Post: #1
Title: وصــيـة ام نـجـيــضة...لي بنـتــهـا
Author: سجيمان
Date: 06-25-2003, 09:01 AM
Parent: #0
يا بت هوي فتحي عينك و ابقي نجيضة وفالحة..... قدر ما اجي داخله عليكم القاكي .... هي هي هي .... و قر قر قر ..... تضحكي مع عبد الله دا.... الراجل ما تضحكي لو كتير..... يسعالني الله يحقر بك....الراجل اديهو العين الحمرا.... وان قدرتي لعند ايدك تلحقيها ليهو لحقيها...ابقي نجيضة.....أ ية..... زي امك.....الله بسعلني وقت ابوكي يقول حاجة تضحك.... امشي اتحشر في الاوضة واضحك زين واجي مارقة صارة وشي.....و بعدين اوعك ثم اوعك ثم ايضا اوعك... تقولي لو الجلابية دي سمحة والله العمه اللابسها دي سمحة... نفسو تقوم تعجبو يعرس فوقك.... وبعدين تشربي ما تروي....واكربي هو بالطلبات.... اوعي تخلي لك قرش يبيت في جيبو...واوعك تخليهو يشوف المسلسلات.... بيخربن الرجال.... وقت المسلسل داك.... شفتي جيبي فندكك...واقعدي دقي أي حاجة جنبو ويا ريت لوكانت شطة... والله كان عندك شافع بيرضع وجيعان وبيبكي خليهو في بكاءهو داك لمن المسلسل ينتهي....وبعدين ما يجي داخل يلقاكي تغني ......حتى ان بقيتي دايرة تغني.... اوعك من الغنا الخايس ناس حبيبي حبيبي.... امسكي في الغنا الحار...... زي البيجري نسيبتو و مرتو طلقانة......والله اندب حظي ام امالي...... والله دفاعنا الشعبي ياهو ديل.....والله النار ولعت بقلبي بطفيها..... اااااااااااي.... عشان تربي لو الزلعة .....والخلعة....بس اوعك تغني لو الليلة يوم الرجال.... بيقوم يصدق و يتحنفش فوقك ساكت........ واوعك تشكري لو حاجةجابها.... ان جاب لك لحم.... ختي ايدك فوق راسك...وقولي لو وب علي وب علي وب علي....غشوك وادوك الجلافيط.....وان جاب لك فتيل ريحة...اول ما تفتحيهو... وتشميهو.... طوالي كشري وقبلي غادي وابصقي..... وقول لي لو..... دا شنو يا عبدالله؟...... الريحةالمتل ريحةالفسيخ دي جايبها من وين؟......غايتو انت مغستك تقد.......
وان جنك نسوان والله بنات....ما تخليهو يقعد وسطن....ويتونس.... طيريهو من البيت....وان ابى يمرق... قدرمايقولو نكته والله يخفف دمو قدامن صري ليهو وشيك.... وقول لي لو انت يا عبد الله ما عندك غير النكتة دي؟ يا خي عملت لنا بها وجع... وش......اصلهم الرجال عارفاهم... الواحد فيهم من يشوف لو لمت بنات يقعد يخفف في دمو ويعمل فيها ودنفاش.....وتلقيهو يضحك بلا سبب... حتى ان واحدة قحت ساكت ... يقعد يضحك ويصفق اديهو....واوعك تخليهو معاهن وتدخلي المطبخ تسوي لك شربات...... وحات الله بنات الزمن دا ان غفلت من راجلك دقيقة بس تلقيها عرستو.........
|
Post: #2
Title: Re: وصــيـة ام نـجـيــضة...لي بنـتــهـا
Author: قلقو
Date: 06-25-2003, 09:56 AM
Parent: #1
والله يا سجيمان نعم الأم ونعم النصيحة الغالية
ان شاء الله كل البنات يطبقو النصائح الغالية دى بى حذافيرا وبى ضبانتا عشان ان شاء الله كلكن تركبن التونسية ونرتاح منكن ويكون عدانا اللوم
ويلا بلا لمة بتاعة نساوبن
|
Post: #5
Title: Re: وصــيـة ام نـجـيــضة...لي بنـتــهـا
Author: سجيمان
Date: 06-25-2003, 11:56 AM
Parent: #2
يا قلقو انت قايل حسي مابيطبقن فيها؟....... انظر حولك
|
Post: #3
Title: Re: وصــيـة ام نـجـيــضة...لي بنـتــهـا
Author: Yasir Elsharif
Date: 06-25-2003, 10:07 AM
Parent: #1
يا سي جي مان
 
تسلم يا صاحب النجيضة بطريقتو.. ..
واااصل كفااااحك خليك حريص
بس باقي البيت خليهو
ورحم الله أعمامنا ميرغني المامون وأحمد حسن جمعة
|
Post: #6
Title: Re: وصــيـة ام نـجـيــضة...لي بنـتــهـا
Author: سجيمان
Date: 06-25-2003, 12:43 PM
Parent: #3
خليك حريص
انت الداقس وان العريس
دي لي انا يا دكتور لحمك ما ياكلك
|
Post: #4
Title: Re: وصــيـة ام نـجـيــضة...لي بنـتــهـا
Author: 3omda4
Date: 06-25-2003, 11:12 AM
Parent: #1
يا سجيمان يا اخوي انت داير تبور البنات وله تطلق المتزوجات؟؟؟
نصائحك دي ما بتوديهم التوج
سلامي يا مبدع
|
Post: #10
Title: Re: وصــيـة ام نـجـيــضة...لي بنـتــهـا
Author: سجيمان
Date: 06-25-2003, 03:21 PM
Parent: #4
عمدة............ لا بتوديهم التونج ولا حاجة....... كان ودت القبالهن
|
Post: #7
Title: Re: وصــيـة ام نـجـيــضة...لي بنـتــهـا
Author: albagir altahir
Date: 06-25-2003, 01:10 PM
Parent: #1
سجيمان السجم
الله يجازي محنك
كن نسيت حاجة عشان
ما تديهو فرصة يعرس تقوم تملا ليهو البيت ولادة ده وفق ده
في السنة تتطلع اتنين شهادة ميلاد
واحدة في شهر واحد واحده في شهر اتناشر
والله كان عندنا واحدة بالشكل في السنه عندها (2) شهادة ميلاد
|
Post: #8
Title: Re: وصــيـة ام نـجـيــضة...لي بنـتــهـا
Author: ابو جهينة
Date: 06-25-2003, 02:38 PM
Parent: #7
سجيمان : عشا اضيفان
دة الخايف أنا منو ذاتو ( الضحك البيشرط الخشم ) .
الأم نجيضة تب ، و دة فعلا دستور لازم ينطبع و يوزع على بنوت الزمن ديل ، و أقترح إنو يكون مادة مقررة في إمتحان الشهادة في المساقين العلمي و الأدبي و الما بتنجح فيهو يعودوها إجباري.
تسلم يا أخوى.
|
Post: #14
Title: Re: وصــيـة ام نـجـيــضة...لي بنـتــهـا
Author: سجيمان
Date: 06-25-2003, 04:09 PM
Parent: #8
ابوجهينة.......الام بجيضة ساكت؟.... دي حتى بنوت الجيران قاعدة توصيهن........
|
Post: #9
Title: Re: وصــيـة ام نـجـيــضة...لي بنـتــهـا
Author: shiry
Date: 06-25-2003, 02:42 PM
Parent: #7
سلام مربع
سجيمان
تفتكر موش الرجال عايزين كده
؟
|
Post: #15
Title: Re: وصــيـة ام نـجـيــضة...لي بنـتــهـا
Author: سجيمان
Date: 06-25-2003, 07:22 PM
Parent: #9
لا يا شيري ما دايرين كدا..... دايرين حنان دارين دلع دارين.....ام جنس النضم دا البيحملو منو يا بت امي
|
Post: #12
Title: Re: وصــيـة ام نـجـيــضة...لي بنـتــهـا
Author: سجيمان
Date: 06-25-2003, 03:47 PM
Parent: #7
الولادة المرتين في السنة دي اسال منها مغتربين السعودية يا الباقر..........والشافع يجي مارق كلو راس......
|
Post: #11
Title: Re: وصــيـة ام نـجـيــضة...لي بنـتــهـا
Author: Maged
Date: 06-25-2003, 03:39 PM
Parent: #1
, دى بالغتة فيها ياسجيمان وزى ماقال قلقو
| Quote: ان شاء الله كل البنات يطبقو النصائح الغالية دى بى حذافيرا وبى ضبانتا عشان ان شاء الله كلكن تركبن التونسية |
أها أم الراجل طلعت نجيضة برضو و قالت ليهو لو مرتك دى عملت أى حاجة من القالتو نسيبتك دى، أسمع كلام قلقو وركبة مش التونسية، و رابعة كمان
|
Post: #17
Title: Re: وصــيـة ام نـجـيــضة...لي بنـتــهـا
Author: سجيمان
Date: 06-25-2003, 10:26 PM
Parent: #11
يا ماجد......... وين الراجل القاعد يسمع نضم امو......... بعد يعرس....... امال ناس الفكي شربكة....ديل قاعدين يسوو في شنو؟....... غيريكضموك ويكضمو امك معاك
|
Post: #18
Title: Re: وصــيـة ام نـجـيــضة...لي بنـتــهـا
Author: قلقو
Date: 06-26-2003, 11:05 AM
Parent: #11
الأخ ماجد
تسـلم يا غضـنفر
لكن ياسـجيمان ياخوى نحن عايزين نعـرف مكانك وين من الأعراب يعنى انت معانا ولامعاهن ؟
|
Post: #21
Title: Re: وصــيـة ام نـجـيــضة...لي بنـتــهـا
Author: سجيمان
Date: 06-26-2003, 04:30 PM
Parent: #18
قلقو.........انا مع الشعب السوداني
|
Post: #13
Title: Re: وصــيـة ام نـجـيــضة...لي بنـتــهـا
Author: bit omdur
Date: 06-25-2003, 03:49 PM
Parent: #1
حقا وصية للاسف البعض لايستطيع مضغها كيف لي ان اتعامل مع من احب واسميه زوج واعطيه ماملك بهذا الشكل دا معركة وحرب ولا راحة بال .....
لكن صدقني هذه وصية غالية وسليمة في هذا الزمن لكن لم نجد من يقولها لنا فشربنا السم والخذلان وضعف الايمان وانتهي المبدا ولم يعد للحب مكان
......
اعتقد ان من يعبر بهذا الشكل يعاني من نقص ما وتربيته بها بعض الخلل لذلك (قدم لمن تحب الحب واظهره
.......
فهل هذا عدو ام شي اخر
.......
اعزائي لابد من وجود صيغة فهذا دمار لكل مبادي الحياة والمشاركة والانسانية
........
بعد هذا كله ياريتني لو بقدر اعمل كدا
.......
بت امدر
_________________________________________
لو كنت ناكر للهوي زيك
كنت غفرت ليك
كل العذاب العشته
وكت حبيت عليكلكن عايش للشقاء
.............
وكل يوم اترجي فيك
وريني كيف اغفر كيف اغفر
كيف اغفر
|
Post: #16
Title: Re: وصــيـة ام نـجـيــضة...لي بنـتــهـا
Author: Ahmed satoor
Date: 06-25-2003, 08:00 PM
Parent: #13
ســــــجيمان الحبيب
باين عليك داخل فى عركة ربنا يمرقك منها ، والحبيبة شيرى قالتها ليك بالفم المليان تفتكر الرجال ما عايزين كدة؟ ده حين إنت قلت وصية ام ، كمان اقول ليك وصية الابهات،
اول ما تجى داخل البيت لا يعجبك العجب لا الصيام فى رجب ،مد بوزك ياخوى زى ما بسون ،
كمان هى ملخومة فى المطبخ أديها طلعة للعزابة وتعال راجع آخر الليل .
ومش هن بيغنن اندب حظلى وآمالى ؟ كمان دندن ياخوى وقول (العيون اللى فيهن نعاس ) وإنشاءالله تنوم ما تقوم إلا تانى يوم .
وكمان امشى فى المحطة اللبنانية وحتلقى نانسى عجرم ساكنة هناك ،بس تقوم تناديها ،وتقول عليكى الله تعالى اسمعى الاغنية دى،وشويت تعليقات ، مثلا هى والله ما سمحة لكن جذابة ،وطلعت الكفر ،
لكن ياخوى كان سمعت كلامى ده ياها الخلت ليك البيت ومرقت إلا يمسكها الشديد القوى.
|
Post: #26
Title: Re: وصــيـة ام نـجـيــضة...لي بنـتــهـا
Author: سجيمان
Date: 06-27-2003, 07:01 AM
Parent: #16
احمد ساطور...... نصيحتك دي غايتو في ناس جربوها في ضمتهم......ام المرا جات سكنت معاهم عديل
|
Post: #20
Title: Re: وصــيـة ام نـجـيــضة...لي بنـتــهـا
Author: سجيمان
Date: 06-26-2003, 01:05 PM
Parent: #13
بت امدر......قدر ما قريت كلامك... بالعدلة وبالقلبة...... ما عرفت فيهو شي ولاّ انتي قاصدة شنو؟
|
Post: #19
Title: Re: وصــيـة ام نـجـيــضة...لي بنـتــهـا
Author: بدرالدين شنا
Date: 06-26-2003, 12:46 PM
Parent: #1
بسم الله الرحمن الرحيم
الرائع سجيمان
سلام وإحترام
تابعت كتاباتك كلها تقريباً ووجدت فيها تفرداً في الطرح والأفكار الحلوة والمفردة العامية البسيطة وأرجو أن تواصل في نفس النهج والذي يحتاج منك نفس طويل
وفقك الله
ملحوظة
لاحظت أنك تخطئ في كلمة (ولاّ) وتكتبها والله
| Quote: تقولي لو الجلابية دي سمحة والله العمه اللابسها دي سمحة |
فأتمنى تعديلها مستقبلاً لأنها بعض الأحيان تعمل لبس للقارئ
|
Post: #22
Title: Re: وصــيـة ام نـجـيــضة...لي بنـتــهـا
Author: Maged
Date: 06-26-2003, 05:38 PM
Parent: #19
| Quote: انا مع الشعب السوداني |
,
ونسابتو
|
Post: #23
Title: Re: وصــيـة ام نـجـيــضة...لي بنـتــهـا
Author: garjah
Date: 06-26-2003, 06:09 PM
Parent: #22
CG man
النجااااض
عليك الله هن دايرات ليهن وصية؟؟
ياخي بدون وصية منجضات الرجال
والله سمع اضاني دي
وانا في كابينة هاتف واحدة مصرية بتكلم في امها
وبتقول ليها
ماما جوزي معيشني في جنة يا ماما
عليك الله في سودانية بتقول كدة ؟؟
ياخي انت ببوستاتك دي بتزيدن على العليهن
|
Post: #27
Title: Re: وصــيـة ام نـجـيــضة...لي بنـتــهـا
Author: سجيمان
Date: 06-27-2003, 05:25 PM
Parent: #23
قلتي يا قرجة........قالت لها زوجي معيشني في جنة.......؟ والله دي ما تسمعها... الا بعد ما تموت ويقعدن النسوان يبكن ويشكرنك
|
Post: #25
Title: Re: وصــيـة ام نـجـيــضة...لي بنـتــهـا
Author: سجيمان
Date: 06-26-2003, 07:14 PM
Parent: #19
بدر الدين حلاتو.......... شكرا للوصية وعاين فوق
|
Post: #24
Title: Re: وصــيـة ام نـجـيــضة...لي بنـتــهـا
Author: raheel
Date: 06-26-2003, 07:01 PM
Parent: #1
سيجمان بطل الحركات نحنا يادو ب بنقول يا هادى مالك علينا
كدى خلينا نفوت مرحلة الحنية والحب بعدين بنعمل بالنصيحة ما بنقصر بعدين ما توصى حريص
|
Post: #28
Title: Re: وصــيـة ام نـجـيــضة...لي بنـتــهـا
Author: tasneem
Date: 07-19-2003, 05:35 PM
Parent: #24
سجيمان مالك ما جبت سيرة امهاتكم ديل اسكت منهم يهدمن بيوت
ومهما عملت زوجة الولد المسكينة برضو ما بترضيها
|
|