مذيع الرياضة في تلفزيون السودان : رياضة الهجن تنضم لكرة القدم ...( يا شداد حصلنا )

أحمد الله انه قد حباني بمشاهدة وسماع وقراءة أغرب الاخبار سواء في التلفزيون او الاذاعة او الصحف

وطوالي بفتح القناة او الجريدة وعيني تقع على الخطأ مباشرة دون تفتيش


اهاانا امبارح سمعت العجب والعجاب في تلفزيون السودان الفضائي

وفي نشرة الرياضة الرئيسية الساعة 11 مساء يوم 9/12/2006م

المذيع اسمه (محمد فاضل)

قرأ الخبر كما يلي :

( يعتزم اصحاب ومهتمي رياضة الهجن في قطر مناشدة الاتحاد الدولي لضم رياضة الهجن لكرة القدم)

طبعاً راسي اتفتح نصين وبقيت اتخيل ليكم الكورة بين ارجل الابل ونظام المنافسات المحلية والدولية والقارية لمن وصلت لي بلاتر وكاس العالم لكرة الهجن وشكل الحكام وخاصة حكم الوسط وهو يجقلب بين اللاعبين وكمان بتاع الراية الحاجز لوج وبتفرج على التسلل من فووق

اها اذا كان اللاعبين والحكام راكبين الابل طيب كيف الجمهور وخاصة جمهور المنصة الرئيسية وناس التسالي والموية والقصب ده كوم وناس التذاكر كوم ما عارفيننشتري تذكرة للابل ولا تذكرتين واحدة ليك وواحدة للابل

غايتو من هسه الف مبروك لينا كاس العالم لكرة الهجن لأننا سوف نغلب اي بلد خاصة لو تشكل المنتخب القومي بتاعنا من ناس البطانة اصحاب الابل أحفاد أبو سن والهمباتة الزمان رجال الحارة

وأنا من هنا بقترح أنه السودان يستضيف اول بطولة للعالم لكرة الهجن ويعمل على نشرها بين شعوب العالم وكلنا يعرف أن الرياضة هي السفير الشعبي لكل دولة