Post: #1
Title: الونســـــة......... ام دق
Author: سجيمان
Date: 05-20-2003, 04:03 PM
من صغير ............. انا مهبوش... ومرووش.......... امي بتقول لي انت ظانيتك يا سجيمان يا ولدي.... هابشك بسم الله...انا كنت قايل بسم الله دا اخو عبد الله سواق الطاحونة....طلع لا اخوهو ولا عندو اخو....حبوبتي بت الارباب.... مرا حنيّنة... علا فهمها ضيق....وطوالي زعلانة ومتحرقة وحردانة الغدا...وقاعدة في ضل الضهر وتسلم علي ابليس. ابوي قال لي مرة خاصمتو سنة كاملة عشان لما جا من السفر وما ضوقها رغيف البندر....كنت بتونس معاها قلت لها يا حبوبة بت الارباب... بعدين لما اكبر... واشتغل... حاديكي متين جنية....وادي حبوبتي التانية نفيسة الف جنية.....تقومي يا بت الارباب......... تزعلي وتتحرقي وتحردي الغداء... وتقعدي في ضل الضهر وهاك يا سلام لابليس.... وحاربتني عديل وبقت ما بتنضم معاي... حدست امي.... امي قالت لي نان انت ماك غلطان...دي ما برضو زي حبوبتك تفيسة... اقسم القروش بيناتن يا سجيمان يا ولدي.. كل واحدة اديها ستمائة.... جاء جدي الضو.... حدستو بت الارباب .. جدي الضو ناداني ...... واداني علقة.... محترمة..... وحلف عليهو بالطلاق علا اوريهو انا جبت القروش دي من وين.... يا جدي قروش شنو؟ الشي ونسة....ونسة يا جدي.... ونسة.....ا.بدا انت داير تبقى حرامي متل جنون البندر.... بعد ما انتهى من دقو.. لي.. قعد في طرف العنقريب.. وبدا يديني درس في الاخلاق الحميدة وانو السارق ملعون ليوم القيامة وبيقطعو ايدو.... وانتي يا بت الارباب تسمعي في النضم دا..... وحلفتي ما تقولي الولد دا كان بيونس فيني و قال بعدين لما يكبر ويشتغل....
وانا قلت طالما.. انا اخدت العلقة مافي داعي .. اشرح تاني..وخليهو ينضم للصباح...عامل رقبتو الكلها سمبيب دي...................
قالو لي بت الارباب فهمها قدرها......ولد بنتها النعيم........ولاد المدرسة جوها جارين قالو لها..... يا بت الارباب ... النعيم جا الطيش.... قالت لهم بركة الجا يا يابا... انا رقبتي قايلاهو ما بجي كلو كلو...و ان شاء الله اشوفو جايي من الحجاز.......بت الارباب ماتت وانا لسه طالب في الثانوي...........يعني انا اخدت علقة اوانطة ساكت
|
Post: #2
Title: Re: الونســـــة......... ام دق
Author: Ahmed Poison
Date: 05-20-2003, 04:25 PM
Parent: #1
ياخوي قالو البلعب مع الكدايس بخربشنو
وانت وريتنا انو البيهظر مع الكبار بيزعلن منو
يعني نعمل شنو يا سجيمان
كدي ورينا انت
|
Post: #4
Title: Re: الونســـــة......... ام دق
Author: سجيمان
Date: 05-20-2003, 04:32 PM
Parent: #2
يا احمد يا اخوي....... اتنين ما تهظر معاهم....... الناس الكبار......... والحيكومة
|
Post: #3
Title: Re: الونســـــة......... ام دق
Author: garjah
Date: 05-20-2003, 04:29 PM
Parent: #1
الف رحمة ونور على بت الارباب
وخسارة فيك الترباية يا سجيمان
وقراية بسم الله على راسك الكبير ده واضنيك الزايدات ديل
انا خايف دعاهم ليك بالزيادة صادف اضنيك وختى جيبك المشرط
اصلو الحبوبة كانت بتدعو ليك وهي ماسكة اضانك
|
Post: #5
Title: Re: الونســـــة......... ام دق
Author: سجيمان
Date: 05-20-2003, 04:37 PM
Parent: #3
يا قرجة....زمان وانا صغير ختفت لي فول حاجات من واحدة حاجة..... ما قدرت تلحقني وقفت قالت لي الله ينزع البركة........ المرا دي دعوتها مبارياني لي حسي.... وقدر ما .ستغفرت وعملت عمرة مخصوص بس عشان امسح الدعوة دي ابت ما تنفك مني
|
Post: #6
Title: Re: الونســـــة......... ام دق
Author: ايهاب
Date: 05-20-2003, 05:28 PM
Parent: #5
| Quote: وانا قلت طالما.. انا اخدت العلقة مافي داعي .. اشرح تاني..وخليهو ينضم للصباح |
لزيزيا سجيمان انت و حبوبتك بت الارباب
والله يا سجيمان يا حليل الحبوبات
ربنا يرحم الفارقوناو يخلي لينا الباقيين القله
الحبوبه هي من اجمل العناصر الاساسيه في حياتنا
مهما كان
اتذكر حبوبتي الله يرحمايا حليله
كانت بتحب تتفرج في المصارعه
و عينك ما تشوف الا النور والله جنس تنشنه
و جنس سكاليب
تقرب تشيل نعلاتا لا مواخده و تدخل ليهم جوه التلفزوين
فكوووووووو
قتلتوووو
ووب علي ووب علي كسر رقبتو
و تشيل و تدعي
و احنا نسيب ليك المصارعه و نقعد نتفرج ليك فيها
وكلومره بالشكل دا
و المسلسلات كذلك الامر
تنشنه كميات
والله لكن الحبوبات ديل هم الحنيه ذاتا متجسده في شكل بشر
تصحى الصباح تصلي الفجر في الجامع
تولع المنقد تحلب الغنمايه
تشوى الشاى
تصحينا
تتفقد الناس
و احوالم
تمشي السوق
و كميه من الحاجات
ربنا اداهم طاقه غير عاديه
طبعا اكيد حبوبات هذا الزمان بيختلفو كتيــــــــــر
علا زي ما قلتا في حبوبات كدا مووش جننو ناس البيت
لا بيجننو الحله كلها
اتذكر كان في حبوبه كدا في فريقنا اصلو ما كنا بنقرب منها
عشان لو لقطتك الله كان في عونك
تديك قرصه خرافه في الوجع
و يدها تقول كماشه اصلو ما بتقدر تتفكا منها
و حا تقرصك يعني حا تقرصك لانو بتكون مخزنه ليك حاجه كدا ولا كدا بتكون عملتها انشاء الله قبل سنه
الله يرحما غايتو
زمان في بوست ما دعيت لي عمل بوست خاص بالحبوبات
و اهو انتا جيتهم لينا في بوستك دا
شكرا يا سجيمان و اسف على البري
|
Post: #7
Title: Re: الونســـــة......... ام دق
Author: جدو
Date: 05-20-2003, 05:45 PM
Parent: #5
هجمتني يا سجيمان بعنوان البوست دا
قلت انت مدير الجامعة المجنون داير يجيب لينا الدق في الجامعة بعد ما كرهناه في المدارس وكرهنا القراية ام دق ..ما عارف ليه اول ما قريت العنوان بالي مشى لجامعتنا الجديدة حقت الونسة..
|
Post: #8
Title: Re: الونســـــة......... ام دق
Author: سجيمان
Date: 05-20-2003, 05:53 PM
Parent: #7
يا ايهاب.....والله انا بكتب البوست دا ودمعتي جرت....... اه ....والله زمن...... بس انا غايظاني الدقة البدون سبب دي
جدو........... لا جامعتنا مافيها اي دق ولا نهير ساكت....... اطمئن
|
Post: #9
Title: Re: الونســـــة......... ام دق
Author: طيفور
Date: 05-20-2003, 09:16 PM
Parent: #8
سجيمان
ازيك اخوى
قلت بس اسلم عليك
قبضتك انا اقول سجيمان
ده بمشى وين دحين عرفتك
سمح اصبر لى
المجاهد
فى شكل عصفور
|
Post: #10
Title: Re: الونســـــة......... ام دق
Author: HOPELESS
Date: 05-20-2003, 09:39 PM
Parent: #9
ياسجيمان
بقيت زي سيد قزازة السمن
وتستاهل الدقه الحااااااره دي
عارف ليه..؟
لانك ظالم ماعدلته حتى في حلمك
ومشيت تتشالق التقول هابشك باسم الله
وكويس انك ما قلت لجدك انك كنت بتهزر لانو كان طبق ليك الدقه تاااااني .. عشان دا ماوقت هزار .. في زول يقولوا ليهو نديك قروش ويطلع كضب ومايزعل ...؟؟
يلا سلام
|
Post: #14
Title: Re: الونســـــة......... ام دق
Author: سجيمان
Date: 05-21-2003, 03:07 PM
Parent: #10
يا هوبليس........المصسية جدي كان مصر اوريهو القروش دي انا جببتها من وين؟؟؟؟؟؟؟؟؟؟؟؟؟؟؟ اهه..... زي دا تقول عليهو شنو؟
|
Post: #11
Title: Re: الونســـــة......... ام دق
Author: سجيمان
Date: 05-20-2003, 10:36 PM
Parent: #9
اهلا بالمجاهد...طيفور العصفور
|
Post: #12
Title: Re: الونســـــة......... ام دق
Author: رباح الصادق
Date: 05-20-2003, 10:47 PM
Parent: #1
والله كويس يا سجيمان
تكبر تنسى
لكن ما عرفت السمبيب الفي عنقرة جدك الضو دة شنو- أشرح لينا انحن من ناس البندر ترا
رباح
|
Post: #15
Title: Re: الونســـــة......... ام دق
Author: سجيمان
Date: 05-21-2003, 03:15 PM
Parent: #12
يا رباح..... السمبيب..دا زي الشامة او ...الوحمة حجمها قدر الفلفل الاسود وبعدين بتكون زي نتؤ بارز كدا لونو اسود كدا
|
Post: #13
Title: Re: الونســـــة......... ام دق
Author: أبوالزفت
Date: 05-21-2003, 12:07 PM
Parent: #1
ya CJman ana shamtan feek lino inta za3lta bint Alarbab Allah yar7mha ali shan kida tesstahl klo wala za3l al7bobat
|
Post: #16
Title: Re: الونســـــة......... ام دق
Author: سجيمان
Date: 05-21-2003, 03:19 PM
Parent: #13
يا ابو الزفت........ حبوبتي متحلمه براها انا لا زعلتها لا حاجة انا بتونس معاها وكان ممكن نجلس على طاولة المفاوضات وتطالب بحقها
|
|