Post: #1
Title: الـــنـجـعـة
Author: سجيمان
Date: 07-17-2003, 06:17 AM
Parent: #0
لقيتو قاعد جنب باب الشقة حقتو...جنبو انبوبة غاز......متفن في واطة الله..... سلمت عليهو....ازيك يا اخينا.....مالك قاعد هنا؟.......عاين لي... وهو ياشر بايدو للشقة....وقال الشقة مقفولة وانا ماعندي مفتاح..... المفتاح جوا......اصلها عواطف قاعدة جوا....لكن متحننه.....وما دايرة تقوم تحوم وتخرب حنتها......قالت لي انتظر لحدي ما الحنة تشيل...واخرتها..وبعدين اجي افتح لك الباب......اهه انا حسي قاعد وراجي الحنة تشيل......لكن يا جنى الحنة بتشيل في كم ساعة؟.............عاينت ليهو....وحقيقة شفقت على هذا الزوج الاليف..الوديع....الذي ابدع الفكي بتاع محاسن..في ان يخلق منه نعجة....وقلت ليهو.....والله يا اخينا شيل الحنة ومدتو بيعتمد على عوامل كتيرة...لكن اهمها...نوع الحنة...نوع المحلبية او الصبغة....واهم حاجة كرعين المرا المتحننة.....كل ما كان ناعمات ..الملمس....كل ما كانت المدة اطول....وبرضو بتعتمد اذا كانت الحنة منقوشة...ولاّ..مفروشة ومجلوطة ساكت.....وبرضو طبقات الحنة...ليها دور...... انتهيت من نضمي وعاينت ليه.....لقيتو الهم باين على وشيهو....وعلى وشك ان يزرف الدمع الثخين..قال لي.... تعرف الحنة نمرة واحد جايانا مخصوص من الدامر....والمحلبية ميسو الاصلية. ما قاعدة تستعمل صبغة عندها حساسية الله يحفظها من عين الناس...و بطن كرعين عواطف صلاتي علي النبي...جضوم ليلي عليوي وداخلات في سفنجة... يعني بي نضمك دا حنتها عشان تشيل دايره لها تلاتة ساعات.....وانا ماشي الشغل.....كيف الحل؟..قلت ليهو ...طيب يا اخي كلمها...وخليها تفرتق الحنة وتقوم تفتح لك الباب......عاين لي وبانزعاج وغضب... نهرني لمن نطيت.... يا زول انت ماك نصيح......؟ داير حنتها تخرب...وتطلع شينة...والنسوان يقعدن يقارصن ويتونسن فيها؟....يا اخوي كل شي ولا زعل عطوفتي دي....ان شاء الله يرفدوني...بس هي حنتها تطلع سمحة..................واتلفت على باب الشقة وقعد يكورك.. يا عواطف...عواطف.... ما شالت؟......وجاء صوت من لداخل..... وكأنو صوت عسكري فس الحركة......وبحدة شديدة ....قالت ليهو.....ما قلنا لك لسه..... كرهتني الحنة زاتها يا اخي.....زولي هنا... قعد يبلع في ريقو..ويضاحك....وعاين لي وقال....والله.... الله يهديها بس.... عصبية خلاص......الا طيبة...... والله.... وحنينة.........
لملمت بعضي.....ونزلت وانا ما مشيت تلاتة خطوات الا واسمع اخونا يغني.......ويدندن
الزول السمح............فات الكبار والقدرو
كان شافوهو ناس نوع دا..... كانو يعزرو
|
Post: #2
Title: Re: الـــنـجـعـة
Author: انور عمر
Date: 07-17-2003, 09:06 AM
Parent: #1
الاخ عادل
السلام عليكم ورحمة الله وبركاته
يا اخي انا سبق وان ادوني شاكوش وكنت متأثر جدا بالشاكوش حتي هذه اللحظة لكن الحمد لله على الشواكوش الفكاني من مثل هذه القصص والاستعباد
عشان كده العرس ذاتو خليناهو
|
Post: #3
Title: Re: الـــنـجـعـة
Author: سجيمان
Date: 07-17-2003, 09:25 AM
Parent: #1
انور.......عليك الله ما تحرد العرس.....دي قصة قاطعها انا من قنقوني دا...............وانا ابو بنات وحاتك انت.............والله مشاكل
|
Post: #4
Title: Re: الـــنـجـعـة
Author: shiry
Date: 07-17-2003, 10:19 AM
Parent: #3
سلام مربع
من يهن يسهل الهوان عليه
لو كان راجل ملو هدومو
ماكانت عواطف لطعتوا
ثلاث ساعات جمب الباب
ياحليلك ياجدي
مات بي مغستو
وهذا كلام حبوبتي حينما يزهجها خمج من رجل ما
حتى وان كان ابي
كان لمن يقول ياولللللللللللللد
وحات محمد ولدي
الما بحلف بيهو بالكضب
جنون البيت وكبار البيت
ونسوانو يجارن
يقومن ويقعن
منو البصلوا اول
|
Post: #5
Title: Re: الـــنـجـعـة
Author: مهاجر
Date: 07-17-2003, 10:27 AM
Parent: #4
الحبيب الدكتور
والله القصة دي بقت غريبة خلاص
خاصة هنا في الخليج
لكن السودان والله البنات بقن حاجة تمام تحرص علي زوجها اشد حرص وتدلعوا دلع ما بعدوا دلع
ولو مرض العجب ما بتعرف حاجة غيروا
لكن هنا الواحدة تقول ابوها لورد
ولو الشغلة حريم واللخ بالفين ريال اجيبها ملكة جمال
لكن الشغلة عشرة وجنسية بنحبها
|
Post: #9
Title: Re: الـــنـجـعـة
Author: سجيمان
Date: 07-17-2003, 06:18 PM
Parent: #5
مهاجر.............المشكلة في مجتمعنا في صراع بين الرجل والمرأة ودا حتى هنا في البرود ممكن تحس بيهو..... ينتقل الصراع الي الاسرة.... المنتصر يمارس الفوقية على المهزوم........يعني برضو في نسوان حقن مهضوم
|
Post: #6
Title: Re: الـــنـجـعـة
Author: سجيمان
Date: 07-17-2003, 10:32 AM
Parent: #4
شيري........والله يا اختي نحن المغتربين الهنا ديل......قاعدين نخاف من اتنين......الكفيل والمرا
|
Post: #7
Title: Re: الـــنـجـعـة
Author: انور عمر
Date: 07-17-2003, 11:34 AM
Parent: #6
الاخ الدكتور
يا اخي انت دايرني تحصل علي قصة بقرة تنقو أو شنو
ثانيا قاتو لسع انا ما جبرت الخوف من المرا
لكن زي زي اي مغترب جربت الخوف من الكفيل والخوف من ناس السفارة في الضرائب أو هناك في السودان جهاز المغتربين نخاف من بنات الضرائب
|
Post: #8
Title: Re: الـــنـجـعـة
Author: بدرالدين شنا
Date: 07-17-2003, 01:55 PM
Parent: #1
بسم الله الرحمن الرحيم
الظريف سجيمان
سلاااااااااااااام بقدر شافيتك
لكن والله حكاية زولك دا (تحنن) عديل كدا
لك ودي
|
Post: #11
Title: Re: الـــنـجـعـة
Author: abuguta
Date: 07-17-2003, 07:09 PM
Parent: #8
سجيمان....سجمى
القاعد جنب الباب...سجمى
وعقابه خراب ...سجمى
ومراته محننه....سجمى
وعليه متجننه ....سجمى
جاب انوبة الغاز...سجمى
وماسكاله العكاز...سجمى
بس هو زول عال....سجمى
ما بزعل ام العيال...سجمى
دا حال ناس كتار...سجمى
وبقطعو الخضار ...سجمى
بس انا من العذابة...سجم امى
طال اغترابه....سجم امى
عايز اعرس....سجمى
والجيب مفلس....سجمى
والبنات راجيات...سجمن
وواحدات مشرورات...سجمن
وتسلم ياسجيمان...حبيبى
وانت زول ضكران...قريبى
|
Post: #14
Title: Re: الـــنـجـعـة
Author: سجيمان
Date: 07-18-2003, 08:34 AM
Parent: #11
ابوقوتة.........شكرا للقصيدة السجمية المعبرة.....انها لعمري من عوين ابو عيون الشعر العربي
|
Post: #13
Title: Re: الـــنـجـعـة
Author: سجيمان
Date: 07-18-2003, 06:41 AM
Parent: #8
يدر الدين حلاتو......... تلاتة ارباع المغتربين يحننو ....اسألني انا
|
Post: #10
Title: Re: الـــنـجـعـة
Author: woroorrook
Date: 07-17-2003, 06:50 PM
Parent: #1
...جضوم ليلي عليوي وداخلات في سفنجة
دى قلبتا فيها الهوبة في زمن إنعدام الوزن الأرضي
مبالغة
الله إديك العافية يا دكتور
|
Post: #15
Title: Re: الـــنـجـعـة
Author: سجيمان
Date: 07-18-2003, 04:15 PM
وروروك........لك التحية والتجلة
|
Post: #12
Title: Re: الـــنـجـعـة
Author: nasiradin
Date: 07-17-2003, 10:58 PM
Parent: #1
والله يادكتور سجيمان كده ما ظلمتك صاح
و الله الله يديك العافيه قول امين
أرفع صوتك سمعني ليها
ااااااااااااي اااااااااامييييييييييييين
انا عندي جدي بنادي مرتوا
وهو بيكون قاعد في ديوانه
يا وليه
وهي بترد عليهو وتقول ليهو
هوي
يا وليه
هوي
يا وليه
هوي
يا وليه
هوي
وبتكون جايه في المسافه دي
لحدي اخر واحده تقول ليهو
الوليه بين ريا و التريا
شفت كيف
مات ليهو عشره سنين ولي الليله بتحترمو
تحياتي ...ناصر البطل
|
Post: #16
Title: Re: الـــنـجـعـة
Author: aboalkonfod
Date: 07-18-2003, 06:39 PM
Parent: #12
دكتور / سجيمان
الله يديك العافية يا مبدع ، الواحد بقا
ينتظر مفاجأتك بفارق الصبر ، عشان كل
مرة يستمتع ويندهش
ـــــــــــــــــــــ
لكن بيني وبينك ، الحاقدات مايسمعن،
زعل " عطوفة " أحسن منو حمام الشتا
الساعة 12 بليل
|
Post: #20
Title: Re: الـــنـجـعـة
Author: سجيمان
Date: 07-19-2003, 06:02 AM
Parent: #16
ابو القنفد.......حبابك........حمام الشتاء االساعة12 بالليل........مالك مذكرني ليهو؟
|
Post: #17
Title: Re: الـــنـجـعـة
Author: سجيمان
Date: 07-19-2003, 00:38 AM
Parent: #12
ناصر البطل......اسمع دي.....حكاها كافينول في سودان نت.............قال......واحدة ضربت لراجلها عشان يجيب صاحبو... ويشلوها لانو الشمش جاتها...ويودوها الضل.....
اها..........شن قولك؟؟؟؟؟؟؟؟؟؟؟؟؟
|
Post: #18
Title: Re: الـــنـجـعـة
Author: HOPELESS
Date: 07-19-2003, 01:51 AM
Parent: #17
عانسات يحنن .. متزوجات يجنن
دي حالة شنو .. نسوى شنو احنا مع الحريم ديل
ما يلاقن ليهن راجلاً مايل الا يركبن ويدلدلن كرعينن؟
مافي مرا حاولت تصلح من راجله السجمان ابداً وكأنو لقت ليها غنيمه في الغنماية دا
وبيني وبينك راجلا نعج .. اريتو بسوط العنج
|
Post: #19
Title: Re: الـــنـجـعـة
Author: tasneem
Date: 07-19-2003, 02:41 AM
Parent: #18
الاخ سجيمان
سلامي
طالعة من اسبوع امتحانات وبحوث جننتني عديل كدا
موضيعك ممتع كالعادة
ياسيجمان مالك محرش الرجال
صدقني الرجال عندنا في الدول الغربية هديين ورضيين
مشاركة في اي شي من غرفة الولادة الي المطبخ
وماتنسي لبيس الاطفال وسريح شعر البنات عندنا هنا عادي
صدقني الراجل من يفارق السودان ببقي هدي ورضي
انت قايل البنات جاريات علي المغتربين عشان شنو
ما عشان كدا
|
Post: #21
Title: Re: الـــنـجـعـة
Author: aboalkonfod
Date: 07-19-2003, 06:50 AM
Parent: #19
يا أخوي هوب ليس
أعمل زي ما عمل جدي ، سرح نساوينو
الأربعة ودكش الخلا
يا تسنيم
بعد كلامك دة إنت عارفة منية الجعليين شنو؟
|
Post: #22
Title: Re: الـــنـجـعـة
Author: ابو جهينة
Date: 07-19-2003, 10:16 AM
Parent: #21
سي جي : التحية و التقدير.
هذا البوست من ذاك البوست الذي سيأتي.
أقصد بوستك هذا أعطاني فكرة بوست و الذي سأسميه ( الما بيخاف من مرتو ما راجل ).
تسلم
|
Post: #25
Title: Re: الـــنـجـعـة
Author: سجيمان
Date: 07-19-2003, 09:40 PM
Parent: #22
ابو جهينة........و الخواف ربا عيالو
|
Post: #23
Title: Re: الـــنـجـعـة
Author: tasneem
Date: 07-19-2003, 02:05 PM
Parent: #21
Dear aboalkonfod
salam
لا ماعارفة قول لي؟
|
Post: #26
Title: Re: الـــنـجـعـة
Author: سجيمان
Date: 07-20-2003, 07:40 AM
Parent: #19
تنسيم......مرحب بك وحبابك.انا ما حرشت اي راجل.......بالعكس وريتهم كيف الواحد يكون دلدول ونعجة.....ومفخرة لزوجته الحنون العطوف
|
Post: #24
Title: Re: الـــنـجـعـة
Author: سجيمان
Date: 07-19-2003, 05:06 PM
Parent: #18
يا هوبلس........الحكاية دي عند نسوانا ولاّ النسوان كلهن يا ربي؟
|
Post: #27
Title: Re: الـــنـجـعـة
Author: aboalkonfod
Date: 07-20-2003, 09:32 AM
Parent: #24
سلام يا تسنيم ...
وأقول ليك منية الجعليين شنو
" سفراً جايبلو غسيل شافع اليطير طيرة أب ريش "
|
|