Post: #1
Title: دعـوى ضـد الفضـائية الســـودانية
Author: سجيمان
Date: 06-23-2003, 09:50 AM
Parent: #0
بما انني من دافعي ضريبة الفاضئية السودانية...وزول ما قاعد اعاين لاي قناة تانية..... ليس اعجابا بفضائيتنا الفاضية... ولكن عشان اخلص حقي الدفعتو.... يظهر غيري كتار.... عشان كدا ناس تلفزيونا حلفو بدينهم وايمانهم.... علا يطرشونا ليها...ويطفشونا منها....احسن برنامج فيها صحة وعافية..... لكن وحات الله البرنامج دا سوى لي هلوسة...... يجيبو ناس الكلي....ويقعدو ينضمو فوقها..... تلقاني اليوم كلو وانا ماسك صفحتي وضهري من تحت واقعد اجس.... وكل دقيقة امشي الحمام واقعد اتفرج في بولي .....لونو يا ربي مالو بقى كدي؟.....البارح كان صافي وفي امان الله ... بس خلاص فشل كلوي..... عليهو العوض ومنو العوض.....ولو جابو ناس الباطنية...وقعدو ينضمو في السكري.... يمسخو علي كباية الشاي القدامي... واكورك فوق المرا علا تسوي شاي تاني وتقلل السكر.... انتي ما يتسمعي في النضم دا؟.....وبقيت كل يومين..... شايل اصبعي وما ديهو لناس المختبر عشان يشيلو منو دم ويفحصو السكري....ودا كوم وناس القلب و العروق والشراين كوم.....بقيت ان كراعي خدرت ساكت... اتمدد فوق العنقريب...واشهّد واستغفر....واوصي الوليدات وامهم ما يدفننوني في البلد دي.... عشان ما اقوم يوم القيامة..... وانا اقعد افتش في جيوبي كايس للاقامة.....والله الرخصة... وان صبحت علي الواطه جري علي المستوصف.... والفحص....وبقروش برضو.....برنامج صحة وعافية بقى لي برنامج هلوسة... وهضربة.....
والله برنامج حبيبنا ...حسين خوجلي..... هو ينضم.... ..والمرا قاعدة جنبي و تعاين للستائر الوراهو.... وتقول والله حلاوة ستائر..... عليك الله يا سجيمان باكر من الصباح تمشي تشتري لنا زيهن.....بعد شوية تعاين للترابيز القدامو.....الله والله طقم ترابيز يجنن... عليك الله يا سجيمان باكر دي تجيب لنا طقم زيو.....الترابيز قزاز.... انا اجيب ترابيز قزاز؟....وعندي اربعة شفع....امهم متوحمه بهم علي كدايس طواااااااااالي مشعبطين ومتشعلقين.......وطقم الشربات القداهم... الغريبة نفس لون الشربات ليهو ستة شهور.. ويوم واحد لا شفت حسين ولا شفت واحد من ضيوفو....مدا لو كباية علي خشمو..... غايتو يا حسين ان بقت شربات بلاستيك ... الختيتها رقدت...والله ترامس الشاي.....ما بعرفهن مليانات والله فاضيات ... وبرضو المرا دايرة ..... زيهن..... وقلبي في ايدي..... تقوم يوم تقل عقلها وتقول لي دايرة لي عمة زي دي........والله تحلف علي طلاق الا اشتري عمة قدر حقت حسين وعكاززي عكازو......ديل هينات يا بت الشيخ علا الوشي اسوي عليهو كيفن؟....
.والمذيعات الواحدة قبال ما تقعد قدام الكميرا... يكون ادوها علقة وتجيك وشيها يلعن قفاها...وتقرا الخبر... انفجرت قنبلة في بيروت وهي في سرها تلعن فينا انشاء الله القنبلة التتفجر فيكم كلكم يا المشاهدين وتقطعكم حتة حتة وما يفضل فيكم زول....والله خبرعن السارس في الصين.... وهي في سرها تقول... ان شاء الله يابركة المكاشفي السارس اليكملكم لي حدكم تعاينو لي شنو؟ عيونكم بالتقددن.......والله لما تقول انتهت النشرة.... وهي في سرها تقول لنا ... اهه انتهت النشرة.... ارتحتو؟ كان عندكم شغلة قومو شوفوها..ولا لو عاوزة تنقلنا للاحوال الجوية... تقول الان مع الاحوال الجوية...وفي سرها تقول ان شاء الله يا بركة الما نام ولا اكل طعام..... زلزال ومطر وسيل..... يغرق البلد دي لي حدها..... وتصبحو تلقو عناقريبكم وحللكم وكواريكم. وكروركم.... في شلال السبلوقة.... كل الدعا والنكد دا تقراهو في وشيها
والمذيعين الجداد البيقرو نشرة الاخبار....... ديل ما اختاروهم على اساس ... الصوت والصورة....... ديل اختارهم على اساس الاضنين....اي واحد ما عندو اضنين كبار ما ينفع مذيع....يا ربي تكون الاضنين ديل عشان تقوية الارسال؟..... غايتو هم عندهم فيهن حكمة.....
اها ندفع قروش عشان......نهلوس...وندفع عشان.... نشتري طقوم. عشاء وشاي وترابيز.....وندفع.. عشان يداعونا وينعلو ابو خاشنا.....وندفع عشان شاشة التلفزيون تتملي كلها اضنين.......... الشكية لي اب يدا قوية
|
Post: #2
Title: Re: دعـوى ضـد الفضـائية الســـودانية
Author: ود الشيخ
Date: 06-23-2003, 10:08 AM
Parent: #1
سي جي
رائع كالعاده وممتع كما عهدتك هنا او هناك
التلفون امس معك ممتع ورسالتك وصلت لصاحبها
ود الشيخ
|
Post: #6
Title: Re: دعـوى ضـد الفضـائية الســـودانية
Author: سجيمان
Date: 06-23-2003, 10:51 AM
Parent: #2
ود الشيخ انا الكنت سعيد بسماع صوتك......وكويس الرسالة وصلت للزول عشان لحمو ما ياكلو
|
Post: #3
Title: Re: دعـوى ضـد الفضـائية الســـودانية
Author: Ahlalawad
Date: 06-23-2003, 10:09 AM
Parent: #1
منكم نستفيد آ سليمان
والله أنا طول عمري دا كنت بشوف الفضائية السودانية محنة سااااي
لكن كتر خيرك .. ذكرتني قروشي . حقو يقسمو لي جزو من الشاشة
الجزو المافيه عمر الجزلي
الواحد يقعد يشاهد وعكازو حداهو ، في أمان الله
|
Post: #8
Title: Re: دعـوى ضـد الفضـائية الســـودانية
Author: سجيمان
Date: 06-23-2003, 12:28 PM
Parent: #3
اهل العوض لا يقسمولك الشاشةولا حاجة......يدوك قروشك ويقفلوها
|
Post: #4
Title: Re: دعـوى ضـد الفضـائية الســـودانية
Author: maia
Date: 06-23-2003, 10:16 AM
Parent: #1
الاخ سجيمان
مش دعوى واحدة ، الفضائية دي عاوزة دعاوي بكميات تترفع عليها ، مش كفاية رفع الضغط والعذاب الابدي الدخلونا فيه
بس الحاجة المدهشة في برنامج ساحات الفداء بيجيبوا واحد ويركزوا عليه الحلقة كلها ثم بعد ذلك يتكتب الشهيد فلان بس هم بيكونوا عارفين كيف ان الزول ده حيموت ؟
|
Post: #5
Title: Re: دعـوى ضـد الفضـائية الســـودانية
Author: ابو جهينة
Date: 06-23-2003, 10:34 AM
Parent: #4
سجيمان : لك تحياتي و تقديري
الله يجازيك ، و الله صورة منقولة تمام التمام.
الإضنين الكبار دي شفرة من الحكومة للشعب السوداني معناها ( الكلام ليكم يا المدلدلين إضنيكم ).
|
Post: #11
Title: Re: دعـوى ضـد الفضـائية الســـودانية
Author: سجيمان
Date: 06-23-2003, 02:47 PM
Parent: #5
ياابوجهينة...زولك اب ضنين اللابد ورا الكتاب دا حتى هو ان شافوهو بيعينوهو لك مذيع
|
Post: #10
Title: Re: دعـوى ضـد الفضـائية الســـودانية
Author: سجيمان
Date: 06-23-2003, 01:50 PM
Parent: #4
وبعدين يا مايا......التلفزيون محتكرنو فنانين معينين.....ومفروضين علينا يا عجبنا يا ندق راسنافي الحيطة
|
Post: #7
Title: Re: دعـوى ضـد الفضـائية الســـودانية
Author: alfatih
Date: 06-23-2003, 10:58 AM
Parent: #1
سجى مان يا مبدع
سجمكم يا البتدفعوا للفضايحية
رفيق الحريرى دة زول براهو عندو
فضائية ؟
و الله مشكلتكم مشكلة ناس
كفيلك , عكاز المغتربين
داقيكم و الفضايحية وناس
منو كدة ما عارف
دى حكومة ولا همباتى ؟
الله يكون فى عونكم
تعالونا هنا , الدولة فيها
53 فضائية وبتدفع للناس
فى مسابقات بالملايين
بدل يدفعوكم
لكن ما شفت انقلاب كوستا ؟
دة حايرجع ليكم حقكم
|
Post: #9
Title: Re: دعـوى ضـد الفضـائية الســـودانية
Author: خالد
Date: 06-23-2003, 12:39 PM
Parent: #7
والله يا سجم الرماد اقول ليك شنو غير ممتع ورائع وواصل ولى قدام
|
Post: #12
Title: Re: دعـوى ضـد الفضـائية الســـودانية
Author: EMU إيمو
Date: 06-23-2003, 03:04 PM
Parent: #9
الرائع سجيمان
للأسف فضائيتنا السودانية
معظم برامجها أخبار مؤتمرات وتصريحات
لجان منبثقة ولجان منسدحة ولجان تمضغ اللبان
ومصفقون يؤيدون كل شيئ . ومحاورون جبناء لا
يستطيعون قول كلمة قبل الرجوع إلى المسؤول الأول
ومحاورون خائفون من السؤال فما بالكم بالإجابة
وحتى فضائية الشيخ صالح كامل التي تعمل في اليوم
ساعتين لم تأتي بجديد
وبيني وبينكم بي سجمنا أحسن من بقية الفضائيات العربية
و الكبريهات اللبنانية إعلان وراء إعلان
حليب ومكرونة وحفائض أطفال وسيدات ولبان والكولونيا
ورررررررررروك
|
Post: #17
Title: Re: دعـوى ضـد الفضـائية الســـودانية
Author: سجيمان
Date: 06-23-2003, 04:15 PM
Parent: #9
خالد........توقيعك في السلك
|
Post: #15
Title: Re: دعـوى ضـد الفضـائية الســـودانية
Author: سجيمان
Date: 06-23-2003, 03:20 PM
Parent: #7
الفاتح انت وين عشان نجيك
|
Post: #13
Title: Re: دعـوى ضـد الفضـائية الســـودانية
Author: Ahmedain
Date: 06-23-2003, 03:11 PM
Parent: #1
سجيمان حبابك:
الموضوع مضحك و مبكى، و شر البلية فى جمعهما معا.
احمد محمدين
|
Post: #20
Title: Re: دعـوى ضـد الفضـائية الســـودانية
Author: سجيمان
Date: 06-23-2003, 09:44 PM
Parent: #13
احمد محمدين...... اخد البيضحك وسيبك من هم
|
Post: #14
Title: Re: دعـوى ضـد الفضـائية الســـودانية
Author: adil amin
Date: 06-23-2003, 03:15 PM
Parent: #1
الاخ العزيز سليمان
والله كلام فى محلو والزول البشوفا هايصة كده يقول البلد ما فيها اى مشكلة لا زالت بوق هزيل لنظام ونحن بنقترح انو يشفروها ومطممة بطن السودانيين فى الخارج اما سودانيين الداخل فحالتم ماساة حقيقية لان الرسيفرات ممنوعة ذى العرقى والبنقو .....وهنا الشفع يبيعوها فى جولات السيارات وفى البقالات...وعشان الناس البطنا طامة فى السودان اتفقنا مع ملك الليمون منوت انه يستورد 5 طن من الليمون من استراليا عشان نوزعو للشعب السوداني فى الداخل مع عدم ذكر الاسباب
********
هذا النوع من الاعلام سيتحول بمرور الزمن الى انشوطة تخنق النظام نفسه
ونحن السودانين كنا مفروض نكون الاولى فى الاعلام الحر بالقدم والعراقة مش قطر الصغيرة دى تفوق علينا بالجزيرة
|
Post: #24
Title: Re: دعـوى ضـد الفضـائية الســـودانية
Author: سجيمان
Date: 06-24-2003, 03:04 PM
Parent: #14
عادل يا ابن عمي....... حتى البرامج الترفيهية موجهة برضو؟ دا شي مامعقول
|
Post: #16
Title: Re: دعـوى ضـد الفضـائية الســـودانية
Author: elsharief
Date: 06-23-2003, 03:25 PM
Parent: #1
سيجمان يارائع واصل فى ابداعاتك ومتابعيين بانتظام
|
Post: #18
Title: Re: دعـوى ضـد الفضـائية الســـودانية
Author: انور عمر
Date: 06-23-2003, 05:02 PM
Parent: #16
الاخ سجيمان
السلام عليكم ورحمة الله وبركاته
يا اخي والله التلفزيون عملينا وهم انا قايتو كل يوم ماسك صفحتي اقول فشل كلوي ومرة امسك بطني اقول دا شنو
الشي التاني يا اخي كمال حامد كرهنا الكوره لو كان في كوره في السودان ممكن يتكلم عنها لكن كل يوم مقلوبين وحالتم زايده سوء
ومهازل ومشاكل بين الاتحاد والاندية
|
Post: #26
Title: Re: دعـوى ضـد الفضـائية الســـودانية
Author: سجيمان
Date: 06-24-2003, 05:17 PM
Parent: #18
يا انور........هو نحن اللعب العلينا شنو؟
|
Post: #25
Title: Re: دعـوى ضـد الفضـائية الســـودانية
Author: سجيمان
Date: 06-24-2003, 05:14 PM
Parent: #16
الشريف.........شكرا ولي الشرف بمتابعتكم
|
Post: #19
Title: Re: دعـوى ضـد الفضـائية الســـودانية
Author: lana mahdi
Date: 06-23-2003, 05:54 PM
Parent: #1
اخى العزيز سجيمان
اضحكتنى حتى دمعت
الله يجازيك
لاحظ انو الضحكة المن القلب فى بلاد الخليج للمغتربين غاااااااااااالية
ذكرتنى الفضائيةالسودانية لانى اليومين دى ممنوعة منها بامر الطبيب
عشان الاكتئاب النفسى و كدة
و ذكرتنى بالمذيع البذيع الاخبار و كانو نازل سلالام كل تلاتة سلمات سوا
بالله عليك الله ما تتلفت لينا على ناس البلو نايل
|
Post: #27
Title: Re: دعـوى ضـد الفضـائية الســـودانية
Author: سجيمان
Date: 06-24-2003, 05:20 PM
Parent: #19
لانا........حبابك.......وانا عارف انوالضحكة في بلد الغربة غالية......وعارف كدا كووووويس
|
Post: #21
Title: Re: دعـوى ضـد الفضـائية الســـودانية
Author: maia
Date: 06-23-2003, 09:58 PM
Parent: #1
الاخ سجيمان
كان الاستاذ ياسر عبدالفتاح صاحب عمود شقشقة في جريدة الخرطوم
يكتب دوما عن حال تلفزيون السودان الكئيب ، فيعطي لكل مذيع وصفا يتناسب مع ما يقدمه لجماهير المشاهدين من جرعات هائلة من وسائل رفع الضغط والرغبة في الهرب الى ابعد مكان في الكرة الارضية لايصله ارسال هذه القناة فمثلا هناك المذيع المروحة ، والمذيع الطاووس ، وكل مذيع بيقلد التاني
لكن برضو ما رديتوا على سؤالي هم بيعرفوا الواحد حيموت كيف عشان يركزوا عليه طول الحلقة؟
سؤال يتردد في ذهني كلما وقعت عيناي عن طريق الخطا على برنامج ساحات الفداء
الله يعسنا ساكت بس !!
|
Post: #22
Title: Re: دعـوى ضـد الفضـائية الســـودانية
Author: سجيمان
Date: 06-24-2003, 04:41 AM
Parent: #21
يا اخوانا مايا دي ما اتلقى راجل يجاوبها
|
Post: #23
Title: Re: دعـوى ضـد الفضـائية الســـودانية
Author: قلقو
Date: 06-24-2003, 09:49 AM
Parent: #1
الأخ سـجيمان
انت البيوديك قدام التلفزيون شـنو ؟ اما عن اشتراكك فأعتبر المسألة ياخى سلامة كرامة,عشان بعدين ماتندم لمن الوليدات يجيهم تخلف عقلى من جراء مشاهدتهم للقناة الفضائية.
كلامك عن مذيعاتنا الفاتنات بيذكرنى بى واحد زهجان منهم ولمن شاف واحدة فيهم اطلت على الشاشة علق عليها قائلا يابتى وشك الفرحانة بيه ده والله نحن بنصحى بيهو من النوم
ودمتم
|
Post: #28
Title: Re: دعـوى ضـد الفضـائية الســـودانية
Author: سجيمان
Date: 06-24-2003, 05:28 PM
Parent: #23
يا قلقو انا ما بعترض على شناتهن......لكن شوية بس يطرحن وشيهن ويبتسمن
|
Post: #29
Title: Re: دعـوى ضـد الفضـائية الســـودانية
Author: HOPELESS
Date: 06-25-2003, 05:45 AM
Parent: #28
سي جي مان
سلام واحترام
انت عارف يا صديقي افضل برنامج تتفرجو علي الفضائيه السودانيه شنو؟؟
برنامج اششششششششششششش
وبرنامج الوان الطيف البجيبوهو بعد التقفيل والتطبيل
وبكدا تكون خلصت قروشك كاااامل شامله ضريبه الشهيد الذي استشهد اثناء الفرجه علي مجروس السودان
اشششششششششششششششششششششششششش
|
Post: #31
Title: Re: دعـوى ضـد الفضـائية الســـودانية
Author: سجيمان
Date: 06-25-2003, 09:14 AM
Parent: #29
يا هوبلس.........ايششششششششششششش...بتاعتهم زاتها مابتشبة حقت التلفزيونات التانية.........تضّرس عديل
|
Post: #30
Title: Re: دعـوى ضـد الفضـائية الســـودانية
Author: كوليل
Date: 06-25-2003, 06:55 AM
Parent: #1
والله كل القولتو صاح 100 فى 100
وانا معاك لى أخر الدرب
دائما مواضيعك حساسة ومهمة
وبتضرب فى الانكل ذى مابقولو ناس الكوره
أها ديل شوف لينا ليهم يوم
|
Post: #32
Title: Re: دعـوى ضـد الفضـائية الســـودانية
Author: سجيمان
Date: 06-25-2003, 09:28 AM
Parent: #30
كوليل.......... يا اخوي كل شي و لا ناس الكورة ديل قاعدين يدقو عديل
|
Post: #33
Title: Re: دعـوى ضـد الفضـائية الســـودانية
Author: shiry
Date: 06-25-2003, 09:31 AM
Parent: #30
سلام مربع
سجيمان
وشفت البت ديك ام وش
لابساليها توب
اصصصصصفففففففر
عارف احتجنا في بيتنا
لرموت تخفيف حدة الالوان
وبعد دا كلو
قالت عايزة تتكلم عن
سايكولوجية الالوان
بين الدفء العائلي
والنفور العائقي
|
Post: #34
Title: Re: دعـوى ضـد الفضـائية الســـودانية
Author: سجيمان
Date: 06-25-2003, 09:36 AM
Parent: #33
يا شيري......... التوب الاصفر ما حقهامسيكينة.......مدنو لها ناس التلفزيون...... اصلهم عندهم بدل وتياب معلقات عند المكوجية الجنب الاستديو ............هي كانت لابسة توب اخدر
|
Post: #35
Title: Re: دعـوى ضـد الفضـائية الســـودانية
Author: خالد عويس
Date: 06-25-2003, 06:59 PM
Parent: #34
والله يا سجيمان يا خوي انا من القروش البدفعها فى السفارة السودانية كلها ما غايظاني الا قروش الفضائية دى ، والمزعلني بلحيل انو بدفع قروش الفضائية واوعك من امشي جنبها ، حرمتها علىّ مما اتخارجت من السودان لأنها سبب أساسي لامراض الضغط والسكر والقلب و(فقر الدم) والسارس وكل البلاوي
الله يرحم ناس ليلي المغربي ايام كان التلفزيون تلفزيون والابداع ابداع
الله يرجع العمالقة للفضائية
والا
حنخمخم عكاكيزنا ونمشي ليهم ونقول ليهم
ها يا ناس
حرّم يا قروشنا يا تغيروا شيتكم البتسووا فوقو ده
|
Post: #36
Title: Re: دعـوى ضـد الفضـائية الســـودانية
Author: al_msaa
Date: 06-25-2003, 07:51 PM
Parent: #35
دوما كتاباتك إبداع يا سجيمان
ذكرتى ايام زمان كنا بنشترك فى الحلة ونلملم قروش نشترى كورة ونلعب بيها البتغلبوا بقولوا دايرين حقنا نقوليهم هاكم قروشكوم يلا فرتقوا ما تعملوا لينا مشاكل - لاكن يصروا يختوها معانا قرض - يقولوا لا نحن عاوزين حقنا فى الكورة - نحن اشترينا كورة وتقطعوها تدوا كل زول حقوا - شوف بالله عاوزين يعملوها زى كيمان المرارة - دى يا فيها يا نطفيها
عشان كدة نحن الفضايحية البندفع فيها دى يدونا حقنا فيها هى زاتها قروش ما دايرنا دايرين حقنا .. يقسموها ويكوموها كيمان كيمان زى السماية ويدونا حقنا
بالله بقيت كل ما أشوف لى اضان جديدة فى الفضايحية أتحسس جيوبى
زى الزول الاتنشل فى الزحمة نن ولا الزول الحسة نفسو اشترى حاجة ما دايرها علا مجبور
------ ولى عودة ----------
اصلوا الموضوع دا هارينى ومقدد مصارينى وكل ما بشوف فايضحيتنا بحس نحن ماشين لى وراء
|
Post: #45
Title: Re: دعـوى ضـد الفضـائية الســـودانية
Author: سجيمان
Date: 06-26-2003, 04:23 PM
Parent: #36
المسا........ والله حاجة محزنة..... لازم يعرفو انو دا عصر فضائيات ومنافسة...... على الاكل يحاولو ينشرو ثقافتنا........ للعالم......لكن بالطريقة دي الله اعلم
|
Post: #37
Title: Re: دعـوى ضـد الفضـائية الســـودانية
Author: سجيمان
Date: 06-25-2003, 10:20 PM
Parent: #35
ياخالد يا اخوي باقي لك قريشاتنا تاني بنلم فيهن؟.......ما ظانيتو....... شربوهن شاي وجبنة......ما شايف كل برنامج فيهو طقم شاي وترامس عينة
|
Post: #38
Title: Re: دعـوى ضـد الفضـائية الســـودانية
Author: تغريـــد
Date: 06-25-2003, 11:01 PM
Parent: #37
|
Post: #43
Title: Re: دعـوى ضـد الفضـائية الســـودانية
Author: سجيمان
Date: 06-26-2003, 01:18 PM
Parent: #38
تغريد اهعلا بك.......مالك رجعتي قروشك؟
|
Post: #42
Title: Re: دعـوى ضـد الفضـائية الســـودانية
Author: قلقو
Date: 06-26-2003, 11:40 AM
Parent: #35
الأخ خالد عويس
وماتنسى ياخى التخلف العقلى
|
Post: #39
Title: Re: دعـوى ضـد الفضـائية الســـودانية
Author: AnwarKing
Date: 06-26-2003, 02:16 AM
Parent: #1
سؤال برىء....
لو قمتا أتكلمتا مع واحد صحبى سعودى ولا فلسطينى ولا نيجيرى ولا العجب لو كان خواجة... عن التلفزيون السودانى... وقلتا بالضبط الكلام ده...
يا ربى فى كم وطنى حا يدافعوا بأنه الحمد لله ليس كالكابريهات العربية وانه مازال بخير والخ.....
انا و تلفزيون السودان على البتاع...
وانا والبتاع فى الهوا سوا...
لك الحب يا سجيمان...
أنور
AnwarKing
|
Post: #46
Title: Re: دعـوى ضـد الفضـائية الســـودانية
Author: سجيمان
Date: 06-26-2003, 09:07 PM
Parent: #39
انور حبابك يا ملك.........البتاع دا شنو؟
|
Post: #40
Title: Re: دعـوى ضـد الفضـائية الســـودانية
Author: albagir altahir
Date: 06-26-2003, 07:03 AM
Parent: #1
مبدع والله يا سجيمان
واباعك فات ابادع التلفزيون زاتو
لكن ما قلتي لي
حسين خوجلي عامل ليكم لخمة
المرة ما قالت ليك عاين خشمو وجضيماتو
واصل يا سجيمان في الابداع
|
Post: #41
Title: Re: دعـوى ضـد الفضـائية الســـودانية
Author: benyya
Date: 06-26-2003, 07:43 AM
Parent: #40
سيجمان
الشنيف الكتير لسع ما خليتوا
بذمتك اسع مش اقل وطئاً من زمان
بعدين حيتعرف كيف تلفزيون السودان كان مافيهو كل ما ذكرت
تحياتي ليك ولي مرتك
عفيت منها مرا ماصله
لى قدام
|
Post: #44
Title: Re: دعـوى ضـد الفضـائية الســـودانية
Author: OmDur
Date: 06-26-2003, 02:02 PM
سجيمان
داخلة بس اسجل اعجابى
وواصل كدة
|
Post: #49
Title: Re: دعـوى ضـد الفضـائية الســـودانية
Author: سجيمان
Date: 06-27-2003, 05:35 PM
Parent: #44
امدر.........شكرا وشرفتي
|
Post: #47
Title: Re: دعـوى ضـد الفضـائية الســـودانية
Author: سجيمان
Date: 06-27-2003, 06:56 AM
Parent: #40
الباقر...... العمة ما مخليانا نشوف خشمو وجضيماتو
|
Post: #48
Title: Re: دعـوى ضـد الفضـائية الســـودانية
Author: wadalzain
Date: 06-27-2003, 09:48 AM
Parent: #47
الاخ سجيمان وضعت الاصبع على الجرح
لكن انت ناسى حاجه مهمه انو الناس ديل جو عشان اعادة صياغة الانسان السودانى من جديد عشان كده عايزين اعجنونا ويشكلونا من جديد
هنا عندنا فى مكان الاغتراب الفضائيه السودانيه بند من بنود العقوبات على الزوج المشاكس تهدده الزوجه بأنه اذا لم يلتزم باللائحه الموضوعه له من قبل الزوجه فانه سوف يعاقب بمشاهدة الفضائيه السودانيه واذا امتثل لللائحه سوف يسمح له بمشاهدة قناة ال بى سى وتحضرنى هنا مقوله ايضا سئل احدهم قال ليهو عرفنا قناة ال بى سى والام بى سى الفضائيه السودانيه اسمها شنو قال ليهو دبليو سى
|
Post: #50
Title: Re: دعـوى ضـد الفضـائية الســـودانية
Author: al_msaa
Date: 06-27-2003, 08:07 PM
Parent: #48
الليلة بعد ما جيت من التمرين فتحت ليك الفضائية السودانية
الاقى ليك واحدة متشحطه بالتوب السودانى وواقفة ترد على التلفونات
اتاريهو برنامج مسابقات ومنوعات والمذيعة جديدة ما عارف جايبنها من وين
لاكن شكلها بتكون كانت استاذة فى الالزامية
لانو كل مرة بتكرر تقول ما قلونا البرنامج بخصوص عيد الثورة
ارقام تلفونات المسابقة كذا وكذا زى ما قلنا قبيل
وردها على التلفونات عينة براها
التقول فى بيتهم مافى تلفون ولا ما شافت ليها زول بتكلم فى تلفون
........
رفعت لى ضغطى والدكتور مانعنى من الانفعال
اخ انا من ابوات وامات اضنين ديل
نسوى ليهم شنوووووو
|
|