Post: #1
Title: 2 يوميات عبدو حنفية وفتاح الكج ..
Author: عامر تيتاوى
Date: 11-13-2006, 07:50 PM
Parent: #0
القربو يحنن وبعدو يجنن .. رقيق وحنين
-ولاهى ولا رقيق ولا حنين هسى دى طريقة ناس بعرفو الحنية
*مالك ياجيمى قامت عليك الحالة تانى ولا شنو
-تعرف ياعبدو الواحد قدر ما يحاول ينسى مافى طريقة .. الشويفعة دى جننتنى
*هوى يا جمال خليك تفتيحة واعمل كبرى ما تبقى داقس
قالوا الشجر الكبار فوقو الصمغ .. كشف هناك شوف التبلدى ده
شوف عينى الحبيب بى حشمة لابس التوب
-توب شنو ياخوى .. قال توب قال لا توب تن.. عاين هناك اللابس البنبى داك
تقول فان باستن شوف القوام ده كيف .. مقتدى الصدر .. عالى صدرك ولى خصرك برى
فيهو جوز رمان جلا البرا
*اها ياابو صلاح .. قديتنا
-ياخ دى حفلة ولا بص روضة الشفع الكتار ديل شنو
*انتا ماعارف شفع الزمن ده لو ما لمو الكراسى مابشتتو!!
|
Post: #2
Title: Re: 2 يوميات عبدو حنفية وفتاح الكج ..
Author: عامر تيتاوى
Date: 11-13-2006, 08:09 PM
Parent: #1
11
- انتا فى الشفع ولا الجلاكيم ديل ..
متحكرين فى الصف القدامى
*خليهم يستعيدوا ماضى الذكريات .. تعرف عمك حامد
ده بقى مابفوت اى ربة طوالى تلقاهو لافح عبايتو عبد الواحد دى
ومقنطر عمتو .. حليل زمن الصبا
- عمك حامد براهو ماهداك فردتو جاركم عباس بقى زى الساوند سيستم
من قولة تيت ولحدى صفارة الحكم
* الذا حاجة قال بجبجب كمان ياحاج اديها صنة
- انتا ياعبدو زول فقر خلاص ياخ نسيتنى الكيس فى محل العشا راسنا ينونى
خارج لينا سفة ولا برنجيياية انشاله
* خد ولع بس ماتشفطا كلها .. انتا قايل نفسك انشتاين ما جمال القرد
سعوط وسجاير بعد ده كلو ماقادر تحنك ليك شافعة .. منتهى
- اها يا فالنتينو البسمعك كده يقول الزير سالم ما الحال من بعضو
شاكوش فى نص الراس !!
|
Post: #3
Title: Re: 2 يوميات عبدو حنفية وفتاح الكج ..
Author: عامر تيتاوى
Date: 11-13-2006, 08:25 PM
Parent: #2
12
*ولاهى مسقف لاكين .. كمان بتعرف الزير سالم .. دى ادوكم ليها
فى سنة كم ؟
-هيا العوير ده ماجابوه مسلسل فى التلفزيون
*فى التلفزيون .. فى التلفزيون تلقى المتعة .. بتعرف النشيد ده ولا ما
كتا بتحضر جنة الاطفال وناس بابا فزارى وماما عشة اكيد لا
-ماما عشة !! لاماما تريزا
*خترى ولاهى .. ناقش لاكين البشوفك كده يقول قريت الابتدائى بالعصر
لا بالمراسلة
جمال جمال ياقرد كشف لى صحبك الكج قال قاشرة قال هسى لبستو دى اتنين
مايلبسوها ماتشين تك احمر واصفر واخدر تقول صيوان !!
-ياحاسد ما احسن من قشرتك التعبانة ابيض واسود تقول تلتوار .. وروار.. وهم
انتا فنلتك دى ما كرهتنا بيها .. لابسا كل يوم .. انتا قايلا نضارة ولا شنو
*بلاهى شوف الداقس ده ولاهى دولابى مليان لكين فى الحلة دى حقو الزول
يجى بى جلابية النوم .. اقشر لى منو سلافة المعشكبة دى ولا طاطا ال ..
ياخ دقيقة
-دى جاكات ساى منك ماياكا حنفية البنعرفوماعندك ابو النوم قميصك العامل
زى الجلاد داك ولا بنطلونك القرب يجرى منك ده
|
Post: #4
Title: Re: 2 يوميات عبدو حنفية وفتاح الكج ..
Author: ودرملية
Date: 11-13-2006, 08:39 PM
Parent: #3
سلامات
وعوافي
حمدا لله علي السلامة ياعامر ..
ويافتاح الكج مشتاقين .. شنو يعني طولتا الغيبة كدا ..
| Quote: الشويفعة دى جننتنى |
|
Post: #5
Title: Re: 2 يوميات عبدو حنفية وفتاح الكج ..
Author: امير عوض الجمري
Date: 11-14-2006, 01:19 AM
Parent: #1
يا سلاااااااااام عليك يا عامر ..
تعرف دي زي : حاجة زي ماتكون محلّق في العواصف فجأة تهبط للسكون
طلعتنا من مشاكسان ومناكفات المنبر .. لأيام وليالي حنفية والكج والأمثلة الحية لمرحلة تعد من أجمل مراحل الحياة وقد تناقلت وتوارثت تلك المعطيات من جيل الى جيل وتبقى ذكراها عطرة وجميلة ونقية نكتسي بها حتى النهاية ..
لك ودي وحبي ايها الرفيق الحبيب
|
Post: #6
Title: Re: 2 يوميات عبدو حنفية وفتاح الكج ..
Author: عادل جبارة
Date: 11-14-2006, 02:07 AM
Parent: #5
عامر تيتاوي
واصل في مثل هذا الأبداع الشعبي ولا تنقطع فينقطع معك السمر اللذيذ
دمت أخي عامر ،،،
|
Post: #7
Title: Re: 2 يوميات عبدو حنفية وفتاح الكج ..
Author: على محمد على بشير
Date: 11-14-2006, 03:46 AM
Parent: #6
عامر تيتاوى
الله عليك يارائع .. سرد جميل وحكى احلى وحوار اكتر من ممتع
بس الكتابه بالقطاعى بتقطع نفسنا
عليك الله ما تطول الغيبه ..... سمح
|
Post: #8
Title: Re: 2 يوميات عبدو حنفية وفتاح الكج ..
Author: ودرملية
Date: 11-14-2006, 05:33 PM
Parent: #7
سلامات
وعوافي
ياعامر اصح معانا ياحبيب ..
منتظرين ...
وسلام ياعبدو حنفية وسلام يا فتاح الكج
|
Post: #9
Title: Re: 2 يوميات عبدو حنفية وفتاح الكج ..
Author: عامر تيتاوى
Date: 11-14-2006, 06:26 PM
Parent: #8
الاعزاء
ود رملية
امير الجمرى
عادل جبارة
على محمد على بشير
سلام يااحباب
شكرا على كلامكم الجميل
لكين هل تصدقوا ان فتاح
الكج .. كجانى انا زاتى
يوم عجيب خلاص
الله يدينا خيرو
|
Post: #10
Title: Re: 2 يوميات عبدو حنفية وفتاح الكج ..
Author: عامر تيتاوى
Date: 11-14-2006, 07:25 PM
Parent: #9
13
اميرة الشباب يالسمحة انا جاييك عرييس
لى كتب الكتاب يالسمحة مهرك ما رخيس
* بالجد دكتورة تهانى اميرة الشباب لكين ود الجاك ماياهو
_ يابو عبدة ما قنا ليك القصة كلها بقت كهربة .. حروت
وكنجالات .. الضحاكات ياخوى .. القروش الفكة انتا عشان مفلس يعنى
الزولة رضيانة ومقتنعة انتا مالك حارق رزك
* هوى ياجمال انا زاتى ماشغال بيهم كتير بس عدم موضوع
يعجبنى فيك لو قلتى انا مادايرة مال
واصو العرس بالفاتحة ياناس ماحلال
- كشف للدفار ده .. عجبتو قصة العرس بالفاتحة ساى .. بايركس
جنس جقليب
* انتا فى البابور ولا زولتك العاملة زى البلنتى دى .. نوال عاين ليها
التقول ركشة شوفا بلاهى بتشاقق الناس كيف شغالة شوارع عرضية ساكت
ولاهى شترة شتارة
- ياعبدو ياخ ما نمشى قدام شوية خلينا نتكل مع ناس طايوقة هناك جمب المسرح
يللاكا
سلام ياشباب ابشر ياعقرب انشاله نشوفك فى الكوشة قريب
* وهو فى كوشة اكتر من كده عن يمينو طايوقة وعن شمالو الدباس ياسر سجوكة
ههههههههههى
البلوم فى فرعو غنى
_ الفرع ولا الاحفاد ياحليلك ياابو السا .. سحورة ياخ .. ااااااااخخخخخخخخخخ
* تبكو بس .. هههههههيا
- يالعالى تعليمك انا من مظاليمك
ايه زنبى ورينى
|
Post: #11
Title: Re: 2 يوميات عبدو حنفية وفتاح الكج ..
Author: عامر تيتاوى
Date: 11-14-2006, 08:03 PM
Parent: #10
14
ياجماعة الغنية الجاية للعرسان
.....
عاد الحبيب المنتظر عاد
عودا حميدا مستطاب
ياللهوى ياللشباب * هو بلاهى عامل فيها كان بحبها من زمان يعنى .. كضاااااااب
- عبدو انتا زول داقس ولا شنو دى غنية ساى قطعا الفنان من راسو
عاين صاحبك قابض كيف .. قال برقص سلو قال شوفو مكنكش كيف
*هوى انا بعدا كاسح البيت بكرة قايم بدرى
- مالك يا زول دبرست ولا شنو ود الجاك ساهر بيك
* لا ولاهى بس الصباح قايم بدرى عندى مشوار مهم
- مشوار شنو لسه الوكت بدرى .. مازال الليل طفلا يحبو
* لالا يامعلم شاو
ماعدت قادر انتظر
سامحنى غلطان بعتذر
عبدو ياعبدو .. تعال قدمنا معاك البيت ما بنقدر نمشى برانا انا واختى وبت خالتنا
هشام اخوى ابى يمشى معانا قال داير يتم الحفلة
* هيا يالبنى انتو لى هسه مساهرين بكرة ماعندكم مدرسة ولا داكين
- لا .. لكين هيام اخت العروس صحبتى شديد وبت خالتى دى قالت دايرة تحضر الحفلة
معانا
* طيب ماشفتى ناس عالية اختى اكان قاعده لى هسى امشى ناديها وقولى ليها عبدو
قال ليك اتخارجى بسرعة بلاش حفلة بلاش كلام فارغ
_ قاااااااااااااااعدة
* امشى امشى ناديها الحاج بعد دا بنقرط
|
Post: #12
Title: Re: 2 يوميات عبدو حنفية وفتاح الكج ..
Author: عماد محمود علي
Date: 11-15-2006, 02:44 AM
Parent: #11
الرجل الأنيق دوماً / تيتاوي
أين ما تكون تنثر الإبداع ، إستراحة في بستان تحفه الزهور وصوت خرير المياه ينساب تدفقاً للحن جميل يزيد اللوحة بهجة وجمال أنت كما عهدناك منبع للفرح ومرتع للجمال . مزيد من الابداع يا جميل .
|
Post: #13
Title: Re: 2 يوميات عبدو حنفية وفتاح الكج ..
Author: على محمد على بشير
Date: 11-15-2006, 02:54 AM
Parent: #12
تــــــــااانى ياتيتاوى
شحتفتا روحنا الله يشحتفك 
عليك الله خليك حلو معانا .
|
Post: #14
Title: Re: 2 يوميات عبدو حنفية وفتاح الكج ..
Author: صديق حمدتو
Date: 11-15-2006, 08:18 AM
Parent: #1
Quote: عاد الحبيب المنتظر عاد
عودا حميدا مستطاب
ياللهوى ياللشباب |
فرحين بعودتك إنت يا عامر تيتاوي و بعودة أولاد حلتنا عبده حنفية وفتاح الكج وكيمو والقرد
لقد مرت على خاطري ياعامر وأنا أستمتع بقراءة هذا البوست الرائع المئات من الحفلات كل منها تصلح مسرحا لهذا الإبداع فالأحداث تشدني إلى أزمان وأماكن حميمة وفي ظني أن اختلاف الأسماء والشخوص قد لا يشكل فارقا.
نحن متابعون ولن ندع الفرصة تفوتنا
مع تحياتي
صديقــــــــــوف
|
Post: #15
Title: Re: 2 يوميات عبدو حنفية وفتاح الكج ..
Author: صديق حمدتو
Date: 11-15-2006, 08:18 AM
Parent: #1
حذفت للتكرار
|
Post: #16
Title: Re: 2 يوميات عبدو حنفية وفتاح الكج ..
Author: طارق جبريل
Date: 11-15-2006, 09:21 AM
Parent: #1
قلنا نتصبر... لا لا لا ما بنقدر
الصبر قاسي والمحبة غدر
تيتاوي
مشتاقيييييييييييييييييييييين
|
Post: #17
Title: Re: 2 يوميات عبدو حنفية وفتاح الكج ..
Author: عامر تيتاوى
Date: 11-15-2006, 02:18 PM
Parent: #16
العزيز على
Quote: تــــــــااانى ياتيتاوى
شحتفتا روحنا الله يشحتفك
عليك الله خليك حلو معانا . |
انا ولا فتاح الكج
|
Post: #18
Title: Re: 2 يوميات عبدو حنفية وفتاح الكج ..
Author: عامر تيتاوى
Date: 11-15-2006, 02:23 PM
Parent: #17
اخوى العمدة .. عماد محمود
Quote: إستراحة في بستان تحفه الزهور وصوت خرير
المياه ينساب تدفقاً للحن جميل |
كلام سمح بالحيل من ناس سمحين ومتسامحين
|
Post: #20
Title: Re: 2 يوميات عبدو حنفية وفتاح الكج ..
Author: عامر تيتاوى
Date: 11-15-2006, 02:28 PM
Parent: #18
الصديق الصدوق .. الحبيب صديق حمدتو
الرائع صديقوف :
Quote: فالأحداث تشدني إلى أزمان وأماكن حميمة
وفي ظني أن اختلاف الأسماء والشخوص قد لا يشكل فارقا.
|
الشباب ديل رجعناهم من الباب عشانك ياصديق
|
Post: #19
Title: Re: 2 يوميات عبدو حنفية وفتاح الكج ..
Author: عبدالكريم الامين احمد
Date: 11-15-2006, 02:26 PM
Parent: #17
في حضرة الكج حضرنا...
ونشتاق الي التفتيحة والشايل مفاتيحها عبدو حنفية
وين يامان ياخ دافن دقن وقانج بالناس العجيبة دي
|
Post: #21
Title: Re: 2 يوميات عبدو حنفية وفتاح الكج ..
Author: عامر تيتاوى
Date: 11-15-2006, 02:34 PM
Parent: #19
الريس طارق جبريل
حبابك الف فى حلة حنفية
ورفيق الدرب توحة
|
Post: #22
Title: Re: 2 يوميات عبدو حنفية وفتاح الكج ..
Author: عامر تيتاوى
Date: 11-15-2006, 02:40 PM
Parent: #21
الفنان كرومة
او كيكى كما يحلو لبورداب الدوحة
وفى الحالتين انتاالكريم تذكر زمان
ان الكريم لكا الربيع تحبه للحسن فيه
وتهش عند لقائه ويغيب عنك فتشتهيه
Quote: في حضرة الكج حضرنا...
ونشتاق الي التفتيحة والشايل مفاتيحها عبدو حنفية
وين يامان ياخ دافن دقن وقانج بالناس العجيبة دي |
البخرة دى كان تديها لى فى واحدة من ايام الشباب اياهم
لكين برضو بجازفا ليك
|
Post: #23
Title: Re: 2 يوميات عبدو حنفية وفتاح الكج ..
Author: حمد فتح الرحمن
Date: 11-15-2006, 03:17 PM
Parent: #1
البوست الفات ما حضرتو
لكن هنا معاك من قولة تيت
واصل يا حبيب
|
Post: #24
Title: Re: 2 يوميات عبدو حنفية وفتاح الكج ..
Author: عامر تيتاوى
Date: 11-15-2006, 05:32 PM
Parent: #23
حمد فتح الرحمن
الف مليون مرحب ياقريبى
يدكم معانا
|
Post: #25
Title: Re: 2 يوميات عبدو حنفية وفتاح الكج ..
Author: Amer
Date: 11-15-2006, 06:30 PM
Parent: #24
الاخ تيتاوي
لك التحيه والتقدير وارجو المواصله حتي نبتعد قليلا عن الجو السياسي والمشاحنات
امير الجيلي
|
Post: #26
Title: Re: 2 يوميات عبدو حنفية وفتاح الكج ..
Author: عامر تيتاوى
Date: 11-16-2006, 10:00 AM
Parent: #25
زولى زاتو ولا واحد تانى
فى الحاتين انا كسبان
تسلم ياامير
|
Post: #27
Title: Re: 2 يوميات عبدو حنفية وفتاح الكج ..
Author: على محمد على بشير
Date: 11-16-2006, 10:06 AM
Parent: #26
تيتاوى
مالك يا اخوى بقيت زى ام العروس
سبت البوست وقعدت تلف على الضيوف وتجامل
عليك الله انسى فرنسا وكب لينا النقه كلها هنا
وبعدين جامل لو عاوز تجامل ...... سمح
|
Post: #28
Title: Re: 2 يوميات عبدو حنفية وفتاح الكج ..
Author: عامر تيتاوى
Date: 11-16-2006, 10:29 AM
Parent: #26
15
ازاك ياعيونى وبراك درتى
السهر لروحك براك
- يعنى نطبز عيونا ولا شنو ..
*انتا ماسمعت الكلام للاخر يا ياقردو ما برضو قال ليك بتشابى لشوفة الملاك
الله لا يهدى الكان هداك ماتخلو الشلاقة وحبو قدر مكنتكم يعنى هسى انتا مكنتك ما فايتا
ليها 3 سلندر حقت ميتسوبيشى وانتا ذاتك بيش البقدرك شنو على اللاند كروزر 4000 سىسى
ولا اقول ليك انتا حنكك دة حدو ركشة بس بنزين بالتمنة حقت اللبن وشوية زيت .. هههههههى
- ولاهى ضحكتنى يا طايووقة تعرف انا الايام دى بقيت اشك فى مقدراتى التحنيكية والسبب
مباراتك انتا وحنفية الجنو نقة فارغة وحنك فى الفاضى اما صاحبك فتحى داك ما عندو حاجة غير
الكلام والغلاط فى الكورة مع انو فكت منو زمان اكين لسه زاكيها
* بالمناسبة وين حنفية هسى ما كان بيجاى .. شتت ولا شنو
_ اييى كسح البيت قال بكرة عندو مشوار مهم الصباح
* مشوار مهم ؟؟ ومن متين عبدو حنفية بقى عندو مشوار ومهم كمان ماقاعد مكسر تحت الشجرة
اليوم كلو ومن ضل لى ضل حتى الشغل اللقاهو فكاهو زمان .. ده حيكون شمار بكرة مع جبنة الحفتية
_ وانتا زاتك عملت شنو فى الشغل ياطايوقة ماكت ايام كده زاكى بكل قوتك
* اه شغل شنو ديل ناس واسطات ديل طمعونا بالشغل معاينات وقشرات وحق مواصلات تلاتة شهور
وبعد ده كلو مسكونا رمل الطريق قالوا ادونا عرض اكتفاكم شلنا ناسنا الدايرنهم وديل هم النجحوا فى
المعاينة .. تصدق اخدوا معاهم اغبى واحد فى التاريخ كان بقرا معانا انا عارفوا كويس لو امتحنوهوا
براهو بجى الطيش .. قسم
_ يازول خيرا فى غيرا بعدين ياطايوقة بصراحة معاهم حق لو انتا مشيت بوشك دا الانا بعرفوادا بصراحة
لو انا بيل جيتس بتاع الميكروسوفت زاتو والمليارات وانتا صاحبى ما بشغلك معاى .. ياخ انتا المفروض
تجلد وشك وتكتب اسمك بى برة .. هههههاى
|
Post: #29
Title: Re: 2 يوميات عبدو حنفية وفتاح الكج ..
Author: عامر تيتاوى
Date: 11-16-2006, 10:35 AM
Parent: #28
يابو علوة
ما لازم نديها حبة زيت
شوية
|
Post: #30
Title: Re: 2 يوميات عبدو حنفية وفتاح الكج ..
Author: khaleel
Date: 11-16-2006, 10:46 AM
Parent: #29
والله يا عامر
الكج دها حقار وعيونو كبار
والقصة كلها حقارات ولبس كدارات
|
Post: #31
Title: Re: 2 يوميات عبدو حنفية وفتاح الكج ..
Author: عامر تيتاوى
Date: 11-16-2006, 11:06 AM
Parent: #30
الحبيب خليل
Quote: الكج دها حقار وعيونو كبار
والقصة كلها حقارات ولبس كدارات |
كدارات بدون شرابات
|
Post: #32
Title: Re: 2 يوميات عبدو حنفية وفتاح الكج ..
Author: عامر تيتاوى
Date: 11-16-2006, 12:26 PM
Parent: #31
16
تغريد تغريد ياتتو عليك الله تعالى دقيقة
_ هسى بلاهى دى يسموها تغريد ياخ قول كوراك سكليبة اى حاجة تانية غير
تغريد وكمان بدلعوها تتو قال شايف جنس الدلع ده يابو الطواييق اندلعك انتا كمان
* انا جنى وجن البنات البشبهو الاولاد هسى دى لو لبستها كدارة ما تظبط الدفنس
ولاهى موية ماتمشى .. وعاين البتناديها زاتا عاملة كيف جلحات عديل كده ياقرد
- طايوقة ياخ عليك الله خلينا من سيرة الناس طوالى شغال ( سنار التقاطع ) خلينا
نهججج شوية يمكن دى الغنية الاخيرة تعال نخش الدايرة جوة
* اوهههو ياشباب تعالوا يللا حتو وشتت نبقك ده فى ا########## فك اللعب ياقرد ونزل
الورل ده من ضهرك اوووو يابت انا ود الحلة وعاشق وحياة الله ... ايييييك من زمن
الطرحة ولاهى قديم قدم .. ابراهيم كببير ياخ
اودعكم افارقكم لالالا ما بقدر
دموع بتغطى عينيى ولكن اااه
ااااه اااه وفى الاخر وداعا
اوعوا تنسونى بطراكم
بشيلكم جوه فى عيونى
ونزرع ريد وعالم كلو
حب وسلام
|
Post: #33
Title: Re: 2 يوميات عبدو حنفية وفتاح الكج ..
Author: عامر تيتاوى
Date: 11-16-2006, 12:35 PM
Parent: #31
Quote:
المتواجدون الان بالمنبر العام 203 شخص » (1 )عضو و (202) زائرا
»عامر تيتاوى
هذه الصفحة يعاد تحديثها كل 120 ثانية. |
كنتا فى حفلة ناس حنفية والكج
فى حظر تجول ولا شنو
|
Post: #34
Title: Re: 2 يوميات عبدو حنفية وفتاح الكج ..
Author: عامر تيتاوى
Date: 11-16-2006, 04:58 PM
Parent: #33
17
انا يا زولة ما بقدر ارجع ليهو تانى .. خلاس تعبتا ودمى زاتو نشف من نقتو الكتيرة
وشكو الزايد وما ليهو مبرر .. تعرفى نحنا يوماتى عايشين دراما بطالة خلاس .. لالا
مافى اى طريقة رسمى كده .. ليه يعنى هو قايلنى اصو انا شنو
* مشكلتك ياريم فاكرة الحكاية هظار انتى الظاهر عليك نسيتى انو ده رقم تلاتة الناس
بعد ده حتاكل وشك
-يازولة احسن من عمر ياكل راسى .. ياخ انا قربت اجن عديل كده بقيت اكلم نفسى
الزول ده شكاك وظنان تعرفى لدرجة بفتش الرسايل الفى الموبايل ولو حصل جاتنى
مكالمة وهو معاى يقعد يتصنت يازولة كفاية لحدى كده والحمد لله نحن فى البر والقصة
مافاتت حد الخطوبة اهى دبلة وبرميها ليهو .. يمكن حظنا المعاكس ده يتعدل
* هييي هييي عاينى هناك شوفى البت القاعدة جمب تهانى فى الكوشة دى .. مبااااااااالغة
لكين دى من وين ياختى
_ اظنها من اهل العريس ياهالة
* هوى ياختى ناس ود الجاك ديل اصو ما عندهم زول سمح بالطريقة دى امشى كده ولا كده
ما ساكنين جمبنا فى الحلة دى سنين وبنين ما شفنا ليهم رقشة ..
_ يللا قومى بعد ده خلاس الحفلة فرتقت نمشى نشوف لينا نومة تنفعنا فستانى ضابى على
الظاهر على سمنتا شوية
* شوية .. ياختى انتى قربتى تطرشقى .. ولاهى انا الا اعرف الزولة الشرط دى من وين
_ طيب دقيقة عاينى انا بسال ليك فتاح ود جيرانا ما هو عامل فيها وزير العريس
.. شايفاهو قابض الجو وهاك يارقيص ويوزع فى ابتساماتو يمين وشمال
يافتاح فتاح طبعا مابسمعنى فى وسط الجوطة دى بكلم الشافعة دى يابت عاينى عليك
الله الفتى لى الود اللابس اصفر ده
فتاح ازيييك كيفك تمام
+ اهلللللللا ازيك ياريم كيفك ماشفناكم الليلة لابدين ورا ولا شنو
_ ايىىى انتا عارفنى انا ما بحب الظهور وبعدين انتو زاتكم مااديتونا فرصة .. عايزة اسالك
انتا البت الواقفة هناك جمب العرسان دى منو .. اللابسا ليمونى دى
+ احححم اححم .. الشمارات يالشمارات اعمل ايه فيك يالشمارات اصو انتو كده يابنات حلتنا ..
.. دقيقة بس العريس عايز يمشى الفندق
_ بس .. يخسى عليك .. عليك الله ورينى يافتاح .. النبى فوقك .. تعال
+ مابقدر اقول ماقادر اصرح .. يللا .. بجيك بجيك .. بجى بجى بجى
* ريم هوى يلاكى فتاح ده سجمان ساى .. عامل فيها مهم بكرة بجيب ليك الشمار كلو
|
Post: #35
Title: Re: 2 يوميات عبدو حنفية وفتاح الكج ..
Author: Amer
Date: 11-16-2006, 06:08 PM
Parent: #34
العزيز تيتاوي
لو انت متابع الهبوط البيودي الرميله يبقي عرفتني
ولو لاقيت عبد الرحمن طمني عليه لاني خايف يكون في الرميله
وارجو المواصله لانك تنقلنا الي عالم جميل الجميع يشعر به
مع تحياتي امير الجيلي
|
Post: #36
Title: Re: 2 يوميات عبدو حنفية وفتاح الكج ..
Author: Ibrahim Adlan
Date: 11-16-2006, 06:32 PM
Parent: #1
Quote: مايلبسوها ماتشين تك احمر واصفر واخدر تقول صيوان !!
-ياحاسد ما احسن من قشرتك التعبانة ابيض واسود تقول تلتوار |
يا عامر و الله الشباب ديل حلوين و الظاهر عليهم من مربع حداشر
|
Post: #37
Title: Re: 2 يوميات عبدو حنفية وفتاح الكج ..
Author: عامر تيتاوى
Date: 11-17-2006, 12:19 PM
Parent: #36
امير الجيلى :
Quote: لو انت متابع الهبوط البيودي الرميله يبقي عرفتني
|
ده زاتو الخلانا نجيب سيرة حنفية وصحبو الكج
عبد الرحمن بخير
|
|