ابو اللمين قالو متألم شوية - بعد الشر عليك

ابو اللمين –قالوا متالم شوية..

فى ليلة قمراء وبمطعم القرية الشعبية بمدينة الدمام ورائحة الكرم تزكم الانوف نثره علينا الكاتب الكبير الموسوعة عبد الله محمد يوسف علقم وكان من غرائب مائدته سمكة العجل لعملاقة المستقدمة من بحر العاديك-النيل الازرق- والتى اطعمت جيشا من الاحباب مكرة بذلك معجزة السيد المسيح..كان من ضمن الحضور فى تلك الجلسة الطيبة الاخ/صلاح الباشا..وهو شقيق المرحوم حسن الباشا والذى لعب دورا كبيرا فى تاريح الفن فى منطقة الجزيرة وهو ايضا صديق الفنان محمد الامين ..
اختلط الفن بالحياة والناس فى مدنى كان حسن الباشا الموظف الكبير بمشروع الجزيرة يحمل فيثارة الفن بمدنى مثل الشاعر المغنى الجوال فى مدن اوروبا –التروبادور – وهو يروى لنا ويحدثنا عن الجمال وعن الهوى صور لنا البيئة الثقافية والوجدانية واسمعنا الموسيقى التصويرية فى المقاطع والايقاعات المختلفة التى تحملنا الى اجواء رومانسيةتريح الاعصاب والنفوس من نكد الدنيا وما اكثره..كان منزله بمثابة المحج لكل اهل الابداع بالجزيرة الخضراء وقف وراء انشاء فرقة اضواء الجزيرة واتحاد فنانى الجزيرة اللذان قدما اروع الانتاج الفنى بكل الوانه واشكاله وانواعه وخرج لنا رمضان حسن –رمضان زايد-الخير عثمان –محجوب عثمان –عبد العزيز المبارك – الجقر ود البنا-محمد مسكين من ارض الجزيرة ومن قلب المحنة-محمد الامين وغيرهم كثر..
يحدثنا حسن الباشا عن الفنان محمد الامين حمد النيل الازيرق-ابن مدنى البار –واصل جذوره من قرية ود النعيم 99والتى هى جنة من جنان الله فى الارض .كان اعمامه من قادة العمل الوطنى فى رئاسة اتحاد مزارعى مشروع الجزيرة لعدة دورات قبل عقود طويلة من الزمان ..يقول حسن الباشا ان مجمد الامين ومنذ صباه الباكر كان يهوى العزف عل الة –المزمار – قبل انتقاله الى الة العود حيث اصبح فيما بعد من اهم عباقرة العزف عليه بتفوق شديد ..اشتهر باغنية الحقيبة التى صاغها الشاعر الراحل ابو صلاح صالح عبد السيد بدور القلعة وجوهرا ..اهداه الشاعر محمد على جبارة الاغنية الاولى فى مسيرته الفنية –وحياة ابتسامتك..
قبل ما اشوفك كنت فاكر الريد مستحيل ..كنت تائه فى طريق خالى وطويل ..ليلى دون الناس كلو اهات..من يوم ما شفتك قلبى للدنيا ابتسم ..اشرقت دنياى فارق ليلى هم..رحت ارعاك فى خيالى وبيك احلم..
والحقه الشاعر محمد على جبارة باغنية –انا وحبيبى ..
يا حاسدين غرامنا ..يا قاصدين خصامنا ..شوفى غيرى وغير حبيبى..يا دايرين تقولو وما قادرين تقولوا..فى وفى حبيبى..
والتقى محمد الامين الشاعر محمدعلى جبارة فى الرائعة يا معاين من الشباك .يا احلى زول شفناك..

كان عام 1962 هو عام السعد لفناننا الكبير محمد الامين حيث انتقل من مدنى الى الخرطوم وذلك لان وزير الاستعلامات والعمل اللواء محمد طلعت فريد ومعه وكيل الوزارة النشط المبدع اول مترجم للبرلمان السودانى محمد عامر بشير فوراوى قاما بافتتاح مهرجانات ومسابقات فنون المديريات التسع بمناسبة افتتاح المسرح القومى شاركت كل المديريات بافضل مبدعيها فى مجال الفنون والرقصات الشعبية بلا اى تمييز او تهميش او اقصاء لاى احد..وقد اهدانا هذا المهرجان الفنان الطيب عبد الله والفنان محمد الامين ..عقب انتهاء المهرجان 1962 استقر ابو الامين بالعاصمة ام درمان نهائيا حيث سكن مع فنان ناشىء يسمى ابو عركى البخيت..تعود علاقة محمد الامين بالشاعر فضل الله محمد عندما كان فضل الله طالبا بمدرسة مدنى الثانوية كما انهما الاثنان انتقلا الى الخرطوم فى فترة متقاربة حيث التحق فضل الله بجامعة الخرطوم كلية القانون 1963م ..وشهدت نفس الفترة فى ستينيات القرن الماضى انتقال مجموعة من عازفى الموسيقى من مدنى الى الخرطوم عازف الكمان حسين عبد الله ..ومن قبله بدر التهامى ..وبدر انجلو..واسماعيل يحيى مندكورو..الحبر سليم ..وعازف الايقاع عبد الله حبة وعلى اكرت..
كانت جامعة الخرطوم فى ذلك الوقت الجدول الرقراق الذى ينهل منه الشعراء الشباب ..الزين عباس عمارة ..فضل الله محمد ..على عبد القيوم ..كامل عبد الماجد ..محمد عبد الخى ..عبد الباسط سبدرات ..صديق محيسى ..محمد المكى ابراهيم..عبد الرحيم ابو ذكرى ..وكان هناك هاشم صديق وصلاح احمد ابراهيم والسر دوليب ..الخ
الم اقل لكم ان الجزيرة ارض المحنة ومنبع الابداع ود المجدوب مسقط راس الحاج محمد احمد سرور وعندما اراد ان يتزوج لم يجد اجمل من حسان الجزيرة فعاد الى ود المجدوب وحمل قطار الشوق المدعوين من الخرطوم وكان على راسهم الشاعر خليل فرح كاشف المحسى الغتيت فالف الخليل قصيدة ود مدنى فى تلك الرحلة..وكان ذلك عام 1930موبعدها لم يعش خليل كثيرا حيث توفى فى يونيو 1932م تلك القصيدة الرائعة والصيت زائعة وضع لها ابو الامين لحنا جميلا ومحببا فاحياه بعد موات وجاء توزيع اللحن بعد ذلك على يد احد ابناء مدنى الدكتور الفاتح حسين مدير الفرقة القومية للموسيقى وعازف الجيتار المعروف..

مالو اضناه النضال..مدنى..روحى مشتهية ود مدنى..كنت اروح ازور ابويا ود مدنى .واشكو ليهو الحضرى والمدنى..دار ابويا ومتعتى ..وعجتى ..يا سعادتى ومنيتى وشجنى ..طوفة فد يوم لربوع مدنى..

رحلة ود اللمين مع الشاعر الرقيق خليفة الصادق يجب ان تحكى لانها سيرة عطرة بدات باغنية خفيفة ..اسمر يا ساحر المنظر ..واغنية من شوفتو طولنا..وقصيدته الشجية ..يا اخى بعد الشر عليك..

قالوا متالم شوية ..يا اخى بعد الشر عليك ..النضارة الفى شبابك والطفولة الفى عينيك ..والقلوب الحايمة حواليك..يا حلوة بتمنى ليك بكرة تشفى وبكرة تبرا .يا اخى بعد الشر عليك..

الشاعر فضل الله محمد هو الشاعر العربى الوحيد الذى طلب من محبوبه ان ياتى اليه فى مدنى بدلا من ان يهرول هو اليه طالبا رضاه وعطفه .قول لى يا حبيبى ايه اعمل معاكا ..ولا اسيب مدنى واجى اسكن حداك ..ونواصل مشوار ابو اللمين مع فضل الله محمد واسحاق الحلنقى والاكتوبريات وهاشم صديق ولماذا ذهبوا للمحكمة طبعا هاشم ومحمد الامين..والى لقاء ..
من المعلوم ان حسن الباشا توفى فى شهر مايو 1997 م رحمه الله بقدر ما قدم ونسال الله له القبول ..

في انتظار المزيد من الابداع يا حمادة

انت يا احمد اخوى ناس مدنى هم مننا ولا نحن منهم ام لا هذا ولا ذاك . عندى احساس في الغربة انو اولاد اقاليم مدنى والحصاحيصا اقرب لينا وجدانيا من اولاد مدنى المدينة.

لكم مودتى

الفنان محمد الامين موجود بجدة متحسس شوية وسوف يغادر الى لندن لمواصلة الفحوصات نسال الله الشفاء ..كيف يا الطيب مدنى كانت عاصمة مديريتنا وكان شعارها السمبرية ..السمبرية ام قدوم ..عيش ابوى نتين بقوم ..بقوم باكر مع العسكر ..ازهى ايام المديرية كان ايام العقيد حسين على كرار ايام عبود ..يليه ابو القاسم هاشم فقد خدم هؤلاء المديرية بحق ...على عكس المدنيين ودقرشى ..وكرار ..وعبد الرحيم محمود..طبعا الاستاذ/احمد عبد العزيز من حلة فايدة صال وجال فى مكاتب التعليم فى مدنى وبلغ الدرجات العلا من الوظائف فى التعليم ف مدنى وقد توفى ودفن فيها بالمناسبة الشيخ مدنى ود حامد قاسمى..من عولك العزازاب

Quote: ..السمبرية ام قدوم ..عيش ابوى نتين بقوم

ووووووووووووب منك انت يا ضؤ القبيلة ما بتخلي لا شاردة لا واردة . انت احمد اخوى دحين شركت للطير في المتلات ؟