** بتقدرى تجرى ؟؟ (موقف طريف)**

Post: #1
Title: ** بتقدرى تجرى ؟؟ (موقف طريف)**
Author: soma
Date: 11-03-2006, 05:01 AM
Parent: #0

التحية للجميع
فى اجازتى الاخيرة للسودان فى اغسطس الماضى ..
سارفت السودان بعد غياب دام اكثر من سنتين
اكثر ما شد انتباهى الموبايلات .. وطبعا كثير من الناس
بكونوا لاحظوا الظاهرة دى..
يعنى باختصار كده عدد الموبايلات فى البيت بعدد الافراد
مهما اختلفت الاعمار..
واحدث الموديلات..والهدايا بقت بالنسبة للمغتربين
المفروض تكون موبايل ..لانه ده الشىء المناسب جدا لكثير من الناس
المهم .. نجى للموقف الحكتو لى بت خالتى
قالت صاحبتها جاب ليها اخوها موبايل من السعودية
وجات جاااااريه فرحانه توريه لى حبوبتها ..
يا حبوبه شوفى فلان جاب لى موبايل
ردت الحبوبه .. بتقدرى تجرى بيه ؟
قالت ليها البت كيفن يعنى يا حبوبة اجرى بيه ؟
قالت ليها ما شايفه الخلق كلها وكت يرن النصيبه ده
بتقوم جارية
كان ايدها فى الاكل بتنفضو وتقوم جارية
لى هسى يا بتى ما شفت لى زول نضم بالداهى ده من بكانو ..
اها كان انتى بتقدرى تجرى بيه مبرووووووك عليك..
***
دحن يا اخوانا صحى نحن ليه بنجرى بالموبايل ..
ملاحظة الحبوبه دى جد صاح 100 فى المية
ما ممكن تكون كل المكالمات خاصة وسرية
ضحكت من اعماقى فى تعليق الحبوبه الطريف
وحبيت اشاركم معاى الضحكة
تسلموا وجعل الله ايامكم كلها فرح

Post: #2
Title: Re: ** بتقدرى تجرى ؟؟ (موقف طريف)**
Author: الطيب شيقوق
Date: 11-03-2006, 08:08 AM
Parent: #1

Quote: كان ايدها فى الاكل بتنفضو وتقوم جارية
لى هسى يا بتى ما شفت لى زول نضم بالداهى ده من بكانو ..
اها كان انتى بتقدرى تجرى بيه مبرووووووك عليك..
***

بالغتى سومة اموت من الضحك انتى مرات الحاجات انا حاسي بتصنعيها من عندك بس

Post: #3
Title: Re: ** بتقدرى تجرى ؟؟ (موقف طريف)**
Author: لؤى
Date: 12-01-2006, 04:55 AM
Parent: #1

أستاذة أسماء
تحيّة وإحترام

يعني تاني البيشيل موبايل هديّة للسّودان يشيل معاهُ حذاء رياضي من نوع أديداس أو ريبوك

أو رُبّما حتّى ((سفنجة))

محبّتي
ـــــــــــــــــــــــــــــ

وأنا في البعيـد مشتـاق لهمسة من الوطن يـا نسمة
[email protected]

Post: #4
Title: Re: ** بتقدرى تجرى ؟؟ (موقف طريف)**
Author: soma
Date: 12-01-2006, 07:24 AM

ود امى الحنين لؤى الضى
تسلم ياالضلالة و نور عينى
وينك يا العشا اريتك طيب ..
يديك العافية يابا وتتبارك ايامك
ربى يسعدك ويفرحك ديمة ..قدر ما فرحتنى بى طلتك المشرقة
تعليقك لذيــذ .. ضحكت من الاعماق
لكن عليك الله مش كلام حبوبة ده صاح ؟
تسلم لؤى
وشكرا ضحكة صغير قبل الفطام

Post: #5
Title: Re: ** بتقدرى تجرى ؟؟ (موقف طريف)**
Author: Sobajo
Date: 12-01-2006, 09:09 AM
Parent: #4

سومة ازيك ..

اضحكتينا اضحك الله سنك ...

لكن ملاحظة الحبوبة في محلها ..

و اكاد اقسم انو في علاقة بين ارسال مواجات الموبايل و الركب بتاعت البني ادم..

لأنو ما ان يرن الموبايل و الواحد ركبو بتنمل و تتململ و الواحد فرترب يقوم يتحاوم ...

ولما يقفل الخط يتعجب من المكان الوصلو في النهاية ...

ولا أعجب انو ناس الحركة منعو الموبايل مع السواقة ..

يعني كيف الواحد يسوق و ركبو متململة .. اكيد هتحصل حاجة ...

او بالعدم يتحاوم بالعربية من غير هدف و يهدر الوقود ...

و تحياتي وودي ...