Post: #1
Title: دقسه في خط نكسه
Author: محمد أبوعاقلة الطريفي
Date: 11-16-2006, 11:54 AM
Parent: #0
يا زول الهوا كاسح زي الزئبق في يوم مسخن ... ينطط بدون اوامر ...يغير رايو فجأه ... ويرجع منهزم ... في اقرب ضل ... وسايح كالذبدة في فرن غاز اكسجين ... والبجيب سيرة الفخار ... بنضرب بالنار ... جاهزين مويه ونور ... وشرز ... ادلات فلنكات ... مطاوي وجبخانه ... بتحوم بره الزنكي ... وبين السخانه ... لو نحن قله ...
اقلو فتحنا اجزخانه ...
نبيع التسالي ...
نزيّت البلالي باي برتكانه ...
اذا فرضنا انك حاوي في اسبتاليه ....
وسكتك بتسرح لألف بيت وغايه ....
وفركتك حرير ....
تصحّي في الضمير ....
في أي يوم سمايه ....
و ك ت ب ن ا في روشته قديمه ... وصفه طبيه ... استارموجيا كل تلاته حبات في دقيقه ... والحبه ما بتسوي شي ... غير يطفح السمك ... وتسرح الضفادع ... وتطرش بحرك في ماعون منسي ... او في اي كيس طوارئ .... ما تعاين لي ... انا بتكلم جد ... تستغرب ليه ... ياود يا جك ... جد الكوز .
الفتيل بشيل كتير ...
وفتيل الازمة جوه الجك ...
اذا فترت ... عليك جايه...
اذا طشت تباشير حك...
بتبرك بيك في أي محك...
بدون عنوان وكرش البيت...
ولو شرقت بقوم أضحك...
خالي من الكحول الجك...
وكان بسكر بأي جمال...
شنو الوداك تهترش في بيوت الضو عن الأزمة...
وضيق الدار ... وشكل النار ... في كل نهار...
ولون الواطه فيها عرق...
بجيب التار ... يدق الطار ... في شكل هظار...
وكل شيتا بتاكلو النار...
وحتي بحرنا فيها غرق...
ويوم نرجع من الأزمة ... اذا فرض الزمن نفسو...
بنلقي الدم ... اذا جات الركب ماشات ...
اذا مرقن قِرب طاشات ...
وناشفات ريق ...
ونتأسف ....
علي انو العمر رحمه ...
والماسكات جمر ايدك ... بتحلم في طرق زحمة ....
براح الرؤية لو تم ّ...
بتبقي الدنيا في عينيك مدن فخمـة ....
بتتزين كأي عروس ...
تجيك ماشه الهويني ... تقيف ... بدون لخمه...
|
Post: #2
Title: Re: دقسه في خط نكسه
Author: فيصل عباس
Date: 11-16-2006, 04:05 PM
Parent: #1
ابو عاقله
يا زول ياسمح
ازيك
قلت احسن تبداها هضار وتكملا بالجد
طولت ما لاقيت زولا شكال(كتاب) زيك كده
Quote: والماسكات جمر ايدك ... بتحلم في طرق زحمة ....
براح الرؤية لو تم ّ...
بتبقي الدنيا في عينيك مدن فخمـة ....
|
ده كلام بماية ريال
قول اي العوالم انتجتك وجدعتك هنا؟؟؟
شكل الكتابه جميل جدا وممتع عليك الله واصل فيهو
وانا جاييك عشان نملا الجك الفاضي ب(الحليب) ونسهر مع منعم الفكي وبصحبتنا بقايا
المبعثر من عمرنا....
|
Post: #3
Title: Re: دقسه في خط نكسه
Author: ودرملية
Date: 11-16-2006, 05:10 PM
Parent: #2
سلامات
وعوافي
ابوعاقلة ..
يازول ياسمح ..
انت بتغيب ليه من المنبر دا ..
ياخي تعال "بي العندك" ..
ماتقفلا معانا..
سمح ..
.
.
ويوم نرجع من الأزمة ... اذا فرض الزمن نفسو...
بنلقي الدم ... اذا جات الركب ماشات ...
اذا مرقن قِرب طاشات ...
وناشفات ريق ...
ونتأسف ....
علي انو العمر رحمه ...
والماسكات جمر ايدك ... بتحلم في طرق زحمة ....
براح الرؤية لو تم ّ...
بتبقي الدنيا في عينيك مدن فخمـة ....
بتتزين كأي عروس ...
تجيك ماشه الهويني ... تقيف ... بدون لخمه...
ياخي والله العظيم دا كلام شحمان شحم مبالغ فيه .. انعن زيتك زاتو
|
Post: #4
Title: Re: دقسه في خط نكسه
Author: محمد أبوعاقلة الطريفي
Date: 11-18-2006, 01:36 PM
Parent: #3
فيصل:
القلم ... بتار ... والتار ودار ... والكلام صبًابات خريف الروح ... خلوني اشتت السحاب الشال جوايا فيكم ... يا جاكم غمام ... يا سيل ... ولو كسح ما خلّ شي ... ذنب السحاب
الواحد مفروض يكون حريف ... في كرنا او فركم ... بحب الناس البتشاغل السحاب بدعوة مظلوم
وتف تف تف تف .... غضب الله في خلق الله ... ما بدس
|
Post: #5
Title: Re: دقسه في خط نكسه
Author: معتز القريش
Date: 11-18-2006, 01:51 PM
Parent: #4
ود أبوعاقلة يا راقي
عليك الله خلي حب النيل تعال تلب
أنحنا كتير مشتاقين
وصب الزيت فوق النار بودر ناس
ويا عسل اندفق ونحنا ليك متاخ
ويا بصل انكشح
ود أبو عاقلة جيدا جاك
|
Post: #6
Title: Re: دقسه في خط نكسه
Author: محمد أبوعاقلة الطريفي
Date: 11-18-2006, 01:51 PM
Parent: #3
ود رملية ... عوافي
بكب العندي اذا حاول لستك ابنشر ... او سوف افقد احد أعصابي الرئيسية في نقل المادة الخام الي هذا الجزء من الرأس ... او زادت حدة التوتر حبتين.
ياخي انا بستمتع لم الدفان يكون ناعم. او القلابات رجعت بالتاريخ ورفعت هامة ...
قاعد في كرسي براي ... والغريبه شايف ما ورا الكواليس ... اربعه انفار وستين ابليس
وكل واحر بلوتينو ضارب ... او في شكل هارب
بصراحة
جيتك كهارب ... وانا مستور حال.
خليني هناك
|
Post: #7
Title: Re: دقسه في خط نكسه
Author: محمد أبوعاقلة الطريفي
Date: 11-18-2006, 02:59 PM
معتز القريش
دايما بتجي في عز الأزمة الضاربه ونر ... او بتكورك (كمان) عبارة عن معزوفة حزاينية وفي زمن اشتر ... يا دوب تلقي فيهو باقي محنه وشوية دميعات ... ياخي القلب لو قسي المشكلة بتكبر ... ولم تكبر المرا بتسوق وليداتا وتمش
وي ودالقريش
يا زول ... أديني من خاطرك مدد ...
كما تسيح في حرفي الكسيح
اللخمة والكون الفسيح ...
أحلام بتتوعك وانا في نهاية درب اجرد
انبري القلم الفصيح ....
انو يلقاك بعد رابع
وباقي ابعادك حكاوي
والكباري المن صفيح
امش علي مهلك ... كما تعتر تدان
|
Post: #8
Title: Re: دقسه في خط نكسه
Author: abdulhalim altilib
Date: 11-19-2006, 06:39 AM
Parent: #7
ود الطريفي الظريف ،
يا أنيق الحرف يا إنت :
وينك يا أخي ؟
فتشت عليك بكان بكان
سبحت في (النيلين)
وأنا أفتش عليك ..
غرقت في (الخور)
وأنا بنده عليك ؟
مشيت مع أبوساندرا
حتى (دخان) ماوجدناك !
وعدنا بخفي حنين
ومليانين دخان .. !
واحدين قالوا بتلقاهو
في (الدفنة) ، وكذبوا علي!
واحدين قالوا بتلقاهو
متوكر في (الوكرة)
وبرضو مالميت فيك ..
آخرين قالوا مؤكد
مستخبي في (كرعانة)
وهرولت ليك بي كرعي
وما لقيتك ؟!
سألت ود رملية وود القريش
قالوا لي بتلقاهو
في حوش بكري مبسوط ومهترش
بالكتابة الحلوة ، وامكن يقول ليك :
Quote: شنو الوداك تهترش في بيوت الضو عن الأزمة...
وضيق الدار ... وشكل النار ... في كل نهار...
ولون الواطه فيها عرق... |
وأنا أقول ليك كما قال يحيى فضل الله :
شنو الفي إيدنا لي بكرة ..
شنو الداخرنو للسكَّـة ..
عشان تشرِق صباحاتك ..
عشان تقْصَر مسافاتك ..
عشان تبرق غماماتك ..
عشان تخضرَّ مساحاتك ..
عشان بُكرة ..
وبعد بكرة ..
وينك ووين أراضيك ؟ والله مشتاقين .
وقول لصاحبك (إسلام) توقعناكم
في زواج (هيومه) ، لكن الظاهر
الظروف والدوحة بعيدة خالص !!.
عوداً حميداً و(جيدن جيت) .
مودتي ،
( ليمو )
|
Post: #9
Title: Re: دقسه في خط نكسه
Author: Sidig Rahama Elnour
Date: 11-19-2006, 07:46 AM
Parent: #8
أبو عاقلة يا ود يا همة ودائماً قمة
ليه جادع أيد وراء وايد قدام ،،، وفارز الواو الضكر من قولة طظ
مع انو النيل اتمدد فكرة ....
وين تلفونك يا جاحد ؟؟؟ وين أسلاكك ، أنا ما مشرور في السلك !!!
تعال بالعندك بس 
|
Post: #11
Title: Re: دقسه في خط نكسه
Author: محمد أبوعاقلة الطريفي
Date: 11-20-2006, 03:48 AM
Parent: #9
اما انت يا ودرحمة
بتذكرني بالدخانه ... المدوخانا ... وفيها جبخانه ... عندما يجتاحها الغنج وتطقطق ...
ياخي ظاهره فيك بصورة عجيبه ...
ما عارف ... هل كنت كربون في يوم من الأيام ...
والا واقع تحت تأثير المنبه ...
شوق كتاحه وكلمه مرتاحه
وكمان العندي كتير ... لكن خايفين يفتحو لينا محضر ازعاج سلطات
بالمناسبة:
تلفوني معلق فوق ... اتحرفن وطلع الارقام
ياخي اي حاجه عادية ما حلوة ...
انت معاي
دفرت ليك حاجه ... ان شاءالله تصلك
|
Post: #10
Title: Re: دقسه في خط نكسه
Author: محمد أبوعاقلة الطريفي
Date: 11-20-2006, 03:24 AM
Parent: #8
ليمو ....
تفتيشك ... بسرق في جغرافيا المدن الساكته ... وبحرق في حشا الساكنين غبينه وضر
ومجبورين نطبظ في العيون الشايفه شر ...
ما قلت ليك ... إنو السفر لي أي حته سخيف ومر
خليك عليك الله في ... انا مختفي
مرات بطل لو مره او حكم المزاج ... أو مكتفي
او لو فرضنا عُلا الدليب غشّاش
....
يا سمح
طشيت كما لم يفعل صبي
ضليت علي الدرب الغبي
اشتهيتك في المسافه البين ألاقيك ... وبين تجي
لو
لا قبلت لي وكره
ولا حاحيت ضنب فكرة
ولا كان الأمل دخان
بناتل فينا للدفنه
اذا سقط السؤال في خور
وقوووووول مشغول
اذا دنقر الصنفور
في أي محطه أو سنده
أسأل عني ما تخجل
ومشتاق ليك ... بآي طريقة اضرب لي
خمسه وتسعه او اقسم رقم اتنين علي تسعه
واحد زائد خمسه ناقص تسعه ...
كم الناتج
اذا فرضنا انو كلامنا بالارقام !!!!
وقوووول تررن ...
|
Post: #12
Title: Re: دقسه في خط نكسه
Author: nazar hussien
Date: 11-20-2006, 03:49 AM
Parent: #10
Quote: ومشتاق ليك ... بآي طريقة اضرب لي
خمسه وتسعه او اقسم رقم اتنين علي تسعه
واحد زائد خمسه ناقص تسعه ...
كم الناتج
|
95أو
2/9 1+5-9
=222222, -3
=-2777778
او
2/19+5-9
2/15
=13333333,
وذلك
اذا افترضنا ان 95 دا رقم طواريْ
يا الطريفي ازيك...يا زول انا جيت عجبني كلامك دا لي الله سيدي...
|
Post: #13
Title: Re: دقسه في خط نكسه
Author: محمد أبوعاقلة الطريفي
Date: 11-20-2006, 04:21 AM
Parent: #12
Quote:
وذلك
اذا افترضنا ان 95 دا رقم طواريْ
يا الطريفي ازيك...يا زول انا جيت عجبني كلامك دا لي الله سيدي... |
واذا افترضنا عجبك الكلام ... بتخرمج في الأرقام مالك
شوف ... يا كالكوليترك ضارب ... حلوه (كالكوليترك) دي
او سواقتك .. دركسون يمين
غايتو جوطها جوطه
ورقمك الأخير ..... اجمالي الناتج لو كان ابصلعه
خليتني احلم بالماديات ليه ....
عشان كده انحنا كتبنا الجملة كتابةً
توهت الجماعة
نزو ... تحيات كتارات في شكل شمارات
التعريجه عندك ... ثم
اضف رد
|
Post: #14
Title: Re: دقسه في خط نكسه
Author: nazar hussien
Date: 11-20-2006, 04:37 AM
Parent: #13
Quote: شوف ... يا كالكوليترك ضارب ... حلوه (كالكوليترك) دي
او سواقتك .. دركسون يمين |
كالكوليتري ساينتيفك يا الطريفي
وسواقتي عجلة...ساكت...
فرملة ما فيها...
هسي اتنين علي تسعة دي كم؟ كان ما عجلتي دي نتيجتها بتنحاش
|
Post: #15
Title: Re: دقسه في خط نكسه
Author: محمد أبوعاقلة الطريفي
Date: 11-20-2006, 05:22 AM
Parent: #14
Quote:
كالكوليتري ساينتيفك يا الطريفي
وسواقتي عجلة...ساكت...
فرملة ما فيها...
هسي اتنين علي تسعة دي كم؟ كان ما عجلتي دي نتيجتها بتنحاش |
وانا كالكوليتري صفرجت ...
فراملك سفنجه
تكابس تداقش اي تنقرنجه (دي بالاثيوبي)
ياخوي اتنين علي تسعه (ما بنقدرو) وقول = 0.2222222222222 وانت ماشي
وكالكوليتري كاس يو يعني بفتش عليك CASYOU بلغة غير اجنبية
ده اذا طبقنا قانون الازدواجية الضريبية
|
Post: #16
Title: Re: دقسه في خط نكسه
Author: nazar hussien
Date: 11-20-2006, 05:33 AM
Parent: #15
Cas You
on
line
البفتش علي الخط دا دحين ما رونالدينو؟
|
Post: #17
Title: Re: دقسه في خط نكسه
Author: محمد أبوعاقلة الطريفي
Date: 11-20-2006, 05:41 AM
Parent: #16
طالما دخلت في الموضع خط
خطين
تلاته خطوط
أربعه خطوط
وبقي
CAS عرقي عدييييييييييييييييييل
وكاسك يا وطن
نزو: مربوش والا مهبوش ... والا الدخول بقروش
|
Post: #18
Title: Re: دقسه في خط نكسه
Author: nazar hussien
Date: 11-20-2006, 06:11 AM
Parent: #17
يا الطريفي...
خليه
Cas
اب لنقة
وأب لنقة دا من النوع البصفق لي الشمس ساعة تغيب...وزول ظريف هسي حي وموجود
|
Post: #19
Title: Re: دقسه في خط نكسه
Author: محمد أبوعاقلة الطريفي
Date: 11-20-2006, 12:33 PM
Parent: #18
| Quote: وأب لنقة دا من النوع البصفق لي الشمس ساعة تغيب...وزول ظريف هسي حي وموجود |
ناس الليل ... ابلنقه يا شحتفه
وبعد تغيب
الوعي زاااااتو بغيب...
والصفقه الياها...
بعدها ينزل يديه زي ما قال صديق
وتاني لا يد لا كراع...
نزو: ما تعتمد علي صحة ردودي بالليل
مجرد تنويه
|
|