Post: #1
Title: مساجلات أبا ذر الغفاري000جديد المبدع صلاح حاج سعيد
Author: فتحي الصديق
Date: 09-02-2006, 01:31 PM
مساجلات أباذر الغفاري
(1)
عمره السكوت ما كان رضا
ولا كان دلالات مقنعة
انه السكوت لحظة قبول وهم انفعالات عارضة
وانه السكوت قولاً صريح
مكتوب على القلب الجريح... كلمة قضا
شان يرضي بالحال الحصل
ويعيش على زمن انقضى
(2)
ياساكته في عصر الكلام
ياساكنة في زمن الجنون والانفصام
ياقانعة بالحال اليباس
ورضاك قطعاً التباس
حدك كفاهو الإحتلام
(3)
ياساكتة في الزمن الصعب
صمتك جرح خاطر الكلام
وفضح عديل زيف الحكايات العجب
عن نخلة طالت عرشت مزروعة في الارض الخراب
عن زهرة فاحت نورت مشتولة في القفر اليباب
عن همة شاخت كرشت... مسقية بي موية السراب
ونقعد نصدق انه ده الحال العليك اصلو انكتب
لكين منو البقدر يقول ليكي الحقيقة الما كضب
ويحكي الكلام الفيكي جد
أنك ولود ...والعين مصابك من حسود
متاكي في جرح الالم
قابض على الأمل العشم
سكين بتجرح فينا لي حد النصال منتصب نوبة نعاس
وخدر غريب لخبط حدود الإحتراس
والحالة معدومة يقين
مذهولة في الحالة البقت في العاملين
الظلم فارض سطوته
وجوع معشعش في البطون لي ( غرته)
العدل مغلول اليدين
والخوف يزازي الآمنين
والحالة معدومة يقين
مذهولة في الحاصل على الناس الفقارى المعدمين
والموسرين.. المنعمين
ونقعد نصدق إنه ده الحال العليك اصلو أنكتب
(4)
ياساكنة في بيت الحداد
لو مات أبو الزمن اللي فات
اصلو العشم فوق الولاد
وكت السكوت ما اصلو فات فيهو الفوات
وبقينا في الزمن الصعب
لازم نكاتل وليكي نقلع فرحة من قلب التعب
لازم نغني وليكي حالك نوصفه
بالصدق نحيا ونعرفه
ونتباها بي سيرة ابا ذر الهمام
من قال في هذا المقام:
أني لأعجب لامرئ يقتل الجوع بنيه فلا يشرع حسام
أني لأعجب لامرئ قتل الجوع بنيه فما شرع الحسام
شعر / صلاح حاج سعيد
من ديوان (الوقوف على قدم واحدة)
تحت الطبع
|
Post: #2
Title: Re: مساجلات أبا ذر الغفاري000جديد المبدع صلاح حاج سعيد
Author: فتحي الصديق
Date: 09-02-2006, 01:34 PM
Parent: #1
المصدر صحيفة السوداني نسخة الخليج السبت 2 سبتمبر 2006
|
Post: #3
Title: Re: مساجلات أبا ذر الغفاري000جديد المبدع صلاح حاج سعيد
Author: فتحي الصديق
Date: 09-03-2006, 05:16 AM
Parent: #2
*
|
Post: #4
Title: Re: مساجلات أبا ذر الغفاري000جديد المبدع صلاح حاج سعيد
Author: Dr. Moiz Bakhiet
Date: 09-03-2006, 09:00 AM
Parent: #3
كم هي صادقة ومشرقة وعميقة تلك الكلمات يا فتحي
وشكراً ندياً لك
التحية للشاعر الرائع أبا ذر
أينما حل وسكن
|
Post: #5
Title: Re: مساجلات أبا ذر الغفاري000جديد المبدع صلاح حاج سعيد
Author: فتحي الصديق
Date: 09-06-2006, 06:15 AM
Parent: #4
سعدت كثيرا بمرورك يا دكتور0ولم أستغربه فأنت شاعر والشعر يهز روحك الفنانة0منذ زمان بعيد لم أقرأ شعرا معبرا عن حال الفقراء وهم يواجهون العوز والفقر00الى أن كتب المبدع صلاح هذه الرائعة00
|
|