Post: #1
Title: العيد أعياد .. وليتكم كنتم هنا
Author: ودقاسم
Date: 11-01-2006, 12:41 PM
كل عام وأنتم بخير ...
بعد سنين من البعاد ، التقينا مرة أخرى ... كانت الدنيا صباحا ، وأنا لم أخرج بعد في ثيابي النظيفة ،،، من هناك يصلني صوت التكبير والتهليل .. أتخيل الناس كلهم يلبسون جلاليبهم البيضاء ، ويعتمرون عمائمهم .. يجلسون في الفضاء الذي يتوسط الحي الذي يضمنا أنا وأسرتي منذ اليوم الأول من رمضان ...
خرجت إليهم واقتربت منهم .. أحسست وكأني أعرفهم جميعا ... حتى ذاك الذي سرق هاتفي الجوال في أخريات رمضان ربما كان مندسا بينهم يطلب غفران ربه ... أخذت مكاني بينهم حين جافاني الإحساس بالغربة ... كلهم مثلي ... يشبهونني وأشبهم ...
يمتد التهليل ... ونصلي ركعتين ، ثم السلام ... وخطبة لا هي بالقصيرة ولا الطويلة ... ثم نعانق بعضنا ...
كان هذا أحد أعيادي ...
وكانت فدوى ابنتي تعاني كثيرا خلال شهر رمضان المبارك ... فإضافة إلى الحر والسموم كانت تؤدي امتحاناتها النهائية لتجمع حصاد ست سنوات بكلية الطب بجامعة الأحفاد... وقبل ثلاثة أيام من العيد زفت لنا الجامعة النبأ العظيم ...
فدوى نجحت نجاحا باهرا ... وفرحنا فرحا عظيما ,,, وملأت الزغاريد دارنا ... وفاضت بالخراف ... وعلب الحلوى ،،، وصناديق البيبسي ...
ليتكم كنتم هنا بورداب الرياض ...
وكان هذا عيد آخر ...
وفي ثاث أيام العيد توقفت عربة كبيرة أمام دارنا ... ونقر في الناقور ... فخرجنا لنشهد عظمة المشهد ...
أمي الحاجة آمنة محمد سعيد ... أخواني وأخواتي .. خالاتي وعماتي ... وكثير من الأبناء والأحفاد وأبناء وبنات العم والخال ... أتوا إلينا محملين بكثير من الخيرات وكأنهم كانوا يحملون إلينا مواد إغاثة ... فاضت مستودعات الدار .. وامتلأت الثلاجة والديب فريزر ، وسمع الجيران أصوات الخراف ...
أتوا ليقولوا لنا مبروك عليكم الدار ... إن شاء الله تتهنوا ...
وليقولوا لفدوى مبروك التخرج ...
وليقولوا لنا جميعا كل عام وأنتم بخير ...
وكان هذا عيدا كبيرا ...
أفتقد بورداب الرياض . وأفتقد جمعهم يوم العيد ..
وأنتظر أن أراهم هنا ...
|
Post: #2
Title: Re: العيد أعياد .. وليتكم كنتم هنا
Author: ahmed saeed
Date: 11-01-2006, 12:51 PM
Parent: #1
الاخ ود قاسم سلام
كل عام وانت واسرتك بالف خير
ومبروك تخرج فدوي واتمني لها حياة عملية سعيدة
ودامت افراحكم
احمد سعيد
|
Post: #3
Title: Re: العيد أعياد .. وليتكم كنتم هنا
Author: تولوس
Date: 11-01-2006, 01:31 PM
Parent: #2
الف الف مبروك ياخال تخرج فدوي وهذه احدي ثمار غرسك الطيب وعقبال الباقين وكل عام وانت والاسرة الكريمة بالف خير
|
Post: #4
Title: Re: العيد أعياد .. وليتكم كنتم هنا
Author: الرشيد حسن خضر
Date: 11-01-2006, 02:22 PM
Parent: #3
الأخ ود قاسم
كل عام وانتم بخير
تحية لك وللأسرة والأهل عامة
وصلت البلاد يوم 8/9/2006م
ودخل شهر رمضان وحتى الآن لم أذهب للخرطوم بخصوص العمل
عنواني
فداسي 05138 20224
جوال 0914145565
مبارك تخرج فدوى وعقبتال البقية
وحتى لقاء بإذن الله
|
Post: #5
Title: Re: العيد أعياد .. وليتكم كنتم هنا
Author: DKEEN
Date: 11-01-2006, 03:49 PM
Parent: #4
الخال ودقاسم
كل سنة وانتا طيب وام طلال طيبة والاولاد في خير
طولنا ماسمعنا عنك
وقبل يومين انا ووليد طه في سيرتك بالخير
تاكد لينا انو فقدك هنا عظيم وفرقتك مابسدها زول..
عاينا لي بعض كده وقنا ود قاسم فرقتو ما بتندسا ..ومن ثم مشينا اسواق بن دايل نتجول بلا هدف..
الف مبروك نجاح فدوى ..وفرحتا لى فرحك يعلم الله..
بلغها عني التباريك وبرضو ام طلال..
اجمل شي حسيتو انك بديت تتعود على البلد وتخش في المود..
ده شي جميل وانتا بيدت تكسر الحواجز وتاخد وضعك في نظام الاشياء وده شي مفرح..
الف مبروك تاني وتقبل مودتي يا حبيب..
قال شارع الضباب قال؟؟
|
Post: #30
Title: Re: العيد أعياد .. وليتكم كنتم هنا
Author: ودقاسم
Date: 11-03-2006, 02:37 PM
Parent: #5
دكين يا لذيذ
ياخ وين إنت ؟
والله مفروض الناس الزيّك يكونوا في السودان وبس ...
قلت لي شارع الضباب ؟
|
Post: #6
Title: Re: العيد أعياد .. وليتكم كنتم هنا
Author: رشا سالم
Date: 11-01-2006, 03:49 PM
Parent: #4
الخال ود قاسم...
يارب الدار ترحب بيكم..
مبروك تخرج فدوي..وقول ليها رشا اختك بتوصيك..
تشتري اتنين تموت تخليه لزوم جري الامتياز وشغل النبطشيات..
ولازم تنزل ليها عربية فارهة..بالعدم اتوس عشان ما تتبشتن
في المواصلات..غايتو قلبي معاها والله..
ناس تمبس ومعتصم وشتات وكلهم فاقدينك كتير..
الوغد دكين بيسلم عليك وقال ليك :العروس اتخرجت وتاني ما عندك
عزر..!
سلم لي علي المدام وفدوي واخوانها..
وعيدك سمح والله..
بالمناسبة انا اسمي رشا وجيت جديدة وتبع بورداب الرياض..
علا لسه ما دفعت حق الاستراحة
|
Post: #31
Title: Re: العيد أعياد .. وليتكم كنتم هنا
Author: ودقاسم
Date: 11-03-2006, 02:40 PM
Parent: #6
رشا
اتأخرتي يا بتي ،،، ما لحقتي على العهد الزاهر ... عهد الخال...
أهلا بيك بين أخوتك وأخواتك بورداب الرياض ...
وربما نلتقيك هنا في الخرطوم ...
لك تحياتي وإلى لقاء ...
|
Post: #10
Title: Re: العيد أعياد .. وليتكم كنتم هنا
Author: الصادق خليفة
Date: 11-02-2006, 03:07 AM
Parent: #4
عيدك مبارك حبينا ود قاسم وكل عام وانت والاسرة بخير
الف مبروك للدكتور فدوي التخرج
|
Post: #32
Title: Re: العيد أعياد .. وليتكم كنتم هنا
Author: ودقاسم
Date: 11-03-2006, 02:41 PM
Parent: #10
الصادق ود أهلي
كيفك والأسرة ؟
إن شاء الله تكونوا بخير ...
عقبال أولادك ..
|
Post: #28
Title: Re: العيد أعياد .. وليتكم كنتم هنا
Author: ودقاسم
Date: 11-03-2006, 02:35 PM
Parent: #4
شيخ الرشيد
تحياتي وأشواقي أيها النبيل ..
كيف الأولاد ، والأهل ؟
سأتصل بك عبر الهاتف ، وسنتفق على لقاء في الخرطوم إن شاء الله ..
|
Post: #27
Title: Re: العيد أعياد .. وليتكم كنتم هنا
Author: ودقاسم
Date: 11-03-2006, 02:32 PM
Parent: #3
تولوي يا حبوب
أخبارك إيه ؟
مشتاقين كثير ... وشنو أخبار شقيقك الكان عمل عملية في جدة ؟ إن شاء الله يكون طيب ...
|
Post: #36
Title: Re: العيد أعياد .. وليتكم كنتم هنا
Author: تولوس
Date: 11-03-2006, 03:39 PM
Parent: #27
بارك الله فيك يا خال ودايما سباق لكل جميل
الحمد لله عملنا له العملية والرجل بلغ الصحة والعافية واصبح قلبه يبض من جديد وزي الحديد والحمد والشكر منقبل ومن بعد لله وازداد حنانا وحبا للناس وخاصة كل من دعاء له بظاهر الغيب ...
وانا لاحقك يا خال بعد عدة ايام وسوف نزورك في دارك بازن الله
|
Post: #26
Title: Re: العيد أعياد .. وليتكم كنتم هنا
Author: ودقاسم
Date: 11-03-2006, 02:31 PM
Parent: #2
أحمد سعيد يا قرنفل
كيفك والأسرة , إن شاء الله تكونوا طيبين ...
وياربي أخونا الغاطس داك أخباره شنو ؟ وللا لسة مخبي؟
|
Post: #7
Title: Re: العيد أعياد .. وليتكم كنتم هنا
Author: مصدق مصطفى حسين
Date: 11-01-2006, 04:44 PM
Parent: #1
الخال العزيز ود قاسم
كل عام و أنت و أسرتك الكريمه بخير ،،
مبروك لفدوى و تمنياتنا بمزيد من النجاح و التوفيق ،،
البيت الجديد سعيد و عامر إن شاءالله ،
نفتقدك بشده ...
فما زالت ( يا خال ) حائره مابين صديق الموج و حمزاوى
و الشكله لسه مدوره .
|
Post: #33
Title: Re: العيد أعياد .. وليتكم كنتم هنا
Author: ودقاسم
Date: 11-03-2006, 02:44 PM
Parent: #7
الفنان الجميل مصدق
أخبارك ؟
عقبال أولادك ...
وكل سنة وانت طيب ...
صديق الموج وحمزاوي قول ليهم عندكم شهر كان ما حليتوها أنا بجي راجع وبريحكم منها ..
|
Post: #8
Title: Re: العيد أعياد .. وليتكم كنتم هنا
Author: الملك
Date: 11-01-2006, 05:05 PM
Parent: #1
يعنى نحن ما عاجبنك 
سمح
...
...
العيد مبارك علينا وعليكـ
ومبروك تخرج البنية
...
...
|
Post: #9
Title: Re: العيد أعياد .. وليتكم كنتم هنا
Author: Muna Khugali
Date: 11-01-2006, 05:30 PM
Parent: #8
ماشاء الله...
مبروك نجاح فدوي..
مبروك العيـد والإحساس بالإنتماء ..
وبركة شـوفة الحاجة والأخـوات واحتفالكم بالعيد..
تحياتي..
مني
|
Post: #11
Title: Re: العيد أعياد .. وليتكم كنتم هنا
Author: abuguta
Date: 11-02-2006, 03:26 AM
Parent: #9
مبروك ياخال
تجمع الافراح
دار جديدة
نجاح بنتك الكبيرة
تجمع اهلى عوضى
وفرحة عيد
وجعار خراف..
يالها من عظمة..
الخبر الاكيد قالو فدوى اتخرجت...
وزغاريدا تدوى... لما الشمس اشرقت..
ادوها الامتياز والخدمة ولو كمان تخصصت..
نودع ملاريتنا.. وتكون جميع همونا انفرجت..
...
|
Post: #12
Title: Re: العيد أعياد .. وليتكم كنتم هنا
Author: ابو جهينة
Date: 11-02-2006, 04:43 AM
Parent: #11
ود قاسم العزيز
كل سنة و إنت و أم طلال و الأسرة بخير
ألف مبروك على تخرج الإبنة فدوى و أرجو نقل التهاني للأسرة.
إتصلت بتلفون فدوى و لكن دون جدوى.
الحال هنا كما هو ...
نتجرع كاسات الشاى من ( إمام القهوجي ) و أحيانا من ( مجيد ) ... ثم نخرج ليستقبلنا طريق الملك فهد و يبتلعنا في جوفه و عشرات الأفكار تسابق و تزاحم السيارات .. لتدور دواليب الغربة لنبدأ اليوم مرة أخرى كمن نقرأ من كتاب مفتوح.
في إحتفالنا بالأستاذ محمد السني يوم الجمعة الفاتت ، جاء ذكرك على لسان يوسف السماني و حياك نيابة عن بورداب الرياض.
نتوقع أن تحدثنا عن تجربة ( الإياب ) و فلسفة ( العودة المفاجئة ) و ( أدب التكيف ) مع مجريات الأحداث.
تحياتي و سلام كتير لأم طلال.
|
Post: #13
Title: Re: العيد أعياد .. وليتكم كنتم هنا
Author: Tumadir
Date: 11-02-2006, 04:53 AM
Parent: #12
كل سنة وانت طيب يا ود قاسم
ومبروك على فدوى ..وربنا يلم الشمل ..
لكن عليك الله اتعود على اى حاجة دايرها الا ثقافة "العرس التانى" الحايمة دى ....
|
Post: #34
Title: Re: العيد أعياد .. وليتكم كنتم هنا
Author: ودقاسم
Date: 11-03-2006, 02:45 PM
Parent: #8
الملك
تحية لك ولبورداب الخرطوم ...
بس انتو ويييييييييين ؟
|
Post: #14
Title: Re: العيد أعياد .. وليتكم كنتم هنا
Author: ملكة سبأ
Date: 11-02-2006, 05:05 AM
Parent: #1
العيد مبارك والدار ان شاء الله
والف مبروك تخرج فدوى
ولكم منى اجمل التمنيات
|
Post: #15
Title: Re: العيد أعياد .. وليتكم كنتم هنا
Author: حمزاوي
Date: 11-02-2006, 05:09 AM
Parent: #1
اخي الدفعة ودقاسم
مسكاقمي
عيد حلو ولذيذ
بيت جديد وحي جديد ( ويا حلة تنوري )
نجاح الدكتورة فدوي
الوالدة آمنة محمد سعيد وتشريفها لكم في الدار الجديد
الاهل والاحباب القادمين من معتوق
فوزية وطلال واشقاءه
الجيران المشاركين في اكل الخراف
المصلين معكم صلاة العيد
المهللين والمكبرين يوم العيد
الحرامي السرق الجوال حقك برضوا
الماشين في الشوارع
الناس الحلوين
بورداب الخرطوم
أنها متعة لا يضاهيها متعة
صدقني انك من الملوك
مشـــتــاقين
|
Post: #16
Title: Re: العيد أعياد .. وليتكم كنتم هنا
Author: نادر
Date: 11-02-2006, 05:26 AM
Parent: #1
مشتاقين يا ود قاسم ... تحياتي لك وللأسرة، وإن شاء الله الأمور ماشة تمام؟
كل الود
نادر/ مريم
|
Post: #17
Title: Re: العيد أعياد .. وليتكم كنتم هنا
Author: انعام عبد الحفيظ
Date: 11-02-2006, 05:51 AM
Parent: #1
ود قاسم العزيز
شفته السودان حلو كيف؟
حلو بي ناسو واهلو
طبعاً العيد طعمو مختلف وسط الاهل
مبروك لفدوى
وعلى وعد الزيارة لسه
|
Post: #19
Title: Re: العيد أعياد .. وليتكم كنتم هنا
Author: Mohamed Abdelgaleel
Date: 11-02-2006, 06:02 AM
Parent: #17
الأخ - العزيز ودقاسم .. تحياتي لك .. والعيد مبارك
عليكم .. ومبروك تخرج الإبنة دكتورة فدوى .. والتحايا
عبركم للسودان البلد الطيب السمح المعافى رهاب رهاب
ينشاف وسيم .. قريب بكون معاكم .. لكين جوالك
سرقوا ومازال السارق يلبس الثياب البيض شارات
التقى .. ويحضر الصلاة .. فابواب غفران ربك مشرعة
للجميع إن لم يتمادوا ويتعمهوا في غيهم القديم ..
فرحنا بعودتك للمنبر .. حمزاوي أصبح خالا منتخبا
وأبوجهينة ريسا للبورداب .. وصلاح شتات فيلسوفهم
والشابين الوسيمين تمبس ومعتصم دفع الله مازالا
واقفين على أقدامهم يواصلا القتال
وما دام تمبس ومعتصم لا زالا واقفين
على أقدامهم يواصلا القتال
لا ضير .. لا ضير
فكلنا بخير
جوالك رقمو كم؟
|
Post: #18
Title: Re: العيد أعياد .. وليتكم كنتم هنا
Author: أبو ساندرا
Date: 11-02-2006, 05:54 AM
Parent: #1
والله مشتاق ليك شوق مبالغة
يافقري
دي عملة تعملها تغيب عني في تمام وقت حاجتي لدعمك
غايتو
المهم أنا سعيد جدآ بأعيادك الثلاث
ويارب فدوى تكون بلسم شاف لكل أبناء الوطن
وللوطن من كل العلل
ويارب تتهنأ بالدار الجديدة وبكم تسعد
ويارب يعود عليك العيد وأنت ترفل بحلل السعادة متأبط فوز وتوابعها
و زوابعها
وعيد رابع يوم طليت علينا بعد طول غياب ببوست الفرحة
من قلبي ليك كل السعادة ياودقاسم
|
Post: #20
Title: Re: العيد أعياد .. وليتكم كنتم هنا
Author: سمندلاوى
Date: 11-02-2006, 06:06 AM
Parent: #1
بسم الله الرحمن الرحيم
العزيز الغالى ودقاسم
كل عام والسعادة تغمركم وانتم دائما فى حبور
تبريكات العيد السعيد منقولة لكم منّا هنالك
حيث الرياح الشمالية الباردة وفرحتنا بنجاح ابنتكم الغالية فدوى
كما نبارك لكم دياركم , متمنين من الله ان تكون لكم مدخل صدق
ومخرج صدق ويسعدكم فيها.
عودا حميدا ودعنا نتمتع بقلمك الرشيق هنا.
دمتم!
بكرى مصطفى
اوسلو.
|
Post: #21
Title: Re: العيد أعياد .. وليتكم كنتم هنا
Author: عزاز شامي
Date: 11-02-2006, 09:17 AM
Parent: #1
كل سنة وانت طيب يا خال
ومبروك لأختي فدوي
احضن لي فدوى وبوس لي راس الخالة
والله يجمعنا في ساعة خير
|
Post: #22
Title: Re: العيد أعياد .. وليتكم كنتم هنا
Author: عمران حسن صالح
Date: 11-02-2006, 03:51 PM
Parent: #21
العزيز ود قاسم
لك التحيات
ولدعوتك القدر الكبير من الإحترام Quote: أفتقد بورداب الرياض . وأفتقد جمعهم يوم العيد ..
وأنتظر أن أراهم هنا ... |
رغم محنة(البورد) :
ولك يا سيدي كل الفرح بفرحك بـ
فدوى
والديار
والعيد بصورته التي نعرفها
ولمة الأهل والأحباب
والحمدلله الذي وفقك أن تجني ما تريد من الديار
ولو لم يكن من سبب وجيه للعودة فيكفي :
Quote: أمي الحاجة آمنة محمد سعيد ... أخواني وأخواتي .. خالاتي وعماتي ... وكثير من الأبناء والأحفاد وأبناء وبنات العم والخال ... أتوا إلينا محملين بكثير من الخيرات وكأنهم كانوا يحملون إلينا مواد إغاثة ... فاضت مستودعات الدار .. وامتلأت الثلاجة والديب فريزر ، وسمع الجيران أصوات الخراف ...
أتوا ليقولوا لنا مبروك عليكم الدار ... إن شاء الله تتهنوا ...
وليقولوا لفدوى مبروك التخرج ...
وليقولوا لنا جميعا كل عام وأنتم بخير ...
وكان هذا عيدا كبيرا ... |
لك الإحترام
وكل سنة والأفراح متجددة
والآمال محققة كما نريدها ...
وأكثر
|
Post: #24
Title: Re: العيد أعياد .. وليتكم كنتم هنا
Author: mahmed alhassan
Date: 11-03-2006, 05:02 AM
Parent: #22
الاخ/ العزيز
ودقاسم
تحية بطعم الفرح الذي يظـــلل داركم الجديدة نسأل الله
أن يسعدكم بها مقـــرونة بالتهنئة القلبية لابنتـــكم
الدكتورة/ فدوي بالتخرج وكل ستة أنت وأسرتك الكريمة
وأهل بلادي بخير 0
ودمتم في حفظ الله 0
|
Post: #23
Title: Re: العيد أعياد .. وليتكم كنتم هنا
Author: معتصم دفع الله
Date: 11-03-2006, 05:00 AM
Parent: #1
الغربة بقت غربتين بغيابك يا خال ..
كل سنة وأنت طيب وكل أفراد الأسرة ..
ألف مبروك لأختنا الغالية فدوى ..
ومبروك البيت ..
أمنياتي لكم بدوام السعادة والنعيم ..
لكم كل الحب ..
|
Post: #25
Title: Re: العيد أعياد .. وليتكم كنتم هنا
Author: doma
Date: 11-03-2006, 05:26 AM
Parent: #23
يا سلام يا ود قاسم
والله سعدت جدا لفرحكم بالعيد و بتخرج فدوي ولمه الاهل والحبان ربنا يديكم العافيه ويكتر افراحكم .
|
Post: #29
Title: Re: العيد أعياد .. وليتكم كنتم هنا
Author: lana mahdi
Date: 11-03-2006, 02:35 PM
Parent: #1
يا سلام يا خال
والله طلتك بالدنيا
وكفارة الموبايل
ألف مرحب بك بعد غيبة و ليتنا كلنا معيدين في البلد
محبة و تقدير
لنا
|
Post: #35
Title: Re: العيد أعياد .. وليتكم كنتم هنا
Author: محمد الامين احمد
Date: 11-03-2006, 03:00 PM
Parent: #1
مبـــــــــــــــــ ــــــــــــــــــــروك
|
Post: #37
Title: Re: العيد أعياد .. وليتكم كنتم هنا
Author: حمد فتح الرحمن
Date: 11-03-2006, 04:46 PM
Parent: #1
الخال العزيز
كل عام و انتم بخير
عيدكم عيدين
و مبروك التخرج للدكتورة
|
Post: #38
Title: Re: العيد أعياد .. وليتكم كنتم هنا
Author: تولوس
Date: 11-03-2006, 04:54 PM
Parent: #37
كل الشوق يا خال
|
Post: #39
Title: Re: العيد أعياد .. وليتكم كنتم هنا
Author: ود محجوب
Date: 11-04-2006, 02:42 AM
Parent: #38
العزيز ود قاسم
اولا الف مبروك للدكتورة وتهانينا وامنياتنا لها بمستقبل مشرق
وبعدين ايه الغيبة الطويلة دى شفقتنا عليك لا نتوقع منك حضورك ايام الاغتراب ولكن ادينا طلة طلة.
|
Post: #40
Title: Re: العيد أعياد .. وليتكم كنتم هنا
Author: ود شندي
Date: 11-04-2006, 10:24 AM
Parent: #39
العيد مبروك ،،،، يا مبروك
دا منو الماعندو زوق
جازف جوال الخال؟؟؟
مبروك للبنيه
|
Post: #41
Title: Re: العيد أعياد .. وليتكم كنتم هنا
Author: أبوذر بابكر
Date: 11-04-2006, 11:00 AM
Parent: #1
إزيك يا ود قاسم وكيف الحال
وكل سنة وإنت والبلد والأهل طيبين
وأنقل تهانينا وفرحنا للدكتورة فدوى
وعما قريب بإذن الكريم نتوهط البلد معاك ونحضن أهلها وترابها
خلاص بدينا فى الكاونت داون وياالسودان جاك بلا
الجية التمهيدية حتكون فى عيد الضحى إن شاء الله وبعدها بشوية حتكون الجية النهائية
ونتلاقى هناك بإذن الخالق
|
Post: #42
Title: Re: العيد أعياد .. وليتكم كنتم هنا
Author: خالد عويس
Date: 11-04-2006, 12:47 PM
Parent: #41
ياااااهـ يا ودقاسم
والله مشتاقين. ويا أخي ألف مبروك نجاح فدوى، والبيت، ومبروك أولا وأخيرا .. الوطن.
ويا بختك بالعيد وبالأهل
|
Post: #43
Title: Re: العيد أعياد .. وليتكم كنتم هنا
Author: عبد المنعم سيد احمد
Date: 11-05-2006, 10:30 AM
Parent: #42
كل سنة انت والاسرة بالف خير
الصديق ودقاسم
والف مبروك نجاح الدكتورة
ومزيد من النجاحات
اشتياقنا والسلام
|
Post: #44
Title: Re: العيد أعياد .. وليتكم كنتم هنا
Author: ود الباوقة
Date: 11-05-2006, 03:15 PM
Parent: #43
الخال الحبيب ود قاسم ..
الف مبروك تخريج الابنة فدوي والى المزيد من النجاحات بعون الله تعالى ..
الف مبروك دراكم الجديدة وان شاء الله تتهنون فيها ..
نفتقدك بحق في كل تجمعات بورداب الرياض ونفتقد الخالة فوزية والابناء طلال وقاسم ..
نسال الله ان يسدد خطاكم ويديم عليكم رغد العيش ...
ود الباوقة
|
Post: #45
Title: Re: العيد أعياد .. وليتكم كنتم هنا
Author: Yasir Elsharif
Date: 11-05-2006, 07:26 PM
Parent: #1
معقول !!! ود قاسم ذاتو؟؟
يا سلااااااام.. يا أخي مشتاقين.. والبيت مبروك ومبروك التخرج والنجاح الباهر.. ومبروك العيد في وسط الأهل ومبروك زيارة الوالدة والخالات والعمات والأعمام والأخوال..
تحياتنا لك وللأسرة ..
بالله لا تنقطع عن البورد!!!!!
والسلام وكل سنة من المعيدين يا رب..
ياسر
|
Post: #46
Title: Re: العيد أعياد .. وليتكم كنتم هنا
Author: saadeldin abdelrahman
Date: 11-06-2006, 00:04 AM
Parent: #1
Quote:
الف الف مبروك ياخال تخرج فدوي
وهذه احدي ثمار غرسك الطيب وعقبال الباقين
وكل عام وانت والاسرة الكريمة بالف خير |
Mabrook and happy to know that
you are enjoying home
|
Post: #47
Title: Re: العيد أعياد .. وليتكم كنتم هنا
Author: الحارث سرالختم عبد الله
Date: 11-06-2006, 00:58 AM
Parent: #46
الخال ود قاسم كما يحلو لبورداب الرياض
التقيناك يوم وداعك وراينا تلك الأهازيج الممزوجه بالحزن على فراقك
من الجميع وانتابتنى مجموعه من الأحاسيس اذ لم احظى بمعرفتك اكثر واكثر ولكن
حتما سنلتقى طالما فى العمر بقيه فى رحاب السودان البلد القاره واهنئكم بتخرج
الدكتوره وبالبيت اسال الله ان يجعل ايامكم كلها افراح ودمتم.
ابو ختم
|
Post: #48
Title: Re: العيد أعياد .. وليتكم كنتم هنا
Author: abulinah
Date: 11-06-2006, 01:51 AM
Parent: #47
ود قاسم العزيز
تحياتي لكم و للأسرة و كل عام و انتم بخير و مبروك تخرج الدكتورة فدوي و عقبال التخصص.
أنقل لكم تحيات الجميع هنا.... و بالمناسبة عصام أبوروف بطرفكم هذه الايام. إلي أن نلتقي في عيد الأضحي بمنزلكم العامر بإذن الله تعالي،،
وليد أبكم
جدة
|
Post: #49
Title: Re: العيد أعياد .. وليتكم كنتم هنا
Author: شرووم
Date: 11-06-2006, 02:41 AM
Parent: #1
كل عام وانتم بخير ياخال
وألف مبروك تخرج الدكتورة فدوى والعاقبة لاخوانها طلال وزياد وقاسم
وألف مبروك البيت الجديد وان شاء الله يبقى قدم الخير والسعادة عليكم.
وتحياتي ومباركتي للخالة فوزية.
شرووم
|
Post: #50
Title: Re: العيد أعياد .. وليتكم كنتم هنا
Author: إدريس محمد إبراهيم
Date: 11-06-2006, 02:57 PM
Parent: #49
الخال ود قاسم والأسرة الكريمة ... كل عام وأنتم بخير .. ومبروك تخرج فدوي .. وحقيقة أكثر ما أسعدني شخصياً والحمد لله إنك تمكنت من إتمام الضل .. وكل الباقي هين خالص يا خال ... ألف مبروك .. وبالله أخبارك الخاصه قوم رسلها لي بالدرب داك ... سمح؟ ..يا خال ..
أصر على تسميتك بهذه الصفة الحبيبة إلى نفسي .. لانه وبصراحه بعد مشيك الرياض بقت حالها حال .. وما زال التنافس محتدماً بين قريبي الخال الذي أجمعت عليه الغالبيه في يوم وداعكم حمزاوي الرائع ... والصديق اللدود صديق الموج الذي يحاول جاهداً انتزاع هذه الصفة منه .. وقد ينجح لآن هذا الموج كما تعرفه زول ما ساهل .. غايتو أنا شخصياً كنت سأكون أول الواقفين في صفه عندما وعدني قبل شهر بإحضار الهرم عثمان حسين للرياض .. وقد فعلها مع مجموعته الخيرة من أبناء مدينة الصحافة الميامين ... يعني لاحظ ما براهو .. ولهذا لازال التنافس الجميل محتدماً بين هاتين القامتين ...
ويا حليل أيامك يا خال ...
وما تنسى الماسنجر ضروري ... لاني في هذه الأيام لا أدخل هذا الحوش إلا لماماً لمشغوليات لا يعلمها إلا الله ... وبعض القلة القليلة من بورداب الرياض .. وعموماً الله في كما يقول دائماً المارشال تامبا ...
ولك كل الحب التي تعرف ... والشوق الذي لا يعرف الحدود ... يا خــــــــــــــــــــــــــــــــــــال .. رضي من رضى .. وأبى من أبى ... و ... خربانه أم بناية قش ....
مع خالص حبي واحترامي للجميع ...
|
Post: #51
Title: Re: العيد أعياد .. وليتكم كنتم هنا
Author: محمد سنى دفع الله
Date: 11-07-2006, 02:00 AM
Parent: #50
مبروك العيد في السودان
مبروك نجاح الأميرة الجميلة
والدكتورة الرحيمة والملاك السوداني
ربنا اجعلها اضافة للعبافرة
أهل الطب والشفاء
ومبروك السعادة الحقيقية
|
Post: #52
Title: Re: العيد أعياد .. وليتكم كنتم هنا
Author: waleedi399
Date: 11-07-2006, 03:23 AM
Parent: #1
الخال الحبيب جداً إلى القلب ..
ابو طلال ..
عيدك مبارك .. وكل سنة وانت بالف خير
والله ليك وحشة .. والف مبروك للابنة فدوى
ومبروك المنزل الجديد بالعافية انشاء الله
تحياتي للخالة فوزية وطلال وقاسم وكل الشباب
والله فاقدنك الف .. افتقدناك كثيييير
لك خالص الود والتحية يا خال
ما تطول الغيبة تاني
سمح
|
|