جمعية المحبة السودانية السودانية ..

هذه الجميعة غير مسجلة في أي مكان ولا أوراق رسمية ..
إنما مكانها هنا في هذا المنبر ..
أسباب تكوين هذه الجمعية ..
ما يحدث فيه من فجور في الخصومة أدمنت عليه بعض العضوية وأصبحت الشتائم بدل الحوار ..
وبلدنا تتمزق يميناً ويساراً شرقاً وغرباً والغول يعيث فيها فساداً ..
ليس هناك شروط لقبول العضوية سوى الحب لهذا الوطن المسمى السودان ..
شعارنا ..
أنا سوداني أنا ..
رسوم العضوية ..
أفديك بالروح يا موطني ..
الجنسية ..
جعلي ودنقلاوي وشايقي ايه فايداني
غير ولدت خلاف خلت اخوي عـــاداني
خلو نبانا يسري مع البعيد والدانـي
يكفي النيل ابونا والجنس سـودانـي

Quote: الجنسية .. جعلي ودنقلاوي وشايقي ايه فايداني غير ولدت خلاف خلت اخوي عـــاداني خلو نبانا يسري مع البعيد والدانـي يكفي النيل ابونا والجنس سـودانـي

الحِبيِّب معتصم...

أولاً صباحك زين يا اخوي وكلللللللللل (العِقد الفريد) المعاك بالرياض منننننننن أبي جهينة وتمبس لييييييييييييييييي أبو إيمان وإيمان...

ثانياً الحمد لله أن ساعدني الوقت لكي أكون أول المسجلين في هذه الجمعية (جمعية المحبة والوئام ... جمعية نبذ الكراهية والخصام... جمعية سوا سوا عالي المقام)...

ثالثاً قواسيب مودتي لك ولكل الإخوة الحا ينزلو مطر للتسجيل في هذه الجمعية بإذن الله تعالى...


أبو الحســـــــــــين...

سجل عندك ....
ولى عندك رأي ؟؟

أفو يا حميد ..
رأينا إنت عارفه ..
ألف مرحب بيك يا حبيب ..


مطايبة شدييييدة ..

أبوالحسين ..
كيفك يا حبيب ..
ألف مرحب بيك في الحوش الكبير منور والله ..

يسعدني إنك تكون أول المسجلين في هذه الجمعية والتي شعارها المحبة والسلام ..
يؤلمني كثيراً ما يحدث هنا من صراع وبلدنا وإنسانها في أمس الحوجة لنا ..
ليس هناك خلاف في إختلاف الأفكار والتوجهات ولكن بأدب نؤسس له وننتهجه ..
وعينا على السودان بكل إختلافاته بحثاً وراء إستقراره وأمنه وسلامه ..
وبعيداً عن النظرة الضيقة وشخصنة الخلاف ..

شكراً يا أبو الحسين ..

الاخ معتصم دفع الله
لك التقدير الشدييييييد..هذا مانحتاجه في هذه الرحلة !!
أرجو تسجييلي ! عاوز أبقى الرئيس !!
عادل سمير

و الله يا معتصم صدق اللي قال ...

لا يأتي من الجميلين غير الجمال...



هذا ما عهدناه فيك ....


ربنا يحفظك..

و سجلني معاك لو ممكن.

خالد

وما ذهبنا لمواضع الجمال إلا ووجدناكم يا خالد ..
شكراً كثيراً لهذه الثقة ..
ونتمنى أن تصب كل الجهود لرفعة السودان وإستقراره ..

خالص تحياتي ..

شكراً جميلاً يا عادل سمير ..
من هسي أعتبر نفسك الرئيس يلا باشر مهامك ..

هي دعوة للتسامح وبناء أدبيات جديدة لسودان ننعم فيه جميعاً بالسلام والمحبة ..
تبدأ من هذا المنبر لتعم كل ربوعه ..
وأعلم تماماً انو المسألة ليست بالسهلة ..
ولكن بوجود إخوة أمثالكم سنصل ..

محبتي ..

معاك يامعتصم


وبرضو للطيش

شكراً يا ملكي ..
أها توجناك ملكة للجمعية ..

معاً لنبذ الخلافات ..
ولننأى بأنفسنا عن الصراعات الشخصية ..

خالص محبتي ..

Quote: هذه الجميعة غير مسجلة في أي مكان ولا أوراق رسمية ..

يا معتصم يعني هسه الجمعية دي ما فيها مكتب تنفيذي

ياخي كنا عايزين لينا نائب رئيس


ليت الجميع هنا تتسم روحهم بالمحبة والسلام

السودانية السودانية

فلنلم الشمل يا جماعة

عافاك يا رئيس العصابة

الريس أبوجهينة ..
تحيات المحبة والسلام ..

هذا ما قصدته يا ريس لم الشمل ..
ليتنا نعي بأن الخطر الذي يحدق بالبلد مننا نحن أنفسنا ..
بمثل هذه الصراعات والخلافات التي توخرنا كثيراً وتدمرنا ..

كن بألف خير ..

يا انعام الرئاسة أديناها لعادل سمير ..
ومافي مانع نديك نائب الرئيس ..

Quote: ليت الجميع هنا تتسم روحهم بالمحبة والسلام

وهذا ما نتمناه ونرجوه ..

لك المحبة والسلام ..

دا الكلام التمام
وطن وافي علي الدوام

سلام

انا معاكم كمان

شكراً يا سيف مساعد ..
يلا إيد على إيد تجدع بعيد ..
بتكاتفنا وتسامحنا سنبيهو البنحلم بيهو يوماتي ..
وطن شامخ وطن عالي ..

يديك العافية يا حبيب ..

الله يعلي مقدارك يا نصر ..
دا العايزنو وطن يسع الجميع ..
دستوره المحبة والسلام ..

محبتي ..

الشفيف معتصم
فوق دربك
حمزاوي للطيش

ياها المحرية فيكم يا خال ..


فليعش سوداننا ..
علماً بين الأمم ..


محبتي ..

العزيز معتصم،،

- أخذت الفكرة مني بطيب خاطر وتوارد خواطر،،

- كنت أفكر في ماهو أكبر من الجمعية ،،

- حزب سياسي : يحكم السودان،،

- شرط عضويته : حب السودان وإحترام الآخر،،

- أنا معكم : جمعية وحزب،،

- لا تدع هذه الفكرة تصغر أو تموت ،، هي والله الخلاص بإذن الله،،

- علاقاتنا الآن تنبؤ بكوارث وخذ ما يحدث من تراشق عنيف في هذا المنبر مثالاً ،،

- معتصم : بشر لدعوتك من الآن، لا حل آخر غير عودة السودانيين إلى ذاتهم فما يحدث الآن
دخيل عليهم ولا يشبههم،،
- صدقني أنت صح ،،
وفقك الله ،،

الحبيب عبداللطيف بكري ..
تحياتي يا زول يا جميل ..

والله بقينا مشفقين على مثلنا وتقالدينا التي توارثناها من أجدادنا ..
ومشفقين على وطننا السودان وعلى مواطنيه من ظلم ذوي القربى ..
يا سلام على توارد خواطرك ..
طالما في أمثالكم لا خوف على الوطن ..
الفكرة حلوة ويا ريت ناخد بيد بعض للبناء والإعمار ..
البناء الحزبي والديمقراطي ومنظمات المجتمع المدني لننعم بحرية وسلام دائمين ..
كلنا فكرة ووقفة رجل واحد سنصل إلى ما نصبو إليه ..
ما أكثرها الكوارث التي تحدق بنا زي ما قلت ..
يلا لي قدام ..

شكراً جميلاً ..
ولك خالص المحبة ..

العزيز مـــوو آآآآي دة الشغـــل ... دة الشغـــل...

سجلني معاك لو في خـــانـــة شـــاغــرة .... و لو مـافــي خُتنــــي إحتيــاطــي في ال "waiting list " و انـا جـاهـز من

مجـاميعـــو ...

مــع مــودتــي الخالصـة لإســرة الجمعيــة

هيثــم،،،

يا هيثم انت زول ( أساسي ) ما يجي ناطي هسي ..
نحن عايزين كل يدين الوطنيين والحادبين على مصلحته ..
عايزين نتكاتف جميعاً من أجل الوطن ..
معاً لنبذ كل الخلافات والصراعات وننأى بأنفسنا منها ..

يلا أستلم مهامك من هسي ..

محبتي ..

يا سلام عليك يا ياخ
سجل عندك
عادل محجوب
سفير الجمعية بقطر

يا سلام عليك انت يا عادل يا هميم ..
لتجاوبك السريع لندائنا هذا ..
وهذه الثقة الكبيرة ..
أعتبر نفسك سفير من الآن والدعوة مفتوحة للجميع ..

وفقكم الله ..

محبتي ..

http://www.sudanit.com/uploadvideo/protected/habob.mp3

ابو الحسين تاني ... خت ليك طوبة ..!!



طوبى .. لمن كان بهذا الجمال يا صوم !!

كل من دخل هذه الجمعية فهو آمن

اعتمدني يا معتصم ..

تامبا يا شقيق ..
تعرف بعد إذن الجماعة الحضروا كلهم هنا ..
في أن تكون الناطق الرسمي باسم الجمعية دي ..
عشان أنا عارف حبك للوطن وهذا المكان ..
وغيرتك عليهما ومن تحب ..
وثقتنا فيك بأنك لا تخشى في الحق لومة لائم ..
شكراً لأنك دوماً معنا ..

محبتي لك بلا حدود ..

Thanks alot Motasim
Count me in pls

Quote: هذه الجميعة غير مسجلة في أي مكان ولا أوراق رسمية .. إنما مكانها هنا في هذا المنبر .. أسباب تكوين هذه الجمعية .. ما يحدث فيه من فجور في الخصومة أدمنت عليه بعض العضوية وأصبحت الشتائم بدل الحوار .. وبلدنا تتمزق يميناً ويساراً شرقاً وغرباً والغول يعيث فيها فساداً .. ليس هناك شروط لقبول العضوية سوى الحب لهذا الوطن المسمى السودان .. شعارنا .. أنا سوداني أنا .. رسوم العضوية .. أفديك بالروح يا موطني .. الجنسية .. جعلي ودنقلاوي وشايقي ايه فايداني غير ولدت خلاف خلت اخوي عـــاداني خلو نبانا يسري مع البعيد والدانـي يكفي النيل ابونا والجنس سـودانـي

الابن الغالى معتصم ود دفع الله

والله دخلت المنبر ونفسى منقبضة

لكن لاقانى بوستك الجميل دة فازال غمى وهمى

سجلونى معاكم

وسيروا وعين الله ترعاكم

بلادا فيها زينين زيكم....ما بتجيها عوجة تب... باذن واحد أحد

بس ختوا ايدينكم فى ايدين بعض...ويد الله مع الجماعة

تحياتى

دكتورة مهيرة تحياتي ..
وسلامتك من قبضة النفس ..

هي دعوة لنشر ثقافة التسامح والسلام بيننا ..
دعوة للم الشمل زي ما قال الريس أبوجهينة ..
دعوة لوضع السودان فوق كل صراعاتنا وخلافاتنا ..
دعوة لنشر المحبة في هذا المكان الذي جمعنا ..

وشكراً كثيراً لكلامك الطيب الذي أثلج صدورنا ..

محبتي وتقديري ..

شكراً ليك انت يا سعدالدين على تجاوبك معنا ..
ودي المحرية فيكم ..
وتأكد إنو وطن فيه أمثالكم لن يضيع أبداً ..

كامل المحبة ..

تسلمي يا سمرية ..
بي قلمك ووقفتك معانا كل شي ح يكون جميل ..
عايزين لينا قصيدة للوطن ولأهل الوطن ..

شكراً لأغنية أنا سوداني أنا ..

محبتي ..

الغالي معتصم
سلامات

Quote: هذه الجميعة غير مسجلة في أي مكان ولا أوراق رسمية

نسجلها في قلوبنا .

Quote: إنما مكانها هنا في هذا المنبر

فليكن مكانها الفؤاد بمساحة مليون مبل محبة للوطن .

Quote: شعارنا .. أنا سوداني أنا ..

سودانيون نحن لاقبيلة ولا طائفة ولا حزب .
السودان اولا السودان اخيرا .

سجل يامعتصم .

ونعم القلوب العامرة بحب الوطن يا يوسف ..
نعرف صدامكم ومنافحتكم من أجله ..
لنمد إيدينا لبعض من أجل الوطن وأهله ..
ومن أجل منبر يضمنا جميعاً بالحب والمودة ..


كن بخير يا صديق ..

حكمـة

الماعنــدو محبــة ماعنــدو ما عنــدو الحبــة
والعنـدو محبــة ما خلــى الحبـــة

معـا نحـب بعضنـا بعضــا - ننبـذ الفرقـة والشتـات نبنـى وطنـا لبنتـة الحـب والوئـام ودعوة جميلـة نأمل أن تلقـى آذانـا صاغيـة

العزيز معتصم ,


نحنا بلا المحبة و المحنة جينا المنبر ده كايسين شنو؟

اها سجلنى يا معتصم .




كل المحبة ,


نادية السر

اجعلنى على خزائن الارض

القروش
القروش
سجلنى امين عليها

الحبيب أبوقوتة ..

نعلم يقيناً أنك ستكون أمين عليها ..
ونعلم حبك لهذا الوطن والوطن الكبير ..
وبوجود أمثالكم لا خوف لا خوف ..

محبتي ..

العزيزة نادية السر ..
يا ألف مرحب بيك وبي محنتك ..
دا الكلام الجميل وعايزنو يسود الحب والمحنة بين الجميع ..
يلا يدك معانا ولي قدام ..

محبتي ..

نأسف للخطا الفني الغير مقصود ..

المداخلة اسفل الصفحة

Quote: معـا نحـب بعضنـا بعضــا - ننبـذ الفرقـة والشتـات نبنـى وطنـا لبنتـة الحـب والوئـام

شكراً يا عمر على كلامك الجميل ..
وندعو معك لنبذ الفرقة والشتات ..
ومعاً لوطن المحبة والسلام ..

محبتي ..

معتصم الجميل سلام,
اذا بتدوني الماليـه بسجيل معاكم لانو مافيها شئ الواحد يستنفع بيهو غير

Quote: أفديك بالروح يا موطني ..

رسوم الاعضاء اها الراي شنو?
ودي

الأخ العزيز معتصم

الأصل الطيب لا ينبت إلا طيباًً

نحن فعلاً في حاجة إلى هذا المستوى من الفهم الرفيع .
وبالتوفيق بإذن الله .

دومه

تحياتي يا خاله دومه ..
كنتِ من ضمن كثيرين قام على أكتافهم هذا المنبر ..
فكان جميل بكم ولا يزال ..
وبكم سيظل الوطن هنا وهناك أجمل ..

كامل محبتي ..

دا من طيب أصلك يا محمود ..
هي دعوة لنبذ الخصام والإحتراب ..
دعوة للتسامح ..
من أجل أشياء جميلة قمنا عليها وتربينا ..
ويجب أن نعض عليها بالنواجز ..
وبتكاتفنا مع بعض سيتحقق كل ذلك ..

كامل المحبة ..

يا سلااااااام عليك يا oudenoord ..
جعلت دمعة تنزل مني ..
أفديك بالروح يا موطني ..
ما أجملكم أهل بلادي وما أعظمكم ..

شكراً جميلاً ..

معتصم
الزول السمح الفات الكبار والقدرو
السماحة هي بشتروها ؟
ما بشتروها
السماحة ما بتطلع الا من نفس سمحة ونقية
سجل يا حبيـــــــــــب
اللمين ود عثمان
1-المحبة
2-المحبة
3-المحبة مليارات

معتصم ..

يا رجل كم أنت جميل .. و حقيقي .
ما أوسم دعوتك ..
و أنبلها ..

ليتنا يا معتصم .. ليتنا .




سجّل ..
عماد عبدالله

ها أنت قلتها يا عماد عبدالله ..
ما أجملنا حين نتكاتف ..
وما أجملنا حين نسمو فوق الصغائر ..
وما أجملنا حين نضع الوطن نصب أعيننا ..


لك فائق المحبة ..

كل المحبات التلاتة ديل سجلناهن يا الأمين ..

معاً لوطن سليم معافى ..


محبتي ..

سجل عندك :

فرانكلي ومعاه كمال سيد الأسم

معكم من أجل سودان الغد ثري بإنسانه ثري بموارده ثري بثقافاته ثري بتعدداته

سودان الإنتماء إليه فخر لكل من يكن الحب لهذا الوطن ولساكنيه

قد نختلف في رؤانا ولكننا نتفق في عشقه وحبه

تحياتي كمال

Quote: معكم من أجل سودان الغد ثري بإنسانه ثري بموارده ثري بثقافاته ثري بتعدداته سودان الإنتماء إليه فخر لكل من يكن الحب لهذا الوطن ولساكنيه قد نختلف في رؤانا ولكننا نتفق في عشقه وحبه

وهل هناك أجمل من كل هذا الحب ..
شكراً يا كمال فرانكلي ..

كامل المحبة ..

يا معتصم كيفنك

ما عايزين ليكم رئيس

تمام يا طارق ..
كيف أخبارك ..
معليش الرئيس ونائب الرئيس دي محجوزة ..
لكن ممكن نديك مستشار ولا مساعد رئيس ..

كل الحب ..

معتصم..

سجلني معك..

فأنا..

أحلم بوطن كبير القلب..

يملؤه الحب..

يالفي الشمال صباحكم خير..

يالفي الجنوب مساكم نور..

يالفي الشرق منك سماح و بأعتذر..

يالفي الغرب..حقك علي.. تقصيري نحوك مالو حد..

يالفي الوسط..ياكا السند..ياكا العضد..

أمسك قوي..

أوعى عقدك ينفرط...

ياسلالالالالام يامعتصم كل هذه الوفود ويكون مقدمي متأخرا !!!!!
أنا معكم قلبا وقالبا

دائماً حاضر يا عادل جبارة ..
عمر الله قلبك بالإيمان وحب الوطن ..

شكراً جميلاً يا صديق ..

Quote: أحلم بوطن كبير القلب.. يملؤه الحب.. يالفي الشمال صباحكم خير.. يالفي الجنوب مساكم نور.. يالفي الشرق منك سماح و بأعتذر.. يالفي الغرب..حقك علي.. تقصيري نحوك مالو حد.. يالفي الوسط..ياكا السند..ياكا العضد..

يا لجمال كلماتك يا سناء خالد ..
وروحك السمحة المحبة للوطن وأهله ..
هكذا نحلم معك ومعاً بالخير والسلام والتنمية ..
لوطن أنهكته الحروب وظلم أهله وجورهم ..

شكراً جميلاً ..
لك كل الحب والتقدير ..

Quoteمعتصم : بشر لدعوتك من الآن، لا حل آخر غير عودة السودانيين إلى ذاتهم فما يحدث الآن
دخيل عليهم ولا يشبههم،،َQuote

وقال تمبس: من دخل هذه الجمعية فهو آمن ..

وقال الزميل الذي أقتطعت منه العبارة أعلاه: ليس جمعية بل حزب شروط عضوية حب السودان
وقبول الآخر ..

الواقع يثبت أننا في مرحلة تتباعد فيها الخطى بين أهل السودان
ولا بد من حكمة تلم الشمل بعد أن فرقت أهل السودان المصالح
والمظالم والسياسة واتسعت الخروق على جميع الراتقين ..
وها هو معتصم يبدأ مسيرة المليون ميل بخطو للم الشمل .. فهلا
تضافرت لها جهود مخلصة لتثمر حقا وصدقا.. اللهم آمين

تحياتي محمد عبدالجليل ..

فعلاً زي ما قلت تفرقنا وتبعادت بيننا الخطى ..
والحكمة أصبحت غائبة فبدل من توحدنا وتكاتفنا إختلفنا وتشاكلنا ..
العداوة أصبحت بيننا والعدو الحقيقي يمرح ومبسوط من كل هذا الخلاف والتشتت ..
فكرة إنشاء حزب أو كيان مشروع كبير يحتاج فعلاً لوطنيين مثلكم وهو ليس بالسهل وليس بالصعب وما نفتقده فعلاً هو البناء الحزبي المؤسسي ويمكننا الأخذ بتجارب الغير ولا ضير في ذلك ،الحرية والديمقراطية هي غايتنا وهذه لا تأتي بين يوم وليلة فهي تحتاج لأقوياء يشغلهم الوطن وحبه ..

شكراً للثقة والإضافة يا محمد ..
متعك الله بالصحة والعافية ..

الأخ الأكرم معتصم سلام ومحبه
لأنك انسان كلك حب وجمال
شوف عدد الجميلين والجميلات
الذين أتوا يلبون نداء الوطن
الغالي بكل الحب والتعظيم
كلي امل ان يتناسى الجميع
قبليتهم وتحزبهم وجهويتهم
وان نضع السودان امامنا..
وسجلني انشاء الله وزير طاقه بس
ماعندي مانع..
عزالدين محمد عثمان

ممكـن أكـون عضوة نشطة?
بوست فكرته نبيلة ولطـيفة زيك يامعتصم..

مني

الوطن معتمد عليكم يا منى ..
شكراً لتجاوبكم معنا ..

محبتي وتقديري ..

سلام يا عزالدين ..
شكراً لكلامك الجميل دا ..
الطاقة العايزنها حب الوطن والإيمان به والعمل من أجله ..
ودي ظهرت مع تجاوبكم الجميل هذا ودا نبع ما بجف يعني بترول دائم ..
سنصدره للعالم أجمع ونقول ليهم ياهم ديل أهلي ياهم ديل السودانيين ..
وحقيقي سعدت جداً لهذا التجاوب الكبير ..
ربنا يجنب وطننا السودان وأهله الكوارث وظلم ذويه ..
وينعم عليه بالتنمية والسلام ..

كامل محبتي ..

معتصم دفع الله Dear

Pleas add my name to the new association. Yes for peace, love, tolerance, respect, and brother hood between all Sudanese irrespective of their religious, cultural, and ethnic backgrounds

تحياتي المعز أبونورة ..
فعلاً هذا ما نحتاجه لوطن يعيش في سلام وإستقرار ..
معاً لرفعته ونهضة إنسانه ..

شكري الجزيل ..
مع خالص المحبة ..

أنا معااااااااااكم !!

ومعاً من أجل قيمنا السمحة والوطن الغالي ..

كامل المحبة والتحية للحبيب الله جابو ..

معتصم يا راقى سلام عليك واشكرك على هذه الدعوة الحكيمة
لانها بصراحة سوف تخرج الناس من ما هم فيه من فرقة وضيق الى لم الشمل مره اخرى وتجعل كل واحد منهم يراجع نفسه بنفسه وان يكون حريص على الا يفسد سعادة الاخرين الذين ليس لهم ذنب فى تعكير صفاء هذا المكان الجميل سوى تواجدهم فيه الذى ظنوا انه سوف يكون مصدر من مصادر السعادة التى شحت فى هذا الزمان .

طبعا لى عظيم الشرف بتسجيلى فى العضوية

بالمناسبة انا من بورداب الرياض الجداد

اكرر شكرى لهذه الفكرة الحلوة

احمد العمار

أخي الحبيب معتصم ود دفع الله

يا جميل يا راقي إحساسك ..
ويا جميل يا منتهى الإلفه ..


بالله بسرعة سجلني في الجمعية
قبل ما (الرئيس) يقفل الدفتر
ويخليني (لايص) أزازي ، وغير آمن ،

مش (فردتك) تمبس قال من دخلها
فهو آمن ، عاد وين نلقى الأمان
كان ما لقيناه في جمعيتك
والتي عمادها القلوب ، من أجل
وطن حدادي مدادي معافى ويجمع
أهله في حب وتآخي ووئام .


أضم صوتي لصوت أخي ود السماني
وأقول ليك (نسجلها في قلوبنا)
العامرة بحب السودان وحب أهله
الطيبين من أمثالكم .

وأردد مع أخي عمر البعشي
الحكمة القائلة :

Quote: الماعندو محبــة ماعنــدو ما عنـدو الحبة والعنـدو محبــة ما خلــى الحبـــــــــة

وسجل ياتاريخ مولد أروع وأعظم جمعية حب .

سير وعين الله ترعاك ، وقلوبنا معك يا رائع .




( ليمو )

اخي الحبيب معتصم
سلامات بحجم المحبة التي تنبض في كل قلب عرف نبلكم....
ما أجمل الطرح الذي لا يتأتى إلا من هم مثل معتصم دفع الله ... دمت أخي بؤرة حب وجمال لكن لي رجاء أن تتيح لي فرصة الترشيح للجنة التنفيذية لهذه الجمعية على أن تكون على النحو التالي :
1 - الأمين العام
معتصم دفع الله
2 - الرئيس
تمبس
3 - السكرتارية :
نادية عثمان


أماأنا فحسبي أن أكون درويشاً في حلقة الحب ( قال يوماً أبونا الشيخ ود بدر رحمه الله ونفعنا بجاهه ... العندو محبة ما خلى الحبة ... والما عندو محبة ما عندو الحبة )... أو عابداً في محراب الجمال ... أسكب فيه روحي وراحي زاداً يضيئ شعلة الحب والجمال في موطني وموطنه.
شكراً كتير يا معتصم

الحبيب مجاهد كيفك يا جميل ..
وما أجملكم حين تستجيبون لنداء المحبة والسلام ونداء الأوطان ..
سيظل الوطن في حدقات أعيننا وسنعمل في صمت من أجله ..
آلمني كثيراً ما يحدث له من تمزق وتفتيت وتشريد لأهله ..
وهذا من صنع أيدينا نحن بنوه ولك أن تنظر حاله الآن إلى أي هاوية هو ذاهب ..
جنبنا الله وأياكم شر العوارض والمحن ..
شكراً لهذه الثقة الرئيس موجود راجع المداخلات ونحن سنكون جنود مرابطين ..

كامل المحبة ..

الدفتر مفتوح يا ليمو وما أظن يتقفل طالما في ناس جميلين زيكم ..
قلوبهم عامرة بكل هذا الحب للوطن ولأهله ..
ويلا إيد على إيد تجدع بعيييد ..
وبتكاتفنا وتعاضننا سيكون كل شي جميل ..

محبتي بلا حدود ..

Quote: لانها بصراحة سوف تخرج الناس من ما هم فيه من فرقة وضيق الى لم الشمل مره اخرى وتجعل كل واحد منهم يراجع نفسه بنفسه وان يكون حريص على الا يفسد سعادة الاخرين الذين ليس لهم ذنب فى تعكير صفاء هذا المكان الجميل سوى تواجدهم فيه الذى ظنوا انه سوف يكون مصدر من مصادر السعادة التى شحت فى هذا الزمان .

دا الكلام الراقي وجميل زيك يا أحمد العمار ..
ولنا عظيم الشرف بوجودك معنا ..
ونحن في إنتظار لقائك مع مجموعة بورداب الرياض في أقرب فرصة ..
ألف مرحب بيك بيننا ..

لك كامل الحب والتقدير ..

الغالي معتصم والغالين الأحبة،،

كل من ساهم بكلمة في هذا الأمر فقد سقى بقطرة صدق وعزة غرساً وريفا نراه يكبر ،،

معتصم:

هذا الموضوع حيوي بالنسبة لي ولوطني الكبير ولكل الذين جاءوا هنا حالمين بعودة الوطن الضال،،


لم أرى ملمحاً لتراجع ،، بل الأمل مزدان بقدوم الأصفياء الأنقياء كل يوم،،

لا نريد كلمة نشاز في هذا البوست : من أحب الوطن وأحبنا في ضيافة المعتصم فليتحكر في سويداء الفؤاد،، أما من رأى غير ذلك فليخرج في صمت وسيجزيه الله خيراً على ذلك ،، على أن يعود إلينا لاحقاً عله يجد ما يسره،،

معتصم :-
دير بالك ،، فورة الأمل إن خبت جذوتها فهي النهاية،، الأمر ليس عسير وهاهي بدايتك فاقت التوقع،،


((تذكروا : بلاداً حوت مآثرنا كالفراديس فيضها منن،،))،،

تحية قلبية أخي عبداللطيف ..
عبرك أحي كل المتداخلين على تجاوبهم ودا نابع من حبهم الكبير لوطنهم ..
ودا شي نحتاجه كثيراً واساسي لبناء الأوطان نشكرهم جزيل الشكر ..

Quote: لم أرى ملمحاً لتراجع ،، بل الأمل مزدان بقدوم الأصفياء الأنقياء كل يوم،،

نحمد الله على ذلك ..
وفقنا الله وإياكم لخدمة الوطن ورفعته ..

كامل محبتي وتقديري ..

مععععععععععععععععععععععععععاكم

يا سلام يا معتصم

فعلا السودان الايام دي في حاجة لمثل هذا

الحب الكبير ولم الشمل ,,,

اتمنى اكبر تسجيلات في هذة الجمعية

عشان تتوثق في وجدان كل سوداني ,,,

دمت معتصم لكل جميل ،،،

السلام عليكم
معاكم ونصين
كمان عندي اقتراح
( اصلي اليومين ديل عامل فيها عبد المصلح المقترحي )
مش بيقولوا
السلام يحتاج الى جيش قوي يحميه
فلازم من فريق قوي يجيد كل مهارات الهجوم والدفاع للتصدي لأعداء الحب
مبدئياً ارشح...
من العضوية الفوق دي
1. منى خوجلي –حارس مرمى
2. تمبس ومعتصم - نص مهاجم ونص مدافع ( حسب الترتيب)
3. دكين .. مهاجم ..لكن يتم تغييروا لما يفقد اعصابو ( لأنو في الحالة دي بيكون عالة على الفريق)
ويكون الفريق في حالة استعداد للدفاع عن المحبة السودانية السودانية ضد كل من تسول له نفسه التعدي على الخطوط الحمراء للحب
والله أكبر والعزة للسودان ( بتاعتنا مش بتاعة الكيزان)

........................
وما الناس إلا هالك وأبن هالك *** وذو نسب في الهالكين عريق

أخـي وصـديقــي الودود معتصـم


تحية قلبية بي شوقي مروية سلام من الأعماق يا نسمه صيفيه

Quote: شعارنا .. أنا سوداني أنا .. رسوم العضوية .. أفديك بالروح يا موطني .. الجنسية .. جعلي ودنقلاوي وشايقي ايه فايداني غير ولدت خلاف خلت اخوي عـــاداني خلو نبانا يسري مع البعيد والدانـي يكفي النيل ابونا والجنس سـودانـي

بلداً تحتوي أشخاص من أمثالك لا بد أن يعم فيها الحب والوئام والتفاني والإخلاص ، شكراً لك على كل جميل تتحفنا به ونحن معكم قلباً وقالباُ ، وعشت يا سودان عالي الهمم . وتحياتي لك ولمن تحب .

كيفك يا عمدة ..
كويس إنك هنا وعارفك ح تكون معانا ..
عايزين لينا سيردباك كويس وأهو لقيناك ..
يلا جهز نفسك وأعمل تمارين ..
بكم القادم أحلى والوطن بخير ..

محبتي ..

سلام يا الزوول ..
بس نسيت انك ح تكون المدرب ..
بعدين دكين دا مشاكس فاولاته كتيرة يمكن يفقد الفريق بعض المباريات المهمة ..
عشان كده خليهو احتياطي

شكراً يا حبيب وخليك قريب ..

كامل المحبة ..

شكراً خالدة ..
على هذا التجاوب وهذه الوقفة التي نحتاجها كثيراً ..

تحياتي ومبحتي ..

الأخ معتصــم
ســلام
سجلني معكم ، ولا يفوتني أن أشيد بروحك السمحة

الحبيب جعفر اسماعيل ..
تكفي روحكم السمحة دي ..
وتجاوبكم الكريم معنا من أجل وطن يضمنا جميعاً ..


محبتي وتقديري ..

يا مو
سلامات

مسجل من ( قولة تيت )


أنا سوداني أنا..

ونحن سجلناك من قولة تيت يا فيصل نوبي ..

سلام وأشواق كتيرة ..

الاخ الكريم


اعتقد اني مسجل

وللتاكيد نسجل تاني

أيها المعتصّمون بحبل الوّد
والمحّبة ... إنّا معكم معتصّمون.
--------------------
شكرا معتصّم على هذا المسعى النبيل

الحبيب عبدالله الحبيب ..
جمل الله أيامك بكل الخير ..
وشكراً لتجاوبك معنا ..

محبتي ..

أكيد مسجل يا دكتور محمد حسن ..

مع خالص الشكر والتقدير ..

قال محبة قال

قد لاتتفاجأ اذا قلت لك انني ضد هذه الجمعية ..
فهذا عهدي ..
لا أويدها ..
بل أناصبها العداء
شعارنا فيها لا صداقة ..
لا محبة ..
بل عداء مستحكم ..
قتال حتى النهاية ..
سلب ونهب .. سفكاً للدماء
تعرض وانتهاك للاعراض ..
كما يحدث هذه الايام من البعض منا ..
قتلنا روح الحوار ..
سلكنا طريق التعرض للاهل والاولاد سبيلاً ..

هذه رسالة من احد الحاقدين على وحدة البورداب اين ما كانوا

اما انا وليد399 فأعلانها صراحة بالانضمام إلى هذه الجمعية الرائعة
كروعة الفتى الاسمر معتصم دفع رجل المحبة والسلام ..
وكل من تداخل مؤيداً في هذا البوست ..
لكم جميعاً الود والحب والاحترام


والسلام ختام ..


ابو ايمان

بسم الله الرحمن الرحيم
عزيزي معتصم
سلامات
يا وطني يا بلد احبابي...
انا سوداني انا...

حاتم هاشم

وطن..حدادى مدادى
ما بنبيهو فرادى
ولا بالضجة فى الرادى
و لا الخطب الحماسية..

******
النقى ... معتصم

كل إناء بما فيه ينضح..


سجلنى عندك..


لك فائق التقدير و الوّد المقيم؛؛

التسجيل قفل ولا نسجل


وبعدين ما معانا استنكاح
قروش التسجيل والاشتراك وادفعو في حفلة هناي ورحلة هناية
من اسع طالبة ونص القيمة

باب المحبة فااااااتح يا بنت عجاج ..
بعدين ما تستنكحينا ساي وتقولي طالبة وما عايزه تدفعي ..
الاشتراك موقفين ليهو زول في الباب ..
هسي عليك الله في رسوم أكتر من المحبة دي ..

تحياتي وتقديري ..

ويقول محجوب شريف ..

وطنا..
الباسمك كتبنا ورطنا
أحبك
مكانك صميم الفؤاد
وباسمك اغنى..
وتغنى السواقى
خيوط الطوقى
سلام التلاقى
ودموع الفراق
واحبك ملاذ
وناسك عزاز
أحبك حقيقه..
وأحبك مجاز
وأحبك بتضحك
وأحبك عبوس
بعزة جبالك ترك الشموس
وما بين ظلالك
افتش وأكوس
أفتش طفولتى وملامح صباى
بناتك عيونن صفاهن سماى
وهيبة رجالك بتسند قفاى
صحى بتملا عينى..
وتشّرف غناى
بحضرة جلالك..
يطيب الجلوس
مهذب أمامك يكون الكلام
لأنك..
محنك
عميق الدروس
مجيد المهابه ومديد القوام
شبابك..
تشابك
شديد الزحام
أراهم..
وراهم
غبار الحياه
مداين..
تعاين
كأمّ العروس
تهلل..
تكلل
جبين الإمام
رزازاً يبلل أغانى الخليل
أصدق كلامك حقيقه وبخاف
أخاف الطريق..
اللى ما بودى ليك
وأعاف الصديق
اللى ما بهم بيك
معاك انتظارى..
ولو بالكفاف
وعنك بعيداً
أبيت الرحيل
وبيك اعتزاز الصباح الجميل
جميع الأغانى اتكالن عليك
جميع الأغانى اتكالن عليك

ما أجملنا حين نجتمع في حب الوطن يا عبدالرحمن عزاز ..
شكراً جميلاً ..

خالص المحبة ..

العريس حاتم هاشم ..
كيفك يا جميل ..
مبروك العرس مرة تانية ووجودك معانا برضو ..
أبقوا عشرة على الوطن وإنسان الوطن ..

محبتي وتقديري ..

يا ولي الله يجازي محنك قطعت نفسنا ..
كويس إنك جيت عشان كنا منتظرنك ..
عايزنك تمسك المقرر يلا أبدأ شغلك من هسي ..

كامل المحبة لك ولإيمان ..

الحبيب الشفيف الظريف معتصم

يا سلام على هذا الحب وأنت من صناع الحب والجمال

فلتكن جمعية المحبة والحب بين كل السودانيين

بداية المشوار الكبير يجمعنا في محبة وعشق هذا

الوطن الكبير 00 وطن الحب والجمال 00 وفي الفؤاد ترعاه العناية 00

معكم بكل محبة 00

مع محبتي ومودتي 00 ويا هو دا السودان الوطن الواحد 00

أستاذنا عثمان سيد أحمد ..
أحد قادة الفن في بلادي وصناع البسمة لأهله ..
شكراً لأنك معنا ..
بالحب نصنع المعجزات ..
وبالحب يكون السلام والإستقرار ..
وبهما تكون التنمية والرفاهية ..

محبتي بلا حدود ..

الأخ الأكرم معتصم
شكرا على كلماتك الطيبات
وربنا يديم الحب والمعروف
بين الجميع

Quote: مش بيقولوا السلام يحتاج الى جيش قوي يحميه فلازم من فريق قوي يجيد كل مهارات الهجوم والدفاع للتصدي لأعداء الحب مبدئياً ارشح... من العضوية الفوق دي 1. منى خوجلي –حارس مرمى 2. تمبس ومعتصم - نص مهاجم ونص مدافع ( حسب الترتيب) 3. دكين .. مهاجم ..لكن يتم تغييروا لما يفقد اعصابو ( لأنو في الحالة دي بيكون عالة على الفريق) ويكون الفريق في حالة استعداد للدفاع عن المحبة السودانية السودانية ضد كل من تسول له نفسه التعدي على الخطوط الحمراء للحب والله أكبر والعزة للسودان ( بتاعتنا مش بتاعة الكيزان)

اتفق مع الأخ الزولوانا ماعندي مانع
العب دفاع خاصه قشاش
ولكم الحب
عزالدين

تحياتي يا عزالدين ..
تعرف أكثر وظيفة في الملعب أحبها قلب الدفاع ..
زمان بنقول عليها سيردباك أو قشاش هسي اتغير المعني ..
أها خليك قشاش بس ألعب نظام 3-5-2 نظام المساكين ودي طريقة مريحة جداً في اللعب ..
بس عايزه ليها لياقة كبيرة ..
شكراً ليك يا ذوق ..

محبتي وتقديري ..

Quote: هي دعوة لنشر ثقافة التسامح والسلام بيننا

الودود معتصم

مشوار الحب بدأ بدعوه ..
معك و بالمحبه واصلين إن شاءالله ،
كل الحب .

حبيبنا مصدق حسين ..
تحيات المحبة والسلام ..
ونحن من غيركم نبقى أيه ..
يلا جهز ليك رسومات ولوحات لزوم الحملة ..

محبتي ..

UP
القومة ليك ياوطني ،،

يقول محجوب شريف ..
ونردد معه ..

حنبنيهو..
البنحلم بيهو يوماتى
وطن شامخ
وطن عاتى
وطن خيّر ديمقراطى
وطن مالك زمام أمرو
ومتوهج لهب جمرو
وطن غالى
نجومو تلالى فى العالى
إراده
سياده
حريّه
مكان الفرد تتقدم..
قيادتنا الجماعيّه
مكان السجنِ مستشفى
مكان المنفى كليّه
مكان الأسري..
ورديّه
مكان الحسره أغنيّه
مكان الطلقه
عصفوره
تحلق حول نافوره
تمازج شُفّع الروضه
حنبنيهو
البنحلم بيهو يوماتى

شكراً جميلاً أخي عبداللطيف بكري ..

خالص التحايا ..

شقيقي الصغير (الكبير) المعتصم

Quote: هذه الجميعة غير مسجلة في أي مكان ولا أوراق رسمية .. إنما مكانها هنا في هذا المنبر ..

والمنبر صار وطناً مترامي الأطراف يحتضننا بكل الحب والود الذي لا تفسد له الخلافات قضية ..

Quote: شعارنا .. أنا سوداني أنا ..

وتصور كيف يكون الحال لو ما كنت سوداني واهل الحارة ما اهلي .

Quote: أفديك بالروح يا موطني ..

ونبذل كل نفيس وغالي في سبيله .

Quote: جعلي ودنقلاوي وشايقي ايه فايداني غير ولدت خلاف خلت اخوي عـــاداني

دي مصيبتنا الكبرى .. لكنها الى زوال انشاء الله خاصة بعد ما ود الجعلي يتزوج بت الدنقلاوي وولدهم يتزوج بت واحد حلفاوي متزوج شايقية .. وهلمجرا.

Quote: خلو نبانا يسري مع البعيد والدانـي يكفي النيل ابونا والجنس سـودانـي

السيرة عطرة ونحمد الله عليها كثيراً .. ونيلنا الهيلنا الجرى قدامنا وسقانا وسقى جيرانّا .. هو شريان حياتنا الأبدي .

هلاّ قبلت عضويتي

مدفع اللذيذ


معاكم
انا واخى شتات
وبالمناسبه انا امتلك كامل
التفويض للتحدث بأسمه,لانى مدير منتخباته الفنى
ومدير اللياقه ايضا...

تعرف يا فيييييل ..
إنتو ما محتاجين تسجيل لأنكم مسجلين من أصلو ..
وبعدين شتات دا ما قلنا ليهو خلاس تعال مارق ..
وبما أنك مدير منتخباته عليك بهذا الأمر ..
وإلا سننزل عليكم عقوبة إنتو عارفنها سلفاً ..
واللياقة ألف ..


محبتي بلا حدود ..

شقيقي وصديقي أمير الجمري ..
مثلكم من يحتاجه الوطن ..
والوطن يحتاجنا جميعاً ..
هي دعوة للتسامح ونبذ الخلاف ..
دعوة للم الشمل والتعايش الكريم مع بعض ..
شكراً أمير فكلماتك بلسم تداوي جراح وطن ..

لك محبتي وإحترامي ..

تحية سلام ومحبة

ربنا يحقق المحبة والوحدة

وعضوية مدفوعة الاشتراك ممهورة بالدم وعهد الهم المشترك

تسعد ايامك
شعارنا ..
أنا سوداني أنا ..
رسوم العضوية ..
أفديك بالروح يا موطني ..
الجنسية ..
جعلي ودنقلاوي وشايقي ايه فايداني
غير ولدت خلاف خلت اخوي عـــاداني
خلو نبانا يسري مع البعيد والدانـي
يكفي النيل ابونا والجنس سـودانـي

Quote: وعضوية مدفوعة الاشتراك ممهورة بالدم وعهد الهم المشترك

تسلمي يا دكتورة سودانية ..
هي دعوة للمحبة والتعايش في سلام ..
ما أكثرها الهموم والمشاكل التي أرهقتنا وأخرتنا كثيراً ..
هي دعوة لبناء وطن يسعنا جميعاً بكل اختلافاته وسحناته شرقه وغربه جنوبه وشماله ..

كامل المحبة ..
والســـــلام ..