هـذا النبيـذ أســـاء لي جـــــــدا !!!

لسنوات طويلة لم أخامر أي نوع من الخمور وقد اتخذت قرار بمقاطعة الخمور وأنا بعد طفل صغير.أذكر إن احد العلماء (الجوالة) كان يزور قريتنا (ود العقيد) بين الفينة والأخرى كان يأتينا و حماره الأبيض ينوء بحمله الثقيل فيجتمع خلق من الناس حوله, فإذا صليت العشاء يبدأ في أحاديث الوعظ ويجيب على أسئلة القرويين الساذجة وكانت أسئلة واضحة ومحددة لا تقبل حيثيات كثيرة معقدة :- ( يا مولانا الدلكة حرام وإلا حلال؟) ..(يا مولانا الزول كان نام ونسى يصلى العشا عليهو حاجة!!؟؟؟).
وذات ليلة أو (ذات خرمة) عنّ لذلك الواعظ أن يداعب أشجاننا حتى يصبح إسما في حياتنا فطفق يتحدث عن الخمر ولعنة شاربها وأذكر جيداً انه قال يومها إن من يعاقر خمرا في الدنيا لن يتذوق خمر الآخرة ثم انتقل بالحديث وقد إكتسب صوته نبرة حالمة انتقل إلى خمر الآخرة فنقل القرويين من (عالم الاجساد الزائلة التي تمضي ثم تنسى )وأسهب في الحديث عن الراح التي تقدم في كئوس من ذهب وفضه بأيدي حور غواني ذوات غنج ودلال فشخصت إليه عيون القرويين المحرومين حتى أصبحت في حمرة خدود الحوريات.وبلغ الحماس من (ود التوم) في تلك الليلة مبلغا أن صلى العشاء ثلاث مرات.
يومها قررت أن أنال نصيبا من هذا الراح المباح إذن فلن أتذوق خمرا ما حييت في هذه الدنيا .
ورغم انه قد صادفتني في هذه الحياة أمور تدعو المرء أن يعب من كأسه حتى الثمالة وأن (يسطل) حتى يري الفأر غولا ضخما ,,وعلى رأسها حكومة الإنقاذ ,والعولة, وثقب الاوزون ,والجالية (البنقالية) بالسعودية ,ومشكلة دار فور,, رغم كل هذه العوامل إلا إنني ظللت وفيا لعهدي الذي قطعته على نفسي بان لا أسكر إلا في الجنة.
ليس خاف على احد إن النهل من هذا المدام قاصر على أهل الجنة رغم إن أهل النار أحوج منهم إلى ما يسليهم عن عذابهم المقيم.وأحسب إني إنشاء الله ذاهب إلى الجنة ليس لأنني أقضي ليالي عابدا متبتلا ولكن لأسباب أخرى السبب الأول لثقتي العمياء بان الله سبحانه وتعالى لن يحرقني بالنار لأنني أحبه جدا ربما أكثر من خوفي منه, والسبب الثاني لأنني لا اكره أحد ولا اظلم احد ولا آكل قروش حرام علاوة على إن كل الأمور السيئة التي قمت بها ليست بذلك القدر الذي يستدعي حرقي بالنار.
واحسب أيضا إن معظم قاطني إفريقية جنوب الصحراء سيدخلون الجنة وربما من غير حساب جراء الشقاء والضنك الذي عاشوه في الدنيا وبالأخص منسوبي جمهورية السودان الديمقراطية(تلك الارض المعطاءة التي تنبت الازاهير من بين الاشواك).وقد صرحت بهذا الرأي لأحدهم فأضاف - من عنده- انه بجانب دخولهم فان الأمر يستوجب إلزام جنرالاتهم بالاعتذار إليهم علنا.
لكل هذه الأسباب فقد كنت أشعر باطمئنان شديد ,,وفي أوقات فراغي كنت أخطط لليالي الحمراء القادمة وكيف إنني سأقضي ليالي في عربدة ومجون تتناقلني أكف الحوريات الغواني وكيف سأقضي نهاراتي التي تعقب ليالي الماجنة منسدحا تحت أشجار الجنة العتيقة الضخمة .
والغريب إنني لم أتخيل أولائك الحوريات على أشكال فتيات سودانيات على الإطلاق حتى (إيناس) الجميلة الفتاة التي أدتني شاكوش ..رغم إنني قضيت ليال طويلة اكتب أشعاراً حول عيونها الداعجة ولحاظها الفاتكة وتفاصيل تفاصيلها حتى إن (نونتي) خدودها استغرقت مني سبع قصائد يا الله ما اجملك يا ايناس وما أرقك..ما هذا!!؟؟
اللعنة عليك يا ايناس ..لا اكاد اتذكرك حتى تشغلني ذكراك عن كل شيء فلأعد الى موضوعي ,,رغم جمال تلك الافعى (ايناس) الا انها لم تفلح قط في التسلل لخيالي عن الحوريات.فدائما أتخيل نصيبي من الحوريات على شاكلة أولائك الفتيات اللائي يرقصن في أغنية (البرتقالة) أولائك الخيول الجامحات اللعوبات بعباءاتهن الحمراء والخضراء والصفراء (كيف أميز الألوان)... والشعر الذي يمتد إلى ما تحت الأرداف.. يا لطف الألطاف متى تقوم الساعة لينتهي صومي الطويل فأفطر على برتقالة.




رجب - يا حامد يا أخي أنا الحاجات دي ما حصل شربتها وعندي قرار انو ما اشربها نهائي!!
حامد الوهم - يا ولد انت عبيط ..يعني حا تعمل ليك شنو!!؟؟ أخدلك جغمة واحدة أمسك ..
رجب- يا أخي ما عايز!!
حامد الوهم - يا أخي امسك..علي الطلاق تمسك..







رجب- هيع

رجب- كفاية واحد كفاية.. خلاص.
حامد الوهم - علي الطلاق إنت ما راجل !! أمسك!!


- هيع هيع


- البرتقالة...ترارا..عذبتي حالا...تراترا
لك لعبا خايييييييل...إلعب والشعر طايييل


أثمع يا حامد داير أديك سر أوعا تكلم الكفيل ..هو أنا خايف منو!!؟؟..(...) أم أهلو ذاتو..داير اقول ليك شنو يا أخي.... أيوا أنا عندي عشرة فدان في البلد أنا ماشي ازرعم لوبيا... والا أقول ليك حا أزرعم مكرونة.
انت يا حامد أمبارح الساعة اطناشر ونص القرصتو عقرب في الحلة دي منو؟
..يا الرتقالاااااا ترا ترا متعلقا..


حتى الساعة الخامسة من مساء الجمعة
كانت الرسالة الوحيدة المتاح للمتصل على موبايل الأخ (رجب) تلقيها هي التالي ) عفوأ..هذا المشترك لا يمكن الاتصال به حاليا..نأمل الاتصال في وقت لاحق... وشكرا)

حامد أقصد معاذ ياوهم يالذيذ

كلو كملتو كمان بقيت تسكر وليدات الناس

لكن عليك الله تحت تحت جبتو من وين

منتظر الرد على الماسنجر عشان نتلافى

شر الكشة وهاك البرتقالة ده


تحياتي

شكرا معاذ على هذا النص (بفتح النون و تسكين الصاد) .. كنت اود أن تكون بضم النون و تسكير الصاد .. بجيك صادّى

Quote: شكرا معاذ على هذا النص (بفتح النون و تسكين الصاد)

الصديق علي الحلاوي..سلام
يا اخوي خلينا في النص بفتح النون وتسكين الصاد.
لانو النص بضم النون سواء كان نص (فيفي عبده) والا نص المورده.
في الحالتين يوم القيامة بودي في ستين داهية.
تسلم يا حبيب.

Quote: لكن عليك الله تحت تحت جبتو من وين منتظر الرد على الماسنجر عشان نتلافى شر الكشة وهاك البرتقالة ده

الشيخ ابراهيم الشيخ ..سلام يا حبيب
والله يومين وانا بحاول اضيف رد على مداخلتك ما قادر
كل ما ادخل يقول لي(بيرمشن دنايد).
بعرف انجليزي وممكن اكتبا ليك انجليزي بس والله كسلان من قلبة الالت شفت.

عموما يا حبيب اهو الحمد لله يا دوب قدرت ادخل.
واعلن لك انه لا علاقة لي اطلاقا بهذه (العملة) المهببة
التي قام بها رجب وحامد الوهم.

معاذ .. زول جميل!!

AlRa7mabi

Quote: معاذ .. زول جميل!!

يا اخي والله انت الاجمل والاحلى.
بس لو اقدر اقرأ دا صاح!!
سلام

العرضحالجي دا أمسكو،،

لغاية الآن 40 جلدة دي مضمونة،،

العرضحالجي : ألإعتراف سيد الأدلة ،،
===

الجعلي قالو سكران جلدوهو 40 جلدة ،، زولك ركز شعرة ما اتهزت منو ،، زغردن البنوت ،، قال ليهن : أبشرن على الحرام بكرة جاييكم زول رجم ساكت،،

==
إنت كمان بكرة جايينا كيف؟؟

يا وهم أنت :

Quote: ( يا مولانا الدلكة حرام وإلا حلال؟)

أها طلعت حلال و لا حرام؟؟

Quote: أها طلعت حلال و لا حرام؟؟

الصديق خالد ..مشتاقون
طلعت حلام...
يا اخوي كان حرام والا حلال الله يضوقنا ليها.

Quote: الجعلي قالو سكران جلدوهو 40 جلدة ،، زولك ركز شعرة ما اتهزت منو ،، زغردن البنوت ،، قال ليهن : أبشرن على الحرام بكرة جاييكم زول رجم ساكت،،

ههههههههههههههه..حلوة وجديدة.
عبد اللطيف يا من كنت صديقي لحدى الخميس الفات.
هسي عليك الله لو لقيتني سكران وواقع في (الخور) بتصدق اني ممكن اعمل حاجة زي دي.
يا اخي دا حامد الوهم ورجب هم السبب.الله يقرفهم الاتنين.

هسي الشي دا يعني ضقتو؟؟

توصي بي شنو؟ للجماعة الما ضاقو؟


سلامات يا معاذ
ومرحب بيك في سودانيز
أنا رحبت بيك في بوست (مخسوس).. بس شايفك ما ظهرت

Quote: سلامات يا معاذ ومرحب بيك في سودانيز أنا رحبت بيك في بوست (مخسوس).. بس شايفك ما ظهرت

المحترم عبد الله عقيد
السلام عليكم
وبشكرك شديد على الترحيب والله ما شفت البوست (الخسوسي)

أخوك جديد ودايش
اعذر جهلي.
تسلم يا حبيب.
وان حيينا بنتلاقى طالماقاعدين في الرياض دي.