( كباية ) قهوتى و( عبار ) دينق

الاخ دينق
صديق من الزمن المضى
لدينا من المواقف المشتركه الكثير
وحتما لدينا ما نختلف فيه وعليه

الاخ دينق
بدات تكرر عبارات محدده عن مواقفى الاخيره
اخرها فى بوست الاخ ود محجوب

لدى الرغبه فى ادارة حوار معك بعيدا عن الهتافيه
ان اردته مفتوح هنا فليكن
واذا اردته مغلق بالتلفون فمرحب
واذا لم تك لديك رغبه فيه ايضا سيجد موقفك احترامه

انا فى انتظارك
تحياتى

Quote: واذا لم تك لديك رغبه فيه ايضا سيجد موقفك احترامه

عدَّاك العييييييييييب...

وأكييييييييد لهجة زي دي نهايتها صافية لبَن...

قواسيب مودتي لك وللأخ دينق...


أبو الحســــــــــــــين...

Quote: وأكييييييييد لهجة زي دي نهايتها صافية لبَن... قواسيب مودتي لك وللأخ دينق...

ابو الحسين باعتبار ما يكون
سلام
ان شاء الله تكون لبن
وما تكون زى الشايلو عبار دينق

قريبي كيفنك
طريقة الحوار الزي دي بتخلي الزول يطولو شبرين لافوق

الأخ العزيز أوسلي،
تحية ود وإحترام

طالما رجعت لأوسلي القديم الذي نعرفه، دعني أعتذر لك عما تفوهت به من كلمات غاضبة تجاهك ماكان لها أن تصدر بين أخوين لولا الغضب الذي إعتراني من تصرفاتك، وبصراحة كل الإخوة الإعزاء الذين تعرفت عليهم من قبل فى هذا النت، وجدتهم هنا كما كانوا عليه فى السابق، إلا أنت ياأوسلي، رأيتك تعزف عزفاً منفرداً فى غاية القبح، أصم آذآني وأزعجني جداً ( دي الحقيقة أكضب عليك عاد؟! )، وأثني على هذه المبادرة الأخوية الطيبة لإصلاح ذات البين وقد كنتُ بصدد طرحها لك هاتفياً حالما أفرغ من بعض مشاغلي الخارجية، وأقترح أن نحدد يوماً للقاء فى البالتوك (يوم الآحاد هى الأنسب بالنسبة لي) وأن يحدد إسم الغرفه هنا فى هذا البوست، وتكون غرفه مفتوحة لكل أصدقاء البالتوك القدامى، لمناقشة هذا الموضوع مناقشة أخوية كما كنا نفعل فى السابق إذا ماإختلف بعضنا البعض لإحتواء الفتنة والمحافظة أواصر المحبة والأخوة الصادقة وعلى ألا نجعل إختلاف آرائنا تفسد ودنا. وأرجو شاكراً منك ومن الأخ العزيز دينق قبول هذا الإقتراح.

ولكما
فائق ودي
وكل إعزازي

Quote: وأقترح أن نحدد يوماً للقاء فى البالتوك (يوم الآحاد هى الأنسب بالنسبة لي) وأن يحدد إسم الغرفه هنا فى هذا البوست، وتكون غرفه مفتوحة لكل أصدقاء البالتوك القدامى، لمناقشة هذا الموضوع مناقشة أخوية كما كنا نفعل فى السابق إذا ماإختلف بعضنا البعض لإحتواء الفتنة والمحافظة أواصر المحبة والأخوة الصادقة وعلى ألا نجعل إختلاف آرائنا تفسد ودنا. وأرجو شاكراً منك ومن الأخ العزيز دينق قبول هذا الإقتراح.

العزيز سيد مراره
اولا لا داع لاعتذار
فالشخص مرات بختلف مع نفسه
اذا كنت فى كل الامور معاتبا صديقك * فلن تلقى الذى لا تعاتبه

اقتراح مقبول وعملى
مواقفتى اكيده وكذلك دينق
بس لابد من اخطار شيوخ البال بهذا اللقاء
نصار
ملامح
ياسر طيفور
عبد الله وداعه

تخياتى

Quote: قريبي كيفنك طريقة الحوار الزي دي بتخلي الزول يطولو شبرين لافوق

يا قريبى
لو كده حنقود كل يوم حوار زي ده
وانت تطول وتطول
على الاقل سيكون عندنا لاعب سله
بمواصفات عالميه


تخياتى

الاخ العزيز أوسلي.

ما عندي أي مانع.

لكن بس شوف العنوان بتاعك ده زي كتابات بريمة.
يعني أنت قلته كباية قهوتي وعبار دينق.
طيب يا عزيزي في السودان الكباية لا تصلح لشرب القهوة فقط فهي تصلح لنفس صلاحية العبابير.
بعدين شايف طارق جبريل ده دخل يناصر أخوه الشايقي على دينق.
لكن أنا معاي سيد مرارة. وبعد ده مافي عوجة تحياتي للاخوة طارق والنزير حجازي.
أنت عندك رقم تلفوني الخاص وممكن تتصل بي في أي لحظة. ولكن ليس اليوم.
الوقت الان متأخر جدا وأنا زايغ من ناس الشغل وتلفوناتهم المزعجة.
أنا في الانتظار.

دينق.

ده السودان

Quote: ده السودان

خالد اتابعك باعجاب

تحياتى

Quote: أنت عندك رقم تلفوني الخاص وممكن تتصل بي في أي لحظة. ولكن ليس اليوم. الوقت الان متأخر جدا وأنا زايغ من ناس الشغل وتلفوناتهم المزعجة. أنا في الانتظار.

الفرده دينق
اليومين ديل ما محتاج اقفل تلفونى
اجازه مفتوحه من الدكتور
بس ما ادانى صوره تانيه للاخ ود محجوب

اتفقنا على اقتراح مراره
لقاء بالتوكى كارب
ساحاول اخطار باك الحكومه( امدرمانيه ) القشاش
تعال بعبارك
وساتى بكبايتى


تحياتى

يا دينق كيفنك

انا قلت انه الحوار الزي دة سمح وبيخلي مستوى المنبر قمة في الروعة
بعدين قريبي ما محتاج ليه لي محامي
بعدين اصبر شوية يمكن من خلال النقاش طرحك يكون الاقرب إلى قناعاتي

تليشة:
اقرب اصدقائي الى نفسي يدعى كومينجي بلال النور
من قبيلة المورو؟؟؟؟؟


التحية لكما وانتما تفتحان نقاشا بشكل حضاري

الأخوة الكرام دينق واوسلى ارجو ان يكون بوست ود محجوب فاتحة لازالة ما علق فى علاقتكما من شوائب.

Quote: نصار ملامح ياسر طيفور عبد الله وداعه

طـريقة معاتبة رايقه..

شـكرا ليكم كلكم وانتم تسهمون في راحة بالنا وتقاربنا..

تحياتي...

مني

Quote: الأخوة الكرام دينق واوسلى ارجو ان يكون بوست ود محجوب فاتحة لازالة ما علق فى علاقتكما من شوائب.

نحن مقتنعين بكلامك يا ود محجوب
بس
البقنع لينا نوريت شنو ؟

ديك البطانة ده يا أوسلى خليه شايل قفتو حتى يأذن ديك الصباح

Quote: ديك البطانة ده يا أوسلى خليه شايل قفتو حتى يأذن ديك الصباح

ود محجوب
ياخ انا كنت شايل قفة ديك العده شهرين بحالهم
لما ضهرى قال الرووووب
نزل القفه من كتف الراجل يا قريبى

Quote: يا دينق كيفنك انا قلت انه الحوار الزي دة سمح وبيخلي مستوى المنبر قمة في الروعة بعدين قريبي ما محتاج ليه لي محامي بعدين اصبر شوية يمكن من خلال النقاش طرحك يكون الاقرب إلى قناعاتي

ود جبريل

الفيك اتعرفت
داير تبيع قريبك قبل بداية السباق ؟


تحياتى

Quote: طـريقة معاتبة رايقه.. شـكرا ليكم كلكم وانتم تسهمون في راحة بالنا وتقاربنا..

العزيزه منى
لو اختفت العكاكيز من جنبات المنبر
كل شئ حيمشى تمام


تحياتى


نسيت ان اضيف المفاريك

الاحبة جميعاً

شايف علامات كتيرة لعودة امجاد البالتوك و نحن لها

نتلاقي في الرملة الدقاقة

Quote: خالد اتابعك باعجاب تحياتى

اعجاب قدر كيف يعني ! وصف ؟

أوسلي تحياتي لك مجدداً
والله كلامك وكلام دينق عجبني بلحيل، وياكا أوسلي ال بنعرفو وبس قرض على كدا

وعلى الرغم ياأوسلى من إنو الناس تعافت بعدما تعافت (رأيك شنو فى الجناس التام دا) والمياة رجعت لمجاريها، برضو الغرفة مهمة لمعرفة أسباب المشكلة وعدم تكرارها من الجميع، ومناقشة أوجه الإختلاف ورؤية كلٍ منا لموضوع تراجي مصطفى، و د. مصطفى محمود وعصام أحمد فأنت بالنسبة لك أعداء وهم بالنسبة لنا أخوان ونحبهم جداً - ومابنفضلم عليك - هذه هى الحسنة الأولى، والحسنة الثانية هي كما ذكر الأخ العزيز نصار دعوة للتواصل من جديد عبر البالتوك وإعادة سيرته الأولى.

أرجو أن لاتنسَ ذكر إسم الغرفة هنا يوم الأحد القام إن شاء الله، وأن ينتبه كل مشارك لفتح قائمة الأعضاء الخاصة به فى البالتوك وعدم إغلاقها حتى يتسنى لنا الدخول للغرفة عن طريق ال"Invitation" بكل سهولة بعد عملية بحث وإضافة الإسم أوف لاين.

وبرضو عايزين نشوف عمو "أنور الشيخ" (البعيو)، وعمو عبد المنعم سيد أحمد"منعم4" وعمو "دبيب"، وعمو أيمن "الأزهري 2" وآخيراً لا آخراً عمو نزار الخواض "الخواض" والدعوة مفتوحة للجميع.

ولك ولضيوفك الكرام فى هذا البوست
فائق حبي
وكل إعزازي

سيد مراره
سلام
اتمنى ان يلبى الزملاء البالتوكيين دعوتك
فبالاضافه لما ذكرت معنا هنا ايضا الزملاء
حسن 6
اسعد ابراهيم
جمال هوبفل
مارد
حسام يوسف
ابو الريش
والكوز هشام امين


اها يا شباب رايكم شنو فى دعوة الاخ سيد مراره ؟

الأعزاء
جاز وأوسلى
بدلو العبابير والكبابى
لا تجعلو الحوار يبعدنا عن تلك الايام الجميلة

وتحياتى من خلالكم لشيوخنا
ملامح ونصار

وكل الأعزاء المرو وال ح يمرو من هنا

محبة دائمة
mcnimir

والله يا ريت ياعمو* أوسلي الناس دي كلها تلبي الدعوة، وقد سعدتُ بمعرفة حسن ستة والمك نمر "ياسر طيفور" معانا ومرحب بيك يا أبو الياء ياملك (أوع تكون بس نسيتني، كنتا بعمل ليك "إنفايت" طوالي ، وبرضو يا أوسلى هنا معانا "بشار" و "ود الشيخ" أحمد عبد الله.

وبعدين يا أوسلي إنتا الغرفة دي عايزا تكون عزابا ساي وللا شنو؟ طعم الغرفة دي يا أوسلي الله يطعما عليك دنيا وآخرة
وهنا برضو شايف مجموعة كويسة من أخواتنا الفاضلات معانا (وياريت نشوفم برضو):
1) عسوللللللللللللللللة (حقو اللي عندو إيميلها يرسل ليها إيميل علشان تجيء وتكون آدمناية الرووم) وفي رجال كبار بخافوا منها ويا البالتوكيين عسولة دي إتذكرتوها وللا نسيتوها؟!
2) سوما
(3) نسمة
(4) سيزو (سوميتا)
(5) زولة 1 2 3
(6) الكلاكلة صنقعت
--------------------
*عمو دي كانوا البنات فى البالتوك بقولو للناس العجائز يا عمو إزيك الكلمة دي كانت بتزعلم وتغيظهم شديد وخصوصاً عمو أنور الشيخ وقام العجائز عملوا الهجوم خير وسيلة للدفاع، وشبكو ليك أي واحد ياعمو ياعمو حتى لو كان عمرو أقل من تمنتاشر سنة، وهى عملية خبيثة لجعل كل الشيبة والشباب سواسية أمام العمومية

1) عسوللللللللللللللللة (حقو اللي عندو إيميلها يرسل ليها إيميل علشان تجيء وتكون آدمناية الرووم) وفي رجال كبار بخافوا منها ويا البالتوكيين عسولة دي إتذكرتوها وللا نسيتوها؟!
2) سوما
(3) نسمة
(4) سيزو (سوميتا)
(5) زولة 1 2 3
6) بت القبائل
7) نها ج
هاديه


واتمنى ان تزدان الجلسه بوجود الشاعرين
منعم 4 ودبيب
والرجل الخلوق عوض لله احمد الطيب ( osli )
حقو نعمل بروفه بكره
رايكم شنو ؟

اعملوi اد ل

osly2

سيد مرارة
كيفك يا حبيب
كانت أيام رائعة
وبالمناسبة روووم مافيها حبشى، ما بتنفع معاى
حبشى فاكهة البال وراحة البال
تحياتى ليهو
تعرف يا أوسلى
كل الchكس الكان قاشر بى ال blue nick name، عملو ليهم سيد مرارة
كمل الفيزا خلاها على الزيرو
لما ودوها collection agency
عليك الله يا أوسلى سيد مرارة ما إتلوم فى صاحبو مكنمر؟؟؟
يعنى الواحد إلا يلبس ليهو طرحة !!!
لكن ما مشكلة يا سيد مرارة
لا إتكسرت القزازة
ولا إتدفق الفيها
هسع تعمل لى blue nick هنا فى سودانيزأونلاين
_________
لو لسه بتمشو البال يا سيد مرارة وأوسلى
أرجوكم بلغو تحياتى لك الحلوين القدامى
وقول ليهم مكنمر القيرل فريند منعتو البال
وصار (مشلهت) البال
وبياكل فول كلو يوم
حليلو

Quote: واتمنى ان تزدان الجلسه بوجود الشاعرين منعم 4 ودبيب والرجل الخلوق عوض لله احمد الطيب ( osli ) حقو نعمل بروفه بكره رايكم شنو ؟ اعملوi اد ل osly2

أثني يا أوسلي، وبعد ما أفتح الرووم ح أعمل لكل من منعم4 ودبيب ماسنجرات وكل الحلوين الماشافو البوست دا مسنجرات، وح إتصل عليك وعلى دينق بعد إكتمال فتح الغرفة ومعرفة الزمن المناسب لكل منكم (وخصوصاً يوم الأحد صعب مع دينيق وكل الإخوة المسيحيين العايزين شاركوا، نشوف وقتهم الأنسب فى هذا اليوم) وزي ماقلتا يا أوسلى ح تكون بروفه ساي الليلة وتكون غرفة إسبوعية للتواصل إن شاء الله. ح أسميها (كباية) قهوة أوسلى و (عبار) دينق إلا دينق يعترض وفى الحالة دي كبايتك دي برضو ح نقلبا عبار

وأتمنى من الجميع حذو حذوك بإيراد طريقة كتابة الإسم لتسهيل عملية الإضافة واللقاء

ولي عودة

Quote: سيد مرارة كيفك يا حبيب كانت أيام رائعة وبالمناسبة روووم مافيها حبشى، ما بتنفع معاى حبشى فاكهة البال وراحة البال تحياتى ليهو تعرف يا أوسلى كل الchكس الكان قاشر بى ال blue nick name، عملو ليهم سيد مرارة كمل الفيزا خلاها على الزيرو لما ودوها collection agency عليك الله يا أوسلى سيد مرارة ما إتلوم فى صاحبو مكنمر؟؟؟ يعنى الواحد إلا يلبس ليهو طرحة !!! لكن ما مشكلة يا سيد مرارة لا إتكسرت القزازة ولا إتدفق الفيها هسع تعمل لى blue nick هنا فى سودانيزأونلاين _________ لو لسه بتمشو البال يا سيد مرارة وأوسلى أرجوكم بلغو تحياتى لك الحلوين القدامى وقول ليهم مكنمر القيرل فريند منعتو البال وصار (مشلهت) البال وبياكل فول كلو يوم حليلو

كيفك يا مك نمر يالذيذ
والله حبوشا لذيذ وعاقل جداً وبتذكر إتعلمتا منو إنو الزول لمن يغلط ويعتذر رجالة ماخوف، فالتحية له، أنا والله أكتر زول مشتاق ليهو "أحمد 102" أو أحمد بكاء يوم ح أفتح بوست وأفتش عن الراجل الجنينة دا ومعلوماتي عنو: إسمو أحمد، حلفاوي، ومن أولاد بحري، ومغترب فى قطر، والله دا ألذ سوداني عرفتو، بس مشكلتو بتاع مشاكل، وبجوط الدنيا ونحنا كاسر ليك عينا بالنكات بتاعتو، وبنشيل ونملس ليهو بالرغم من إنو زول مهبب وبقول أي حاجة عايز يقولها ، بس راجل قلبو أبيض، والغريبة تعرفت على أوسلي دا عن طريق شكلة بينو بين أحمد البكاي، وعملنا ليهم غرفة صلح، ومن اليوم داك أوسلى بقى فردتنا.

حكاية البلو نك نيم: إنتو يامك نمر ماكنتوا عاملين فيها شرامة وتفاتيح نيويورك وماقادرين تعملوا لي نفسكم "بلو نك نيم؟!" ملح؟! ، وبالمناسبة كان البلو نك نيم أبو الرخاء، تلاتة أسماء بي 9.99 $ تشتري واحد وبدوك إتنين مجان لأصحابك، وبعد دا كلو فى جماعة (ما ح أقول أساميهم من كندا بطلعو مجان بالسلفكة، والعرب والسعوديين كانوا تخصص فى الحاجة دي، ولمن كشفوهم بقوا بسرقوا النك نيم البلو، والله النت دا فيهو كترة مصائب). وبعدين القيرفريند بتاعتك دي، دقسها وأدخل "أندر كفر"، بمناسبة الأندركفر دي يامك نمر، أحرا (وليس أحلا) حاجة فى البالتوك، تكون مجكس ليك واحدة وتجيك أندركفر وتقعد تشاغلك وإنتا تنداح معاها، وتقوم تسألك عن زولتك (اللي هي نفسها) وتقوم تقول ليها ياخي دي فردة ساي مافي شيء بيناتنا، وتقوم تدردقك، وتقول ليك بتحبها؟! وغالباً الرد فى الحالة دي بكون، يحبوا ليها شنو عليك الله دي واحدة وهم ساي رسلت لي صورتا وشكلا زي الجدادة اللي داقها مطرة ، والله مرة أخوك دقس دقسة زي دي، والله إتلطش جنس لطيش وخلى البالتوك تلاتة شهور، والبركة فى الأجاويد ناس أوسلى ودينق وكيلر والمنصور، دخلوا واسطات وحلو المشكلة، إني كنتا بهزر ساي والله بالجد كانت أيام شقاوة وأيام حلوة بالجد، والناس كلها أخوان، وسرها فى طرد الكيزان من البالتوك ونبذهم من مجتمعاتنا التى لا تشبههم ولايشبهونا.

البالتوك آخر عهدي بيهو 2003 وتاني من ديك وعيك يا مك نمر، وحاولتا السنة دي أدخل والله لقيتو ليك حاجة مقرفة جداً، وما قدرتا أصبر أكتر من ربع ساعة، وفارقتو ليك فراق الطريفي لي جملو.

يلا نشوفك بعدين يا مك نمر، والناس ما ح يكون عندها صبر زي زمان، ممكن نقعد ساعة واحدة بس الناس تصالح وتتواصل كل إسبوع، ولو خايف من القيرفريند بتاعتك تعال أندر كفر، والله لو بقت وداعية ما ح تنقشك بس أوع الموضوع يقوم يسخن وتمسك المايك وتتكلم

salam
mrara @ mc nimir
keef 7alkoom

BRB
gv
nv
bv
tyt
111111111

bellahi ma eshtaheeto al kitaba be lo`3at al pal talk

t7yati

w/s Osly ya laziz
loooooooooooooool
شكراً أوسلى ودينق على اللقاء الهاتفي الجميل، وسنواصل عبر البالتوك حالما يحل الأخ العزيز دينق مشكلة النت ويستقر به الحال

thx
I gtg now
lol

أكتر كلمة غياظة فى الإختصارت يا أوسلي لمن تقول للناس أنا ماشي I gtg ويقوموا يكتبوا ليك gmt (قشة ما تعتر ليك)
loooooooool

يلا كونوا كلكم بخير وإسبوع الجري بدأ، ونتلاقي فى الرملة الدقاقة