إيماناً مني بحرية التعبير في هذا المنبر ، اطالب بفصل العضوين سلوى صيام وأسامة الخواض ..

ظني أن المنابر هذه ما خلقت إلا كمتنفس لنا للتعبير عن اشواقنا دون خوف من مقص الرقيب ، ولكن هنالك في هذا المنبر من يريدون الوصاية وخنقنا هنا ايضاً

لست كاتب يشار إليه بالبنان ولا حتى اعرف تنميق الحروف والمداخلات وكثير الاخطاء الإملائية والنحوية ، لكني سعيد جدا وراض عن نفسي واشكر وأحمد لصاحب هذا المكان صباح مساء أنه سمح لي بالكتابة عنده دون أي نوع من محاكم التفتيش لمقدراتي الكتابية .

لقد فوجئنا بهذا المنبر أن العضوة سلوى صيام تريد حرمان البعض من هذا المكان لا لشئ إلى سوى انها تظن اننا لا نصلح له ولا نصلح للتعايش معهم في مكان واحد، ويريدونه ان يكون جميل الواجهة فقط للناظر مثله مثل تماثيل الشموع التي توضع لعرض الأزياء على واجهات المتاجر وتخفي في داخلها من جمود وقبح ما تخفي .

ورغم إيماني التام بسياسة عدم الحجر على احد لمجرد انه ابدى رأيه إلا أن هذا الإيمان قد إهتز في داخلي لدى شعوري ان هنالك من يهدد وجودي وبقائي في هذا المكان ، لذا لا بد علي محاربته ومقاتلته بذات الاسلحة التي يحملها .

أما اسامة الخواض فلقد كنت سعيداً جداً حينما إنضميت لهذا المنبر وأهديت بوستي الاول له ، لا لشي إلا لأني سأكون معه في مكان واحد ، فلقد كنت من المعجبين به ، ولكني خذلت فيه لتاييده سياسة الإقصاء التي إنتهجتها سلوى ولذلك فهو يتهددني بالإقصاء طالما هو يؤيد ما جاءت به سلوى .

عليه أطالب معاملة بالمثل وإحقاقا لمبدا حرية التعبير بفصل المتغطرسين أسامة وسلوى وليذهبا غير ماسوفاً عليهما إلى خارج هذا المكان

وعاشت سودانيز أون لاين متنفسنا الوحيدين سنداً للغلابة والكادحين من امثالنا


ناصر

فوووق

ناصر سلام ياخي الحبيب وكل عام وانت بخير

Quote: ظني أن المنابر هذه ما خلقت إلا كمتنفس لنا للتعبير عن اشواقنا دون خوف من مقص الرقيب ، ولكن هنالك في هذا المنبر من يريدون الوصاية وخنقنا هنا ايضاً لست كاتب يشار إليه بالبنان ولا حتى اعرف تنميق الحروف والمداخلات وكثير الاخطاء الإملائية والنحوية ، لكني سعيد جدا وراض عن نفسي واشكر وأحمد لصاحب هذا المكان صباح مساء أنه سمح لي بالكتابة عنده دون أي نوع من محاكم التفتيش لمقدراتي الكتابية .

اتفق معاك واشد من ازرك..بس حكاية الفصل دي انا ما معاك فيها ... روق شوية يا اخوي وخليك انت الكبير

منو القال ليك انك لا يشار اليك بالبنان .. انا هسع قاعد اشير ليك بالبنان
رغم انى ما عارف اسماء الاصباع لكنى قاعد اشير ليك (ما قلة ادب ما تخاف)
كيفك قريبى وشريكى عند اقتسام الثروة .ووزير معرفناوتعليمنا العالى قى حال الانفصال عن السودان .
داير اهزر معاك شايفك مسخن .
طيب نرجع للجد ونخلى التاشير.
اتفق معاك جملة وتفصيلا (حلوة جملة وتفصيلا دى, حلفاوى لكنى شاطر فى لغة المستعمر).
الاقصاء مرفوض فى المنابر (والاخصاء فى بيوت الاشباح ايضا) .. التنوع هو المفيد وهو الذى يعطى المنبر بهجة ومذاق .
نرجع للهزار تانى .. ماشاء الله انت الزول الوحيد البيصغر فى العمر .. يعنى كل شوية تجى صورتك اصغر فى العمر من الصورة القبلها من ايه ده يا برعى ؟ يعنى باذن الله على 2007 حتظهر صورتك بالموجات الصوتية وانت داخل الرحم ولا شنو ؟ اعمل زيى لصق ليك وردة ولا بحر .. عشان ترتاح من الشلهتا دى .
رمضان كريم بالمناسبة (الرمضان ليها وضعية خاص) على راى قريبتى .. وانت فاهم وانا فاهم .
طبعا تكون مندهش من الهزر .. انا بخفف عليك لانو احتمال ده يكون اخر بوست فى عمرك
سلوى صيام دى بتلعب كاراتيه .
ارقد عافية حبيبى .
......
شاهين.
......
شاهين.

الكترابة...



فصل عديل كده؟


يازول باركها


قول انذار ..

لفت نظر وانتباه..

هسة عليك النبي ...الاقصاء

وصرّير الحريات ..البمارسو

منو؟

هم ولّ انت ؟


نطالب بفصلكم


ياخواض ويا سلوى..

نزولا لرغبة

اخونا فيصل..

وانا زاتي بطالب

بي فصلي معاكم..

اخـي الـحبيـب الحبـوب،
ناصــر،

تحــية الـود والاعـزاز، ورمضان كريـم.

....الـمعروف عن اهلنا الحلفاوين انهم بكرهـوا الانقلابات العسكرية، من قبل زمن عبود الغرق النوبة لحدي البشير النـحس. ولكن لو حصل انو الاخ بكري ابوبكر ( وعمل بكلامك ) وفصل سـلوي صيام واسامة !!!، حنقوم نحنا الحلفاوين في البورد ونعمل... انقلاب عسكري علي بكري، وإنقلابنا حينجـح 100 في المائة لاننا أغلبية صـامتة ولكـن وقـت الجـد....." عـربآ حملناها ونوبة"..."ونحـن في الشـدة بآس يتجـلي....وعلي الظلم نضم الشـمل اهل ".

.....الاخ ناصــر، لك مودتي وتحياتي،

أخي ناصر

رمضان كريم

الموضوع في غاية البساطة وما محتاج للمطالبة بالفصل مرة واحدة يا راجل صلى على النبى

كل ما في الأمر هو اقتراح ...

واوضحت الأسباب ولو راجعت البوست مرة ثانية

ربما تتفق معها في الجزء المهم فيه...

الموضوع ما أقصاء ولا تهميش ولا تفتيش...

وبعدين ياخي نحن مشتركين فى الأعجاب بأسلوب أسامة الخواض


كدى راجع البوست تانى بالله عليك..

تحياتى

Quote: لتاييده سياسة الإقصاء التي إنتهجتها سلوى

وبكده يا ناصر بتكون وقعت في نفس الاقصاء ...


حرية التعبير تستوجب علينا ايمان غليظ بحرية الاخرين في التعبير

وانا بفتكر هم طرحو راي - وان كنت انا اختلف معهم فيه - ولكن
الحوار هو الافضل دائما يا سيدي ده ربنا بعزته وجلاله حاور ابليس
ليه انحنا نحجر علي الاخرين ؟؟
خلو اي زول يقول العاوز يقولو وما ينفع الناس هو اللي ح يبقى والقاري
هو البحدد من هو الموضوعي ومن هو غير الموضوعي .. لكن نحنا ديل نعرض
بضاعتنا هنا في سوق بكري ده وبعد كده نخلي قوانين السوق هي التسود واكيد
البضاعة الجيدة هي الاربح .. قد يقول قائل ان هنالك بوستات فيها نبز
وشتيمة وواجده رواج طيب ديل الزوار ودي رغباتهم كيف نحرمهم من خياراتهم ؟؟
ما هو حق التنقل ده مافي الجغرافيا الارضية ؤبث ده العالم
بق قدر جحر النمله واذا اتدخلنا بنكون انتهكنا حقوق الاخرين في التعبير
وفي التنقل كمان

يا اخوانا اي زول عليهو بالبكتبو قلمو وبس ويترك الباقي للاخرين
كثير ما اسيء الينا في المنبر ( وقالو كوووووووز ) في اكتر من ده نبز تاني ؟
ولكن لم نرسل حتى ماسنجر لبكري الزول ده خلوهو يفتش اكل عيشو بدل مصاقرة
المنبر وفلان عمل وفلان ترك واهو الخور قاااااااعد مع اني زرتو مرتين بس
وغلبني اتنفس من الفيهو

وعشان كده يا حبيب ناصر انا بطالب بعكس عنوان البوست ورغما عن اختلافي معهم
كثيرا الا انني اتشرف بزمالتهم في المنبر

ناصر يا ابني

اولا رمضان كريم

ثاني يا زول ما يسخن معاك الطقس تقوم تتفشى في

الاستاذه سلوى صيام و الاستاذ اسامه الخواض

يا ناصر

ما طرحوه هنا قد طرح كثيرا من قبل وهي اراء

تقبل الخطأ من الصواب

فلا تتشنج يا بني واهدا

وصدقني كلاهما من الناس المبدئيه

جدا و التي تدافع عن حقك قبلك

فلا تتعجل يا ابني وياريتك تطالب بكري يسحب هذا البوست

وتعتذر لهم فصدقني ليس هم من يمارس الاقصاء او التهميش.

ولك الود.

تراجي.