لو السودانيين والأمريكان بكامل رضا الطرفين (إتبادلوا) البلدان..البيحصل شنو؟؟(رأيك)

ياأهلنا..مساء الخير..


بقول مثلا يعني:-

لو السودانيين والأمريكان بكامل رضاهم بدلوا الدول
وجاء الشعب الأمريكي كله ليعيش في السودان..
ومشي الشعب السوداني كله أمريكا..

تفتكر الحيحصل شنو..وشكل الحياة بعد ذلك..؟؟؟


عصام

أحد الأصدقاء هنا (بالسويد) ذكر لي أن الأمريكان سيبدأون مباشرة
في الذهاب كل لمكان عمله فالمزارع سوف يذهب الي الجزيرة والمشاريع
والعامل سوف يذهب الي المصانع أو المنطقة الصناعية وسوف ينتشرون
كلهم في أصقاع السودان..

أما نحن في أمريكا فسوف نتجه كلنا الي واشنطن ونيويورك ..
والبيصل ول منو.!!!

انا شخصيا بحجز شركة ميكروسوفت باسمى
وبدى بيل غيست بيتنا فى امدرمان يعمل
العاوزو فيهو على كيفو


هتاف .....؟
يا امريكان البلد سخانة وجبخانة مدورة من جميع الاتجاهات

عصام الله يجازى محنك كمان عاوز تعشمنا فى امريكا عدييييييييل

عصـام أيهـا الصـديق ..

إخـرب عقلك !!!

Quote: ومشي الشعب السوداني كله أمريكا..

في الحالة دي أنا بوافق وما عندي اعتراض !!!
عارف ليه !!؟؟

1/ أكيد الكهرباء ح تقطع !!
واتخيل الفرحة لمن تجي !!!

2/ أكيد الموية ح تقطع !!
وفرحة جيتها بالدنيا ..

3/ أكيييد ح ألقى ست تسالي أختف منها تساليات !!
وما أجمل الحميرة والحدرة ..

4/ أكييد ح ألقى ست قهوة تحت ضل شدرة !!!
وما أروع ريحة البن ..

بس الشئ الما ح ألقاهو الكتاحة والسخانة ..
اللهم إلا الأعاصير ديك البتشيل البقرة ..
وبما أنو ما في كتاحة أنا ما ماااااااش !!!!

مـع الحب ..

صديقي حسين يوسف..
سلامات..

Quote: / أكيد الكهرباء ح تقطع !! واتخيل الفرحة لمن تجي !!! 2/ أكيد الموية ح تقطع !! وفرحة جيتها بالدنيا .. 3/ أكيييد ح ألقى ست تسالي أختف منها تساليات !! وما أجمل الحميرة والحدرة .. 4/ أكييد ح ألقى ست قهوة تحت ضل شدرة !!! وما أروع ريحة البن ..

طبعا الحاجات دي ثوابت ما بتتغير
حتي ولو غيرنا المكان!!!
وإتعودنا عليها..
متأكد شديد يا حسين؟!!

Quote: وبما أنو ما في كتاحة أنا ما ماااااااش !!!! مـع الحب ..

والله يا حسين علي قولك ..فعلا الكتاحة مهمة جدا..
يعني لو ما إتكتحنا وإتغبرنا حنعمل شنو يعني؟؟
أنا بالجد النقطة دي مؤرقاني حبة برضو..لكن ممكن نلقي ليها حل..



ـــــــــــــــــــــــــــــــــ
تسلم يا مدمن..

Quote: انا شخصيا بحجز شركة ميكروسوفت باسمى وبدى بيل غيست بيتنا فى امدرمان يعمل العاوزو فيهو على كيفو

الغالي النسر..
سلامات..
مايكروسوفت ما كتيرة عليك والله..

لكن المشكلة حتكون ثم ماذا بعد إمتلاك مايكروسوفت؟؟

Quote: هتاف .....؟ يا امريكان البلد سخانة وجبخانة مدورة من جميع الاتجاهات

إتخيلتك يا النسر لافي العمة وجادع الشال في كتفك
وقاعد في مكتب بيل قيتس.. حاجة ما تخلص..

ما بعيدة علي ربنا..الله يديك الفي بالك..

سلام
زوجتي العزيزه
تخيلت الآتي:
في ناس حيكسروتمثال الحريه.
الولايات ال51 كل قبيله حتمسك ليها واحده وبطون القبايل والقبايل المالقو ليهم حته حيسكنوهم في ألسكا
طبعا اللصقات في الصيدليات حتتعدم من جراء الظليط والكسير في المتروهات
المسارح ودور السينما والمتاحف حيعملوها زرايب ومخازن بصل
الصواريخ النوويه العابره القارات حيربطو فيها الحمير وستات الشاي والفول والتسالي حيعملو سوق امدفسو في ضل المركبه الفضائيه (ديسكفري).
مركز ناسا حيبقي بوتيك قدر ظروفك
السلاح النووي حيبيعوا في السوق الاسود
الاسطول السادس في البحر الابيض المتوسط وأساطيل الاطلنطي والهادي بقلبوها سلخانات والقواصات حيلحقوا بيها السمك في حتتو
البيت الابيض حيضربو لون اصفر زي اشلاك البوليس
وشوارع نيويورك حتبقي بنيه بفعل التمباكه
ومباني الامم المتحده حيبيعوها في المزاد(السري)
والبوهيه حتنعدم في امريكا لانو كل واحد عاوز يشخبت في محلو او في العربات الحيخلوها الامريكان
والسي آي ايه حيشتغلو فيها النسوان
والوزاره الا يمسكوها نفرين نفرين وحيكون في منصب دستوري جديد (وزير مشترك) لانو عندنا مشكلة فائض وزاري .
وأخيرا العالم كلو حيستغرب عن الاختفاء المفاجئ للولايات المتحده الامريكيه

أما الولايات المتحده السودانيه عاصمتها الخرطومطون زاهيه وجميله وخضره
وناطحات السحاب تتشاف من مدني وحقات مدني تتشاف من دنقلا وناطحات دنقلا ضلها في الابيض
طبعا سخانه الا اول يوم لانو جماعتك دورو في البلد تشجير ونوافير في كل المدن
وتشوف كيمان التراب دي تقول في شنو؟ جماعتك عملو مترو!!!!
قوات جويه ضاربه اساطيل سودانيه حايمه في المحيطات وغواصات كمان والسودان بدل مليون ميل مربع بقي اكبر دوله وضم الشاد واثيوبيا ومصر وكينيا ويوغندا كمان
وتسمع في الاخبار السودان بقي دوله نوويه ووجه ضربه لهندوراس وغزا النيبال وارسل قواته لحفظ السلام في دآلاس وفض النزاع النشب بين أريزونا واركينزاز بسبب غنمايه اكلت حوض جرجير مرشوش بالغلط سم فأر.
والسنر حينعدم في البلد وشغالين مسح شديد في الشخبته البتمجد الجهويه والقبليه
وخططوا المدن والقصر الجمهوري اصدر قرار بمنع تشييد المباني من الجالوص والقش
وتسمع دول العالم يقولو :مطره شغاله في الخرطومطون 3 ايام ولا ميعه وصرف صحي يازوووووووول!!!!!!
ولسه

بساطة حاتتحول امريكا لصحراء بعد عشر سنوات فقط و تملاء السفاية الارض والسماء من سواحل فلوريدا الى سواحل كالفورنيا...والله يكضب الشينة....
.. وبعد اربع سنوات فقط..تتحول صحارى السودان الى سهول خضراء ....وتتوقف الكتاحة...الى الابد..

Quote: لو السودانيين والأمريكان بكامل رضا الطرفين (إتبادلوا) البلدان..البيحصل شنو؟؟(رأيك)

انا ح امشى أطلب لجوء فى السودان
لانو حيحصل انقلاب فى امريكا

_____
انت (قايل) الانقاذ دى جات ساكت كده!!!
جات نيجة (مخلفات) متراكمة

أكثر تاريخ يعيد نفسه، هو التاريخ السودانى
فشل متوارث
تجارب وأدوار متشابهة

الغالي ياسر طيفور..

سلامات..

Quote: انا ح امشى أطلب لجوء فى السودان لانو حيحصل انقلاب فى امريكا _____ انت (قايل) الانقاذ دى جات ساكت كده!!! جات نيجة (مخلفات) متراكمة أكثر تاريخ يعيد نفسه، هو التاريخ السودانى فشل متوارث تجارب وأدوار متشابهة

ياسر برضو مفترض نأمل في القادم..
وما نفقد الأمل..
أنا محبط ولقيتك أكثر إحباطا مني..

الغالي الفحل..

سلامات..

Quote: بساطة حاتتحول امريكا لصحراء بعد عشر سنوات فقط و تملاء السفاية الارض والسماء من سواحل فلوريدا الى سواحل كالفورنيا...والله يكضب الشينة.... .. وبعد اربع سنوات فقط..تتحو ل صحارى السودان الى سهول خضراء ... .وتتوقف الكتاحة...الى الابد..

الله يكضب الشينة والله..

ـــــــــــــــــــــــــ
ليه كده يالفحل..!!

الغالي محمد شرف الدين..

سلامات..

Quote: سلام زوجتي العزيزه

دي ما فهمتها..

Quote: في ناس حيكسروتمثال الحريه. الولايات ال51 كل قبيله حتمسك ليها واحده وبطون القبايل والقبايل المالقو ليهم حته حيسكنوهم في ألسكا طبعا اللصقات في الصيدليات حتتعدم من جراء الظليط والكسير في المتروهات المسارح ودور السينما والمتاحف حيعملوها زرايب ومخازن بصل الصواريخ النوويه العابره القارات حيربطو فيها الحمير وستات الشاي والفول والتسالي حيعملو سوق امدفسو في ضل المركبه الفضائيه (ديسكفري). مركز ناسا حيبقي بوتيك قدر ظروفك السلاح النووي حيبيعوا في السوق الاسود الاسطول السادس في البحر الابيض المتوسط وأساطيل الاطلنطي والهادي بقلبوها سلخانات والقواصات حيلحقوا بيها السمك في حتتو البيت الابيض حيضربو لون اصفر زي اشلاك البوليس وشوارع نيويورك حتبقي بنيه بفعل التمباكه ومباني الامم المتحده حيبيعوها في المزاد(السري) والبوهيه حتنعدم في امريكا لانو كل واحد عاوز يشخبت في محلو او في العربات الحيخلوها الامريكان والسي آي ايه حيشتغلو فيها النسوان والوزاره الا يمسكوها نفرين نفرين وحيكون في منصب دستوري جديد (وزير مشترك) لانو عندنا مشكلة فائض وزاري . وأخيرا العالم كلو حيستغرب عن الاختفاء المفاجئ للولايات المتحده الامريكيه أما الولايات المتحده السودانيه عاصمتها الخرطومطون زاهيه وجميله وخضره وناطحات السحاب تتشاف من مدني وحقات مدني تتشاف من دنقلا وناطحات دنقلا ضلها في الابيض طبعا سخانه الا اول يوم لانو جماعتك دورو في البلد تشجير ونوافير في كل المدن وتشوف كيمان التراب دي تقول في شنو؟ جماعتك عملو مترو!!!! قوات جويه ضاربه اساطيل سودانيه حايمه في المحيطات وغواصات كمان والسودان بدل مليون ميل مربع بقي اكبر دوله وضم الشاد واثيوبيا ومصر وكينيا ويوغندا كمان وتسمع في الاخبار السودان بقي دوله نوويه ووجه ضربه لهندوراس وغزا النيبال وارسل قواته لحفظ السلام في دآلاس وفض النزاع النشب بين أريزونا واركينزاز بسبب غنمايه اكلت حوض جرجير مرشوش بالغلط سم فأر. والسنر حينعدم في البلد وشغالين مسح شديد في الشخبته البتمجد الجهويه والقبليه وخططوا المدن والقصر الجمهوري اصدر قرار بمنع تشييد المباني من الجالوص والقش وتسمع دول العالم يقولو :مطره شغاله في الخرطومطون 3 ايام ولا ميعه وصرف صحي يازوووووووول!!!!!! ولسه

محمد والله بالغت عدييييل كده..

ليه الإحباط التقيل ده؟؟
مافي أمل كلو كلو؟؟
ما ممكن يعني بعد ما لقينا لينا بلد جاهزة نبدأ من حيث إنتهي الآخرون..؟؟

ـــــــــــــــــــــــــــــــــــ
أنا كنت قايل نفسي الأكثر إحباطا..لكن بعد كلامك ده
أنا ما محبط ولا حاجة..


تسلم ..ويديك العافية

معليش على مشاعر الاحباط الغرقت فيها... بس دى الحد الادنى من افرازات السلوك السودانى!!!
الصورة المحبطه دى رسمها خيال زوجتى العزيزة

we are all isam Ahmad here
up ustaz isam
we will all work together
until the fall of the corrupt ingaz gang

down with
the sugar dollars suckers
and the petrol dollars thieves

the parasites who feed from the poor sudanese blood
the islamist fascist ingaz gang mafia
dr mustafa mahmoud