Post: #1
Title: الطـــــابق....... البـــوخة
Author: سجيمان
Date: 05-12-2003, 02:00 PM
Parent: #0
كنت قايل الغنا دا صعب وقاسي خلاس..... لقيتو اسهل من ساهل...ونويت ابقى فنان عديل كدا... كان رضيتو والله ابيتو... احفض لي كم غنية.... لاي فنان ... كان ميت والله كان حي...واصاحب عمر الجزلي والله حسين خوجلي.....والصق فيهم لحام.....وحسين خوجلي يقودني معاهو.... عصايتو في ايد وانا في الايد التانية....ويقدمني للمشاهدين ... على اني فنان.... مدفون ومغبون....وما لاقي زول يتبناني..وما قاعدين يسمعوني الا مرتي ووليداتي.... غصبا عنهم.... واليضحك فيهم الله قال بي قولو .وامي برضو بتسمعني وتقعد تزغرد وانا اغني وتنده في الله يا سجيمان ولدي ربنا يرضى عليك وتتعلا ما تندلا.....وتبقى فنان كبير وتفوت ناس فرفور...وتزورني الحجاز.. وامسك في شباك النبي..وكدي نسمعو كلنا ونخليكم... تحكمو..... احنحن ثم ابتسم... ثم اكح .. واخت ايدي في خشمي مع الكحة زي الفنانين الكبار..... وابدا بي رمية ابو داوود الطابق البوخة......
الطابق البووووووخة
يتوحم وقع من الدوخة
نسيبتو ..... كااااااااويا
كراعو.... مملوخة
وحنتو ..... ملبوخة
صنقر في الزاويااااااااااا
بعد الرمية دي..... اعاين بقعر عيني لي فردتي حسين..... واشوفو... البسمة تعلو فمه.... وهو يبرم في العاصية.....هنا انا اعرف انو هو في غاية الطرب و الاضطراب...ودا تشجيع لي ... ان استمر في الابداع..... وانظر الي الاوركسترا..... وارفع ايديا الاتنين... فوووووووووووق واقول لهم .... يلاااا...... وعشان اغير من النمط القديم ..... اكسر الرمية بغنية المنديل....... وابادها من نصها......
المنديل.......
المنديل.....
المنديل المشروط جانبهو
أ و...............تذكرين
ما زلت اذكرو..... ضبانة عربيدة
................فوق الجبين... فوق الجبين
ما زلت البد في الجحور.... بعض السنين
وحدي.......أو لا............ تلبدين؟
وتاني يوم....... اطبع شريط كاست.... لكن المرة دي اشوف لي خمسة ستة بنات.... يشيلن معاي ...وانا اغني..... ويتوزع الشريط.... ويسمع بي.... صلاح ادريس ... ويديني عربية ....جديدة من الورقة. ويشغلني معاهو سكرتيرو الخاص للشئون الفنية...ويمكن كمان يفتح لي قناة فضائية.....
|
Post: #2
Title: Re: الطـــــابق....... البـــوخة
Author: sentimental
Date: 05-12-2003, 02:08 PM
Parent: #1
مسطول انت يا سجيمان مسطول
ده شنو الخرجمة البتعمل فيها دى. انا ما قلت ليك اقعد ساكت
|
Post: #5
Title: Re: الطـــــابق....... البـــوخة
Author: سجيمان
Date: 05-12-2003, 03:31 PM
Parent: #2
سنتيمينتال....... انا ما المسطول........ انا قايد المسطول
|
Post: #3
Title: Re: الطـــــابق....... البـــوخة
Author: Ahlalawad
Date: 05-12-2003, 02:09 PM
Parent: #1
غايتو يا سليمان نصيحتي ليك ما تبدأ بالشعر والتلحين والغناء مرة واحدة الناس المتفلفسين يقولو عليك غناك فطير . فأنصح بأن تكتفي بالغناء فقط ، ولو مغرود في شاعر ولسة ما لامي في واحد حقو تحجزني أكتب ليك الشعر وشوف ليك واحد يلحن ليك ولو ما لقيت صلاح ادريس زاتو بيعرف يغني .. ولما يكتب ليك القناة بي اسمك اديني العلوان عشان ألاقيكم هناك وكان اشتريتو بدل اشتري لي كان تلاتة كان خمسطاشر .
وكان عندكم لوتري ماتكتبني معاكم وكان عندكم حفلة في مايكرونيزيا أنا ما بمشي معاكم لأنه حايكون عندي نزلة
|
Post: #4
Title: Re: الطـــــابق....... البـــوخة
Author: nile1
Date: 05-12-2003, 02:46 PM
Parent: #3
أسمع يا سجيمان
أيه رأيك أنا أبقي الشاعر بتاعك ونبقي ثنائي زي عمنا عثمان حسين وحسين بازرعه؟؟؟؟ وما عاوز منك أي مليم لغاية ما تبني ليك بيت وتسوي ليك عربيه وكرش كبييييره...وأم الوليدات تتملي دهب وتبقى عامله زي فترينة ناس ود مسيك..وتسوي ليك رصيد أكبر من كرشك في البنك..يعني إعفاء مؤقت....وبعدها...لا يخدم بخيـــــل؟؟؟؟؟
وهاك الرميه دي عربون لغاية ما نتفق
الطابق العرسه
قام جيوبه خــلا
وضارب الجرســـــه
نسيبته طارداهو
ماقــدر ينسى
أم ولايداتو
النايمـه في دقسه
قاعده راجياهو
ونخلي باقي القصيده لغاية مانشوف آخرها معاك شنو..يمكن ما نتفق
وأشوف غيرك
تحياتي
|
Post: #7
Title: Re: الطـــــابق....... البـــوخة
Author: سجيمان
Date: 05-12-2003, 03:52 PM
Parent: #4
النيل1......... يمكن ما نتفق و تشوف غيري؟..... لا لا يا زول انت ما مضمون
|
Post: #6
Title: Re: الطـــــابق....... البـــوخة
Author: سجيمان
Date: 05-12-2003, 03:37 PM
Parent: #3
اهل العوض......... انا ما عندي مانع اغني لك....... بس تدفع لازم
|
Post: #8
Title: Re: الطـــــابق....... البـــوخة
Author: alsngaq
Date: 05-12-2003, 09:12 PM
Parent: #1
سجيمان اخوي
مساك بعبير البوخة ذاااااااااتها
طبعا اقل ما يمكن ان اصفه بك هو الفنان الذكي
وعرفت كيف تدخل عالم الفن بعد كده حوته وفرفور يشوفو ليهم بلد
وانشاءالله ح تكون مع الفنانين العملاقةوقول شعبولا شعبان عبد الرحيم
انا برشحك لسهرة مع حسين خوجلي ومعاكم ترباس وانت في النص
بين عمتين والله تموت من الحر هواء مافي ههههههههههه
وقبل ما تاخد نفسك يكون عمر الجزلي محضر ليك اسماء في حياتنا
بس اوعك تدقس تمشي عشان ما بعد كم يوم نسمع بيك المرحوم سجيمااان
اسمع كمان لو عملت ليك شريط دويتو مع ستونة مجروس لانو بقت تغني بالمصري ح يكون ابدااااع بس اوعك تحاول مع شاكيرة لانو جد ما ح تقدر تقول مقطع واااااااحد
|
Post: #9
Title: Re: الطـــــابق....... البـــوخة
Author: HOPELESS
Date: 05-12-2003, 10:56 PM
Parent: #8
سجيمااااان
انا غايتو اتأملت في دعوة امك دي كويس
دا كلام زول مرارتو مفقوعه
تكون قاصده بكلامه انشاء الله تتعلا ما تتدلا
معناها ربنا يشنقك
حراااام عليك دي امك يا اخي غني بعيد عنها ما كفايه استحملت من وانت شافع .
|
Post: #10
Title: Re: الطـــــابق....... البـــوخة
Author: HAMZA SULIMAN
Date: 05-12-2003, 11:05 PM
Parent: #9
نقدم لكم الفنان الكبير
سجيمااااااااااااااااااااان
|
Post: #12
Title: Re: الطـــــابق....... البـــوخة
Author: سجيمان
Date: 05-13-2003, 07:56 AM
Parent: #10
يا حمزة........ شكرا..... لكن كلمتين بس ما بتقنع الناس بفنان جديد زيي
|
Post: #17
Title: Re: الطـــــابق....... البـــوخة
Author: سجيمان
Date: 05-13-2003, 11:42 AM
Parent: #9
يا جمال سكتنا علي حرش ناس البورد علي.... كمان عاوز تحرش امي؟
هاك اللووووووووووووووول دي....... خمسها
|
Post: #11
Title: Re: الطـــــابق....... البـــوخة
Author: سجيمان
Date: 05-13-2003, 07:02 AM
Parent: #8
السنجك........ شكرا للتعاون السخي..... ووضع الخطة المستقبلية........موضوع ستونا دا عاوز دراسة متأنية....لكن تفتكر عمر الجزلي حيكون قاعد لحدي ما انا ابقى اسماء في حياتهم؟
|
Post: #13
Title: Re: الطـــــابق....... البـــوخة
Author: elameen
Date: 05-13-2003, 08:36 AM
Parent: #1
سيجمان اخوي فن اكتر من كده اكثر من ما تدع البورداب يتلهفون على بوسطاتك
|
Post: #14
Title: Re: الطـــــابق....... البـــوخة
Author: سجيمان
Date: 05-13-2003, 10:47 AM
Parent: #13
يا الامين يا اخوي....... باقي لك شغلتي دي بتاكل عيش؟
|
Post: #15
Title: Re: الطـــــابق....... البـــوخة
Author: عزيز
Date: 05-13-2003, 11:23 AM
Parent: #14
سجيمان ياخوى
لك التحية والتقدير
وأسأل الله أن يعلى سلالمك لأعلى الدرجات الموسيقية
ويسخن ايقاعاتك وتبقى أحر من أيقاعات أيام حسين خوجلى
ويكتر عداداتك وتبقى أغنى من صلاح ادريس
وتحقق امنيتك الفنية وتمسك امك شباك النبى
بركة النبى
|
Post: #16
Title: Re: الطـــــابق....... البـــوخة
Author: Tumadir
Date: 05-13-2003, 11:32 AM
Parent: #15
وفى اللحظات القادمة
(تقولها المذيعة بصوت حنكوشى جدا
نستمع الى الفنان الذى طال انتظاركم له(موسيقى حنكوشة جدا فى الخلفية) الفنان الذى اذا مر صوته بالجبال هداها(موسيقى حنكوشيه) واذا مر بالغابات كداها) (موسيقى) واذا مر بالبحار مصاها
واذا مر بخلايق الله دقاها
واذا مر بالحفلات فى ستين داهية ، وداها
(ينقطع صوت الموسيقى فى فجائية مثيرة... ويدخل الصدى ،
الفنان سجيمان مان مان مان مان
تتم
يللا خش
|
Post: #19
Title: Re: الطـــــابق....... البـــوخة
Author: سجيمان
Date: 05-13-2003, 12:10 PM
Parent: #16
تماضر حبابك......... المذيعة حنكوشة... و الصوت حنكوشة......والموسيقى حنكوشة....... والفنان شيطان كوشة
|
Post: #18
Title: Re: الطـــــابق....... البـــوخة
Author: سجيمان
Date: 05-13-2003, 12:02 PM
Parent: #15
,ياعزيز.... بارك الله فيك.....وخاصة حكاية احقق امنتي الفنية واحجج امي دي
|
Post: #20
Title: Re: الطـــــابق....... البـــوخة
Author: شرير والبرتقاله
Date: 05-13-2003, 01:08 PM
Parent: #18
سجيماااااااان
والتسجيل في وكــر الاشرار
والحنك السنين
خليهو علي
بس انت خلي بالك من حنجرررررتك
الخطييييره
واشرب لبن عشر
بدل الزغاليل
|
Post: #21
Title: Re: الطـــــابق....... البـــوخة
Author: سجيمان
Date: 05-13-2003, 02:01 PM
Parent: #20
اهه....... يا الشرير..... ناوي تبارني براك والله برتكانتك معاك؟
|
Post: #22
Title: Re: الطـــــابق....... البـــوخة
Author: saifkeli
Date: 05-13-2003, 03:39 PM
Parent: #21
الأخ .. سجيمان .. تحية
تحية .. ملحنة
أنا مستعد أكون أول مستمع .. ومستمع ملتزم وجيد جداً .. وما عندي مانع أحضر كل حفلاتك وأقوم بالدعاية اللازمة .. لكن اذا حصل إنو الناس إنطربوا زيادة من اللزوم والناس شالت الكراسي على رأسها بدل ما يقعدوا عليها .. تخلي مفتاح البنز عندي لأنو في الآخر أنا وكيل دعايتك .. والتجي من الطرب تحملها الأضان .. ولا رايك شنو
لأنه في هذه المرحلة الحساسة أنت محتاج لمستمعين اضافيين على ناس بيتكم
سيف كلي
|
Post: #23
Title: Re: الطـــــابق....... البـــوخة
Author: سجيمان
Date: 05-13-2003, 04:29 PM
Parent: #22
سيف........ صدقت والله.. التجي من الطرب تحملها الاضان..... اسعالني انا
|
Post: #24
Title: Re: الطـــــابق....... البـــوخة
Author: بدرالدين شنا
Date: 05-14-2003, 05:27 AM
Parent: #1
بسم الله الرحمن الرحيم
الفلتة/ سجيمان
سلام يا ظريف
عليك الله لو سمحت بي أضانك التالتة أسمعك لي معاك
|
Post: #25
Title: Re: الطـــــابق....... البـــوخة
Author: سجيمان
Date: 05-14-2003, 10:04 AM
Parent: #24
بدرالدين حلاتو........وبعد ما اسمع لك باضاني التالتة انسخها في سي دي وارسلها لك؟
|
|