متين العودة يا مطر

في غيابك العصافير ِفاتت الاعشاش
ووجه الارض ما عرف زينة الرشاش
و الضُّل الكبير إتكَسَّر
والحلم البيَحبي إتعَسَّر
والِّلسَّع في جُوَّانا دَمُّوا إتخثَّر
لسَّع البسمة تأيهه في جوف المتاهه
والناس حِفت من طول المسافة
بتسألني عنك ذرات أرضنا
بتقول بتحلم بلقاك
لما شافت عيون الغُبُش مسكونة بآيات وفاك
وين ما أُقَبِّل ألقى السؤال يسبق الاجابة
مرة في وجوه الجياع
ومرة على أرصفة الضياع
ومرة في دعوات زولا ليلا ونهارا بيركع
ومرة في الطَوريَّة البتزرع
ومرة من الأه المارقة من المصنع
ومرة من الدخان المن بيتنا بيطلع
ومرة من كل الشوارع
السؤال حتما ليهو إجابة
قلب الدفاتر تلقى الاجابة مالية القُفَّه الخرابة
الصبر ملح الغلابة
كفانا انتظار يا يُمَّه يا يَابه
حث خُطاك يا مطر
ابداها من ارض النخيل
شرِّق وغرِّب
وفي جنوبنا حتماً بيكبرالسؤال
انتظرناك في الساحات والمؤانئ
في الجروف والطوابي
بس في هجعة الليل
سمعنا صوت سلاح بلعلع
وفي الدغش
جاءت الحدائق العارفة كلَّ الحقائق
بتسألنا نحن الغبش
بتقول متين العودة يا مطر
ونحنا بدورنا بنقول متين العودة يا مطر؟


الطيب الزين

السويد