الرقص مع ذئاب المرض

الأيام

ماضية، دون أيما إلتفاتة، فى مسيرها، فى دورانها السرمدى

ونحن

مع كثرة الإلتفات، نحو كل الجهات، الجلوس على حواف الوقت أحيانا، والركض على هواء الأسئلة أحيانا أخرى، غير عابئين بذلك الدوران الغريب

الأيام

وكأنها أقلام الحياة، تسطر كتب الأعمار، وتكتب شهادات هذا النزف اليومى، الدائر أيضا فى فلك الأسئلة

والأسئلة، هى المداخل العتيقة الى كنه الشئ وروحه، تارة تقود الى إجابات هائجة لا وجه لها ولا جسد، وتارات كثر تفضى الى المبهم، وتوالد المزيد من الأسئلة

ومن قبل، قال التجانى

من لهذا الأنام يحميه عنى -- قلمى صارمى وطرسى مجنى
نهلت من دمى الحوادث واستروى -- يراعى مما يدفع دنى
ويل هذا الأنام من قلبى الباكى -- وويحى مما يجر التجنى
حشدت جندها الحياة وزجت -- فيه من مفزع القوى كل قرن
إنها ثورة الحياة فمن للكون -- يحميه من قذائف رعن

الأسئلة، الأسئلة

مدارات من الوهم والحقيقة، ثقوب سوداء غائرة فى سماء الأيام

أينما أدرت الروح، تتراءى أخيلة بلا أسماء، وكيفما نبشت فى خزانة الأسماء، واجد أنت زيف المعنى ورمادية اليقين

وكذلك أنشد سند، وحدث

فخل الشمس ترحل
خل اشرعة الوضوح تذوب عبر
مدارج الرؤيا ةتحتدم الظلام
انا ذلك المرصود للشجن العقيم
وللكابة والضلال
يسعون بى للقاع ينتظرون رائحتى
تشق حوائط الامواج
تنبت فوق ارصفة المحال
ما قلت
صار فجيعتى الكبرى
فليت العمر مر بلا قواف او حروف
او ليت شعرى كان فى عرس الهوى
نزق الكمنجة والمزاهر والدفوف

الأيام
وكأنها لم تكتف بعد بكل ومن كل ما اقترفته اياديها الممسكة بأكاليل الشوك والشوق معا، تضعها على رؤوس اللحظات، تتويجا لرفعة الألم ومقام المعاناة

أنا مثلك الآن يا "كيفن كوستنر"
أحاور الظلال والأشباح وأرقص مع أطياف الترقب وذئاب المرض

فى فلمه الجميل، والذى قام هو بإخراجه ايضا، حشد كوستنر رؤىً عديدة، شكلت الإنسان حين لا يكون رفيقا سوى للوحدة وبوادر الضياع، فى "الرقص مع الذئاب"، قال كوستنر الكثير وترك لنا الأكثر

محاورة المجهول وترقب وصول مرتجى لا يأتى وإنتظار مثل ما هو لدى "بيكيت" ومثل "غودو" الذى لا يأتى، و"غودو" كوستنر أتى ولكن بعد أن إنتهى كل شى وتبدل، جاء ما يخشى منه، جاء قادما من خلف سديم الخوف والترقب

طيب

قيل لأبى الطب "ابقراط"
مالك تقل الأكل جدا؟
قال إنى آكل لأحيا وغيرى يحيا ليأكل

ويبدو أنى قد "عصرت على" مقولة أبى الحكماء واستوطنت أقصى أغوارها
فقد صرت دون أن أعى خصما للأكل وعدوا للطعام، ابقراطيا أكثر من ابقراط نفسه

يا زول هوى والله عدم الأكل ده إلا يسوى ليك قرحة، إتا ما بتعرف ولا شنو، أكل ياخ، أدفس بس وخليها على الله
وقد قال أولئك ال "كايسين أذاى" فى بطون كتبهم، وأطلب العذر هنا من شيخنا" بن عبد ربه الأندلسى" ومن "عقده الفريد" حين أورد ما قالوه

ألا ترى أن العود إنما صفا صوته لما خلا جوفه

طيب ياخى
العود خلا جوفو ورق صوته وزاد رنين أوتارو

وأنا خلا جوفى وزاد تعبى وشقاى، ومافى رنين غير الجاى من أوتار الوجل والخوف

ثم ما قاله الجاحظ عن أبى عثمان الثورى وهو يعظ إبنه
أى بنى، قد تسعين عاما ما نغضت لى سن، ولا انتشر لى عصب، ولا عرفت ذنين أنف ولا سيلان عين ولا سلس بول، ما لذلك علة إلا التخفيف من الزاد، فإن كنت تحب الحياة فهذه سبيل الحياة، وإن كنت تحب الموت فلا أبعد الله غيرك

وأنا كان مالى ومال الجاحظ ولا الثورى ده وولدو كمان

لا أحب الحياة إلا من أجل آخرين، فهى عندى لا تعنى شيئا طالما يعوزنى الإختيار فى إطالة أمدها، ولا أخاف الموت إلا من أجل آخرين ايضا، فهو لا يعنى لى شيئا طالما أنى لا أستطيع تأجيله

لكن يظل الموت يشكل ويرسم مغامرة تستحق الخوض، بغموضه وعوالمه التى لم يخبر عنها من ذهبوا إليها، ولكن

ما مهم يا زول

المهم أنا هسه زيك تب والله يا كوستنر

الله لا غز فيك بركة يا "تأبط شرا"
يا صعلوك يا سفيه

قال شنو
ما أحببت شيئا قط حبى ثلاثة

قال
أكل اللحم، وركوب اللحم وحك اللحم باللحم

مش قلت ليك الزول ده سفيه وما عنده دم

طيب ياخى التلاتة ديل كلهن والله ما عندى فيهن داك النصيب الوافر يعنى، البسوى التخمة

رضينا من زماننا بقليل القليل، ولم يرض زماننا منا إلا بالكثير من الهم والمرض والعلة

وأنا ما كرهت قط فى حياتى، كرهى لثلاثة

أماكن بيع اللحم، مذبوحا وحيا، وأماكن تواجد العسكر، والمستشفيات

ياخى ده وجع حلق ساى، الحبه دى ما بسويها

وجاء دور النطاسى

إنت عندك إلتهاب فى المريئ وهو السبب ليك الألم ده كله

طيب يا دكتور، الشى ده البجيبو شنو؟
المعدة فيها بكتيريا إسمها "هليكوباكتير بايلورى" ولما تتوفر ليها ظروف معينة فى المعدة، يعنى الجوع الكتير أو أكل البروتينات الدسمة والدهون المركزة والتوابل الحارة، بتتحول لى جيش جرار مؤذى وبيؤثر تحديدا فى مدخل ومخرج المعدة، وتبدأ المشكلة، تزيد العصارات وتتجمع وتنتشر فى كل القناة الهضمية

لا حول ولا قوة إلا بالله، أنا يعنى خلاص ناقص

بسيطة يا سيدى، العلاج ساهل، بس عايز منك حزم ومحافظة شديدة لأنه حيستمر لفترة طويلة

كم يعنى

حتاخد علاج مكثف لمدة أسبوع عشان ننتهى من البكتيريا، وبعد داك علاج أخف للإلتهاب لمدة تلاتة أسابيع، وبعد داك عاد الله يعينك، وعشان ما يرجع تانى لازم تواصل فى العلاج لمدة اطناشر شهر

اطناشر شهر يا مفترى، قلتها ليهو براى بى تحت تحت

جاك الموت يا تارك الصلاة

مش قلت ليك بقيت زيك يا كوستنر

التعايش مع الأضداد
التآلف مع ما لا يأتلف ولا يجتمع

فالذئب فى "حد" أسنانه الحد بين الجد واللعب، بين الموت والحياة
لكن لا بد مما ليس منه بد

اطناشر شهر ؟؟؟؟

يا حليلك
زمان كنت تضحك على المرض وتغنى كمان

هوى يا ناس أنا ما معيون
اذاى ودواى خدود وعيون

كنت عارف مرضك وين ودواك وين، وهسه برضو عارفو وين وعارف دواك وين، بس شتان ما بين الاتنين

قبيل كرومة كان بغنى

زاد أذاى يا صاحِ واعترانى نحول
طرفى دامع وصاحى وبالسهاد مكحول

والعلى ما بزول
ونومى فى عيون زول

هسه يا صاحبى نومك بدل ما كان فى عيون الزول
بقى ب "الأبرازول" و"بانتوزول"

اطناشر شهر اطناشر قرن، ما مشكلة، بس المهم الزول يكون "فى"
وأمرى لله

والغريبة "تأبط زفتا" ده لا جاهو إلتهاب فى المرئ ولا كان عنده باكتيريا ولا يحزنون

عليك أمان الله جاط الصحراء دى كلها طول وعرض ومات واقف على حيلو

و "أيوب" ده، عليه السلام والرحمة

إنت قايلو مات فى حادث يعنى

ما كتلو الصبر

القلق والزهج والخوف والوجل وتقول لى الصبر


ياخى أنا بوادى ليس بذى أهل، ولا اصدقاء ولا أحباب، اللهم إلا حجارة تشبه البشر أو بشر بشبهو الحجارة

خلينى معاك يا كوستنر

والله العظيم معاك

شكرا مرة تانية يا خواض

وأنت تحاول تخفيف وطأة الوحشة فى فضاء المرض وذئابه

والله لا وراك وجع ولا مرض

المرض ده حاجة غريبة جدا

تصدق يا اسامة دى أول مرة فى حياتى أمرض جد جد كده

إزيك يا مشاء

الذئب كائن عجيب جدا

إتحكر بى سطوة شديدة جدا فى الميثلوجيا الشعبية، خاصة عند ناس وسط أوروبا وعند قبائل الشمال والشمال الغربى الأمريكى

بقى رمز لأشياء كتيرة، خاصة الشريرة منها

عشان كده الرقص معاهو بحمل دلالات غنية جدا

وشكرا يا خواض على تزيين ساحة الرقص بالفوتوغرافيا الباهرة

نحن هنا ياصديقى
لنتزود بما يجود
به هذا القلم الانيق

إزيك يا منعم

كيف الأحوال يا صاحبى الوريف

لقياك يا منعم دائما تجيب معاها الفرح
وتفتح للأمل أبواب زى ما قال الدوش

وإبتسامة حضورك وحرفك تكتب عناوين الحياة
بطعم وإسم وروح جديدة

وبيها وبيك ومنك وفيك

نحن برضو نشيل الزاد، نقرب لى غنا الأعياد

وحياك الخالق الجميل وأبقاك

فى جوفِ حُوتِ الذهولِ
ما زلتُ
متدثراً بحلمٍ
سرقتِ الظلمة وجهَ ليلِه
و قميصُ الصباحِ
قُدّ عند فجره الكسولِ
ما زالت الأشياءُ
ترتدى عتمةَ الوهمِ الصريحْ
تسترقُ الضوءَ
وهى غرقى
فى صخرها الليلى
فى نومِ شهرزادَ
وموتها المباحِ

كتابة راقية جداً ..
ممتعة جداً ..

وونسة مع الذات ولا أحلى ,,

أستاذي أبوذر ..

أتمنى لك الرقص مع غزلان العافية
بدلاً عن ذئاب المرض

وماتخليك مع كوستنر دا

خليهو براهو

والله العظيم براهو ..

فلترقص مع تيجان المطر
حينما تلامس القطرة جسد الأرض
فلترقص مع الندى ،
فلترقص مع تفتح الورد البري
رقصة العافية الصافية
ودع الحمى والهضاريب والكوابيس
تتفرج ومن شدة الحسد تأكل نفسها
مودتي[/purple]

محمد السنى

الزول المليان بالضوء النمير
والفياض بالألق الغزير

دعواتك يا حبيبنا
زى تراتيل الملائكة
تجى نازلة مرافقة أغنيات المطر المرسل من روح الغيم

ترد الروح والله يا سنى

إن شاء الله ما تشوف كربة ولا شر
والعافية تبقالك هٍدٍم

وشكر كتير

ومودة أكتر

إزيك يا تيسير

وكل الأيام وإنتى إن شاء الله طيبة وسعيدة

الرقى والله يا تيسير فضلة خيرك
ولو نحن بدا علينا منه شوية مسحات
فهو قطع شك حيكون بقايا أريج فاح من ناس حدائق
جملو وعطرو المكان هنا، وإنتى معاهم

ومردودة ليك ذات الأمنيات السمحة
وفوق ليها باقات ملونة ومعطرة

الواحد غصبا عنه يا تيسير يكون مع كوستنر
بس قولى يا ريت نكون قويين زيه ونصبر على رقصة الوجع

أجدد الشكر الكتير والإمتنان الغزيز

وأهديك الود والإحترام والتقدير

يا تيسير

Quote: وجاء دور النطاسى إنت عندك إلتهاب فى المريئ وهو السبب ليك الألم ده كله

Quote: جاك الموت يا تارك الصلاة

والله يا معتصم فعلا شفت الموت عديل

عمل مناورات بايخة جدا

نظام تخويف وتهديد كده

هو قايلنا بنخاف ولا شنو

أنا عايز منه حاجة واحدة

بس يكون دوغرى ومباشر، جنى وجن اللولوة الزى دى

ماعندنا ليها لا روح ولا وقت

مش قلت ليك

Quote: تصدق يا اسامة دى أول مرة فى حياتى أمرض جد جد كده

سلامتك يا مطر

تسلمى يا بلقيس

من كل أذى وعلة

وما تشوفى شر

الحبيب المطر..سلامات
كل الأضوء الليلية مستنسخة من الشمس ، إلا ظل شاعرٍ
يكتب مايمليه عليه حزنه ، ويبقى ما بقيَ احتراق شمعته ..!

سنظل على انتظار في الشرفات الجانبية نرقب قصة حب تغنينا..

Quote: خلينى معاك يا كوستنر

اشكرك لانك انت انت..هذا يستحقه نبضك المتشكل حروف طاغية..

تحياتى يا بشرى

وكانت كل الأحلام الصباحية، شئ مما تركته أغنيات القمر
على قارعة الحزن

وسنبقى وحيدين، نستنطق عصى الوحشة، وتتجاهلنا قوافل الأمنيات

وما زال فى الغناء بعض حب، ما زال فى الصوت مداد

غذن فلنغنى يا بشرى

أجلس بقربك، يربت الفرح على صدر الوجع فىّ
وينام الجرح قليلا

وأهديك المودة حديقة

Quote: خلينى معاك يا كوستنر

حيث ألذئب ألأنيس والبيضاء المنتصية ماري ماكدونالد
ما أجمل كوستر وهو في حالة ترقب للمجهول
و .... ما أقبح الغزاة

كان كوستنر يحفر قدر ايامه بأظافر الإنتظار
ترقبا مليئا بالأمل
وكان القدر يتشكل فى ثنايا مخفية
ليأتى بما لا يتوقعه أحد

والله يا أحمد لو جلس كوستنر مائة عام قبل ذلك
ليتخيل فقط أن الأقدار ستجمعه ب مارى ماكدونالد فى تلك النقطة من الزمان
والمكان، ما كان ليستطيع

إذن
هل نسلم ألواح عمرنا لقلم الأيام وننتظر؟

فقط ننتظر ما ستسطره لنا وعلينا؟

شكرا يا أحمد

Quote: لا أحب الحياة إلا من أجل آخرين، فهى عندى لا تعنى شيئا طالما يعوزنى الإختيار فى إطالة أمدها، ولا أخاف الموت إلا من أجل آخرين ايضا، فهو لا يعنى لى شيئا طالما أنى لا أستطيع تأجيله

على سبيل التحية يا جميل

الآخرين الذين أحب الحياة من أجلهم ، أنت في زمرتهم
تحياتي للأسرة

غامر الود يا أباجهينة

ونحن ايضا نحبك والله يا جلال
لأنك واحد ممن يجملون وجه الأيام
بمدادك المضئ وعطر حضورك الأريج

وحياك الخالق وأدامك طيبا وسعيدا

العزيز المطر


سلامة وتنقية للروح ..واغتسال من الادران التي

تثب علي غفلة ..لكن المرض برضو بجلي الانسان

ويثقف البصيرة ..فيجعلها ترى الاشياء

من مركز حيواتها ...لك التحية ياشفيف

وحمد ا علي سلامتك ...

منعم العزيز

تحياتى وكل ايامك طيبة وعافية

Quote: المرض برضو بجلي الانسان ويثقف البصيرة ..فيجعلها ترى الاشياء

صحيح صحيح والله يا منعم

المرض بيدخل الإنسان فى أماكن غريبة جدا
رؤى كتيرة بتتغير ومعانى كانت بتدعى الثبات، تبدأ تتخلخل وتتداعى

والأهم من ده كله
تغير سلم الأولويات، والمفاهيم برضو

ده بقى حاجة تانية خالص

شاكرك والله يا حاج منعم

وبهديك تحية ملونة ومعطرة

وبهديك المودة دائما

سلامتك ايها الشاعر والفيلسوف. سلامة معدتك. و(اذا كانت النفوس كبارآ.. تعبت فى مرادها الاجسام). وجاء عن الرسول (ص) (نحن قوم لا نأكل حتى نجوع.. واذا اكلنا لا نشبع). وهو القائل (ثلث لطعامك وثلث لشرابك وثلث لنفسك) فى الدعوة الى تجنب خطر الافراط فى الاكل. وبالذات انواع الاكل التى تضر اكثر مما تنفع. مثل الدهون المشبعة والاطعمة السكرية واغذية الحضارة الحديثة من العصائر والبرقرات و(التيك اوى).
وجاء عن المواطن السودانى من جنوب السودان القولة المشهورة ( وه!! انتا بطن شايل كرئين ولا كرئين شايل بطن؟) فى معرض استنكاره لدعوة السلطة بشد الاحزمة على البطون! يعنى تحمل الجوع والتضحية، فى حين تمتلئ بطون السادة المترفين بما لذ وطاب من الاطعمة والاشربة وينامون على السرر الناعمة ويسكنون البيوت الفخيمة ويستمتعون بالرياش!

ولقد شخص الطبيب اصل العلة

Quote: وجاء دور النطاسى إنت عندك إلتهاب فى المريئ وهو السبب ليك الألم ده كله طيب يا دكتور، الشى ده البجيبو شنو؟ المعدة فيها بكتيريا إسمها "هليكوباكتير بايلورى" ولما تتوفر ليها ظروف معينة فى المعدة، يعنى الجوع الكتير أو أكل البروتينات الدسمة والدهون المركزة والتوابل الحارة، بتتحول لى جيش جرار مؤذى وبيؤثر تحديدا فى مدخل ومخرج المعدة، وتبدأ المشكلة، تزيد العصارات وتتجمع وتنتشر فى كل القناة الهضمية

ولقد جاء فى الطب الشعبى وفى حكمة الشعوب المتراكمة عبر التاريخ ان افضل دواء لعلل البطن والامعاء والمعدة هو الاغذية التى تحتوى على البكتريا النافعة مثل اللبن الرائب او الزبادى او اليوقورت yogurt
او الروب كما نقول فى السودان. عليك بالروب. ثم الروب. وعليك بتجنب استخدام المضادات الحيوية. ففى السودان وفى غيرها هناك تقليد طبى بصرف المضادات الحيوية لعلاج كل شئ. كل شئ. ولا يعلمون ان هذه المضادات الحيوية تقضى على كافة انواع البكتريا الضارة والنافعة flora فى المعدة. وتقليل او ابادة البكتريا النافعة يفتح المجال لاستيطان انواع مختلفة من البكتريا الضارة وعلى رأسها الهيلكوباكتر التى اشار اليها الطبيب المعالج. وهى مسئولة عن زيادة افراز الحامض (حامض الايدروكلوريك او موية النار) فى المعدة، الامر الذى يعرض جدار المعدة للالتهاب ومن ثم للتقرح والنزف الدموى لا سمح الله.

عليك بالروب. وتقليل او وقف التدخين. وتقليل او وقف شرب القهوة. والمشروبات الغازية. والكحول. والتقليل من البهارات فى الطعام مثل الشطة وغيرها.
وعليك بالاكثار من اكل الخضارات والفواكه الطازجة. وكل من الخبز الاسمر الذى يحتوى على ردة القمح، لما فيها من الياف تساعد الجسم فى التخلص من الفضلات.
ثم عليك بالرياضة. وبصرف ذهنك عن التفكير الكثير الذى يجلب الغم والهم.
وعليك بالحب.
الروب
والحب
اتمنى لك حب امرأة لا تجعلك تقول (الروب!)

سلامتك يا ابو ذر. وسلامة معدتك الحساسة وروحك النقية.

عادل عثمان

الزول السمح

كيفك وكيف الأيام والدنيا، وعساك تكون زى ما إنت عايز

كلامك كله صحيح والله يا عادل
خاصة فى موضوع الطب الشعبى، تعرف أنا وزى ما قلت للجماعة هنا
يمكن دى أول مرة "أضوق لى زرة جادة كده"

زمان كله كان تلاقيط ساى ومرض كضب كضب

الطب البلدى يا عادل ناجع جدا ومفيد بشكل ما معقول ابدا

تعرف نحن قاعدين هنا فى بلد، كل شى فيها بيع وشراء، من السلام عليكم لحدى مع السلامة
والطب والعلاج هنا عبارة عن تجارة وسلعة مدرة للربح والفوائد، إنت المهم تدفع وخلاص، بس تتعالج أو تموت دى ما مشكلتهم بعد داك

من وقت طويل جدا والله يا عادل بعتمد على "عسل النحل" وده شى ما عادى أبدا

وناس الحلبة والتوم والمحريب والكمون الخ القائمة العجيبة

واحد صاحبن قام قال لى

ياخى العسل ده جاى فى القرآن

قلت ليهو طيب شجرة الزقوم البقولو عليها دى برضها جايه فى القرآن

يعنى هسه العسل ده بعالج الناس عشان بس مذكور فى القرآن، ولا عشان أصلا فيهو المكونات والمواد البتعالج

ما علينا، خلينا هسه فى مرضنا العجيب ده

والله يا عادل تصدق

جد جد أنا قلت "الروب"

مع إنه الروب واحد من الحاجات اللذيذة البحبها، من ايام كنت فى السودان

بعدين اصلا أنا زول شبه نباتى، والغذاء الأساسى بتاعى هو الخضار والفواكه، يعنى علاقتى باللحوم سيئة جدا جدا، اللهم إلا إذا لقيت لى لحم أحمر مشوى، يعنى يا شية السودان ديك أو الاستيك، أما باقى اللحوم الأخرى ما عندى معاها موضوع ابدا

حياك الشافى يا عادل

والله خففت على ياخ الله يخفف عنك دنيا وآخرة

وإن شاء الله دائما ألاقيك وإنت أجمل وأسعد

والعافية تبراك محل ما تقبل

الرقص يتواصل

تبقى يومان اثنان على إنتهاء المقطع الثانى من سيمفونية الوجع

تذكرت اللحظة وجه "فيفالدى" وهو يفترش أرض "الفصول الأربعة"

نفس الثياب لك الفصول

ترى كيف سيكون المقطع الثالث من سيمفونية الآثام هذى؟

لنرى

أو لنستمع ونرقص مع تلك الذئاب التى امست داجنة