق احمد فضل الله

أبيي وخدعة حكومة الجنوب ! بقلم الطيب مصطفى

المقاومة بقلم عائشة حسين شريف

حتى يغيروا ما بأنفسهم بقلم نورالدين مدني

شهادة الترابي على العصر حلقة (2) بقلم مصعب المشرّف

السوداني هو الافضل في نظر اغلب الخليجيين ولن تتاثر هذه النظرة باي كلام فاضي من اي مصري او من اي سوداني