Post: #1
Title: دمــــي.....و....دمـــوعـي......و......ابتســـــامتـي
Author: سجيمان
Date: 05-27-2003, 09:49 PM
المغتربين البؤساء........ كلهم.... الواحد.. فيهم يقضي تلاتة ارباع عمرو في الغربة... وفي النهاية يرجع اهلو ايد ورا وايد قدام.....و اباطو والنجم......وحصيلتو الثقافية..... العربية سيارة... والمرا الحرمة..... والقروش الفلوس....ويجيب لو ولد ويسميهو محمد ويدلعو بحمودي.....ويصاب بشلل تام في علم الانساب لدرجة انو ما بيقدر يميز بين.... كفيلو.. وابوهو.... ومرتو.. البيرجع معاهو قرشين منهم.... يرميهن في حافلة والله امجاد......ويقعد يجري وراها طالع نازل...نازل طالع.... وما يتم الحول الا ....وهو رجع مفلس ولحق رفاقتو.........
واحد منهم ربنا ياخد بايدو...... رجع متفائل وكلو امل وطموح.... في ان يصعد سلم الراسمالية...... ولكن........ شوفو الحكاية........ قابل جماعة ..قال لو يا زول قروشك ديل سوهن في سكر علينا اليمين السنة الجاية اليدفرك ما يرميك.... الكلام دا زمن السكر فيهو ندرة وفي السوق السوداء..... كمد القريشات كلها في السكر... مشى الجنيد... اشترى شحنة لوري كاملة.....قدر قريشاتو...وركب مع اللوري وعلى بنطون رفاعة....... اللوري في البنطون..وهو معاهو.... ويولع سجارة ويطفي سجارة..... تعال انت يا بنطون الجن اغرق.... بكل مافيك.... الناس مرقو... والزول معاهم..... وقف مسافة يعاين للبحر...وبعد شوية بقى مباري القيف... ويدخل اصبعو في الموية ويضوق.....ويكورك ....حرم لي هنا حلوة...... حرم لي هنا حلوة...... وماشي....ماشي....وقالو لحسي مباري البحر..... ويضوق فيهو....ويسوي في اللي هنا حلوة......
دا حين يا المغتربين....... اوعكم من السكر... كفاية السكر الفي دمكم
|
Post: #2
Title: Re: دمــــي.....و....دمـــوعـي......و......ابتســـــامتـي
Author: HOPELESS
Date: 05-27-2003, 10:01 PM
Parent: #1
حرم انت زاتك حلو
انا قريشاتي داير اكمدن في بطني
استثمار باطني
اكل لمن اقيف تويه
واشحم واتنفخ نفيخ التانبيره
وبعد داك انفضل شي من عقاب القريشات اخليهو للعشاء
مالنا ومال القرايه ام دق
|
Post: #5
Title: Re: دمــــي.....و....دمـــوعـي......و......ابتســـــامتـي
Author: سجيمان
Date: 05-27-2003, 10:16 PM
Parent: #2
يا هوبليس.... والله عاقل... عاقل تب....مالك ومال السكر المواصة
|
Post: #3
Title: Re: دمــــي.....و....دمـــوعـي......و......ابتســـــامتـي
Author: alfatih
Date: 05-27-2003, 10:11 PM
Parent: #1
سيجيمان
النسعلك سؤال
مافي عربية ليمون وقعت جوة البحر ؟
و سعال تاني..
إنت قريشاتك بتعمل بيهن شنو ؟
ابو القدح بعرف محل بعضي اخو
|
Post: #7
Title: Re: دمــــي.....و....دمـــوعـي......و......ابتســـــامتـي
Author: سجيمان
Date: 05-27-2003, 10:25 PM
Parent: #3
الفاتح....... السعال الاول..... تقصد مع لوري السكر دا....مفروض يكون في لوري ليمون غرق معاهو؟ههههههههه
السعال التاني.......... انا ما عندي التكتح وحاتك انت....مش وضع مريح بالله؟ احسن من يتماصن واقعد اباري القيف... يا ابوي انا فاضي للجن
|
Post: #4
Title: Re: دمــــي.....و....دمـــوعـي......و......ابتســـــامتـي
Author: 3omda4
Date: 05-27-2003, 10:11 PM
Parent: #1
سجيمان قولي الحادثة دي كانت سنة كم
عشان مرة كسروني ناس البيت و قالو اني كبيت السكر في الزير
و لحدي حسي ما قدرتي اثبت ليهم اني ما عملت كدة
بالله عليك تعال برء اخوك
ولك التحية
__________________
متي استعبدتم الناس و قد ولدتهم امهاتهم احرارا
|
Post: #10
Title: Re: دمــــي.....و....دمـــوعـي......و......ابتســـــامتـي
Author: سجيمان
Date: 05-28-2003, 03:33 AM
Parent: #4
يا عمدة4.....طيب ناس بيتكم ديل موية الزير جابوها من وين؟ مش من البحر؟...اهه ما شافو الزول المباري القيف ويضوق في الموية ويحرم ويطلق داك ؟
|
Post: #6
Title: Re: دمــــي.....و....دمـــوعـي......و......ابتســـــامتـي
Author: Ahmedain
Date: 05-27-2003, 10:17 PM
Parent: #1
تعيش يا المبدع سجيمان وانت تنقل لنا ماساة اهلناالطيبين, و عبرها تلطف احزانناو تهدينا الابتسامة فى زمن اللاابتسامة
دمت يا مبدع
احمد
|
Post: #12
Title: Re: دمــــي.....و....دمـــوعـي......و......ابتســـــامتـي
Author: سجيمان
Date: 05-28-2003, 03:52 AM
Parent: #6
احمد تسلم...لك كل الود.....لا تحرمنا طلاتك
|
Post: #8
Title: Re: دمــــي.....و....دمـــوعـي......و......ابتســـــامتـي
Author: مريم بنت الحسين
Date: 05-27-2003, 10:48 PM
Parent: #1
والله يا سيجيمان بالغته... عملتها في رفاعتنا...غايته ضحكتني وصحيت ناس البيت كلهم نص الليل...
التحية لك.. وانا من متابعي كتاباتك باستمرار.. استمر.. الابداع له صور عده.. لكن زي ده ما شفته
بنت الحسين
|
Post: #9
Title: Re: دمــــي.....و....دمـــوعـي......و......ابتســـــامتـي
Author: ودرملية
Date: 05-28-2003, 01:55 AM
Parent: #8
سلامات
النكتة لذيذة يامسطول فوق العادة
لكن تعال هنا انا من مولود وربيان في رفاعة ماسمعتا بي قصة اللوري دي
شوف ليك حتة تانية مناسبة عشان مااقوم اربط ليك كرت ديجتال
هاهاهاهاهاهاهاهاهاهاهاهاهاهاها
|
Post: #14
Title: Re: دمــــي.....و....دمـــوعـي......و......ابتســـــامتـي
Author: سجيمان
Date: 05-28-2003, 04:12 AM
Parent: #9
ود رملية........ انت ماعارف انو انا باشمونس ميكانيكي كبير...... في النقل النهري؟
|
Post: #13
Title: Re: دمــــي.....و....دمـــوعـي......و......ابتســـــامتـي
Author: سجيمان
Date: 05-28-2003, 04:09 AM
Parent: #8
مريم........ شكرا للاطراء......والتشجيع... دمتي
|
Post: #11
Title: Re: دمــــي.....و....دمـــوعـي......و......ابتســـــامتـي
Author: عديلة المتوهجة
Date: 05-28-2003, 03:44 AM
Parent: #1
CG.MAN
الاخ لك التحية الظاهر انت كمان شربت من الموية دى اية الحلاوة دى
|
Post: #15
Title: Re: دمــــي.....و....دمـــوعـي......و......ابتســـــامتـي
Author: سجيمان
Date: 05-28-2003, 04:16 AM
Parent: #11
عديلة المتوهجة.....و المتالفة دائما.....هذا بعض مما عندكم..... شكرا لك
|
Post: #16
Title: Re: دمــــي.....و....دمـــوعـي......و......ابتســـــامتـي
Author: HOPELESS
Date: 05-28-2003, 04:31 AM
Parent: #15
يا مطعم مويه النيل
مصيرك بكره تشربه
|
Post: #17
Title: Re: دمــــي.....و....دمـــوعـي......و......ابتســـــامتـي
Author: abuguta
Date: 05-28-2003, 07:24 AM
Parent: #16
سجيمان
تحياتى
المغترب المبارى البحر
وانا عيونى غلبن السهر
والسكرى ووجع الضهر
طيب دا قروشو غرقت قدام عينو
لكن اغلب المغتربين قروشهم بتغرق ببطء
اقامات مطرشقة وواحدات مسحوبة وديون ما بترجع وارض مبيوعة قبله
5 مرات
انت سمعت بالمغترب اكثر من 20 سنة كان ببنى ليه عمارة لما تمت اجر ليها غفير ..تسلط عليها محامى ودكتورة قالو للغفير نحن اشتريناها
من صاحبها وهم قامو باعوها وكانت معاهم جمعيع اوراق البحث.. ايه رايك
خليك من دا واحد من معارفنا شغال ممرض عنده قطعة ارض مشتريها من الستينات فاتحة على سوق كبير فى الخرطوم .. تسلط عليها واحد من الجماعة طلع ليها شهادة بحث ورمى البيوت الفيها وترك اولاد الراجل فى الخلاء وهو باناها داكين سعر الدكان 50 مليون زولنا قاعد فى السعودية لما عرف الحادثة دى بقى بين الحياة والموت تقول لى سكر
انشاء الله الغربة تخسر
|
Post: #18
Title: Re: دمــــي.....و....دمـــوعـي......و......ابتســـــامتـي
Author: ابو جهينة
Date: 05-28-2003, 07:29 AM
Parent: #17
سجيمان صباحك خير يا ( سكر )
معليش ندلعك شوية.
أتاري السمك بتاعنا في الشمالية قدر ما نسوي ليهو ملح ، برضو طعمو متغير.
|
Post: #20
Title: Re: دمــــي.....و....دمـــوعـي......و......ابتســـــامتـي
Author: سجيمان
Date: 05-28-2003, 08:09 AM
Parent: #18
ابوجهينة...... يكون يا ربيالسكر دا طعمو وصل لحدي هناااااااااك...... علا يكون الغرق مصنع الجنيد
|
Post: #19
Title: Re: دمــــي.....و....دمـــوعـي......و......ابتســـــامتـي
Author: سجيمان
Date: 05-28-2003, 08:02 AM
Parent: #17
ابقوتة............ انا زاتي ما عندي شي هناك عشان يبيعوها...... انا قاعدين ياكلوني الجماعة هنا اول باول
|
Post: #21
Title: Re: دمــــي.....و....دمـــوعـي......و......ابتســـــامتـي
Author: albagir altahir
Date: 05-28-2003, 09:29 AM
Parent: #1
والله ده الحاصل علينا
سمعته خبر المغترب البرسل في القورش عشان يبنو ليهو البيت
كل اسبوع تلاثتة اربعة ملايين
الطوب الاسمنت السيخ
الخته الداخل فيها رسلة
بدل السكن رسلو
قورش الاجازة الصفيفة رسلها وقعد مع ولادو قبلوا
الصندوق حق مرتو رسلو
اخد سلفية من الشركة رسلة
اتسلف من اصحابوا ورسل
وبيت الجن ده ما تم
كل ما يتصل يقولوا ليهو قرب للعتب
لما زهج وخلاص العندوا انقطعت
قال ليهم البيت ده وصل وين
قال ليهو الحمد لله وصل العتب
قال ليهم اسقفوا علي كده بس
هههههههههههههههههههههههههه
|
Post: #24
Title: Re: دمــــي.....و....دمـــوعـي......و......ابتســـــامتـي
Author: سجيمان
Date: 05-28-2003, 08:38 PM
Parent: #21
يا الباقر.................عشان كدا ما عاوزين ننبني هناك.........متكلين علي حكومتنا الرشيدة
|
Post: #22
Title: Re: دمــــي.....و....دمـــوعـي......و......ابتســـــامتـي
Author: ود العجمى
Date: 05-28-2003, 12:14 PM
Parent: #1
سجيمان
قبل شهر اتصل بى أخوى قاعد فى بلاد الحرم . وقال انه جاييى نهائى وسالنى عن رايى . اها فى التلفون قلت ليه كدى تعال زيارة وبعدين نشوف . وهسى صاحبك جاء ليه كم طاشر يوم . ولحسن حظو لقى بلدنا سخانتها تلخم . الكهرباء قاطعة فى الخرطوم بالليل وبالنهار والموية كمان . اها صاحبك أول امبارح لقيتو صاقع للحاجة أدينى عفوك خلينى النرجع. ... ما قلت الناس ديل ما ناس حارة؟ . قال جاى نهائى قال. اجارك الله
|
Post: #26
Title: Re: دمــــي.....و....دمـــوعـي......و......ابتســـــامتـي
Author: سجيمان
Date: 05-28-2003, 10:13 PM
Parent: #22
ود العجمي.................. يعني ما نرجع.....والله كيف الراي؟
|
Post: #23
Title: Re: دمــــي.....و....دمـــوعـي......و......ابتســـــامتـي
Author: 3mak Hasabo
Date: 05-28-2003, 12:36 PM
Parent: #1
انت عارف ياسجيمان الرمدان الاغتراب دا مشكلة كبيرة خلاص
|
Post: #27
Title: Re: دمــــي.....و....دمـــوعـي......و......ابتســـــامتـي
Author: سجيمان
Date: 05-28-2003, 11:34 PM
Parent: #23
يا عمي حسبو ....والله فعلا مشكلة كبيرة............. لكن بقت ادمان للناس نسوي شنو؟
|
Post: #25
Title: Re: دمــــي.....و....دمـــوعـي......و......ابتســـــامتـي
Author: Abdalla Gaafar
Date: 05-28-2003, 09:37 PM
Parent: #1
سجيمان
الحمد لله نحنا ماجربنا اغتراب القروش دا وزي ماقلت كل الناس البعرفم مغتربين مافيهم زول بقي غني التقول مدعيين
انا عجبني اسم البوست دا دحين ياخوي الاسم دا ما اسم فلم عربي
وشايف حتي ردودك فيهو اخر رقة
نعل مافي عوجة
وياخوي نعل مادفعت لمشاريع المغتربين الزراعية
ياخوي المغتربين ديل في جماعة مسلطين عليهم البلموها بياكلوها منهم اول باول
سلام ياجميل
عبدالله جعفر
|
Post: #30
Title: Re: دمــــي.....و....دمـــوعـي......و......ابتســـــامتـي
Author: سجيمان
Date: 05-29-2003, 05:06 AM
Parent: #25
ايوا يا عبدالله جعفر دا اسم فلم قديم...... بتاع نجلاء.......... وبعدين قلت لي نعل ما في عوجة؟ والله يا عبد الله العوجة بايته ومقيلة...... علا انا فارس عدييييييل
|
Post: #28
Title: Re: دمــــي.....و....دمـــوعـي......و......ابتســـــامتـي
Author: artiga
Date: 05-29-2003, 02:30 AM
Parent: #1
سجيمان
انا لى الليلى ما عملت لى قروش اشترى بيها سكر
اها اكان الله قدرنى المها بعد عمر طويل اسوى شنو
عشان ما تتماص منى
ومزيد من الابداع
|
Post: #31
Title: Re: دمــــي.....و....دمـــوعـي......و......ابتســـــامتـي
Author: سجيمان
Date: 05-29-2003, 08:22 AM
Parent: #28
يا ارتيقا عشان ما تتماص اعمل الاتي.... اذا ما معرس عرس..وجيب اخوانك....... واخوان المرا.....وحجج امك وابوك....... اهه تاني ان لميتها تعال عضيني في نص قنقوني دا
|
Post: #29
Title: Re: دمــــي.....و....دمـــوعـي......و......ابتســـــامتـي
Author: tabaldy
Date: 05-29-2003, 04:03 AM
Parent: #1
أها البغالطوا وقالوا البنطون ده ما بتاع رفاعة أنا امبارح دي , أمبارح القريبة دي استحميت في البحر في الفيضان ولمن طلعت لقيت النمل لامي فيني , أكون أنا ذاتي السكر وما عارف يا سجيمان السكّر ؟؟
يا زول أنا عندي 5 ملايين ليرة تركية يا دوب ما تخليني أشتري لي رطلين سكر وأكشحهم كرامة للحمام في موية الزير وكت التلاجة ما شغالة وكدة أقول حتى حمامنا شرب من الزير ومافي زول يقول لي كلبهم أكل جرجير
تبلدي
أبنوسي
خايف أقول سكري يقوم بكرة يقول لي زو في البورد رفعت ضغطي
تيب أوف توداي
يمكن أضافة جميع المغتربين إلى البطاقة التموينية حسب قرار الوالي الجديد وبي كدة تقدر تصرف ربع رطل سكر زيادة عن كل مغترب من محلات التجاري
|
Post: #32
Title: Re: دمــــي.....و....دمـــوعـي......و......ابتســـــامتـي
Author: سجيمان
Date: 05-29-2003, 11:29 AM
Parent: #29
بالله رطل السكر في تركيا بمليونين ونص؟ .....والله نحن في نعمة.....وتقولو لي الانقاذ كعبة
|
|