لا للتدخل في السودان

لا بنستسلم ولانا بنركع
ولا بنسلم ليك شان تشبع
لا بنلين بالفصل السابع
ولا بنهاب صاروخ أو مدفع
ولو تاريخنا معاك ناسيه
حاول لى تاريخك أرجع
نحنا الموت رافعين راياتو
شان اولادنا في أرضنا ترتع
ونحنا الوطن الراية الكبرى
شانها الموت الغاية الأنجع
بالأرواح للعدو نتجندل
وكل العالم يشهد ويسمع
لا السودانى في يوم اتخاذل
ولا باع شبر في ارضو وطبع
لا بنستسلم ولانا بنركع
ونرفض قطعاً إنك تدخل
ارضنا يا طامع في المنبع
واحد سبعه وصفر السته
لا بيرهبنا ولا بنتزعزع
واحد سبعه وصفر السته
قرار الزيف والعدل الأبشع
واحد سبعه وصفر السته
مجلس أمنك بيه يتصدع
واحد سبعه وصفر السته
واضح هدفك وسوء المطمع
تحكم وتصدر وباقى القاضى
بس ما لينا لى الليك بخضع
تلعق في لسانك وتتشهى
وفاكر إنك تقدر تقنع
ونحنا بندرك إنك غاصب
وحالم بي خيراتنا الأروع
تدخل ؟ واهم إنك قادر
توجد لقضايانا الأنفع
وفاكر إننا ممكن نخضع
وليك نسلم أو نتضرع
واحد سبعه وصفر السته حينهى غرورك
عشان حتضوق الموت الأوجع
حنحفر ليك مقبرة أجيافك
ونسقيك مر ما كان مُتوقع
وحنخصب أراضينا بزفرك
وأشلاء جتتك وبكره حتسمع
وأرضنا حتطلع يورانيوم
والبترول حيجرى مترع
والفوسفات والدهب الأصفر
ومن مويتنا حنروى ونشبع
ومن خيرات الأرض الثره
خيرنا يفيض وبذاتنا بنقنع
ومهما فرضت حصارك وحربك
لا بنستسلم ولانا بنركع
وكان من قبل الفصل السابع
و واحد سبعه وصفر السته تفكر وترجع
وتسأل تاريخنا وأمجادو
حتلقى هزائمك في صفحاتو
وقائد حلفك فيها الوقع
نحنا الشعب الهب وقرر
يكون الموت انبل غاياتو
شان الموت تاريخاً انصع
ونحنا دراويشاً إن غضبو
تجِز الروس تسلخ وتترقع
لا بنخاف تهديد لا تهمة
وطنا نموت رافعين راياتو
وتب ما بتوقع
ويظل سودان العزة الشامخ
معروف بين الناس بسماتو
لا بستجدى ولا بتشفع
لا زاودنا عليه ولا خنا
ولا حنبيع في يوم بصماتو
ولا بتجيب العار جنياتو
ولا بنستسلم ليك ونركع
قرار الموت وقعنا عليهو
نموت واقفين وما فينا الإخضع

قرار الموت وقعنا عليه
ونحن قرارناالسيف البقطع
ونحن الموت للطامع فينا
ونحن الخير للكايس يرتع
نحمي حماك يا عزة نصونك
ونغرس بدل الزهرة المدفع

شكراً يا نجاة

قرار الموت وقعنا عليه
ونحن قرارناالسيف البقطع
ونحن الموت للطامع فينا
ونحن الخير للكايس يرتع
نحمي حمالك يا عزة نصونك
ونغرس بدل الزهرة المدفع

ياها المحرية فيكم ..

شكرا نجاة


شكرا محاهد .

الي الامام . وما النصر الا من عند الله ....



ود الباوقة

كرري تو

ويموت الدراويش

وننتظر تنصيب ملك علينا في الالفية الثالثة

حب الوطن ليس بالصراخ

بل بالعمل على تصحيح الاخطاء

تسلم مشاعركم