عبد العظيم النو..... مدير الخطوط السوداني بالقاهرة

عندما يقول الفرد منا عبارة أنا سودانى يعنى الكثير
هذة الكلمة (أنا سودانى)
تعنى المرؤة
تعنى الشهامة
تعنى الرجولة
والوقوف فى المواقف الصعبة
اليوم سأسرد لكم ماحدث معى فى مطار القاهرة الدولى مع هذا الرجل
كنا انا وصديقتى فى دورة تدريبة لم تتجاوز العشرة ايام وبينما نحن فى المطار
وجدنا هذا الرجل الذى يدعى عبد العظيم النو صراحة فرحت جدا عندما وجدت سودانى يقف مع المصريين فى مكان وزن العفش قلت الحمد لله يوجد سودانى بين هؤلاء القوم مما سيسهل لنا اجراءاتنا ولن نتعرض للجرجرة اثناء الوزن لاننا كنا نحمل شنطة اضافية لزميلة لنا لتوصيلها للسودان, حتى هذة اللحظة لم اكن اعرف من هذا الرجل او ماهو وضعه بالضبط فدار بيننا انا وهو وصديقتى الحوار التالى :
هو : الوزن بتاعكم زايد
صديقتى : نعم ونريد ان نعرف كم ستكلفنا هذة الشنطة
هو : كل العفش سيكلفكم الف ومئاتين(1200) جنية مصرى
انا : لماذا كل العفش نحن شخصين نريد كل احد على حدى
هو : لا لقد وزنا كل العفش مع بعض وانتهى الامر
انا : كيف الكلام دة نحن شخصين بتزكرتين منفصلتين وعلى كل تزكرة 40 كيلو كيف تقول وزنا لكم الاثنين وانتهى الامر .
بينما نحن انا وصديقتى نتناقش فى امر العفش ويجب ان يوزن لكل واحده منا لحالها انفعل هو وقال لى بالحرف الواحد:
انتو بتهظرو شكلكم كدة ماعاوزين تسافرو
والتفت الى الرجل المصرى الذى كان يمسك بجوازاتنا وقال لة :
رجع ليهم جوازاتم شكلهم ما دايرات يسافرو
صديقتى : كيف الكلام دة احنا طلبنا عفشنا ينفصل من بعضو عشان كل واحده فينا تعرف البيها والعليها
قال : لا انا بوزن مرة واحده وانتهى الامر
المهم بعد المشاورات والمناورات تم ارجاع الشنطة لصديقتنا لان التكلفة كانت كبيرة علينا واعادة وزن العفش لكل واحده منا على حده على اساس حق من حقوقنا لاننا نمتلك تزكرتين مختلفتين فرضى المصرى بوزن العفش مرة اخرى وتم ارجاع الشنطة
فاتى هو وقال لى يلا انا عاوز اقفل الكاونتر حاتدفعو ولا يرجعو ليكم جوازاتكم
قلت لة : لقد تم ارجاع الشنطة ذات الوزن الزائد واعتقد انة من حقنا وزن عفش كل واحده منا على حده
فقال لى : لا لم يتم ارجاع الشنطة
قلت لة : لقد رجعت فعلا
قال لى : ومن اخذها ليرجعها
قلت لة : احد الافراد الذين يعملون معك
قال لى ماإسمة
قلت لة : لا ادرى ولكنة ذهب مع صديقتى ليسلمها صديقتنا الاخرى عبر طريق بوابة الوصول
والان يمكنك وزن عفشنا حتى نعرف كم علينا من الوزن الزائد
قال لى : لقد وزنت مرة واحده ولن اوزن مرة اخرى وعليكم دفع ال1200 جنية مصرى (لاحظو معاى انو عاوز يدفعنى حق الشنطة حتى وهى غير موجوده يا اما نأجل السفرية)
قلت لة : كيف الكلام دة نحنا رجعنا الشنطة الوزنها زائد ومن حقنا نوزن كل واحدة براها ودة حق من حقوقنا
فى هذة اللحظة تدخل احد اولاد الحلال السودانينن وقال لة لماذا لاتريد ان تعيد الوزن
فقال لة : لقد وزنت لها عشرة مرات وهى تريد ان نوزن لها مرة اخرى
فقلت لة : بانفعال لاتكذب هى مرة واحده وجمعت لنا عفشنا مع بعض انا وزميلتى فى حين انة من حقنا ان نوزن كل منا على حدى ونحن منتظرين لينا ربع الساعه عملية الوزن تحصل
فقال للرجل : يمكنك الذهاب سأحل معهم الموضوع فقلت لة يمكنك ان تحل المسألة امامة وبعد مجادلات قام على مضض بوزن العفش كل منا على حدى وقال لى وزنكم زائد 15 كيلو لكن ممكن نقول كل واحده فيكم خمسة كيلو
صراحة فى اللحظة دى ماعرفت روحى انا واقفة فى السوق الشعبى عاوزة اشترى جزمة والبائع بجامل فينى عشان البيعه ماتطير منو,,,,,,, حقيقة الفهم الوصل لى فى اللحظة دى انو الحكاية مسألة قروش ليس الا, مع انو وضعو كمدير ما اظن بكون محتاج لى حاجة زى دى الا اذا كان المرتب ما مكفي التزاماتو وبيضطر يضغط على البنات الزينا البكونو براهم عشان ماعندهم حل غير انهم يدفعو ليهو.
فى حاجة مهمه نسيت اسرده فى حكايتى معاهو دى اللى هى والشهادة لله
كان شايف شغلو لغاية اخر لحظة بمعنى انة كا متابعنا لغاية ما وصلنا سلم الطيارة
المافهمتو هل كان بيؤدى واجبو وبيطمئن على ركاب طائرة الخطوط الجوية السودانية ولا عشان الموقف الحصل والمواجهه الحصلت بيننا لانو كان مركز نظرو علينا
كل العاوزة اقولو ليهو العملتو دة ما موقف رجل سودانى أصيل لاننا كنا فى غربة ونحن بنات لوحدنا والزعلنى اكتر الطيارة فيها كمية من الكراسى الفاضية يعنى عدد ركابه ماكان كامل
وانا وصديقتى ماكنا منتظرين منو يعفينا من الرسوم بتاعت الوزن بث كان على الاقل فى احترام فى التعامل بين الناس وخصوصا نحنا بنات

رسالة اخيرة للمسؤلين ضعو الرجل المناسب فى المكان المناسب
(مع انى عارفه مافى زول حايشتغل بى الكلام دة)

مودتى وتقديرى واحترامى للخطوط الجوية السودانية

كامل تضامني معك

نجــود

كلمة في محلها


تحياتي


أحمـد الشايقي

تسلم يا الشايقى

على المرور

والطلة

وابداء الرأى

نجود

حمدا لله على السلامة






تلفونك ما برد

الأخت الفاضلة / نجود

تحياتي

تنتابني الحسرة في كل سفرية من و إلى السودان و أناأستخدم خطوط طيران غير ناقلنا الوطني سودانير الذي تعاملت معه ـ خارجياً ـ مرة واحدة و أخيرة في حياتي تركت لدي إنطباعاً لا زالت آثاره السلبية باقية حتى الآن .
و من خلال تعامل الكثيرين من أقاربي و أصدقائي و معارفي و من خلال كثير من المواقف التي كنت شاهدا عليهاأكاد أجزم أن سودانير تتعامل مع عملائها بما يتنافى مع أبسط قواعد الذوق و اللباقة ناهيك عن سبل إجتذاب و إكتساب العملاء .. سودانير تعامل عملائها بتعال و صلف و كأنها تتصدق عليهم بشحنهم في طائراتها الخربة و المستأجرة ..
لا أعتقد إطلاقاً أن عدم الرضا من سودانير مبعثه عدم مراعاتها لمسألة وزن العفش الزائد ـ و إن كانت سودانير تجامل في هذه المسألة أحياناً كثيرة ـ و لا أرى أن سودانير ملزمة بتحمل قيمة الوزن الزائد و تضييع مكاسبها إرضاءاً لعملائها لأنها في المبدأ و المنتهى شركة تجارية تهدف إلى الربح فضلاً عن أن معظم أن لم يكن كافة شركات الطيران لا تجامل في العفش الزائد ، لكن أعتقد جازماً أن مشكلة سودانير الأساسية و تكمن في إفتقارها للكوادر البشرية المؤهلة لتقديم خدمات مميزة ، و بإختصار سودانير و على الرغم من سنوات عمرها الطويلة إلا أنها حتى الأن لا تعرف صنعة السفر .. و لا تستغربي يا نجود إن وجدتي في كل مكتب من مكاتب سودانير أكثر من عبد العظيم النو ..

Quote: و من خلال تعامل الكثيرين من أقاربي و أصدقائي و معارفي و من خلال كثير من المواقف التي كنت شاهدا عليهاأكاد أجزم أن سودانير تتعامل مع عملائها بما يتنافى مع أبسط قواعد الذوق و اللباقة ناهيك عن سبل إجتذاب و إكتساب العملاء .. سودانير تعامل عملائها بتعال و صلف و كأنها تتصدق عليهم بشحنهم في طائراتها الخربة و المستأجرة ..

على شنو ماعارفة

وخدماتم تعبانى

واى سفرية لازم تتأجل ساعتين

مافى مراعاه للركاب ممكن يكونو اغرباء فى البلد

يعنى زى موقفنا الحصل دة وعاوز يرجعنا ماراعى لى انو ممكن نكون ماجرين شقه وطلعنا منها على نهاية فترتنا نمشى وين بث

مرؤة مافى

عارف الناس صايمة والطيارة اتاجلت لغاية اطناشر ونص الناس فى المطار الطعام الجايبنو والناس صايمة تانى يوم انسى بس

اللهم حدث ولا حرج

والله العظيم عدم مبالاه مبالغ فيها

العزيزة انعام

تسلمى يارب

ومشتاقييييييييييين شديد كمان

تلفونى غيرتو برجع ليك فى الخاص

معليش

يا نجود ما تستاهلي البشتنة دي , ربي يجازيهو علي عمايلو الزول ده

الدنيا رمضان ربي يغفرلنا

اعفي منو تاخدي اجر اكثر

بس اعملوا لي سودانير المقاطعة

Quote: معليش يا نجود ما تستاهلي البشتنة دي , ربي يجازيهو علي عمايلو الزول ده الدنيا رمضان ربي يغفرلنا اعفي منو تاخدي اجر اكثر بس اعملوا لي سودانير المقاطعة

ما انا براى الامة دى كلها زعلانة منها

ليهم يوم

الاخت نجود
انتى مخطئة فى خطاء كبير للغاية بانك حجزتى على هذةة الخطوط
التى لاتراعى اصلا خدمة للركاب
لستى انتى الوحيدة التى قد عوملتى بهذة الطريقة فى مطار القاهرة الدولى
من قبل الخطوط الجوية السودانية
فهناك الالف من نساء وطنى عوملو كذلك
احكى اليك قصة حصلت معى انا مغادر السودان فى اجازتى القصيرة
اذا انا بالمطار اتيت لاوزن العفش فكانت شنطة واحدة
اتتنى سيدة سودانية تطلب منى بان اوزن لها هذة الشنطة
فاعلى الفور وافقت واذا انا واقف لاوزن شنطتى وشنطتها
قال لى موظف الكاونتر الشنطة دا ماحقتك الشنطة دا اتوزنت وعاوزين 500جنية
قلت ليهو انت ياخوى مابتشوف الشنطة دا حقتى
انت مالك وبتين اتوزنت
ورفض بان يوزن الشنطة فقلت له اما انا اما الشنطة لانو عفشى ماحصل ال40كيلو ومامن حقك انك
ترجعنى
فبعد ذلك وزن الشنطة
فيا اخت انعام كثير من القصص جرت فى مطار القاهرة من قبل الخطوط السودانية
والف حمدلله على سلامتك

عارف يامحمد عادل

الحكاية ما وزن بس الحكاية اكبر من كدة

فيها ضياع عفش بتاع الركاب واهمال مابعدو اهمال

والتعويض زاتو فى مشكلة

وحصلت لى اتنين من صديقاتى اخوات وكل واحده فيهم حصل ليها الموقف بتاع تتضيع الشنط بتاعتم على فترات متباعده

الفترة الزمنية قرابة السبع سنوات بين تتضيع شنط الاخت الاولى والاخت الثانية واخر مرة حدث تتضيع الشنط كان شهر 12من السنة المضت

ومازالت المشكلة قائمة

وانا بعتبر البحصل دة إهمال وعدم مسئولية من المسؤليين

نجود كيفك
عوداً حميداً ..

ما حصل شئ مؤسف ..
ليتهم يعلمون بأن الخدمة الممتازة هي الوسيلة الوحيدة لجذب الناس ..
فكيف نعرف ذلك ونستفيد من تجارب الغير ؟

Quote: نجود كيفك عوداً حميداً .. ما حصل شئ مؤسف .. ليتهم يعلمون بأن الخدمة الممتازة هي الوسيلة الوحيدة لجذب الناس .. فكيف نعرف ذلك ونستفيد من تجارب الغير ؟

مووووووووووو ازيك ورمضان كريم

مايحدث حقيقى شئ موسف

وماعارفه هل هذا عدم مبالاة من المسؤلين