ويستمر الحريق

ويستمر الحريق

على هوى الدنيا بنمش
ممطوط ...على كتف القدر

مكتوب حرف
مرسوم على عشق الفرح

ولون المويه...

والشط البكاتل... الرمله

يا نهاراتك... براك

يا سؤالاتك ... صفاك

ما تزيدى حرفين من غناك

استنى لون السكه

والحزن النبيل

ورينا عشقك...
كيف بينخر فى الحنين...!!



على هوى الدنيا بنمش
مافى مخبول.. بيسال القمر.. البهت

ولا عرق الشمس ...

بيصل الارض

مغلوبه ست البيت على الضيفان
ومستوره على (العريشة) ... صحانتا

والسكه موت ........

كان الرصيف بيسال

مين السمح لخطوتك..

اصلاً .......

توازى حداى...؟

ومين فيك انشده

غلبوا الشرود....؟

ومنو الوداك... لوادى المحن

كايسه الانتباه ......؟

ومنو الختاك... وسط الناس حلم؟

يا الله هوووى........

ومين الدفرنى... عليك؟



على هوى الدنيا بنمش

اكتر من الخلق العشم ..!

وقبال وصولك...

عشقى ليك

قبال تطلى ...

سمعت صوتك

وقبال تموتى ...

حضرت موتك

ياسكة السفر..الندامة

وياغنوة الناس.. الحزانا

ويا غرف ضلمة ..حجانا

يالامل الشحيح....

يا قلبى الجريح....

ياقولى الصريح...

يا البلد الضريح....

صحينا على هواك....... ومدى النبيح




على هوى الدنيا بنمش
وهى........

تمش الكون على كيفا

تغنيلو......

وتبسملو......

وتمشيلو ........

يلاقيها الفرح

فى السكه بالاحضان

وصوت النآى
و النهر ....المتابع بانبهار
واقف...... على رصيف عمرا
ويحيها .....


على هوى الدنيا بنمش

مكتوب على الوجع

الانين......

ومنقوش على الروح

الخفوت.....

ومسنود على الحزن

البكا......

ورينا وين اخر السؤال....؟

ورينا كيف
شبهة الامل العنيد
تصبح منال...؟

ما فتنا منك...وجئنا ليك

ما شفت غيرك ...وكست ليك

وبقيت عليك

وبقيت عليك

يا لون السما الفاتح
على شرفة عيونا
و يا وجع مطر السحاب

احبس دموعنا معاك

ويا زمن السراب

ضليت.... من السكه

البتاخدك ..لسواى

ورجعت منك

مستتر....

او.....مبتكر

أو......

أو........



على هوى الدنيا بنمش

والكلام ببقالنا قاسى

وكتين نحس... الفرقه بينا

وينكسر خاطرى... المعاك

والكلام منك صعب

يجرح كمائن الالفه ...جواى

ويشتت... نغمة الحرف المموسق

منى... ليك

واتحملى لوم الحروف

وسؤال مشاعرك

وكتين يجف...

فى مساماتا الحنين





على هوى الدنيا بنمش

ما منتظر... عشم الوصول
بيك ينتهى
أو.. ليك.... أصل

وما انخدعت... معاك

خدعتنا... حجوة أمكنة

وشهوة زمانى الفات

وقناعة....
انو مافى امل بيموت


يا بت.... حقيقة.... واشتها

القطار مزلول ...معاك

والخيانه... ترتيب وانهماك

يابت.... وضوح

الزهور...مقطوفة لفازة ترف

راجية.... لحظة شوف

وسلوك ...غزل

وطريق..ز وصول

وحشمة الندى... فى الورد

والطل عرق

كل المساماتن...حلال



على هوى الدنيا بنمش

سؤال اخير...

مين البيمسح ملامحك

من دمائى....

مسامك

من صباى...

مقاطعك

من غناى....

حديثك

من حجاى ....

مين زى

منهمك فى الدهشة بعد الموت...!!

لا معاك.... ندم

لا بلاك.... نآى



على هوى الدنيا بنمش
بأوصيك.... على روحك.... معاك
ما تموتى .... الحبينا فيك

ما تغطغطى ....الاحزان عليك

ما تفوتى.... الافراح مجيئك

ابقى ...أخر بت وضوح

ابقى كل كلام.... مباح

اصلو ما فى امل بيموت

وياتو صاحب

تاوقن ايامو عمرك وفجأة....راح...!!؟



ابقى... أخر بت وضوح

ابقى أخر قول... مباح

ابقى... أخر بت وضوح

ابقى أخر قول.... مباح



ويستمر الحريق ..