بـين هــــذا وذاك ..

إننا لا نحب حين نختار ..
ولا نختار حين نحب ..
الحب قدر وقضاء ومصير ..
ومشاعرنا خارج إرادتنا ..
تدفعنا حيث شاءت ..
وكيفما شاءت .. ومتى أرادت ..
قد نتوه ..
وقد نصل ..
قد نسعد ..
وقد نأسى ..
قد نتعثر ..
وقد ننكسر ..
قد ننهزم ..
وقد ننتصر ..
يقولون الحب هزيمة ..
ويقولون الحب إنتصار ..
يقولون الحب كبرياء ..
ويقولون الحب إنكسار ..
هكذا أندفع إليك ..
وتمتد يداي ..
ليتها لو تصافح يديك ..
وبين صمتي ونجواي ..
تحترق الأيام وتلتهب الدواخل ..
ما أمر الإنتظار ..
ما بين صبري وإنتظاري ..
أحلق في العواصف وفجأة أهبط في السكون ..
ما أقسى المجهول ..
وما بين هذا وذاك ..
أموت مرات وأحيا ..
وألمح الأشباح والأطياف ..
ما أصعب الوصول ..
ليتك تختصرين الطريق ..
نحوك أمضي ..
فليتك نحوي تمضين ..
نتلاقى في منتصف الطريق ..
لنحتفل وتحتفل الجموع ..
أنا وأنتِ والطريق ..

( لك الخيار تأملي وتفكري ..
أنا يا هذه لو أرهقتني بالنضوج قناعتي .. ألقيتها طوعاً ولا أخشى ..
لننبذ كل هدام .. ونحفظ للقديم الواصل .. النفحات إعزازاً وإجلالاً ..
ونرصد للزمان القادم المجهول إيماناً ..
وأشواقاً وذخراً مستنيراً ) ..

عزيزي مو

شنو يا زول انا ما خليتك كويس و عال العال،الحصل عليك شنو و بقيت تغني اغاني الحزن النبيل؟!!!!!!!!!!!!!!!


بالجد افتقدك كثيراً


سواحل السماء شوقي يا أمير... مقلتاي ترسم على الماء كيانك المعطاء و تسطر على الريح اسماً يشرق حتى نهايات الوجود.

و احتسب سنة وراء سنة
سنة بعد سنة

أتدري ما الاحتساب يا أمير؟؟

إن الشوق اشجار، و الدمع مدرار، و الليل أرق و الزهر عباق، و بعضك هم و كثير منك إشراق.

حاشيه:-
" عندما ينساب الحب من نبع الحياة، و يشق مجراه بين قلبين عاشقين، تنهار بينهما كل الحواجز.. أو يجف الحب.."

ارقد عافيه
و دم بخير صديقي

زهرة المنتدى

Quote: شنو يا زول انا ما خليتك كويس و عال العال،الحصل عليك شنو و بقيت تغني اغاني الحزن النبيل؟!!!!!!!!!!!!!!!

والله بقينا زي الكورة السودانية يوم فوق ومائه تحت ..

كيفك يا سيدة الورد والرياحين ..
ويبقى شوقنا إلى حد الشوف ..
(يا صاحبة في الزمن الصعب ..
والدنيا تشبه يوم معاد ..
وأبقى أحوج ما يكون لحضورك )..
أنا مثلك أفتقدك كثيراً يا صديقة ..
في زمن ضنت فيه كل الأشياء ..
وأصبح موحش ومستحيل ولا ضوء آخر النفق ولا أوله ..
كل الأيام أصبحت متاشبهة وكل الأبواب سداها المحل ..

شكراً جميلة رنوية ..
محبتي بلا حدود ..

كان نفسي قوللك من زمااااااااااااااااان

ما قلت جعلي ؟

لكن يا رئيس العصابة .. كلام ممتع جدا و من الأعماق .. بوح سلس و جاي من جوووووووووووة
يديك العافية

يديك العافية يا ريس ..

قلت لي زمان زماااااان ..
وجعلية كمان ..
دي بعض خطرفات وكلام أخريات الليل ..
لكن ..
إلى أين لا أدري ..
قد يصل ..
وقد يضل الطريق ..

شكراً جميلاً يا ريس ..

ود خالتي
ود خالتي إزيك
يا زول حرم ما تشيل هم نحن جاهزين حريقة في البكاء البجي بعد الصبر ده
ما عليك باقي العصابة أنا متكفل بيها بدءاً من تمبس مروراً بحميدة وعمر الفاروق كلها الف الف ونحل ليك المسألة ...
معتصم يا ود خالتي مرض حامد إن إتوكر فيك شديد مروقو صعب وخلينا نحصل المسألة دي بدري بدري

Quote: معتصم يا ود خالتي مرض حامد إن إتوكر فيك شديد مروقو صعب وخلينا نحصل المسألة دي بدري بدري

يعني يا عمران الواحد ما ينستر معاكم ..
ننزل أغنية تكشفوا حالنا ..
نكتب كلام تقولوا دا ريد وستو نساية زي ما الدنيا بقت قساية ..
ما نكبت خالس خالس تقولوا الحكاية فيها شاكوش ..
وتاني ياخي حامد دا ظااااتو تعب معانا ..

Quote: ما عليك باقي العصابة أنا متكفل بيها بدءاً من تمبس مروراً بحميدة وعمر الفاروق كلها الف الف ونحل ليك المسألة ...

الفكرة دي سمحة والله ..
رأيك شنو نعممه ونعمله زواج بوردابي رياضي ..
ولا نامت أعين العزابة ..

فتك بعافية ..
(وش مكشوف حاله)

تسجيل حضور ومتابعة

ما نصدق انو تمبس يطيب ويبقي كويس ...الا يقع لينا معتصم ...
الحب بقي زي الملاريا ... يقوم ده ويقع ده ,,
ملاريا لزيزة

معتصم دفع الله

تحياتى

أراك تغسل الكلام بحبيبات المطر فى رياض نجد.
ياحبيبى أنت فى عمر الهيام واللوعة والشوق فانطلق ولا تكبح فرس مشاعرك فطاقته عالية وله مقدرة فائقة على الوثب.
الغربة دوما ترهف المشاعر وإن كانت المشاعر معتصمية تجعلها لطيفة خفيفة كالطيف الجميل.
عندما أراك وتولوس بجلسته هذه وتمبس وبقية الشلة الجميلة أتذكر أيام جميلة فى منطقة عسير حيث الإنسان السودانى يحكى عنه فضله وشمائله التى يحبها أهل الخليج وخصوصا بنى قحطان وشهران وبنى الأحمر والأسمر فى تلك المناطق الجميلة.

لك التحيات بما أضفيته على صباحى من جمال.

ازيك يا دكتور بله ..
عساك بخير وعلى أحسن حال ..
نجد بصحرائها موحشة والغربة فيها غربتين ..
ولكن هناك أناس كحبيبات المطر يبللون صحرائنا ويرطبونها ..
وكأوتار الكمان يعزفون لنا لحن الحياة ..
بهم نحس بأن الدنيا لسه بخير فهم نعم الصحبة ونعم الأخوان ..
مثلك نشتاق لأرضنا الطيبة ولأهلها الرائعين ..
وذكريات حلوة كانت ما أجملها ..
شكراً لحلو كلامك ..

كن بألف خير ..

دكتور بله وشتات وعمران ...
انتو ما تعترفوا عديل كده وبالواضح ... واعلنوها داوية كما اعلنتها من قبل ونازعت فيها دكين ...
انو
الحب اجمل مافي الوجود

Quote: الحب اجمل مافي الوجود

يقول شكسبير ..
تكلم هامساً عندما تتكلم عن الحب ..
وآخر ..
( قد يولد الحب بكلمة ولكنه لا يمكن أبداً أن يموت بكلمة )..
كل منا في داخله يبحث عن الحب ..
هامساً كان ..
أو صارخاً بأعلى صوته ..
والمحظوظ منا من يجده ..

شكراً جميلاً تولوس ..

Quote: ما نصدق انو تمبس يطيب ويبقي كويس ...الا يقع لينا معتصم ...

من فترة طويلة يا تولوس خالنا ودقاسم قال "أشوف فيكم يوم" ..
وكررها أستاذنا أبوجهينة وقال أحسن تقولوا الفي نفسكم ..
إلى أن يجئ هذا اليوم الحمى بتكون كملت على الباقي فينا ..
والكلام دا كان في تاريخ سابق لزمن جميل وذكريات حلوة ..
نتمنى أن تعمر القلوب بالحب ..
والدنيا بالسلام ..

كن طيب وبألف خير يا صديق ..

سرورة صاحبتي ..
حضورك دوماً يسعدني ..
تابعي معنا ..
قد نتوه ..
وقد نصل ..
قد نسعد ..
وقد نأسى ..
قد نتعثر ..
وقد ننكسر ..
قد ننهزم ..
وقد ننتصر ..

محبتي وتقديري ..

أخي ود فع الله
الحب لك
والمنى ان تلتقي معها في الطريق
الشاقيه الترام
رغم اني من مدني لكن تقتلني ام درمان
تخيل تلاقيها والدنبا لابسه الأصيل عند ابروف
والمراكبيهاغنو ليكم وكل الخلايق اتنبن اتنين
نغني معاكم
في أجمل من تحت الشمس
بوح ياصديقي وفرح الدنيا
فترنا من نشرة الأخبار والكلام الفاضي
ومن العالم الفاقد الحب
بوح ياصديقي[/purple]

أخي الحبيب وددفع الله ..
سلامات يا زول يا رائع ..
بالأمس كنا مع فرقة المسرح السوداني بالرياض ..
صدقني كنت معنا بروحك السمحة وأعمالك الجميلة وكل الرائعين أمثالك ..
تحدثنا عن المسرح السوداني وهمومه ..
عن تراجعه ..
وعن نهضته وتطوره ..
فلكم التحية أينما كنتم ..

الطريق الشاقي الترام دا طويل شديييد يا قريبي ..
فهل إلى أخره نصل ؟
وأنا مثلك أحب مدني كيف لا والجزيرة الحبيبة أمنا وتضمنا معاً ..
ولأم درمان حب خاص أيضاً ولأهلها ..

Quote: تخيل تلاقيها والدنبا لابسه الأصيل عند ابروف والمراكبيهاغنو ليكم وكل الخلايق اتنبن اتنين نغني معاكم في أجمل من تحت الشمس

ما أجملك وأنت تمنحني هذا المشهد الرائع ..
لمسرحية قد تمتد فصولها ولكن لم يحن وقتها بعد ..
شكراً جميلاً لرائع كلامك ..
وكن دوماً في الجوار ..

محبتي بلا حدود ..

Quote: يقولون الحب هزيمة .. ..

ياهو ده بس

أنا زمان قلت ليك المثل القديم

كترة المرض للموت

اقعد إدردق كدى بس

وكل من عليها عاشق

Quote: وتمتد يداي .. ليتها لو تصافح يديك

المعتصم .. انا حالتي شايفكن إنتا وتمبس من
فتره ما مركزين وبقول الناس ديل الباقي عليهم
شنو.. أتاريكن .. تحيون هزيمة ليت و
(إن شاء الله يلاقيني)..
الله يحقق .. ولكن د. مبارك بشير يسير
مع محجوب شريف في نفس الخط وبيقول:

كل الحبيبات الجميلات مستحيلات
وربك يسهل.

Quote: كل الحبيبات الجميلات مستحيلات

وحده المحروم من رومـــا يتوه ..

أستاذنا وحبيبنا محمد عبدالجليل ..
أظنها رحلة البحث في جزر الغياب ..
أم هو التوهان بعينه أو لنقل هزيان القلوب في غير زي طمأنينة ..
أما صاحبي تامبا الله يعينه ..
راح يبحث في دفاتره القديمة ولعل الدنيا قست عليه أو نسيت ذات الوعد ..

شكراً ليك يا جميل ..
دوماً خليك في الجوار ..

وأين نحن منكم يا قبيلة العشاق ..
قلنا نحاكيكم شوية ونحاول نرسم بالكلمات ..
لكن شكلها جلت ودقت في العراضة ..
ووجدنا نفسنا في وادي لم نألفه ..
تعرف يا أبوذر ..
قبل فترة كنا بتناقش تامبا وشتات ريسي العصابة عن الحب ..
وهل أصبحت له أشكال ويتلون حسب الزمن ..
كيف كتب شعرائنا زمان وعجز الآن من يكتبون الشعر أو يحسونه ..
وتحدثنا كيف للمشاعر أن تكون حبيسة الدواخل لا تسمع همهتها من نناجيهم ..
هناك من يكتمون وهناك من يعلنون ..
وهناك من تكون الكتابة عزائه الوحيد ..

شكراً مطر ..
كن بألف خير ..

تخريمة ..

Quote: اقعد إدردق كدى بس

الحقوق دي محفوظة لأخينا الكاشف ..

..
.

Quote: ما أمر الإنتظار .. ما بين صبري وإنتظاري .. أحلق في العواصف وفجأة أهبط في السكون ..

طيب منتظر شنو يا أبو الدفاع ما تتكلم !!
ردد معاى :
كلمنى حاول حس بي
عاتبنى ارمى اللوم علّى

_____________________

حب فى المدن المغلقة ما هو الا كتم للمشاعر
وتبلد للاحاسيس .. يا الطال إنتظاركـ

Quote: حب فى المدن المغلقة ما هو الا كتم للمشاعر وتبلد للاحاسيس .. يا الطال إنتظاركـ

هو فعلاً هكذا يا تبلدي ..
كلامك في الصميم ..
لقد تبلدت مشاعرنا وسط غيوم من الغياب وجدران الصمت القاتل ..
تعرف يا تنقا عمر الكتابة دي ثمانية سنوات ..
نفضت عنها غبار الذكريات وحبيت أشرككم فيها ..
في زمان كان لسه بخير ولكنه الآن أصبح حطام نتباكي على أطلاله ..
شكراً جميلاً ..
ما أشوفك تتجول بين المكاتب والممرات ..
قال غربة ومدن مغلقة قال ..

كن بخير يا صديقي ..

Quote: إننا لا نحب حين نختار .. ولا نختار حين نحب ..

من زمن .....

لقينا لينا دقيقتين قلنانخش نشوف الحاصل شنو ....
لقيناكـ لسه سجمان و رمدان ....
أريتو حالكـ حال العدو ....
... ازيـكـ ....

بين هذا وذاك نظل حبيسين القرار

ونظل نرتقب الكلام ...

كلام عمران دا ما تديها البحر يا معتصم ...

قبل القرار يا صديقي ..

Quote: نظل نرتقب الكلام ...

حلوه وشجوه ..
قد نسعد وقد نأسى ..
وقد نضل الطريق ..
ولا نصل ..
شكراً صديق وكلام عمران على العين والرأس ..

كن بخير ..

أنا بخير يا أبوحميد ..
إنت كيفك مشتاقين بالكوم ..
والله حالة صعبة خلاس ..
يعني الدقيقتين ديل حبكو هسي ..
غايتو عالم مكشوفة حال خلاس ..


سلم لي على كل البي طرفك ..
سلام يا صاحبي ..

معتصم

حالك ما يسر لا عدو لا حبيب ..
مغتغت و خايف من كشف الحال ..
الله يصبرك









بعد إذنك يا معتصم تخريمة:
أحمد عبدالله
سلامات و مشتاقين ..
إنت وين هسي .. المكيف إشتغل

يا نوبي ما هو زي كلامكم دا البخوفنا زاتو ..
ياخي انتو اصلو ما بتريحو ..
جيبو الدربات بس وعايزين مرافقين ..



خد راحتك ياحبيب ..
البيت بيتك وأبوحميد صديق مشترك ..

كن بخير ..

Quote: أعود لسيدة البحر.. فقد أبحرت سفني في المحيطات والأرخبيلات، كانت رياحا تهز الصواري، ولا شيء في الأفق اللازوردي يوحي إلى قلب أمي، لا شواطئ، إلا النزير من الحلم والهذيان.. وفي لحظة الحزن والغثيان تذكرت سيدة البحر..! فللبحر سيدة من بهاء جميل تحط الطيور على كتفيها ويجتمع الورد في وجنتيها.. على عرشها يجلس الطيبون ومن حاصرتهم شقاواتهم.. يفرشون ويفترشون عذاباتهم.. يبيعون فوق الرصيف قلوبا جميلة.. بخورا وطيبا وشيئا من اللغة المستحيلة..! أعود لسيدة البحر بعد سنين..أخاطبها أردد نفسي بنفسي كأني أقول كلاما جديدا.. وليس لسيدة البحر شيء جديد.. كل ما في اصطلاحاتنا من جمال سردناه مثنى، ثلاث، رباع، وقاموسنا لم يعد يتحمل .... هنا يدخل الناس في رونق من بهاء جميل، تعود الطيور لأعشاشها مطمئنة، وطير يغادر سربا تشرد منفردا من سراب إلى واجهات فنادق تحمل خمس نجوم على كتفيها فيهرب منها.. إليها..! يقول كلاما كثيرا ولا يتذكر منه القليل.. هو الهذيان يعود إلينا، فسيدة البحر تعطي الحياة وقد خذلتها الحياة..! كنبع حزين يوسخه العابرون فلا يأبهون ولا ينصتون ولا يفرحون ولا يحزنون..! يمر الزمان طويلا كحزن الأحبة، جميلا كريها فلا يتذكر منه سوى انه مر في لحظة نادرة.. وسيدة البحر في لحظة نادرة، تحط الطيور على كتفيها، تعود البحار إليها.. وسيدة البحر في لحظة الصمت والهذيان تعيد قراءة قاموسنا. ترتب أحزاننا.. وترفع أشرعة من بهاء جميل على سفن هدها البحر والموت والزمن المستباح..! وسيدة البحر تمسك بوصلة البحر، تدرك أن المحبين في لجة البحر في لجة..! وأن التوحد يلغي الأنا، وشيئا فشيئا.. نغادر أجسادنا.. وسيدة البحر تمزج أرواحنا..! هنا نكتفي..! كل شيء لنا..! بدايتنا من هنا..! نهايتنا من هنا..!

يا موو ..
بالله خذ كلام د. الربعي دا .. بلسم وشفاء ووصفة لا تتوفر في الصيدليات العامة ..
أعمل منو حجاب .. تعويذه من رياح الهبباي
وأدي نسخة منو لصاحبك تمبس .. انشا الله ما تنفعو وتدخل عليهو بالوجع والحمى والسهر الطويل ..

Quote: كل الحبيبات الجميلات مستحيلات

ياسلام يا استاذ محمد ..
دا كلام جميل .. مؤثر .. ومؤلم
نعم ..
الحب صناعة مستحيلة ..
أجمله أفشله ..
أيسره أعسره ..
وأحلاه في فترينة يستعصي على الشراء ..
فـ يا ..
يا دفاتر الماء .. ويا قبض الريح ..
كل من نحبه يهجر البحر وتنساه الوعود ..
كل من نحبه يرحل ولا يعـــود ..

تقديري ومليون سلام ..

صلاح / شتات

لو مني مستني الملام ..
يا سلام عليك يا سلام ..
يا حلو دا السكوت مرات كلام ..
وعدم الكلام هو كمان ملام ..
إذاً هي رحلة الصمت في مجاهل العشق الهلامي ..
وعتاب لذيذ ينتهي بوصوله لنهاية الطريق ..
أنا يا غرامي وصلت بيك ..
في الدنيا لي حد الغرام ..
ولقيت ملامي في عينيك ..
يا سيدي زي الما ملام ..
إذا هنا وصل بيهو الغرام إلى أقصى حد ..
حيث الوله والوجد ..
ولكن تظل مخاوفه هاجس يلازمه من المجهول ..
وتستمر رحلته في تأرجح ووجل وحب لذيذ ..
الوردة لو فاته الفراش ..
ما أظن تلومه مع الندى ..
ما بتجرح إحساسو الجميل ..
والريدة يا حنين كده ..
الفراش يحتاج للرحيق ..
والرحيق في الورود ..
ثم يواصل الفراش في التحليق بعيداً ..
فهل يعاوده الحنين ؟..

Quote: يا دفاتر الماء .. ويا قبض الريح .. كل من نحبه يهجر البحر وتنساه الوعود .. كل من نحبه يرحل ولا يعـــود ..

يا الله عليك يا صلاح ..
تقتلني مثل هذه الكتابة وتعود بي إلى حيث تضيق المكان ..
وأمارس عادة الإختباء والإنزواء في محرابي الحزين ..
شكراً صلاح لكلماتك الرائعات ..
وشكراً للكاتب المتميز الربعي رد الله عافيته فقد علمت منك بأنه يلزم السرير الأبيض ..

محبتي ..

معتصم

لا حولااااااااااااااااااااا

كل دي مطرة؟؟؟؟؟؟؟؟؟؟؟؟؟؟؟






جاياك بروااااااااااقة






مودتي واحترامي

Quote: لا حولااااااااااااااااااااا كل دي مطرة؟؟؟؟؟؟؟؟؟؟؟؟؟؟؟

تخيلي يا انعام ..
أحب المطر شديييييييد ..
مع إختلاف المكان ..

شكراً لهطولك هــنا ..

محبتي ..

معتصم ياغالى

وحدهم يخوضون في الحياة يمنعونها شبهة اليأس
غيابهم يهدي الإرتباكات.. إن كان ثمة نبض أثناءه
هم هكذا يخلقون تفاصيلنا..
لعلهم يعلمون!

لك قوافل بهجة تزفك الى مبتغاك في يسرٍ وأمان.

معتصم الشفيف ..
جميعنا نتسكع مابين الانتظار وحلم العوده ...
بين الالم والامل...ورغـم اتساع المساحه وبعد المسافه
(جغــرافيا")الا انها تضيق.. فدوما" الحنين رسول بيننا
يدني البعيد..

غــدا" اجمل( العين تشوف العين والايــد تصافحو)

Quote: وبين صمتي ونجواي .. تحترق الأيام وتلتهب الدواخل .. ما أمر الإنتظار .. ما بين صبري وإنتظاري .. أحلق في العواصف وفجأة أهبط في السكون ..

لك

لنا

لهم

اللـــــــــــــــه

بشري سليمان كتب:

Quote: وحدهم يخوضون في الحياة يمنعونها شبهة اليأس غيابهم يهدي الإرتباكات..

اواااااااااااه لو يعلمون
مايفعله غيابــهم

معتصم + بشري
كمية الشجن دي كبيره ياخواني

عزيزنا المعتصم بالحب:

((

Quote: ما أقسى المجهول .. وما بين هذا وذاك .. أموت مرات وأحيا .. وألمح الأشباح والأطياف .. ما أصعب الوصول .. ليتك تختصرين الطريق .. نحوك أمضي .. فليتك نحوي تمضين .. نتلاقى في منتصف الطريق .. لنحتفل وتحتفل الجموع .. أنا وأنتِ والطريق ..))

وكما قالت زهرة المنتدى ( رانيا ) .. بقيت فعلاً تغني أغاني الحزن النبيل .. الحكاية شنو يا أبو الشباب .. ما سمعت ندوية بت القلعة (ندى العنبر) قالت شنو على لسان دكتور الكوباني ؟ أسأل حبيبنا سجيمان ، فعنده الخبر اليقين .. واللا أقولك ، مافي داعي نزعجو .. هاك ما قالت :

قلت ليك سيب الغرام ..
يا قلبي مارضيت الكلام ..
خلاك وغاب ما حنا ليك ..
وبقيت مع الشقا والملام ..
يا قلبي مارضيت الكلام ..
******
من ريده في جواك صحا ..
شلت الاماني المفرحه ..
وما قايل الحلم الكبير ..
لحظاته ذي ضل الضحي..
والليلة ما الهم اترسم..
والحسرة بانت والندم ..
حتي الامان راح وانعدم ..
تلقاه وين تاني المنام..
******
يا قلبي مارضيت الكلام ..

وبيني وبينك .. بوحك انت وهمسك سمح بالحيل ، لأنو كما قال الريس جلال – (أبوجهينة) جاي من جوووووه) .. ومن الأعماق يا حبيبي يا غالي .. وطعمو حلو ، رغم إنو حروفو تئن وتتوجع .. يا ربي ده من شنو ؟ من مرض حامد كما قال أخي (عمران) ؟ طيب ما أهو شايفين صنو روحك (تمبس) متماسك وقابض على الجمر .. أم تراه هو الآخر يتجمـّـل ؟! حيرتونا معاكم يا شباب ؟!

لكن لو عاوز الجد .. أمسك في كلام أخونا دكتور (بله موسى) .. وأعمل بنصيحته : (أنت فى عمر الهيام واللوعة والشوق فانطلق ولا تكبح فرس مشاعرك فطاقته عالية وله مقدرة فائقة على الوثب) لماذا ؟ لأني برضو بتفق مع أخينا (تولوس) الذي أكد أن : ( الحب أجمل ما في الوجود ) .. وزي ما شرحت ندوية في أغنيتها الجديدة اللي إسمها باب الريد متاكا : (يا ربي سجيمان يكون سمعها ؟!)


لو حبيبك فات نساك ..
والزمان سابك جفاكا..
اصبر الايام تعدى ..
خلي باب الريد متاكا..
*****
اصلو طبع الناس بتنسى ..
وتاني بتلين لما تقسى ..
والغرام لو موجه لجه ..
بكره فوق الشاطىء بيرسه..
*****
تلقي زول يعرف جمالك ..
ويعرف الحب في وصالك ..
وتلقي في الطيب منالك ..
والسنين تصدق معاك ..
*****
خلي باب الريد متاكا..

ما أصدقك وأنت تتجلى في مواصلة البوح : ( قد نتوه ..وقد نصل ..قد نسعد ..وقد نأسى ..قد نتعثر ..وقد ننكسر ..قد ننهزم ..وقد ننتصر .. الخ) ..

وصدق شاعرنا الحلنقي عندما حلق بنا في القول :

نهوي الازاهر ما غلط ..
بالريد نجاهر ما غلط ..
يبقي الغلط لما العزيز ..
يفهم مشاعر الناس غلط ..

وقبل ختام هذه الشخبطة على جدار بوحك ..أقول ليك لو عاوز نصيحتي ، وهي عن تجربة .. أقول ليك كما قال (ود البادية) على لسان المبدع (عز الدين هلالي) :

شوف نحن عارفين قيس شقى ..
وعارفنو كان تايه وحيد ..
لاحبـو لاريدو اتلقــــي ..
ولا عمرو في يوم عاش سعيد ..
طول عمرو كان مستنى ليلى ..
وكان بيحـلم بالجديد ..
اهو هسه مرت الف ليلة..
وبرضـو بنفكــر نريد ..
مع انو عارفين الثمـن ..
اصلو طبعك يا زمن..
لا راضي إنت تغيرو ..
ولا نحن راضين بالمحن ..
**********
انا ما بقول يا قلبي اقسى ..
وخلي للحــــب الـدرب ..
لكن كمـان ما تكـون عنيد ..
وتحـب ليـك زول ما بحب ..
معقـول بس زول ما بريد ..
يعصـــر وراك دم القلـب ..
ساكت تضيـع ويروح شبابك ..
وتفنى في نــص الدرب ..

وفي الختام أدعو ليك عزيزنا الرائع مو فأقول :

سلامتك من حسد أو شر..
ويسلم عودك الاخضر..
سلامتك من عيون الناس ..
يطول عمرك وما يقصر ..
سلامتك يا المعتصم بالحب ..


وسلمت لأخيك :

( ليمو )

يحكى أن الأصمعي كان ماراً في بادية الشام فوجد بيتاً من الشعر مكتوباً ..
يا معشر العشاق بالله خبروا إذا حلّ بالفتى عشق فماذا يصنع ؟..
فكتب الأصمعي تحته ..
يداري هواه ثم يخضع في كل الأمور ويخشع ..
وعندما عاد في اليوم الثاني وجد مكتوباً تحته ..
كيف يداري هواه والعشق قاتل الفتى في كل يوم قلبه يتقطع ؟..
فكتب الأصمعي تحت البيت ..
إذا لم يجد صبراً لكتمان سره فليس لي شيءٌ سوى الموت ينفع ..
وعاد في اليوم الثاني ووجد شاباً معلقاً على شجرة وقد فارق الحياة بعد أن كتب ..
سمعنا وأطعنا ثم متنا فبلغوا سلامي إلى من كان للوصل يمنع ..
فهنيئاً لأرباب النعيم نعيمهم وللعاشق المسكين ما يتجرع ..

أين نحن من كل هذا أخي الحبيب عبدالحليم ؟..
لقد أصبح الحب كالوجبات الخفيفة نتناولها ولكن لا نشعر بها ولا تشبعنا ..
أصبح الحب مادي في زمن سريع تتغير فيه كل الأشياء ..
قليلون فيه من يحفظون الوداد ..

وأبقى فى كل المداين
سكتى .. وسفرى الجحيم
تبقى أيه الدنيا من بعدك .. تكون
وأبقى أيه بعدك .. أكون؟ (صلاح حاج سعيد)
وتتواصل رحلة البحث في مدارج المجهول ..
تفتر خطاي وأضل الطريق ..
نفسي ألقاك ..
وأكون كلي من بعضك ..
أو بعضي من كلك بدن ..
داير ألقاك وأوحد دائرة الدم ..
المسمة بيني بينك والشجن .. (أزهري محمد علي)
شايل جراح الفرقة ..
والعشم لي سكتك ..
يصدني عنادك ..
يغلبني الوصول ..
لقيت غيرك .. بضيع إسمي
وبقيت أنا حي .. وزي مفقود .. (مدني النخلي)
ويجيني حنين الكون ..
يضيّق صدري ..
وأبقى عارف دي النهاية ..

شكراً عبدالحليم ليمو على الكلام الجميل ..
وليتنا ندرك معاني الحب ونسمو به ..
جمل الله أيامك زي ما جملت هذا البوست بحضورك الأنيق ..

محبتي ..

الغالية عنيدة ..
تحيات الشوق والمحبة ..

Quote: جميعنا نتسكع مابين الانتظار وحلم العوده ...

إنه كذلك ..
ما أكبرها مساحات الألم والحزن ..
تتسع باتساع المكان وطول الغياب ..
ولكن يبقى بعض حنين وذكريات جميلة ..
ودائماً أقول إن أجمل اللحظات هي التي لم نعشها بعد ..
ما أسعدنا بكم وبصحبتكم ..

لك حبي وتقديري ..

تقول غادة السمان ..
كلُّ أرضٍ تحت نعال الروح.. هاوية
كلُّ منيـّة في مصاف الرؤى.. خنجـر

الصادقون وحدهم يا صديقي بشرى ..
ينتشلوننا من الهاوية ..
ويبعدون خناجرهم من خاصرة الحلم ..
ويعلنون بأننا أحــــيا ..

شكراً لحروفك الأنيقة ..
دم جميلاً كما أنت ..

الحبيب معتصم ،، ما كنت كويس يومداك ده متين بقى عليك

غايتو بس آآآآآآآآخ.

شرووم

Quote: إن الشوق اشجار، و الدمع مدرار، و الليل أرق و الزهر عباق، و بعضك هم و كثير منك إشراق.

الالق الانيق

معتصم

الامانة في الذمة صاحبتي حوبة اتصلت و اخبرتني بالبوست و باعجابها به و انا ما كنت شفتو لسة

و هسي بعد شفت البوست و بقول ابكيتني و U MADE MY DAY برضو

فعلا مميز

شكرا علي الكلمات و اللحن

و ربنا يجمع تمبس و معتصم و بقية الشلة باجمل و اصدق الحبيبات

العزيزة دكتورة سودانية ..
البوست زاد أناقة وتميز بحضورك ..
شكراً لرقيق كلماتك ..
وشكراً أيضاً لصديقتك بلغيها تحياتي وتقديري ..

علمني حبك أن أحزن وأنا محتاج
منذ عصور لامرأة تجعلني احزن
لامرأة أبكي فوق ذراعيها مثل العصفور
علمني حُبكِ أن أحزن و أنا مُحتاج
منذ عصور لامرأة تجعلني احزن
لامرأة أبكي فوق ذراعيها مثل العصفور
لامرأة تجمع أجزائي
كشظايا البلور المكسور
علمني حبك سيدتي أسوَءَ عادات
علمني افتح فنجاني
في الليلة آلاف المرات
وأجرب طب العطارين وأطرق
باب العرافات علمني أخرج من بيتي
لأمشط أرصفة الطرقات
أطارد وجهك في الأمطار وفي أضواء
السيارات والملم من عينيك
ملايين النجمات يا امرأة دوخت الدنيا
يا وجعى يا وجع النايات
أدخلني حبك سيدتي مدن الأحزان
وأنا من قبلك لم أدخل مدن الأحزان
لم أعرف أبدا أن الدمع هو الإنسان
أن الإنسان بلا حزن ذكري إنسان
علمني حبك أن أتصرف كالصبيان
أن أرسم
وجهك بالطبشور علي الحيطان
يا امرأة قلبت تاريخي إني مذبوح فيك
من الشريان إلى الشريان علمني حبك
كيف الحب يغير خارطة الأزمان
علمني أني حين أحب تكف
الأرض عن الدوران
علمني حبك أشياء ما كانت أبدا في الحسبان
فقرأت أقاصيص الأطفال
دخلت قصور ملوك الجان
وحلمت بان تتزوجني بنت السلطان
تلك العيناها اصفى من ماءالخلجان
تلك الشفتاها أشهى من زهر الرمان
وحلمت بأني أخطفها مثل الفرسان
وحلمت باني أهديها أطواق اللؤلؤ والمرجان
علمني حبك يا سيدتي ما الهذيان
علمنـي كيف يمر العمر ولا تأتي بنت السلطان
ولا تأتي بنت السلطان ..

جزء من قصيدة مدرسة الحب .. نزار قباني

ربنا يجمل أيامك ..
ويبعد عنك الأحزان ..

محبتي بلا حدود ..

Quote: ما كنت كويس يومداك ده متين بقى عليك

أنا زاتو قلت كده يا شروم ..
لكن تقول شنو صاحبي قاعد يعاديني ..

كيفك يا حبيب من ديك وما شفناك تاني ..
دوماً خليك في الجوار ..

محبتي ..

الأستاذ معتصم...صاحب القلم الحنين

أعدو..أركضُ..نحو محراب الحب
أتمهل..ُأصعد..أسواره ُ
أهبطُ..أدنو..من دواخله
أبتعد..ُأصرخُ..أئنُ من آلامه
ألهثُ..أصمتُ..أضيعُ بعمق في جوفه
أتواجدُ..أعصفُ..أمطرُ شوقاًللقاءه
أبكي..أبتسم..أضحَكُ..فانا الآن معه



salma subhi

أخي العزيز الحبيب معتصم


يسعد صباحك وينور طريقك يا غالي

Quote: تكلم هامساً عندما تتكلم عن الحب

بس شايف صوتك عالي يا غالي ، أين الهمس هنا ولا تمبس عاداك ، ربنا يرجعها ليك بالسلامة ، وتسلم عزيزي .

كيفك يا عمدة ..
مشتاقين كتير ..

هل يجدي الصراخ في وادي الصمت والعاشقين ؟
إنه همس الدواخل يا صديق ..
لعشق هلامى لم تكتمل لوحته بعد ..
حروفه بلا نقاط ..
كوردة بلا رحيق ..

كن بخير ..

بتخيلك ما بين خطاي ..
وروعة حروفي التشتهيك ..
وأنا بكتبك سكة للشوق والمطاف ..
دوزنت ليك كل الغناء ..
وأبحرت في شاطئ الضفاف ..
جاني الصدف راسم عليك ..
كل خيوط الإشتياق ..
شان أوصلك ..
ورغم كل التفاصيل بتخيلك ..

كلام جميل يا سلمى ..
ليتنا نفعل ذلك فما أحوجنا للركض لمن نحب ..
نقطع كل المسافات نعلو ونهبط لندنو على من نحب ..
وجميل حينما غنى أمل دنقل لحبيبته ..
مازلت أنت ... أنت ..
تأتلقين يا وسام الليل في ابتهال صمت ..
لكن أنا ..
أنا هنـــــــا ..
بلا (( أنا )) ..
سألت أمس طفلة عن اسم شارع ..
فأجفلت ... ولم ترد ..
بلا هدى أسير في شوارع تمتد ..
وينتهي الطريق إذا بآخـر يطل ..
تقاطعُ ..
تقاطع ..
مدينتي طريقها بلا مصير ..
فأين أنت يا حبيبتي ..
لكي نسير ..
معا..
فلا نعود ..
لا نصل ..


شكراً جميلاً سلمى لحلو الكلام ..
وحضورك الأنيق ..

محبتي ..

Quote: إننا لا نحب حين نختار .. ولا نختار حين نحب .. الحب قدر وقضاء ومصير .. ومشاعرنا خارج إرادتنا .. تدفعنا حيث شاءت .. وكيفما شاءت .. ومتى أرادت ..

اين انت يا معتصم

واصل بوحك هذا فهو جميل








مودتي واحترامي

يا ودفع الله

الزول السمح

الله يكضب الشينه

خليت ناس ابو جهينه... يشمتو فينا

يازول شد الضراع


كلام بيني... وبينك

الحب حلم لايتحقق...

يازول ما اكسر مقاديفك

سير يا ود دفع الله

الجميل ودشندي ..
والله زماااااااان يا حبيب ..
مشتاقين بالجملة ياخ ..
مكالمتك اليوم رفعت من معنوياتنا شوية ..
بعد ما كنا في دوري الشمس الحارة ..

Quote: الحب حلم لايتحقق...

ما أكثرها الأحلام يا عمدة ..
وليس كل ما نحلم به يتحقق ..
بعدين الشماتة دي لاحقانا لاحقنا ..
يعني سجن سجن غرامة غرامة ..

يديك العافية ..

موجود يا انعام بحسكم ..
شكراً لأنك دوماً في الجوار متلفته ومناديه ..

أحياناً تجديني حين يغني صلاح أحمد إبراهيم ..
وأخذت أغنى فى شجو .. ألمى ظاهر
يا طير الهجرة .. يا طائر
يا طيراً وجهته بلادى
خذنى بالله أنا والله على أهبة
قصت أقدار أجنحتى
وأنا فى زاوية أتوسد أمتعتى
ينحسر الظلُ فأمضى للظل الآخر
* * *
لكن الطير مضى عنى
لم يفهم ما كنت أغنى


محبتي بلا حدود ..

معتصم يا ختيييييييييييير..

والله عندي قصيدة كده كتبتها في

زول اداني شاكوش حار خلاص..اها قلت

اجي اكتبها ليك هنا ونجتر الذكريات مع بعض..

تاني ضميري انبني وقلت معتصم ده زول حساس

وحيقعد يساهر من شدة ما القصيدة مؤثرة

وانتي تكوني نايمة في سابع نومة بقلبك

الميت ده... عشان كده ما حاكتب ليك القصيدة

وانت ذاتك ما تبوظ لينا التماسك التكتيكي

بتاعنا بكلامك البيقطع القلب ده...

بديك لغاية يوم الجمعة كان لقيت البوست ده

لسه فوق بنزل ليك القصيدة وانا ما مسئولة

من البحصل.. يلا مع السلامة

( وين صولو ؟ والله مغرودين فيهو غردة..!)

يعني دا تخدير موضعي يا دكتورة ولا كيف ..
تعالي مارقه بالقصيدة ..
الحصل حصل زمااااان ..
والحاجات دي بقت ذكريات وحاتك ..
راسنا دا بقى يستحمل كل الصدمات والشواكيش الأرضية والمحمولة جواً ..
وجرعات ما قبل الحب وما بعده من شواكيش ..
بعدين دي بخطة 3-6-1 ميرسلاف في الهلال ما لعب بيها ..
قالت تبوظ لينا التكتيك بتاعنا قال ..



سول تحت الخدمة ..
بس أدونا ألووووووو ..

الأستاذ معتصم

لم أجد كلمات تستحق الرد على شخصك الحساس سوى أن أهديك قصيدة "ماذا يكون حبيبتي"التي كتبها والدي حسن عباس صبحي رحمه الله وتغنى بها كابلي....

________________

ماذا يكون؟

ماذا يكون حبيبتي؟
ماذا يكون؟

******

يا جرح دنياي الّذي لا يندمل
يا من تركت القلب ينزف في أنين
حسرات لحظات توالت في وجل
كصدي يطير مضيّعا عبر السنين

*******

ماذا يكون حبيبتي؟
ماذا يكون.

*******

بعد الّذي جرّته أيّام العذاب
و توشّح القلب المولّه بالسراب
وهو الّذي يلقي الصباح علي أمل
و يبثه من وجده شوق الكنار
وينضّد النغم المورّد للنهار
حتّي مع الّليل المخيّم بالظلام
يهب الحياة غناؤه...
يهب الفنون.

*******

ماذا يكون حبيبتي؟
ماذا يكون؟

*******

بعد الوعود وقد تلاشت و انطوت
بعد البراعم في أكمّتها ذوت
بعد العناد و قد توشّح بالظنون؟

*******

ماذا يكون حبيبتي؟
ماذا يكون؟

*******

و مع السلام
لك من فؤادي باقة الحبّ الحنون
لك من عيوني دمعة المزن الهتون
لك من جنوني، يا جنوني، ألف لون
لك من فؤادي ما يكون و لا يكون
و لك السلام و لهفتي
و تساؤلي:
ماذا يكون حبيبتي؟
ماذا يكون؟


salma subhi

يا الله يا سلمى ..
كم أعشق هذه الأغنية وأطرب لها ..
شكراً جميلاً على الإهداء ..
بالجد أسعدتيني وأطربتي دواخلي ..
ألف رحمة ونور للوالد الدكتور حسن عباس صبحي في الخالدين إن شاء الله ..
تابعت البوست التوثيقي وسوف نكون هناك معك ..
في هذه الرحلة عبر كتابات الوالد الراحل ..
ومع السلام
لك من فؤادي باقة الحبّ الحنون
لك من عيوني دمعة المزن الهتون
لك من جنوني، يا جنوني، ألف لون
لك من فؤادي ما يكون و لا يكون
و لك السلام و لهفتي
و تساؤلي ..

كامل تقديري ومحبتي ..