بقادي الحاج أحمد يكتب من الغربة " الخواجة قال قووود"

من الغربة المتاخمة للبحر ، رسائل إلى الوطن


صالح حامدين يكتب الي صديقه الهادي آدم عن الخواجة:

الخوجة قال قووود

ذهبنا للعشاء في مطعم الكردفاني قريبي. الكومونية خلصت من بدرى، والشية غير جديدة على رفيقي الخواجة، عاوز لأبن أوروبا عشوة (مدنكلة) موغلة في السودانية؛ وجبات تصيبه بالدهشة، كما فعلت مع الجنسيات الأسوية والأفريقية الأخرى على رأسهم النشامة السعوديون مستضيفو هذا الجمع. رحب بنا المطعم كعادته مع الزبائن بتقديم شوربة الكوارع، احتسيناها حتي قال الخواجة قووود، أستشرته في طلب المزيد وافق ثم أردف قووود بقووود تانية. طلبنا لحمة رأس، وفول مصلح وتبع الراس عدس مع السلطات والمقبلات. مسحنا الصحون مسح، عندها جاء قريبي راعي المطعم يسأل عن الأكل عجب الخواجة. قلت ليهو أول ما شرب شوربة الكوارع قال قووود، والله قال قووود يعني عجبتو، آآآي عجبتو ساكت، دي عجبتو لمن دبل، قال قووود اه ، أيوه أما باقي الأكل ذى ما أنت شايف ... مسح. قال قووود اه ، آآآي قال قووود...

أخوك: صالح حامدين
مارس 2014م