Post: #1
Title: الغــــــــراب...........و........الارهــــــاب
Author: سجيمان
Date: 07-10-2003, 07:33 AM
اهه....... الطيارة وقعت والناس ماتت وشبعت نوم....و الوليد المرق من الموت..... الجماعة عاوزين يتخاطفوهو...واحد مصري رجل اعمال .....وشيخ زائد....كل واحد قال انا بربيهو...... يا رجل الاعمال يا مصري ويا شيخ زائد.....ما تشاكلو في وليد الناس ساكت...... السودان مليان.....من نوع دا .....فيهم البيلدوهو عميان....وفيهم الامو تموت وهو يا دوب رضيع.....وفيهم البيموتو ا مو وابوهو.....و بلدنا بخيرها...... بس انتو دقو سدركم وتعالو.... لكن النصيحة لك يا الله الوحيد المرق من حادث طيارة .... تراهو المسيكين دا....علا كان تكونو دايرين تضموهو..... لخيلكم وصقوركم وغزلانكم...... وتفرجو فيهو... الغاشي و الماشي..... لكن ان بقى شغلكم شغل رجالة و ضكرنة....البلد مليانة...وحبابكم الف.
اهه...... ناس سودانير....ووزير الخارجية.....كلو زول يقول في نضم...... الوزير قال السبب امريكا....وعدم توفرقطع الغيار..... مدير سودانير حلف بالتكسرو انو الصيانة منتظمة وقطع الغيار متوفرة.......طيب حسي نحن يا ربي نصدق منو؟...والله نطش .....ونقشقش دميعاتنا.... وننضف عيوناتنا.... عشان نبكي علي الجاي تاني؟.....
انا غايتو عندي حل.....لكم يا ناس سودانير...... انتو عارفين بورسودان دي ملياااااااانة غربان......وغربان بروسودان....وكدايس سواكن.....كلهن بيعرفن النضم....و مضرات ضرر شديد...... غربان بورسودان..... ابصم بالاربعه تلاتة ارباعن ارهابين.... اسعالوني انا....وكلهم في تنظيم القاعدة......واكان دايرين تعرفو نضمي دا صح ولاّ لا....كدي شوفو غراب مصنقر فوق زير وشوفو قعدتو كيفنها؟....وبعدين علاقتهم ببن لادن.....متينة وقوية.....و مندوبهم في تورا بورا....ابي السوداء غراب بن ابي الجبنة..............طيب.... يكون اتنين انتحارين من غربان القاعدة....... كانو لابدين فوق السلك الشائك.... بتاع المطار.... وانتظرو لحدي ما الطيارة قامت...واتقدمت شوية ولحقوها..... وكل واحد... دخل في الهنايات الفوق للاجنحة ديك.... المكنات..... وعطلها...والطيارة هنا فقدت توازنها.... وارررررردلوب وقعت........ والناس ماتت..والطيارة حرقت........ ولما تفتحو الصندوق الاسود.... حتلقو جواهو احد الغربان الانتحارين......وقبل ما الطيارة تقع بثواني كان بيقول وما رميت اذ رميت ولكن الله رمى
شحدة...صغيرونة.....ما تنسو تدوني اربعة تذاكر...... لي ولاسرتي مجانية......من الخرطوم الي الاخرة
|
Post: #2
Title: Re: الغــــــــراب...........و........الارهــــــاب
Author: كوليل
Date: 07-10-2003, 08:21 AM
Parent: #1
الغالى سجيمان
والله الواحد يقول لى اسرهم البركه فيكم وربنا يتفبلهم قبولا حسن
لاكن والله خليها ساكت الموت طبعا اسر ... وسودانير طبعا ليها نصيب
الاسد فى الحادث ناس بورتسودان خلو ركوبها قبل زمن لاكن وقفو
الشركات التانية عشان يشتقلو الموسم براهم
والله شارعنا فيه 9 انفار طول الشارع ذى 200 متر وديل من بيتين بس
والله ربنا بس يسهل ساكت .... ونقول ربنا يرحمهم ويرحمنا مقدما
|
Post: #3
Title: Re: الغــــــــراب...........و........الارهــــــاب
Author: سجيمان
Date: 07-10-2003, 09:37 AM
Parent: #2
كوليل......الله يرحمهم و يرحم جميع امواتنا......لكن نتمنى انو المسألة ما تمر ساكت بدون تحقيق كافي وافي
|
Post: #6
Title: Re: الغــــــــراب...........و........الارهــــــاب
Author: سجيمان
Date: 07-10-2003, 11:06 AM
Parent: #2
كوليل......... لا حولة ولا قوةالا بالله.........بيتين منهم تسعة؟ الفضل شنو طيب؟
|
Post: #4
Title: Re: الغــــــــراب...........و........الارهــــــاب
Author: elsharief
Date: 07-10-2003, 10:00 AM
Parent: #1
سيجمان
جابت ليها تدريب غراب ارهابيين والظاهر عليه دا ما غراب سودانى وده شكله جاء مع الاصوليين وننتظر نتائج التحقيق
>>
|
Post: #8
Title: Re: الغــــــــراب...........و........الارهــــــاب
Author: سجيمان
Date: 07-10-2003, 11:44 PM
Parent: #4
الشريف.........ممكن والله... لكن غريبة ما سلموهم لامريكا لحدي حسي؟
|
Post: #5
Title: Re: الغــــــــراب...........و........الارهــــــاب
Author: albagir altahir
Date: 07-10-2003, 10:38 AM
Parent: #1
سجيمان
التحية لك ولابداعك المتواصل
ونترحم علي ارواح المتوفين في الحادث
بمناسبة كدايس بورتسودان وغربانه
والله يا سجيمان حاجة تحير الغربان زاته مازي الغربان حقاتنا الشايفنهن ديل
ديل حجمن صغير وعريبات شوية كده وجنهن وجن الصابون بس يوم اغلط وخلي ليك لو صابون قاعد برة طوالي يخطفوهو وعينك تعاين فيهن
اما الكدايس فحدث ولاحرج
قالوا واحد سواق لاقتو كديسة في سواكن وهو راقد تحت عربيتو قالت ليهو تلقي راجلي في مطعم في بروتسودان تقول ليهو مرتك ولدت
صاحبنا زي كان حلمان وسمع الكلام مشي في بروتسودان قاعد ياكل طبعا كدايس بورتسودان تشحد عديل الواحدة تدق كراعك وتمد ايدة ليك المهم صاحبنا قاعد ياكل جاء كديس مده ايدو ليهو صاحبنا اتذكر الحلمة قام قال ليهو انت قاعد هنا ومرتك ولدت
وخلاهو
الزول اكل قام مشي يحاسب قالوا ليهو حسابك مدفوع
اتلفتت في المطعم ما لقي زول بيعرفو
اقتنع انو دفقو الكديس
|
Post: #12
Title: Re: الغــــــــراب...........و........الارهــــــاب
Author: سجيمان
Date: 07-11-2003, 07:47 PM
Parent: #5
الباقر.........حكاية اكل الصابون دي ماانتبهت ليها........لكن انتبهت انو دايما عندها اسهال.......اما الكدايس ديك انا بخاف منها بكل فخر................ ولما اكل في مطعم ...اول ما الكديسة تضربني في كراعي...ارمي لها اللقمة بودن ما اعاين لها...........مالي وماالمشاكل يا ابوي
|
Post: #7
Title: Re: الغــــــــراب...........و........الارهــــــاب
Author: artiga
Date: 07-10-2003, 01:32 PM
Parent: #1
سجيمان
سلمت على المعالجه الرائعه
ونحن شعب اتعود انو ما يحاسب ولا يتحاسب
وانا متأكد انو الكارثة دى حا تملر مرور
الكرام ككوارث كثيره سبقتها
ربنا يلهم اهلهم الصبر
|
Post: #9
Title: Re: الغــــــــراب...........و........الارهــــــاب
Author: abuguta
Date: 07-11-2003, 00:45 AM
Parent: #7
الاخ عادل
تحياتى
قاق قاق قاق قاق
وقعت الطيارة ليه ياغراب
صياحك دا فراق يا خراب
وقتلت الشيوخ والشباب
وناس سودانير سفو التراب
والوزير تقول شارب شراب
والاسبير موجود فى الغرب
بس امريكا هى السبب
ياناس شوفو الكضب
والدم حدو الركب
بس نحن لمتين فى الذنب
والشعوب فوق فى السحب
والشكر ل زايد الدهب
علاج محمد فى عاصمة الضباب
وربنا يشفيه لكى يتعدى الصعاب
|
Post: #10
Title: Re: الغــــــــراب...........و........الارهــــــاب
Author: امبدويات
Date: 07-11-2003, 06:24 AM
Parent: #9
هو فى فرق بين الكيزان وغربان بورتسودان وبن لادن والحبر والارهبين المحلين والدولين
طيب الغربان الفى البورد دى كيف ربنا يتسر على برود نا وبورد الحبيب بكرى
|
Post: #11
Title: Re: الغــــــــراب...........و........الارهــــــاب
Author: ابو جهينة
Date: 07-11-2003, 12:29 PM
Parent: #10
سي جي
غربان بورتسودان تتبع طريقة تسمى ( الغرابية المترصدة ) و سأشرحه في بوست منفصل ، و هي طريقة منسوخة من صقور الخلا في أرض التتر و المغول.
تسلم.
|
Post: #13
Title: Re: الغــــــــراب...........و........الارهــــــاب
Author: HOPELESS
Date: 07-11-2003, 07:57 PM
Parent: #11
الأخ سجيمان ... الأرهاب انواع واشكال وكل غراب بيمارس ارهابو بطريقتو المدرب عليها .. وفي غربان ضد بعض وبتمارس الأرهاب علي بعض بس فوق روؤسنا .. ونحن المستهدفين
| Quote: ...... يا رجل الاعمال يا مصري ويا شيخ زائد.....ما تشاكلو في وليد الناس ساكت...... السودان مليان.....من نوع دا ..... |
والله ناسك ديل كان سمعوا كلامك دا بكره نلاقيهم جنب اقرب صينيه .. وهاك يا حسنه قليله تمنع بلاوي كتيييييره
|
Post: #18
Title: Re: الغــــــــراب...........و........الارهــــــاب
Author: سجيمان
Date: 07-14-2003, 04:34 AM
Parent: #13
هوب ليس ان شاء الله ناسي ديل يسمعو كلامي دا.....ويسوا لنا حاجة فيها فائدة بدون منة ولا اذى
|
Post: #17
Title: Re: الغــــــــراب...........و........الارهــــــاب
Author: سجيمان
Date: 07-13-2003, 12:42 PM
Parent: #11
ابوجهينة.......لي كم يوم....منتظر بوست الغربان بتاعتك........ما تنسى يا زول هوي
|
Post: #16
Title: Re: الغــــــــراب...........و........الارهــــــاب
Author: سجيمان
Date: 07-12-2003, 11:23 PM
Parent: #10
......الغربان حتى البورد خبرتو ووصلتو ؟....الله يستر يا امبدويات
|
Post: #15
Title: Re: الغــــــــراب...........و........الارهــــــاب
Author: سجيمان
Date: 07-12-2003, 02:07 AM
Parent: #9
اب قوتة........شكرا للنشيد الغُرابي
|
Post: #14
Title: Re: الغــــــــراب...........و........الارهــــــاب
Author: سجيمان
Date: 07-11-2003, 08:16 PM
Parent: #7
ارتيقا سلمت انت........ والله لومرت مرور الكرام تكون مصيبة كبيرة
|
Post: #19
Title: Re: الغــــــــراب...........و........الارهــــــاب
Author: ترهاقا
Date: 07-14-2003, 08:46 AM
Parent: #14
العــــــزيز د.سجيمان
صــــدقنى الموضـــوع ده حيمر مرور الكرام ، بس اديها يومين تلاتة ، لاحس ولا خبر ، وإحتمال تحصل ترقــــيات فى صفوف مستنكحى سودان طير ،لما وجدوهو من إنتقادات من كافة الشعب السودانى ،
|
Post: #21
Title: Re: الغــــــــراب...........و........الارهــــــاب
Author: سجيمان
Date: 07-15-2003, 06:39 AM
Parent: #19
ترهاقا......اذا اراد اهل الضحايا ان لايمر الموضوع فلن يمر
|
Post: #20
Title: Re: الغــــــــراب...........و........الارهــــــاب
Author: Abu Eltayeb
Date: 07-14-2003, 11:57 AM
Parent: #1
انا بفتكر انو الناس يمشوا يحتلوا مكاتب سودانير, وانسب مواعيد وقت صلاة الضهر, بعدين بتلقوا ليكم مساندين كتيرين هناك الواقف فى صف تذاكر, والشنطو رايحات, والمالاقى ليهو حجز, المهم بتلقوا الأعمى شايل المكسر هناك وكلهم سمهم فاير, وعرقن خارى, ومنتظرين ناس الصلاه ديل اجو متين, صلاة الضهر انتهت ليها ربع ساعه, الحمدلله ظهر واحد دقنو تقول يا ليل مطع بس, واحد سألو قال ليهو انتو الشى بصلو فى التراويح, اها الشكله قامت, وصاحبك قفل الشباك, قال وقت الشغل ذاتو انتهى, يالله اطلبو الله, تعالوا بكره, واحد الدم غلى فى عروقو, وقال كده هجم على الأرهابى ابودقن موظف سودانير, ابوقن قام يكبر, لى التعتر صاحبنا البوليس بتاع سودانير دقنو تعجبك, بس ما صدق الجهاد جاهو فى محلو, وعمر سلاحه ومرق قاشو وبدأ يضرب يمين وشمال ولسوء حظو ما كان رابط رباط الجزمه, فعترت ليهو ووقع الطلقه طاشت, الوقت ده صاحبنا بقى عادل امام ولحسن حظو الناس الدايرين احتلوا سودانير وصلوا, وبدوا يهتفوا الكباب الكباب الغراب الغراب الأرهاب الأرهاب, وجات الحكومه عشان تنفذ المطالب, ناسنا احالوها لمشاكوس وقومية العاصمه, والعندو مقدره يتم باقى القصه مع الغاء قوانين سبتمبر صراحة, وتعويض المساكين وسلام تعظيم لأمريكا المفترى عليها وقطع الغيار
|
Post: #22
Title: Re: الغــــــــراب...........و........الارهــــــاب
Author: سجيمان
Date: 07-15-2003, 05:14 PM
Parent: #20
ابو الطيب.....والله انا طولت ما ركبت سودانير..........بالله تعاملهم مع الناس بالصورة دي؟ والله تكون مصيبة.......وشركة تجارية
|
|