عفوا خطأ مطبعي في ترابلة البوستات الصحيح ترابلة الانـــــــقاذ ؟؟؟؟؟؟

بالامس شاهدت عمر البشير المجرم

وهو يصيح وبمنتهى الوقاحة بقول الناس دي (فى اشارة واضحة لحزب الامة والديمقراطي)
نحن اديناها فرصة المشاركة عبر انتخابات حرة
نحن القلنا ليهم فى حاجة اسمها تعددية
يعني مافي زول جبرنا عليها نحن منحناها ليهم!!!!!!!!!



دا عمر البشير ديل الكيزان ديل هم ناس الانقاذ

حرية التعبير ملكهم التحكم فى ارزاقنا ملكهم
يزيدوا اسعار المواد التمونية وعامة الشعب يجوع
وكروشهم تكبر على حساب الغلابة وكله بأسم الدين
ولمن يعطردو الغلابة ديل على ارتفاع الاسعار

يطلع عمر البشير يقول ليهم الكلام الفارغ القالو فوق دا

دي الانقاذ ودي حكومتها ودا وقائدها المسحوب من اضانو بالرغم من راسو الكبير دا

والواحد فى الاحباط دا لمح بوست الاخ عبدالله عقيد ترابلة البوستات

وسبحان الله اتومتيكلي العنوان أتصحح أمام عيوني وصار

ترابلة الانقاذ

الناس ذممها تم بيعها فى سوق الكيزان و أصبح همها كله كيف تلقط رزق اليوم باليوم

وناس عجبها الحال اول ما تهبشهم يقولوا ليك ياخ خلينا اها البديل شنو؟؟؟؟
طلعنا مظاهرات وعملنا مسيرة وشلنا الناس ديل حيجي منو ؟؟؟

دا شغل التربال العايز يظل ترابل الى الابد ويلقط رزق يومه بيومه بكرامة
بدون كرامة المهم يتحصل عليهو زي الكيزان دي اخلاقهم وسياستهم.

الديمقراطية دي ما عصا سحرية مجرد ما نعلنها سوف نسبح فى نعيم ورخاء

والله والمرة دي بحليفتها لو الديمقراطية وجدت نصف مجهود ترابلة الإنقاذ الاسي دا
سوف تأتي أكلها حتما وسريعا والحلم يصبح حقيقة فى ايام معدودة.

عزيزي السنجك

الإشكالية أن البشير يتحدث وكأن السودان (حق أبوه)

سيظل إنقلابي يبحث عن شرعية بمقاييس عقليته العسكرية التي ترى الأخر مجرد عدو

فقط يجب أن يعلم أن السلطة لاتعرف الديمومة ... وإلا ما آلت إليه.. بإنقلاب

بئس ما يقول


بس يدينا عرض أكتافو

إن شاء يحكمنا الجن زاتو طالما كان برضاء الأغلبية

up
up
ustaz al sanjak
little present

نريدُ جيلاً غاضباً..

نريدُ جيلاً يفلحُ الآفاقْ

وينكشُ التاريخَ من جذورهِ..

وينكشُ الفكرَ من الأعماقْ

نريدُ جيلاً قادماً..

مختلفَ الملامحْ..

لا يغفرُ الأخطاءَ.. لا يسامحْ..

لا ينحني..

لا يعرفُ النفاقْ..

نريدُ جيلاً..

رائداً..

عملاقْ

Quote: لا يغفرُ الأخطاءَ.. لا يسامحْ.. لا ينحني.. لا يعرفُ النفاقْ.. نريدُ جيلاً.. رائداً.. عملاقْ

الاخ مصطفى شكرا على المرور



احتراماتي

الاخ حيدر سلام

Quote: الإشكالية أن البشير يتحدث وكأن السودان (حق أبوه)

والمصيبة الكبيرة فى الشرائح ترابلة الانقاذ

البسمعو فى كلامه دا وبتساءلوا البديل شنو؟؟؟

دي المصيبة الحقيقة اخي حيدر

مشكلة الإنقاذيين وترابلتهم أنهم (مطلعين نفسهم خالص) في قمة جبل عالي.
وشايفين باقي الناس ... نمل.
وما عارفين أن من تواضع لله رفعه.


شايفين نفسهم هم الصاح
وكل الدنيا غلط.
ونسوا أن الحق مع الجماعة

شايفين نفسهم هم القوي الأمين.
وباقي الناس الضعيف الخائن.
ونسوا أن القوي.. هو القوي على نفسه الأمارة بالسوء.

شايفين نفسهم هم المؤمنين
وباقي الناس المرتدين والمشكوك في إيمانهم
ونسوا أن الله هو المطلع على ضمائر العباد. وهو الحاكم عليهم.


شايفين نفسهم هم الوطنيين
وباقي الناس الخونة والعملاء والمتمردين والمارقين
ونسوا أن الخائن هو من خان الناس
والعميل هو ممن أستعدى العدو القوي على بلد مشتت ومفتت
ونسوا أنهم هم من تمرد على الديمقراطية
ونسوا أنهم هم الحزب الوحيد الذي لم يوقع على ميثاق حماية الديمقراطية
وأعتدى عليها بليل


قالوا الديمقراطية ما حلت مشاكل السودان وإنوا الحزب الواحد بيحلها.
فتحول السودان بفضل حكمهم
إلى بؤرة للتمرد والعنف وإقتسام وتوزيع الثروات والسلطات حسب الإنتماءات وقوة التمرد والسلاح، بدلاً عن المساواة والعدل والحرية ولغة الحوار والإعتراف بالآخر.

وقالوا أن الشارع السوداني ما بيمشي إلاّ بحد السيف والبندقية وبالرجالة والإرهاب.
ونسوا أن التاريخ مليء بالعبر. وأن الأيام دول. وأن الشارع السوداني هو أكثر شوارع دول العالم إنتفاضا وتمرداً على الظلم. وأن عمر الظلم قصير. وأن السلطة لا تدوم.


صحيح الجمل ما بعرف عوجة رقبتو.

والإنقاذيون الآن يحصدون نتائج أعمالهم السيئة.

والعبرة لمن اعتبر.

Quote: ونسوا أنهم هم الحزب الوحيد الذي لم يوقع على ميثاق حماية الديمقراطية وأعتدى عليها بليل

والشئ المؤسف حقا انو الناس بتنسى معاهم ودي مشكلتنا الكبيرة ذاتها

- الكراس
أدوني الـ نكتب
خُتّو اللمبة
بشيش.. ما تلهلِب
وجيبو لي
القلم الـ.. ابيض
- ابيض؟!
ابيض لآ
أبيض ما بيظهر
- بس جيبوهو
اللكتب هسي
وبعدين بِظهر
...
لمّن بكرة الكراس يقدم
وصفحة وجهو البيضا تسوِّد
قلمي بيظهر
ناصع أبيض
وتجي تقراهو الناس تتعلّم
...
- بس يا أبلم..!
أيه الفايدة؟
بعد ما وجه الصفحة يسوِّد
والكراس يتبهدل ويقدَم؟
...
- دي حاجة تضحِّك
مين الأبلم؟
هسِّع ما قلنالكم بِقدم
وصفحتو تصبِح ليلا أظلم..!
...
جيبو الدفتر
جيبو.. النكتب
يمكن باكر نلقى البِفهم

ود عقيد

ليكن العصيان المدني السلمي سلاحنا الباطش بالظلم. ذلك بأن القوة الأخلاقية للرأي العام السمح تبطل مفعول العنف، كما علمتنا الثورات السلمية في تاريخنا الحديث والمعاصر


down with the killers
down with the suckers pf the Sudan oil dollars
down down with all who sells religion for few more dollars

dr mustafa mahmoud

Quote: إن شاء يحكمنا الجن زاتو طالما كان برضاء الأغلبية

the quote of the month
thank you
u said it all

Quote: ليكن العصيان المدني السلمي سلاحنا الباطش بالظلم. ذلك بأن القوة الأخلاقية للرأي العام السمح تبطل مفعول العنف، كما علمتنا الثورات السلمية في تاريخنا الحديث والمعاصر down with the killers down with the suckers pf the Sudan oil dollars down down with all who sells religion for few more dollars

الاخ ودعقيد سلام

تعرف اللون الرمادي اذا كان متعلق بشخصي اوكي
لانو دي ما مشكلة بالنسبة لينا الاتنين


لكن الخوف لمن يجتمع اللون الاسود مع الابيض فى الكتابة
عن الانقاذ.


تحياتي

Quote: والمصيبة الكبيرة فى الشرائح ترابلة الانقاذ البسمعو فى كلامه دا وبتساءلوا البديل شنو؟؟؟

ويزيدوا ويزايدوا
ويرموا الديمقراطية والديمقراطيين بكل سبة تخصهم.