Post: #1
Title: للشوق هنا طعم البيوت -- للنيل هناك ريحة الوئام
Author: أبوذر بابكر
Date: 08-27-2006, 10:27 AM
قعدت حداكى
قدام منامات الشموس
الغايبه ليها أزل
ندهت معاكى
ريحة الفرح البتاوق
فوق شقانا
يا صفصافه
مين ودر صباح نهرك
جدع ليلك بعيد
يا قمريه
وينو غناكى
مين شتت هديل عمرك
سرق خرس البيوت حسك
ولا السكات هزم النشيد
يا عطريه
وينو شذاك
مين دنس صلاة زهرك
دفن جوه الفيافى مناكى
حلمك رهاب
جوه العطش محبوس
دمك يباب
مسمر فى الأسى الجواكى
ونحن ليهو نكوس
قدام منامات الشموس
الغايبه ليها أزل
عبيت قرب ليلك
عذاب
قبال تصل
ومرقة بدرى زى عمرك
يتيمه
صباحا بعيد وما ملحوق
وفتحتَ فى العينين مسارب
سويت دروب سيلك
سراب
مرقة غنا الناس القراب
تفضح بالحنين أمرك
والمواويل القديمه
هدت حيلك الممحوق
مضاريا بالشوق المحل
قدام منامات الشموس
رجيت غيماتك الفسلا
قعدت براى
زى عشم الأرض مدسوس
يا جايينا من جوانا
اتمهل
يا حابسنا جوه دمانا
اتمهل
يا طافينا بى نيرانا
اتمهل
شيل ضو الصبر فانوس
وعاين فى ضلام دنيانا
بى مهلا
قدام منامات الشموس
الغايبه ليها أزل
قبال مواعيد الخفوت
شمسك مكتفه بالضلام
قبال مراكب الليل تصل
لملم شراع حزنك وفوت
للشوق هنا
طعم البيوت
وللنيل هناك
مليون سلام
للشوق هنا
طعم البيوت
وللنيل هناك
ريحة الوئام
|
Post: #2
Title: Re: للشوق هنا طعم البيوت -- للنيل هناك ريحة الوئام
Author: عبدالله الشقليني
Date: 08-27-2006, 11:01 AM
Parent: #1
أبوذر الشاعر :
صديق الأمكنة .
عذب أنتَ وما تكتُب ،
تنساب عواطفك أنهارا .
توجست قبل أيام عند قراءتي أنك تنوي هجرة الصحائف السماوية !
لكنك تلطفت الآن بنا فكذبتَ الخبر ،
ففي رعود الريح ، ( تصبُر شَتلَة الوِلِف ) .
ليت لي قدرة لمزاوجة شِعرك بالغناء الواجِد .
يستحق هذا الشعر الدافئ أن تطوله أغنية تعرف كيف تبوح
بفرحكَ المُغطى .
شكراً لك
25/08/2006 م
|
Post: #3
Title: Re: للشوق هنا طعم البيوت -- للنيل هناك ريحة الوئام
Author: أبوذر بابكر
Date: 08-28-2006, 01:29 AM
Parent: #2
يا عبد الله
الشقلينى الوريف
يا ندى الأزمنة
تحياتى وكل ما فىّ من ودٍ
بالفعل، كنت أنوى مجافاة أمكنة ما عادت تجود حتى ببعض ما تبقى فينا/فيهم من إخضرار
والشرح حتما يطول، وليس هذا بمقامه
بل المقام مكرس الآن لإشعال أقمار الترحاب بك
وسوف يضيع نورها ويتضائل أمام وهج حضورك البهى دوما
أما عن الغناء يا شقلينى
فوالله قد ضج المدى كله بموسيقى حرفك النضير
سيمفونية يخرج منها ألق مختلف ألوانه
وتستحق أنت يا عبد الله أن تنصب لك الأغنيات
وتشيد لك مواسم الإبتهاج
أحييك وأهديك كل عطر الأمنيات
|
Post: #4
Title: Re: للشوق هنا طعم البيوت -- للنيل هناك ريحة الوئام
Author: أبوذر بابكر
Date: 08-29-2006, 05:24 AM
Parent: #1
وفى عتمة الوعد الضنين
وعد الخيارات إنكتب
حزنك قعد
فرحك هرب
|
Post: #5
Title: Re: للشوق هنا طعم البيوت -- للنيل هناك ريحة الوئام
Author: عبد المنعم ابراهيم الحاج
Date: 08-29-2006, 09:17 PM
Parent: #4
المطر
وبينات الشموس
السر حقيقة
الشوف
وفرح الضو
نبات يتغذي
موجاتو..
يفج ريحة
الهجير ..
ضل غيمة
مسلوبة..
تناتق مارقة
من قوس سوطك
المطري..
الوان فاضحة
خط الريشة
للآخر..
مزاج يستثني
حال الروح
وروح تنكت
جروف ختاها
نهر الحول
سماحة الطين
علاقة الكون
نواة النطفة
تتخلق..
قصيدة تلم
طرف توبها
تمد الليد
تورق لوبية
الاحساس..
العزيز ابوذر هذا ما جادت به القراءة كانعكاس لحظي
دمت يامرهف وياذوق ..ويا مشاعرك تريانة..اوع تفوت
|
Post: #6
Title: Re: للشوق هنا طعم البيوت -- للنيل هناك ريحة الوئام
Author: أبوذر بابكر
Date: 09-10-2006, 04:56 AM
Parent: #5
العزيز منعم
والشوق ليك
فيهو طعم المعزات العراض
صدقت فعلا يا زول يا أنيس
وكأنك كنت بتقرأ الغيب
فتّ والله يا منعم غصب عنى، أعارك هسه فى المرض
مره يغلبنى ومره أغلبو
ومع المقدور اسوى شنو
آنست يا منعم وبزيارتك نور المكان وضج بألوانو المبهجة
|
|