Post: #1
Title: نزار حسين ... فى الأسفار خمس فوائد ... وبيانٌ للناس
Author: أبوبكر حامد الأمين
Date: 09-13-2006, 08:21 AM
فى البدء حمداً لله على سلامة العودة وأسرتكم الكريمة من رحلة الصيف لماليزيا ، ومازلنا نتشوق لبقية انطباعاتكم ومشاهداتكم .
أسعدتنى مداخلتكم التى أنصفت فيها الزميلة بيان ، وللحق أثق فى كل كلمة أوردتها عنها لأننى لم أعهد فيك غير الصدوع بالحق غير متحيز ولامتحرف لقتال ، فلبيان ولكل عضوات المنبر كل التجلة والتقدير ، وهاهو البوست يحتفى بكم جميعاً ، فلنؤسس لأدبيات الإختلاف فيما لايجاوز القدر المتيقن من احترامنا لأنفسنا وللآخر المختلف .
كتب نزار حسين :
Quote: والله والله والله يا هشام...أتمني أي زول كتب عنها ما يسيء لها يقابلها شخصيا
عشان يقطع اصبعه من الندم...فبيان التي تكتب هنا ...شخصية في غاية الأدب
واللطف والوداعة...والفي قلبها علي لسانها...صحيح انها مصادمة هنا...ولكنها
وديعة جدا في بيتها وكريمة...كرم يخجلك...وأسعلني انا كنت ضيف عليها لساعات
فالذين يطالبونها بشهادات والذين يسيئون اليها... هؤلاء ...رسموا لها شخصية
من خيالهم...لا تتفق مع الواقع...وان لاقوها علا يقوموا جارين
وربنا يوريهم الصواب بركة شعبان ...والشهر الجائي... |
|
Post: #2
Title: Re: نزار حسين ... فى الأسفار خمس فوائد ... وبيانٌ للناس
Author: nazar hussien
Date: 09-14-2006, 02:51 AM
Parent: #1
لم أري هذا البوست يا بكوري...يا حبيب...زي ما بقولو ناس لنا مهدي...فقد كنت منزولا
أقحقح الليل دا ما طال...
أما عن بوست ماليزيا...فقد فشلت في تحويل الصور من الكاميرا الي الجهاز هنا...وكان
حا يكون بوست زي المعرض التشكيلي...ولا زلت أحاول...
عن دكتورة بيان...والله انا محنان في الخلق دي متلحاها في شنو؟
أها نزيدك من الشعر بيت...ما جبهة ولا كوزة ولا شكلها له علاقة
بالجبهيج أو الكوزين...ولم تقل لنا بارك الله فيك يا شيخنا...
ولم ترفع اصبعها ولم تهلل ولم تكبر...
وكان عايزة تنقلب جبهة
والله كوزة بعد ما مشينا منها حا تكون مصنفة طيش الكيزان...
فهي قطعا تختلف عن دكتورة بيان الهنا دي...
علي الحرام ياهو الصح انا لا بخاف لا بجامل ولا مكري
وما عايز أتداخل في كل بوست خاص ببيان...لكونها قادرة علي ذلك لوحدها
وعشان ما يجي زول يقول لي د..... ود.... ماليزيا الشفتها دي...
طوال بقوم بفقد المنطق وبجر عكازي...كان كتبا بكري زاتو؟
ويا جماعة الخير بيان دي ما كوزة ولا بتشبه الكيزان...دحين الماسك عليها شبهة كوزين وبكتب علي اساسه
الينزل من طهرها
|
Post: #3
Title: Re: نزار حسين ... فى الأسفار خمس فوائد ... وبيانٌ للناس
Author: nazar hussien
Date: 09-16-2006, 01:15 AM
Parent: #2
Up
للداير يشاكلني...
أنا لا عندي دكتوراة
ولا عندي قروش..
ولا حزب...
لكن جلابي...تب...كان التجليب هو سكون اعالي الأنهار...وادعاء الجعلية
أو ركوب الجمال بلا حوية
|
Post: #4
Title: Re: نزار حسين ... فى الأسفار خمس فوائد ... وبيانٌ للناس
Author: أبوبكر حامد الأمين
Date: 09-16-2006, 01:39 AM
Parent: #1
Quote: علي الحرام ياهو الصح انا لا بخاف لا بجامل ولا مكري
|
لولا أن شهادتى فيك مجروحة لقلت أنك من أشرف أبناء وطنى وأنقاهم سيرةً وسريرة ، الحال هنا يانزار لايسر ، واختلاف الرأى يفسد للود مليون قضية .
|
Post: #5
Title: Re: نزار حسين ... فى الأسفار خمس فوائد ... وبيانٌ للناس
Author: nazar hussien
Date: 09-16-2006, 01:57 AM
Parent: #4
شكرا يا صديقي علي الأطراء يا قول شيري...الله يديها العافية وين ما كانت
شيري يا بكري لو رجعت البورد وكتبت هنا بتلاقيه مميل طوالي...زول تاني
بالغلط ما بفتح بوستات ناس هناي وهناي...لامن يرك فيها الضبان...وتمشي
الكوشة براها...
يا زول الاختلاف حبابه وهو علامة عافية بس يكون بي أدب وأحترام...
أي حاجة غير كدة بتبقي غير مقبولة...
|
Post: #6
Title: Re: نزار حسين ... فى الأسفار خمس فوائد ... وبيانٌ للناس
Author: bayan
Date: 09-16-2006, 06:20 AM
Parent: #5
عاجزة عن الشكر
وربنا يجبر بخاطركم دنيا وآخرة..
وانا متأكدة كل الناس تعرف قصة اني ما كوزة
ولكن لازم يرددوها عشان يصدقوها
عشان يبرروا الكراهية دي..
التى اساسها الحسادة والحروب بالوكالة.ز
لكني واقفة في المدى ودايسة على الابر المسممة
بالكلام.. يا عملات هاشم..
وشرفتنا يا نزار ولسع بناتي بيتكلموا عن عروساتك..
ونتمنى نشوفك في وقت اطول المرة الجاية
فانت رجل عظيم وكريم وجلابي جعلي تب.. ماك مقطوع طاري..
وشكرا لابي بكر
كم انت لطيف ومهذب,,
مودتي
|
Post: #7
Title: Re: نزار حسين ... فى الأسفار خمس فوائد ... وبيانٌ للناس
Author: أبوبكر حامد الأمين
Date: 09-16-2006, 06:46 AM
Parent: #1
Quote: شيري يا بكري لو رجعت البورد وكتبت هنا بتلاقيه مميل طوالي...زول تاني
بالغلط ما بفتح بوستات ناس هناي وهناي.. |
أتمنى عودة شيرى وعودة كل من يسعى لغرس فسيلة المحبة والسلام ، وحينها سنصرخ فى وجه كل من أفرد قلبه وكيبورده لنشر ثقافة الكراهية : صه ياطنين البلبلة
لك التحية مجدداً أبايارا سيد الراى والفهم.
|
Post: #8
Title: Re: نزار حسين ... فى الأسفار خمس فوائد ... وبيانٌ للناس
Author: أبوبكر حامد الأمين
Date: 09-16-2006, 08:42 AM
Parent: #1
Quote: وربنا يجبر بخاطركم دنيا وآخرة..
|
الفاضلة دكتورة بيان ...
أشكر لك دعوتك الموغلة فى السودانية الحقة ، كم يحزننى ما آل إليه حال المنبر ، الإختلاف رحمة وفيه سعة لجهة مصالح العباد ، قد نختلف وقد نخطىء فى حق الآخرين ، وتبقى المحبة الصادقة هى خير معين على كسب احترام الآخر ، وتحضرنى هنا مقولة للراحل أميل حبيبى : " أجمل النقد ماكتب عن محبة " .
فلنؤسس سوياً لأدبيات الإختلاف ، وليكن انحيازنا لجوهر القضايا لالشخوص الخصوم .
أعانك الله فى الحل والترحال
|
|