Post: #1
Title: الخرطوم النائمة في العسل ....
Author: sudania2000
Date: 08-31-2006, 02:28 PM
السلام عليكم
اليوم زيارة عمل سريعة للخرطوم المتعافي في ون دي ترب
كنت متوجسة و خائفة قصة الاضرابات و الزحمة و المظاهرات ..
وصلت الميناء البري و اخدت تاكسي ... في التاكسي بديت اسال الشوارع السريعة
و بعيدة من الجوطة و المظاهرات يا عمو .. التفت و قال لي مظاهرات شنو يا بتي ووين؟؟
مش يا عمو عندكم مظاهرات و اضطرابات في الشارع ...
قال لي و الله انا حائم اليوم كلو ما شفت لي حاجة
طيب الجامعة كيف؟ قال ما عارف بس شارع النيل شوفتو و فاضي
طيب القصة شنو؟؟ قال القصة زوبعة في فنجان ...
مشيت مشواري و انا ما مصدقة و اتلفت و اتصل كل شوية بزول يقول لي جوطة شنو يا بت ؟ ما سمعنا
بيها الا عندك ؟
الشوارع جميلة و نظيفة و الشباب اخر وجاهة و اخر حلاوة
عربات كثيرة و جميلة و مظللة
بنات الجامعة في اخر هداوة و حلاوة
مشوراي الامم المتحدة و قضينا الزيارة الرسمية و الاخري للحبيبة العسولة
و مشينا اتغدينا في الامواج الراقية
و انا اهل العوض الكيشة اتلفت زي مروحة التربيزة 
يا ناس الخرطوم سلام (:
و يا ناس البرج العالي سلام 
يا ناس الرفاهية سلامة
الغداء اخر حلاوة
بس انا ما في الغداء في انا في جمال البنات و خفتن
قال مظاهرات قال
ديل كملو صيدلية المك نمر و كوينز كريمات
كان للعربات الباركنج ياخد ساعة لمن تزهج و في النهاية انقسمنا ناس لوج و ناس ارضي
خرجنا و شارع افريقيا يعج بالعربات و سيل البنات و الاولاد
لا حد عارف السكر صلب و لا سائل
و لا حد عارف البنزين غاز و لا كرت بيري بيد طائر
دورت علي الجزيرة و انا اقارن بين العاليمن
عالم اهل العوض و مدني الحنينة و جميلة بطبيعتها الغير مسرطنة بداء العمارات و البقالات
و الخرطوم العروس التي ترفل في المتناقضات و الفيضانات
من العشوائي الكسروا و ناسوا محيرين لليلة يمشوا وين ؟؟
لفلل الياسمين و الدياموند بالمليارات
اها ما تقولوا دا كلام بت ضلامية بس دي بلد الالف حكاية و حكاية
و القصة الخرتوم الشفتها انا و حات سيدي نائمة في العسل
و كل عام و انتم بخير
|
Post: #2
Title: Re: الخرطوم النائمة في العسل ....
Author: هجو الأقرع
Date: 08-31-2006, 02:40 PM
Parent: #1
الابنه سودانيه ، مساء النور ، الحمدالله اطمئننا وليداتنا فى الجامعات ، الله يبشرك بالخير ، المهم ناس امواج لسع السمك والشوربه تمام تمام، طيرتى ربع الراتب فى الغداء.
|
Post: #3
Title: Re: الخرطوم النائمة في العسل ....
Author: Mustafa Mahmoud
Date: 08-31-2006, 02:44 PM
Parent: #2
سامحُونا
ـ أيُّها السادةُ ـ إن نحنُ جُنِنَّا
ألفُ دجَّالٍ على أكتافنا
إسْتَبَاحُوا دَمَنا منذ وُلِدْنَا
ألفُ بوليسٍ على أوراقنا ..
يُطلقُونَ النارَ .. لكنْ ما سَقَطْنَا ..
حاولوا أن يقطعوا أرجُلَنا
كي يُعيقوا الزَحْفَ .. لكنَّا وَقَفْنَا ..
قَطَعُوا الأيدي. لكي لا نُمْسِكَ الأقلامَ ،
لكنَّا كَتَبْنَا ..
حاولوا أن يُقنعونا.. أنَّ قولَ الشعر كفرٌ .. فكَفَرْنَا
|
Post: #4
Title: Re: الخرطوم النائمة في العسل ....
Author: sudania2000
Date: 08-31-2006, 02:51 PM
Parent: #3
تسلم سيدي
الشوربة لذيذة بس اتفاديت الكام فيها عشان ما يلقي ليهو دعاية مجانية و انا مغيوظة علي القروش
الدفعتها البنية في حبيبة الاكل هسي عليك الله قراصة بدمعة وشطة كاربة و سلطة ناعمة ما كان احلي
بس ونستني معاها بالدنيا و بقول ليها انشاء الله في عرسك يا اجمل البنات
مصطفي محمود القراصة جاهزة انت جاي متين؟؟ و لا انت هو وين؟؟
تسلم
|
Post: #5
Title: Re: الخرطوم النائمة في العسل ....
Author: Mustafa Mahmoud
Date: 08-31-2006, 02:51 PM
Parent: #3
غنى ياخرطوم غنى
شدى أوتار المغنى
ضوى من جبهة شهيدك
أمسياتك واطمئنى
نحنا منك ريح وهبت
نار وشبت
فى وجوه الخانو اسمك ياجميلة
ونحن ياست الحبايب من ثمارك
فى دروب الليل نهارك
وقبل مايطول انتظارك
نحن جينا
وديل أنحنا القالو متنا
وقالوا للناس انتهينا
جينا زى ما كنا حضنك... يحتوينا
لما فارسك فينا هبّّ
وعبّّ حجرك بالمحبة وبالأماني
صحى نار الثورة تاني وجانا داخل
زي شعاع الشمس من كل المداخل
وهز بالمنشور وبشر
يوما فرهد فى عيونك غصن أخضر
وفرحة أكبر من شجونك
والسلاسل يا جميلة
يوما كان ميلاد شهيدك
يلا غني ولاقي عيدك
ولى ثمارك لقي ايديك
جيل مكافح حلّّ قيدك
فى غضبنا الح و لافح
وياما باكر وفى زنازين العساكر
نبني مجدك ومهرجانك
وكل قطرة دم عشانك
ولى جديدك يا جميلة
|
Post: #6
Title: Re: الخرطوم النائمة في العسل ....
Author: محمد جمعه جوده
Date: 08-31-2006, 03:02 PM
Parent: #1
سودانيه انتى عشان شربت الشوربه واكلتى عشان كدا بتقولى الخرطوم نايمه فى العسل دى نايمه فى نار العسل والله
|
Post: #7
Title: Re: الخرطوم النائمة في العسل ....
Author: sudania2000
Date: 08-31-2006, 03:20 PM
Parent: #6
اخي جمعة شوربة شنو دي بهارات ساي لكن و الله الخرطوم الشفتها الليلة دي و الله نائمة نوم العوافي لا شفت لي نار و لا بصل ... بس انا ما دخلت السوق العربي و اهو الجزء الشفتو العمارات و الجامعة و السفارات و البنوك و شارع القيادة كلو هادئ و اخر عسل و المدارس
كدي احكي انت ...
تسلم يا عسل
|
Post: #8
Title: Re: الخرطوم النائمة في العسل ....
Author: محمد جمعه جوده
Date: 08-31-2006, 03:42 PM
Parent: #7
الاخت سودانيه بس شوفتى الحتات السمحه ورجعتى والله يا انتى طيبه وعلى نياتك ولا تطلعى
عكس ذالك
|
Post: #9
Title: Re: الخرطوم النائمة في العسل ....
Author: sudania2000
Date: 08-31-2006, 03:47 PM
Parent: #8
الكريم جمعة
تحياتي و مودتي
انا علي نياتي دي حقيقة
الحبيت اقولوا انو انا فعلا مندهشة من حالة البورد و صدفة مشيت لقيت الامر غير
الجامعة و الميناء البري و شارع الجمهورية و البلدية و القصر هي تاني الخرطوم وين يا سيدي
الا امشي امبدةو لا الكلاكلة عشان اكون شفت الخرطوم
الخرطوم منطقة الاحداث ياها دوواين الحكومة و السفارات الاجنبية و القيادة العامة
ابو جنزير و المواصلات كلو عادي و هادئ
انا لا اكذب احد و لا اقول شئيا اخر لكن خرطوم اليوم دا نائمة و لذيذة و كمان مغيمة سخانة ما فيها
اها يا ناس الخرطوم خبرونا بالحقيقة
تسلم يا كريم
|
Post: #10
Title: Re: الخرطوم النائمة في العسل ....
Author: محمد جمعه جوده
Date: 08-31-2006, 03:55 PM
Parent: #9
يا عزيزتى سودانيه
الناس الشايفها ساكت ونايمه دى ناس نايمن بالرجاله بتايدينى ولا عندك
كلام تانى اذا كان السفارات محميه وامبارح فى السوق العربى انا شفت بى عينى
دى ولا زول قالى بنات طالبات ماشات قدامى رفعوهم فى عربيه الشرطه وبرضو تقولى الخرطوم
نايمه فى العسل انتى النايمه فى العسل يا سودانيه لانك لو عرفتى الحقيقه ودخلتى محل
الدشمان حتعرفى العسل والله حين اذن
|
Post: #13
Title: Re: الخرطوم النائمة في العسل ....
Author: sudania2000
Date: 08-31-2006, 04:08 PM
Parent: #10
انا بتكلم عن اليوم الخميس يا سيدي
تسلم
|
Post: #11
Title: Re: الخرطوم النائمة في العسل ....
Author: lana mahdi
Date: 08-31-2006, 04:02 PM
Parent: #1
Quote: اليوم زيارة عمل سريعة للخرطوم المتعافي في ون دي ترب
كنت متوجسة و خائفة قصة الاضرابات و الزحمة و المظاهرات |
كان تطلعي أمس يا حبيبة
البوست دة كان ح يكون مافي
أنا بالمناسبة يوم 30/8 فارق جداً بالنسبة لي
وفقو أعدت تقييم الكثير
لنا
|
Post: #12
Title: Re: الخرطوم النائمة في العسل ....
Author: محمد جمعه جوده
Date: 08-31-2006, 04:05 PM
Parent: #11
ايوه وريها يا لانا
|
Post: #14
Title: Re: الخرطوم النائمة في العسل ....
Author: sudania2000
Date: 08-31-2006, 04:13 PM
Parent: #12
| Quote: الناس الشايفها ساكت ونايمه دى ناس نايمن بالرجاله |
متفقين هنا
لونية
سلامات
يعني انا لو عارفاها جائطة ح امشي ؟؟؟ مالي علي روحي يا بتي ؟؟
الخرطوم دي امبارح فرقت من الليلة يعني بكم درجة ؟؟
اخواني قالوا ما عرفوا بالمظاهرات الا من النت
ديل طلاب جامعات برضو
نتفق في انو القصة ما قدر الكلام دا
|
Post: #15
Title: Re: الخرطوم النائمة في العسل ....
Author: محمد جمعه جوده
Date: 08-31-2006, 04:14 PM
Parent: #1
خلاص يا زوله تصبحى على خير لانو انا ماشى
|
Post: #16
Title: Re: الخرطوم النائمة في العسل ....
Author: khaleel
Date: 08-31-2006, 04:31 PM
Parent: #15
سودانية ازيك
ناس الخرطوم مشغولين باستقالة جمال الوالي وفقدان المريخ لصدارة الدوري بعد كان الفارق سبعة
نقاط.
وبعدين هيثم طمبل الجاء من جنوب افريقيا عشان اشارك في مباراة السودان ضد سيشل
وبعدين ما معاهو مهاجم تاني لانو معتز كبير مصاب
ولا يهم زادو الجازولين ولا زادو السكر بعدين ناس الخرطوم بعرسو شهر تمانية عشان كدة البنات بكونوفي الكواقير والنسوان مع الحنانة
وناس الطراف بيوتهم كسرها الخريف
والناس سادين دي بي طينة ودي بي عجينة
والماعاجبو يحلق حواجبو
واشغل اعدائي بانفسهم واغشيهم ربي بالمرج كما يقولون اهلي الختمية
|
Post: #17
Title: Re: الخرطوم النائمة في العسل ....
Author: عبدالكريم الامين احمد
Date: 08-31-2006, 04:54 PM
Parent: #16
الاخت ..سودانية 2000
لو كنتي عاوزة العسل الجد كنتي تمشي الكراتين في الحاج يوسف
ودار السلام...وهناك كده في اطراف ام درمان..في عسل جد...!!
|
Post: #18
Title: Re: الخرطوم النائمة في العسل ....
Author: بشير جبريل علي
Date: 08-31-2006, 05:20 PM
Parent: #17
الأخت: سودانية عاطر التحايا
والله طمنتينا وطممتينا ...
الأولي : دي عاصمتنا القومية ونتمنى أن تكون كذلك
والثانية : الصفوة أكلوا حق الشعب وناموا بيهو في العسل
وعلي كل حال هنيئاً للأميرة النائمة في الغنج
بشير
|
|