Post: #1
Title: انـــا........و.....جـــاري...و..... الكــديســة
Author: سجيمان
Date: 03-02-2004, 00:43 AM
Parent: #0
قالت لي حبوبتي الكدايس ديل.... تلاتة ارباعن جن...والربع الباقى هجين...نصو جن ونصو كدايس..... النضم دا في راسي... ودائما لما امرق الصباح... القي لي كديسة راقدة وشوف عيني بعد مرات مكوعة..واكان ما اخاف الله تلوك لها في لبانة.... راقدة في عربتي ...وفي الفرشة الورا....وبقيت اول حاجة اعملها اطرد الكديسة دي براحة...حتين بعد داك ادور الكركروبة حقتي... اها لاحظت الايام دي الكديسة دي بطنها كبرت..وتقيلة...ويمكن تلد لي في العربية دي الليلة قبال باكر....وانا مذكر ايام الوحم حقها.... راقدة وتبصق..وزهجانة....ووقت اجي مارق ومتريح تقوم تشخر فوقي...اظنو وحما كان مكجن الريحة البتريح بها...
فكرت في جاري السعودي التغيان دا وقلبو مسدود عليهو. وشايفني انا والكديسة زي بعضنا.....وعربتو اخر موديل.... قلت انا اخد في الكديسة دي الاجر واخليها تلد في عربية الزول دا.....وشحت الله تبقى الكديسة دي من النوع الجن صاااااافي.. عشان لو الزول دا غلط فيها ...يجو اهلها ويوروهو ليهو....ويخلوهو بدل يركب عربية... يركب قناية...لكن كيف العمل؟.... اوريها درب العربية الشرط دي كيفن؟.... قلت انا اجيب لي فار.... واربطو من كراعو واربط طرف الخيط في رفرف عربية الزول دا.....واقعد احندقا بالفار....هي طوالي حتجي جارية.....شركت للفار وقبضو....والصباح بدري الدغش الشارع ما فيهو زول... اربط الفار في عربية جاري....واقعد احندق في الكديسة.....الكديسة مرقت...وعاينت لي وعاينت للفار في ايدي...وجات جنبو ....ومسكتو جستو.... من ضهرو....عاينت لي وهزت راسا ورجعت علي اوضتا في عربتي..... قعدت في الواطا وانا ماسك الفار واعاين لو.... يا ربي الكديسة دي لقت الفار دا ضعيف...وما بينفع معاها ودايرة واحد سمين شوية؟....جبت فار تاني... ونفس القصة الكديسة ابتو كلو كلو......قلت اكيد الكديسة دي هندوسية...وهنا طوالي اتذكرت نضم حبوبتي..... انا اخوك انت.. امانة ما ورطت يا سجيمان... كديسة جن...وحامل وحتجيب لك... وليدات جن في عربتك دي.... وان نهرتها ولاّ اتزهجت عليها..... الله قال بي قولك. شلت هم كبير الكديسة ويمكن تجيب ستة كديسات وام الخير وعندها اربعة من ضهري اتناشر روح يا سجيمان دايرين ياكلو ويشربو... اتحملت حمل شديد في صمة خشمك... غايتو الله يخدر ضراعك ويقويك
... يوم من الصباح اجي والقى الكديسة خاترا مو طيب... واظنها بي تتوجع وخلاص دايرة تلد... بعد ما كنت ماشي الشغل... ضربت لهم تلفون وقلت لهم انا شوية عيان.... وماني جايي...قعدت برا جنب العربية...وصنقرت...وانا اشحت في الله يحلك بالسلامة يا دي الكديسة....قاعد في الواطا تحت العربية....وكل مرة ارفع راسي اشوفا.... من الصباح لي عند الضهر حتين انتي يا دي الكديسة تتحلي... جابت ستة كديسات....جريت جوا علي ام الخير وقلت لها نفسي في مديدة حلبة... سوتا لي.... شلت المديدة ووديتا للكديسة...شربت المديدة...واتمددت ونامت... وانا اعاين لها...... لا لا يا سجيمان الشي دي مو كديسة.... حسي الجضيمات ديل جضيمات كديسة؟..... وشنب ما عندها.... شفت مكانو املس.... تكون شايلاهو بالحلاوة..؟.. براحة رفعت ايديها عشان اشوف ابطاطا...ولا شعرة ما فيهن.... لا لا يا سجيمان دي كمان متحضرة ومتجهزه للنفاسة..و عاين للرقدة دي رقدة كدايس؟....ابدا.... وعاين للكرعين ديل كرعين كدايس...؟... وكمان محنناهن وراسما الحنة للولادة...... يا سجيمان بس ابقى عشرة فيها وما تتلوم.... يوقومو اهلا يتلومو فيك...وانت ماك ناقص جن... كفاية عليك حمار النوم....وكل يوم ام الخير في الليل تقابض فيك من خشم الباب...وانت شايلك حمار النوم وداير تمرق...خلها في بكانا دا.... تتم الاربعين وتقوم من الولادة براها حتمشي لي اهلها.... تلاتة ايام انا اخدتهن اجازة عشان اولد كديسة الجن دي...اليوم الرابع جيت لقيتا مافيشا... وجاري السعودي وهو مارق سلم علي بي حرارة مو عوايدو..... قال لي المدام بتشكرك.... لرعايتك لي كديستا...اصلها هي غالية عليها....ولما عاوزة تلد قلنا تلد برا البيت عشان ما توسخ البيت...ولقينا عربتك دي انسب مكان.... دي كديسة دي نوع سيامي... مشترياها المدام الصيف الفات من اسبانيا بي 3000دولار...
|
Post: #2
Title: Re: انـــا........و.....جـــاري...و..... الكــديســة
Author: Osman Hamad
Date: 03-02-2004, 02:35 AM
Parent: #1
ياسجيمان
قلت لى عامل فيها شِفت ... الجماعة طلعو اشفت منك ...يبقى لى انت شهادة عربية ... انا كنت قايلك قريت فى مدرسة فريق الطين.
بعدين انا ماقلت ليك المشى لراس الشيطان دا خلى.
|
Post: #3
Title: Re: انـــا........و.....جـــاري...و..... الكــديســة
Author: bayan
Date: 03-02-2004, 03:25 AM
Parent: #2
سجيمان الجن مو قلتلك
الدك دا بيشنقك حبلو عقب
هسعتية كان مشيت محاضرات الكدايس ما كان فرزتا الشى سياميةولا جن
ودكك للمحاضرات وعدم شرايتك
لكتابي الطريقة الحديسة فى غمس الكديسة فى المريسة[/*U]
كلفك 3الف دورار يا بعيد خم وصر
.. فيشان كدى وحاة نضرى انت بيطرى فشنك ودكاك
الله يجيب العواقب سليمة ما تكون داكى حاجات تانية تلخبط الاختساس
* منشورات دار الكتب الحديسة رقم الايداع ط ب 20002
سنة النشر 1935
|
Post: #4
Title: Re: انـــا........و.....جـــاري...و..... الكــديســة
Author: PLAYER
Date: 03-02-2004, 06:37 AM
Parent: #3
يا سجيمان اترقب جارك دا كويس لو شفتو اشتري كلب...ارحل لاخر الحله
|
Post: #5
Title: Re: انـــا........و.....جـــاري...و..... الكــديســة
Author: ترهاقا
Date: 03-02-2004, 09:02 AM
Parent: #4
دكتور سجيمان إنت سايق ياتو موديل؟
|
Post: #13
Title: Re: انـــا........و.....جـــاري...و..... الكــديســة
Author: سجيمان
Date: 03-02-2004, 02:11 PM
Parent: #5
ترهاقا
انا سايق موديل 81
ليه؟....عندك كديسة دايره تلد برضو؟
|
Post: #14
Title: Re: انـــا........و.....جـــاري...و..... الكــديســة
Author: ترهاقا
Date: 03-02-2004, 02:30 PM
Parent: #13
كده جهجهتنى،لانو كديستى كانت مصرة تعرف الموديل عشان تلدفى
عربية مريحة، ده حين اودى ليها الخبر ده كيف
وإنت عارف اليومين دبل الولادة فى عربات المرسيدس بتكلف كام .
|
Post: #23
Title: Re: انـــا........و.....جـــاري...و..... الكــديســة
Author: سجيمان
Date: 03-03-2004, 01:12 PM
Parent: #14
Quote: كده جهجهتنى،لانو كديستى كانت مصرة تعرف الموديل عشان تلدفى
عربية مريحة، ده حين اودى ليها الخبر ده كيف
وإنت عارف اليومين دبل الولادة فى عربات المرسيدس بتكلف كام . |
ترهاقا....عربتي مازدا صاح.... لكن خدماتنا خدمات مارسيدس...مارسيدس شنو؟... خدمات رولزرويس
|
Post: #6
Title: Re: انـــا........و.....جـــاري...و..... الكــديســة
Author: ابو جهينة
Date: 03-02-2004, 09:05 AM
Parent: #4
سي جي المو عادي
صباحك بنكهة مديدة الحلبة
إنت متأكد من السعودي دة كويس ؟ يمكن هو زاتو راجل الكديسة ، بس أيام الولادة كان زعلان معاها و ربنا حلاها في عربيتك.
كدي إتأكد.
|
Post: #15
Title: Re: انـــا........و.....جـــاري...و..... الكــديســة
Author: سجيمان
Date: 03-02-2004, 07:23 PM
Parent: #6
ابو جهينة الغالي
تعرف الراجل دا..مرة عينويكون لونا ازرق ومرة اخدر..ومرة رصاصي..... انا قلت يمكن بيستعمل عدسات...... لكن امشي واجي لي نضمك....وخليني اتوكد منو.....
|
Post: #12
Title: Re: انـــا........و.....جـــاري...و..... الكــديســة
Author: سجيمان
Date: 03-02-2004, 01:25 PM
Parent: #4
بلير
ارحل؟....قول لي ارجع اهلك....قبال تهلك
|
Post: #9
Title: Re: انـــا........و.....جـــاري...و..... الكــديســة
Author: سجيمان
Date: 03-02-2004, 12:53 PM
Parent: #3
بيان
بلدا دي كدايسا يقدل فيها الفار
|
Post: #7
Title: Re: انـــا........و.....جـــاري...و..... الكــديســة
Author: سجيمان
Date: 03-02-2004, 11:48 AM
Parent: #2
عثمان حمد
انا دقستني حبوبتي.... القالت لي الكدايس تلاتارباعن جن
|
Post: #8
Title: Re: انـــا........و.....جـــاري...و..... الكــديســة
Author: Alia awadelkareem
Date: 03-02-2004, 12:53 PM
Parent: #7
العزيز سجيمان
خلي بالك كدايس الخواجات اذكي منهم
|
Post: #16
Title: Re: انـــا........و.....جـــاري...و..... الكــديســة
Author: سجيمان
Date: 03-02-2004, 08:22 PM
Parent: #8
عاليا عوض الكريم
Quote:
خلي بالك كدايس الخواجات اذكي منهم |
و الخواجات اذكى مننا... اذن الكدايس فعلا جن.... مافيها اتنين تلاتة
|
Post: #10
Title: Re: انـــا........و.....جـــاري...و..... الكــديســة
Author: maia
Date: 03-02-2004, 01:11 PM
Parent: #1
دكتور سجيمان
طلعت ليك كديسة اسبانية مرتبة ، حسه تقوم تكون ليك فريق كورة
|
Post: #17
Title: Re: انـــا........و.....جـــاري...و..... الكــديســة
Author: سجيمان
Date: 03-02-2004, 11:19 PM
Parent: #10
كديسة اسبانية مرتبة وبس؟..... دي طلعت قريبة ديميس روسوس
|
Post: #11
Title: Re: انـــا........و.....جـــاري...و..... الكــديســة
Author: ali othman
Date: 03-02-2004, 01:25 PM
Parent: #1
سجيمان اخوي
لو درت تقايضا بعربيتك حتدفع ليهم فرق كم
|
Post: #18
Title: Re: انـــا........و.....جـــاري...و..... الكــديســة
Author: aosman
Date: 03-03-2004, 02:03 AM
Parent: #11
هههههههه الجاتك في عربيتك سامحتك, لكن المرة الجاية في سريرك عديييل كده
|
معقولة يا سجيمان طلعت سجمان للدرجة دي
|
قصة غريبة, مما امي ولدتني وفطمتني ولحدي هسي اول مرة اسمع بقصة زي دي
|
قرب تعال ما تبتعد, والمرة الجاية جيب معاك سجيمان وتعالو الاتنين عشان اشوفكم نجوم الليل بالنهار
|
|
Post: #19
Title: Re: انـــا........و.....جـــاري...و..... الكــديســة
Author: سجيمان
Date: 03-03-2004, 06:54 AM
Parent: #11
علي عثمان يا اخوي... باقي لك بي يقبلو يقايضوني؟
|
Post: #20
Title: Re: انـــا........و.....جـــاري...و..... الكــديســة
Author: سجيمان
Date: 03-03-2004, 11:17 AM
Parent: #19
عسمان
شكرا.. للصور الحلوة... للكدايس الحلوة... لكن ديل كدايس ....؟....ولاّّ هجين؟
|
Post: #21
Title: Re: انـــا........و.....جـــاري...و..... الكــديســة
Author: maia
Date: 03-03-2004, 12:42 PM
Parent: #1
دكتور سجيمان
المشكلة حسه لا في السيدة الكديسة ولا في الراجل ، المشكلة في عربيتك
تفتكر الجماعة ديل تاني بيخلوها ليك ، لذلك اطلب منهم بدل فاقد
يعني نظرة من عيون الراجل الكحلية تلقى قدامك عربية وجيهة ما خمج
|
Post: #24
Title: Re: انـــا........و.....جـــاري...و..... الكــديســة
Author: سجيمان
Date: 03-03-2004, 01:37 PM
Parent: #21
Quote:
المشكلة حسه لا في السيدة الكديسة ولا في الراجل ، المشكلة في عربيتك
تفتكر الجماعة ديل تاني بيخلوها ليك |
مايا
غايتو ان ما خلوها.....انا بخلي لهم البلد كلها
|
Post: #22
Title: Re: انـــا........و.....جـــاري...و..... الكــديســة
Author: ودقاسم
Date: 03-03-2004, 12:59 PM
Parent: #1
سجيمان
علق على عربيك لافتة اكتب عليها
مستشفى الكدايس والولادة ،
رقم تلفون الحجز .........
الولادة الطبيعية بمبلغ ....
الولادة القيصرية بمبلغ .............
متابة الحمل بمبلغ ................
معالجة حالات العقم ..............
وأديني نصيبي في دراسة الجدوى دي
|
Post: #25
Title: Re: انـــا........و.....جـــاري...و..... الكــديســة
Author: سجيمان
Date: 03-03-2004, 02:23 PM
Parent: #22
ود قاسم
واضيف عليها
كدايس انابيب بمبلغ.........
|
|