من زمان .. ناس ( الأمني ) ديل ما شايفين شغلهم ..

زمانك في خورطقت ..

كنا عاملين فيها تفاتيح ..

كان في واحد زميلنا كدا شفت جداً

و بتاع جدعات ..

مرة قررنا أنو نطلع مظاهرة ..

و أتفقنا إنو صاحبنا داك

لانو زول ختري !!

يقوم يهجج المظاهرة ..

و يلهب الحماس بخطبة نارية قبل التحرك ..

صاحبنا وافق بدون تردد ..

وطوالي عمل لينا بروفة ..

قال لينا كلام عن حال البلد و اسباب المظاهرة

و شنو شنو ..

كلام يطلق النارية في حنان أي مستمع..

لمن آمنا ..

و إقتنعنا بالمظاهرة إقتناع جد ..

أهة لمن جا موعد المظاهرة بعد صلاة الفجر ..

صاحبنا الشفت قام زاغ ..

زاغ عديل كدا ..

فتشنا ليهو سما أرض في الداخلية ما لقيناهو ..

قالوا كان لابد في الغابة بتاعت المدرسة ..

قال أيه ..

ناس الأمن رصدوني ..

حي انا !!

اهة نحنا أتحيرنا ..

و لمن بقى الموضوع سيك .. سيك ..

واحد من الشباب كان شايل ليهو كيس مخدة ..

مخرم كدا زي بتاع عصابة القناع الأسود..

نظام قناع بتاع مناضل و لزوم تأمين ..

أهة أنا لمن شفت ليك القناع داك ..

بس طوالي شالتني الهاشمية ..

لبست الكيس في راسي و نسيت نفسي ..

و خطبت ليك في الشباب خطبةكدا

بت كلب..

الشباب ماكلبوا

أقصد ما كضبوا ..

قاموا شالوني أنا ذاتي ..

لمن إتكيفت ..

لكن ..

في واحد صاحبي حاقد كدا ..

شالتو الهاشمية هو ذاتو ..

شن بقى ليهو ما بقى ليهو ..

قام شال القناع الأنا مغتي بيهو وشي ..

لما فتحت لقيت ليك وشي في السهلة ..

أهة يا جماعة بقيت في التحلني ؟؟

الليلة أودي وشي وين من ناس أمني الدولة ؟؟

المهم المظاهرة قامت ..

و بجاي بجاي ..

وصلنا الأبيض ..
و ناس البوليس سكونا..

و نحنا سكيناهم ..

و دقشنا السوق ..

و حرقناهو ..

و جطنا كداااا ..

لحدي ما فترنا ..

بعد داك لقينا بنات ..

ما شاغلناهم و لا حاجة ..

و قمنا رجعنا المدرسة ..

لقينا الناس الطلعوا المظاهرة كلهم عملوا ليهم ..

suspension من الدراسة لمدة شهر ..

حتى صاحبنا الزايغ داك ..

أدوهو في حنانو عشان ما حضر التمام ..

لكن ناس الأمني ما سألو أي زول ..

بس أعتقلوا مدير المدرسة ( كارلوس )

الله يديهو العافية ..

رغم إن المدير كان بيحذرنا من المظاهرة ..

و نحنا و لا أستدعونا و لا هببوا لينا ..

و لا أنا في زول قال لي ..

انت يا الكنت لابس الهناي داك ..

و دا الشيء المزعلني ليوم الليلة ..

هسع كان الواحد عمل ليهو رصيد ..

عشان كدا أنا من اليوم داك ..

ما مقتنع بناس الأمني ديل ..

لانهم

ما شايفين شغلهم .

و لأن حقيقة كون ناس الأمني ما شايفين شغلهم أضحت راسخة عندي .. فأورد لكم قصة سبق أن رويتها في بوست سابق حيث حكاها لي أحد الزملاء ..
على أيام الإنتفاضه كان أحد مدعي النضال من المايويين السابقين قد عقد العزم على أن يركب قطار الإنتفاضة و يدخل في زمرة المناضلين ،، و قد حاول جاهداً أن يستعدي أجهزة الأمن للقبض عليه بأي وسيلة حتى يصنعوا منه معتقلاً و من ثم مناضلاً / ففطن ناس الأمن ( التفاتيح ) لذلك المتسلق ففتحوا له و تغاتتوا عليه و صهينو منه ، و حلفوا برأس أبوهم نميري أن لا يعتقلوه حتى لا يصنعوا منه مناضلاً ، لكن الرجل لم ييأس فطفق يكيل السباب لمايو جهارا و يوزع المنشورات النارية نهارا ،، لكن ناس الأمن عملوا أضان الحامل ..
وقف الرجل في نص الشارع وهو يهتف ..
نحنا المناضلين سلاحنا الطوب لن يحكمنا ( طيش ) حنتوب .. لكن لم يسأله أحد
جاز مافي و سكر مافي يموت نميري و يعيش قذافي.. و لم ( يهبب ) له أحد ..
ينعل أبو الحكومة و ما ينعل أبو المعارضة .. لم يشتغل به أحد ..
ينعل أبو البيعارض المعارضة .. برضو ما نفعت ..
في اليوم السابق للإنتفاضة قامت أجهزة الأمن بإعتقال عدد كبير من المعارضين كان من ضمنهم ( سيد اللبن ) الذي يزود ذلك السادن المتسلق ..
فصاح الرجل في وجه جاره النقابي خريج المعتقلات بدون أي مناسبة :
بلا نضال بلا كلام فارغ أنتا النضال بتعرف ليهو شنو ؟؟
وأصر الرجل على أن يعتقل ..
فذهب إلى مقر الأمن برجليه و قدميه و كرعيه ..
و في بوابة مقر جهاز أمن الدولة وقف ذلك الرجل و جعر بأعلى صوته ..
يا ناس الأمني ( بالياء ) ..
يا ناس الأمني
يا ناس الأمنييييييييييي ..
انتو ما شايفين شغلكم مالكم ..
ما تعتقلونا و تريحونا ..
ياخي ينعل أبوكم عديييييل كدا ..
و لم يعتقله أحد .. حتى مات بحسرة الدخول في زمرة المناضلين ...
بالله الجماعة ديل لو شايفين شغلهم صاح ..
هسع دي زملانا سودانيي الداخل من مناضلي الهناي ديل كان فضل فيهم لوح ؟؟

Quote: فألف مرحب بالقوات الدولية الي دارفور وتظ في البشير الذي يرفض القوات الدولية وتظ في خليل ابراهيم وتظ في كل من يرفض دخول القوات الدولية

هسع الناس ديل كان شايفين شغلهم صاح ..

تظ دي براها ما بتجيب كثافة الطظاها ..

و لا حسادة منهم بس ..

حتى أستدعاء ساكت مافي ..

اهة تظ في الجهاز ذاتو ..

غرامة غرامة .. إعتقال .. إعتقال ..