ريحة الحلو مر

بدأت تنتشر في الجو هذه الأيام رائحة الحلو مر التي تعلن قرب حلول شهر رمضان بتفاصيله المغرقة في الخصوصية في السودان، رائحة الحلو مر (الآبري) تبعث في نفسي أشجاناً وتستدعي صوراً تقبع بعيداً في أعماق الذاكرة.
الاستعداد لرمضان يبدأ ببرنامج (الزريعة) والذي يبدأ بغسيل الذرة (العيش) ثم وضعها على جوالات الخيش على الأرض، بعدها يبدأ التسوق لشراء مستلزمات رمضان من الجرادل والكبايات وصحون البليلة والكور(رمضان كريم) ،وغسيل السجاد وتنظيف "الأكاليم" وشراء الحطب

الطقس الرئيسي كان يوم (العواسة) ... يرتبط في ذهني مباشرة بأكل "أم فتفت" و"الكمونية" واللتين تحرص جدتي على تحضيرهما كبرنامج أساسي في هذا اليوم. تستعد النساء مبكراً لهذا اليوم وتشعل النيران في الصباح الباكر وتنتشر الرائحة الجميلة.
كان كل همنا أكل (الخرات) وهو -لمن لا يعلمون- عجينة الحلو مر الزائدة عن "الطرقة" بعد نضجها وتؤخذ من الصاج مباشرة وترش بالسكر وتؤكل ساخنة.

كنا في طفولتنا نسكن في السجانة ... قريباً من بيتنا الكبير (جدنا وجدتنا) .. وكان البيت عامراً بالأهل والضيوف والحب، وكنا نعتبره قلعة الأمان والفرح. الأحفاد في هذا المنزل يزيدون عن العشرين يجتمعون على مدار اليوم ناشرين الفوضى والفرح.

كانت جدتي –رحمها الله- إمرأة خرافية تتميز بوجه صبوح وصوت يفيض طيبة .... مستعدة لتحمل مسئولية كل هذا الجيش من الأحفاد بحب حقيقي وبلا كلل. لها مقدرة فائقة على حل النزاعات المستمرة بين الأطفال ... يأتي كل طريف لاجئاً إليها وهو موقن بأنها ستنصره، يخرج الجميع بعد حل المشكلة راضياً وكل طرف على قناعة تامة بأنها انحازت إليه.
حتى عندما نخطئ ويهم آباءنا وأمهاتنا بمعاقبتنا... نسارع بالاختباء خلفها .... فتسقط فكرة العقاب.

نواصل

Quote: كانت جدتي –رحمها الله- إمرأة خرافية تتميز بوجه صبوح وصوت يفيض طيبة .... مستعدة لتحمل مسئولية كل هذا الجيش من الأحفاد بحب حقيقي وبلا كلل. لها مقدرة فائقة على حل النزاعات المستمرة بين الأطفال ... يأتي كل طريف لاجئاً إليها وهو موقن بأنها ستنصره، يخرج الجميع بعد حل المشكلة راضياً وكل طرف على قناعة تامة بأنها انحازت إليه. حتى عندما نخطئ ويهم آباءنا وأمهاتنا بمعاقبتنا... نسارع بالاختباء خلفها .... فتسقط فكرة العقاب.

الله يرحمها جدتكم .. وجميع الجدات اللائي أمتلكن الحكمة التي حافظت على التماسك الأسري .. لتستمر الأسرة الممتدة في تناغم وإنسجام بفضل حكمة تلك القيادة.

Quote: كان كل همنا أكل (الخرات) وهو -لمن لا يعلمون- عجينة الحلو مر الزائدة عن "الطرقة" بعد نضجها وتؤخذ من الصاج مباشرة وترش بالسكر وتؤكل ساخنة

ويمكن أن تؤكل باردة غير أن أكلها باردة غير محمود لأن الآخرين لن يصبروا حتى تبرد .. شكراً لك على إنعاش البورد بحديث عن الحلو مر .. ومسكينة هي الشعوب التي لم يك لها فيه نصيب ولا سهم.. وفي إنتظار أن تواصلي.

العزيزة اشراقة ...
ريحة الحلو مر وصلتنا بكلامك وسردك لاجمل ذكريات الطفولة ( رحم الله أمي نفيسة )






سوف نتابع السرد ...

الأخت العزيزة إشراقة

كل ريحة حلومر و إنت طيبة

بالله كرتونة مدنكلة كدة بالبريد السريع لو أمكن ..

مستمتع بالسرد .. واصلي

صديقي أبو جهينة

وانت طيب .... وأمنياتي رمضان القادم تكون مستقر بالسودان وتستمتع بالتفاصيل دي

ما عندك مشكلة بس رسل لي عنوانك

تصلك كرتونة الحلو مر ومعاها كمان كرتونة رقاق

انت بس تأمر .... "أمك يا سلمى"

الأستاذ محمد عبد الجليل

سعيدة أنا بمشاركتك جدا
أعجبتني جدا تجربتك (كنت مدرس للأطفال)
لك التحية وتمنياتي بالمحافظة على الأسرة الكبيرة والبيوت المفتوحة

سرد قصصي رائع مافي شك.. وموهبة في الكتابة واللغة
................
لكن يا إشراقة الآبري بقا مكلف جداً الزمن دا
مع تكاليف الحياة المرتفعة..
ما بتقدر عليهو كل الأسر
زمان هو مشروب الناس الشعبي
هسه زي الأيامات دي لو ماشي ليك بي شارع وشميت ليك ريحة آبري..ما يفضل ليك إلا تنقر ليهم الباب يدوك طرقة آبري
وهناك البي يجي ماشي شاقي الشارع ويحسدهم ولو رباطابي والله واحد عينو حارة
تلقى البي تعوس ديك في عواستا طارت ليها جمرة في عينا والله حرقت أصابعينا يسحرا بالرموت كنترول هو ماشي بالشارع وهي جوة تعوس سحرة من شدة الحرمان الشديد بتكون صعبة
........
استفتاء واحصاء بسيط
كدي تعالي شاقة شارع السجانة كما ذكرت
أو الثورات
وشيلي معاكي ورقة وقلم وسجلي كم بيت بي ينبعث منو ريحة آبري
حاتلقي الحكاية رسوب
الناس بقت تخلص أموا بما قل ودل في مويات رمضان
ليمونة واحدة لجك آبري
قونقليس
عرديب
فراولة
لون مع موية مع سكر
حرجل
المهم حاجة
وبعد كل واحد ما ياخذ كباية من افراد البيت تلقا الجكاكة فضت
زمان تمشي التراويح وتجي تلقى الجكاكة مليانة بالآبري ومخلوط الفواكه
الجكاكة تظل متندلة لغاية السحور
لمان اطفال البيت القايمين المدرسة الصباح شايلين شنطهم يشربوا منها ويدفقوا باقيها
لأنو بيكون خممر
......
آبري زمان ذاتو من شدة تركيزو
يقررب يسكر الزول
هسه أبري الزمن دا بقا شروري مغسول مزغول تلقيد..كشا مشا.. اي كلام..مسيخ..

استاذ منصوري
كل سنة وانت طيب

شكرا على المداخلة القيمة

الآبري مكلف جدا لكن ما زلنا نتمسك به
رغم توفر البدائل كما ذكرت

تحية وسلام اشراقة ..

وتصومي وتفطري على خير باذن الله ...

الحلو مر (الابري) هو من اكتشافات المراة السودانية وحدها ،وعبقريتها في صنع مشروب له طعمين ، لا اظن ان الحلو مر يوجد في دولة أخرى غير السودان وبعض مناطق صعيد مصر ،وحقيقة هو اصبح من ضمن ثقافة السودانيين وقد إرتبط بشهر رمضان المعظم ، والرائحة التي تفوح الان في كل الشوارع السودانيية دليل غلى قرب حلول الشهر الكريم.
الحلومر له طقوس في صناعته ذكرتي بعضها منذ تجهيز (الزريعة) حتى (العواسة) تتشابها طرق الصناعة و الطقوس في كل انحاء السودان مع اختلاف بسيط في لتفاصيل باختلاف البيئة من منطقة الاى أخرى ، الابري من الاشياء التي يتوحد عليها الشعب السوداني .
لايخلو منزل في السودان على اختلاف الطبقات في رمضان من (الحلومر) بطعمه ولونه المميز، وهو إحد العناصر المهمة جدا في المائدة الرمضانية السودانية .
هنالك ايضا الابري الابيض او الملون الذي يختلف عن الابري الاحمر او الحلومر في طريقة صناعته وطعمه وعلى ما اعتقد ان صناعته لاتحتاج للجهد الذي يبذل في صناعة الحلومر ..
في السنين الاخيرة بداء الحلو مر الاختفاء التدريجي من مائدة رمضان شانه وشان بعض الاشياء الاخرى في الثقافة السودانية المختلفة بسسب راتفاع تكفلة المواد التي يصنع منها وخاصة في المدن ، فاختفت الطواحين بعد ان سادت تقافة الرغيف وكذلك (الصاج) و(الحطب) بعد انتشار الغاز و البوتجاز وبعد العوامل الاخرى .

ومع كل ذلك يبقى الحلومر ذو مذاق فريد بتميز سوداني اصيل

>>

الأخ جمال الصادق

سعدت بلقاءك في احتفالية سودانيزونلاين

كل رمضان وانت بألف عافية

الحلو مر يميز المائدة السودانية الرمضانية

والآبري الأبيض أيضا مسته رياح التغيير وأصبح ملون

بوست فقري جدا ... ( يعني خطر ودي بتستعملها اشراقة كتير )

يآه اعدتي لنا زكريات حلوة - جميلة خاصة تلك التي عشناها في بيت السجانة وخاصة الخراتة يا له من طعم كان ...

وياريت تواصلي في البوست دا لحدي ما توصلينا خبيز العيد لما كنا نمشي ( الطابونة) شايلين

الصواني في رسينا ....

طبعا عندنا الخالة حوة حيمورة ومقولتها المشهورة - تاتيي عويسي الابري- لها العديد من القفشات والابيات الشعرية الموسيقية سنفرد لها مساحة هنا اذا سمحت ست البوست ...

كل سنة وانتي طيبة

اكان عستو
بجيب شباب الكلاكلة
ونشرب لينا جك كبير
تحياتنا للاخ مهدى حيمورة

أنعام فعلا ذكرتنا بكلام الخالة اللطيفة حواء حيمورة وهي بترد للاخت سهام المتسائلة عن ايام
زمان فتسأل الخالة حواء : انتو لما كنتو في سننا كنتو بتعرفو تعوسو فترد الخالة حواء نحن لما يكونو عايزين يعلمو الطفلة المشي كانو بقولوا ليها تاتي عوسي الابري ....
وجيل هذا الزمن اما ان يشتريه جاهزا (بالجردل ) واما ان يأجر العواسات لعمل الحلو مر ...
والله أيام يا زمـــــــــــــان .....








تابعي

العزيز صلاح

مرحب بيك انت وكل شباب الكلاكلة ورمضان كريم

تشربوا بالجردل لمن تقولوا كفى
لو ما شالكم الراس تشيلكم العيون ... نحن لاقينكم وين؟؟؟

سلام كتير من مهدي

Quote: كنا في طفولتنا نسكن في السجانة ... قريباً من بيتنا الكبير (جدنا وجدتنا) .. وكان البيت عامراً بالأهل والضيوف والحب، وكنا نعتبره قلعة الأمان والفرح. الأحفاد في هذا المنزل يزيدون عن العشرين يجتمعون على مدار اليوم ناشرين الفوضى والفرح.

رحمهم الله جميعا يا اشراقـة,
لما جدي كان يقول (مشيت لي خالي محمد حيمورة ) كنت استغرب كيف أن جـدي بكل كبـر سـنـه يقول أن لديـه خال.. .. وكان يقولها بحنان بالـغ )

لك الشكر الجزيل على البوسـت وروائـح الاباري المنبعثـة,

من جميل الصـدف تعرفت بالأمس على علاء الدين في الرياض, وبالتأكيد سنتواصل

لك التقدير أجزله وتحياتي للجميع

أحمـد الشايقي

أخوتي علاء - إنعام - أحمد الشايقي

كل رمضان وأنتم كما أتمنى لكم

تلك أيام قد خلت .... ليتها تعود
رائحة الحلو مر في الجو
البصلة في الشمس
الشرموط يملأ الحبال

الاستعداد للعيد
الكعك ... الفرن البلدي
السكر المسحون
بكسويت الشاي

يا سلاااااام

اشراقة

Quote: عجينة الحلو مر الزائدة عن "الطرقة" بعد نضجها وتؤخذ من الصاج مباشرة وترش بالسكر وتؤكل ساخنة.

يااااااااااااي.....انتو بلدي خالص

بكري

بالله ثبت لينا الحلو مر دا.....اما نقوم نحرد رمضان وما نصومو السنة دي.....

الاخت اشراقة لك كل التحايا
حلومر زمان والان واحد ام تغير
زمان تبداء العملية بالذهاب الي زريبة العيش لشراء الفتريتة التي يصنع منها الحلومر فقط ثم سوق التمارة بموقعه شمال شارع الصياغ لشراء البليلة فريك ولوبا حلو
للحلومر يضاف الغرنجال والحبهان والجنزبيل والكركدي والعرديب واهلنا الرباطاب كانوا يسيطرون علي هذا السوق ويبيعون الحرجل والزعف والتمر والجردقة والعطرون في سوق امدرمان
وعملية الحلومر عملية صعبة جدا ومعقدة وتحتاج لاشراف كامل من البداية الي النهاية
سوف اعود لاحقا لهذا الموضوع الشيق

الصديق متولي مالك

أطمئن .. ياهو حلو مر زمان
الغريب أن أمهاتنا وجداتنا كن يسعدن بهذه التفاصيل أيما سعادة - رغم أنها مرهقة جدا-

شكرا متولي ورمضان كريم وربنا يحقق أمنياتك

سي جي العزيز

بركة الجيتو الخرطوم وبقيتوا (ما بلديين)

صحي "الشلاق ما خلى أعمى"

وبعدين يا اخوي انت كان رمضان غالبك ما تعملها في بكري

اشراقة يا غالية

Quote: صحي "الشلاق ما خلى أعمى"

انا من قبيلة الشلاليق.... يعني انا الشلاق ظااااااطو

الحلو مر المشروب ذو الخلطة السحرية والتي ما عادت سرية هو ما يميز شعبنا في صيامه وقيامه وقعوده وهو شراب في تقديري كامل الدسم يعني كباية الحلو مر تعادل وجبة متوازنة بشرط أن لا يتم تحبيسها بسفة.
لكين الغريبة أن يكون الحلو غير حلو بل مر مرارة عديل كده ويبدو أن المرارة أتت من ذلكم الطعم اللاذع الذي يميز الحلو مر ويعطيه نكهة خاصة ولا عيب في أن يكون الحلو مر ما بقيت النسبة موزونة بينهما بالقدر الذي لا يختل معه الناتج النهائي وهو هذا الآبري ، وقد أيدني في ذلك شاعر من شعراء الجاهلية لم يشرب الحلو مر بل شرب الحلو منفرداً والمر منفرداً فقال:
ضدان لما إستجمعا حسنا
والضد يظهر حسنه الضد
الغريبة ناس الإذاعة ومن أول يوم في رمضان يركبو لينا شريط يا شهر الصيام أوحشتنا ويكون لسه باقي أقل شئ 28 يوم على نهاية الشهر أها أوحشنا كيف بالله

الملا عملا
رمضان كريم

أمي كانت تخاف جدا من رمضان وما أن تبدا الإذاعة في بث (مرحب حباب شهر الصيام) حتى تلتفت إليهم قائلة: (الله يجيب يوم أوحشتنا)

Quote: كانت جدتي –رحمها الله- إمرأة خرافية تتميز بوجه صبوح وصوت يفيض طيبة .... مستعدة لتحمل مسئولية كل هذا الجيش من الأحفاد بحب حقيقي وبلا كلل. لها مقدرة فائقة على حل النزاعات المستمرة بين الأطفال ... يأتي كل طريف لاجئاً إليها وهو موقن بأنها ستنصره، يخرج الجميع بعد حل المشكلة راضياً وكل طرف على قناعة تامة بأنها انحازت إليه. حتى عندما نخطئ ويهم آباءنا وأمهاتنا بمعاقبتنا... نسارع بالاختباء خلفها .... فتسقط فكرة العقاب.

عزيزتي اشراقة

ربما يكون هذا اخر عهدك بالحبوبات .

وا اسفاه لقد بدأت هذه القيم والمعاني تندثر في مجتمعنا السوداني بعد الشتات الذي لازم كيانات الاسر . صحيح ها انتى تدركين هذه القيمة النبيلة في الحبوبةولكن المستقبل ينبئ بظهور شباب لا يمثل وجود الحبوبة لهم في المنزل الا ازعاجا.

وانا متاكد عندما يجى الدور علي جيلكن فلا تجدن من يسمع لكن ولم تكونن مؤهلات لحل منازعات .

وانا متاكد يا ام سلمى هسه سلومة بتناديك يا شوشو بدل يا ماما.


لك ودى

الطيب

الطيب شيقوق
إزيك يا عربي ورمضان كريم

يا حليل زمان الحبوبات ... حبوبات الزمن دا لابسات الكعب العالي ونساء عاملات
ليس لديهن زمن لطقوس الحبوبات

لذلك اندثر المفهوم واندثر الحلو مر.....

صدقت فقد تلاشت الحواجز ... سلمى أحيانا تناديني : (يا بت يا ماما)

كان جل ما يعنينا من رمضان تلك الموائد العامرة والعصائر المتوفرة، والضيوف وأحادثهم الشيقة التي تمتد طويلاً في ليل رمضان وكان يسمح لنا -على غير العادة- بمشاركة الكبار مجالسهم تلك (ربما إكراماً لهذا الشهر)

الرجال يتناولون الإفطار في الشارع تحسباً لمرور عابر سبيل لا يمكنه الزمن أو الحاجة من اللحاق بأهله ، ويسعدون غاية السعادة بمرور أحدهم ومشاركته في الإفطار.

النساء يجتهدن في إخراج الصواني بأبهى صورة وأغنى محتوى ويتنافسن في استعراض الأواني الجديدة الخاصة برمضان والأطباق التي يبتكرنها في هذه الأيام.

الأطفال يحتفلون على طريقتهم ويسعدون باللعب على السجاد وأكل البليلة عقب الإفطار، ويشعرون بالفخر لمشاركة آبائهم صلاة المغرب.

نبدأ بتعلم الصيام في سن مبكرة، ويتباهى كلٌ بعدد الساعات التي التزم فيها بالصيام بعد أن نسعد بتناول ما تبقى من الموائد والجرادل في الصباح.

وكات جدتي -رحمهاالله- تقول:
رمضان عشرة في الدوف
وعشرة في الجوف
وعشرة في الشوف

أي أنه العشرة الأولى من رمضان لا تؤثر على الصحة
والعشرة الثانية يبدأ الإحساس بالجوع لأن الجسم يكون قد بدأ يفقد من مخزونه
ما العشرة الأخيرة فشديدة يمتد تأثيرها حتى النظر فالإنسان من شدة الجوع تصبح رؤيته غير واضحة

تحياتي اختي اشراقة
بوست بعبق الشهر الفضيل

احب الحلومر جدا
ولكنه يؤزيني وفي ذلك يتفق مع الكثير...
الا توجد معادلة جديدة تتيح لنا ان نحتفظ بحبنا له مع الاستمتاع بمزاقه الجميل وفوائده الجمة

صديقي تولوس
سعيدة بطلتك

الله يديك العافية وتتذوق الآبري بدون مشاكل

أبقى عشرة على وصفة أخونا منصوري

(حأرسل ليك وصفة خاصة بالناس العندهم مشاكل مع الحلو مر)

وبالهناء..............

يا إشراقة
ألذ حاجة في عواسة الابري..
تجمع الحريم البي يعوسن فيهو
ست البيت البي يعوسن ليها والله يعوسن عندها
تلقاها خاتة جردل مليان موية باردة وسكر وراميات فيهو طرقات آبري من البيعوسن فيهو دا..الآبري دااابو جديد وحار أحمااار وفيهو كباية مرمية في الجردل أو كوز الغاشي والماشي يشرب وعشان يخفف عليهن عناء تعب العواسة..عرن يتخارت لكن كوز آبري واحد بارد ينسي التعب
......
تولوس
ما تخلي الآبري.. إنت بالتحديد عايز آبري موزون كدة حا يعالجك موش يأذيك
ما يكون طعمو حرق حرق.زأي ما محرق شديد
بعدين وزنة الكسبرة والشمار والعرديب قيهو تكون قليلة خاصة العرديب كدة ما حا يازيك
أكيد عندك غازات والله حموضة والله بداية قرحة والله إنتفاخ
..........
أنا عندي جار لبناني
مرة في رمضان ضوقتو ليهو
شال ودا لى مرتو منو قدر زجاجة موية كبيرة أديتو ليهو جاهز
قال لى مرتي قالت نفعا.. عايزة زيادة
هسه كل مرة يسأل رمضان بلا رمضان عايز آبري..حلومر
......
واحد إقترح على ليه السودانين ما يعملوا ليهو باكنق ويغلفوهو تغليف راقي ويصدروهو؟

سلام للاخت اشراقة...
وشكرا لهذا الدف الذي حمل الينا رائحة كثيرة التميز ومثيرة للذكريات
والتداعي....
الابري..مشروب بطعم مميز تتمدد رائحته الينا ونحن بعيدا عن مراتع الصباء..
وتطل الي الذاكرة دوما ذلك الكرنفال المدهش مهرجان ترتيبات (عواسة الابري)
التي تبدا رويدا رويدا من (الزراع) الي السحن...الي اضافة التوابل الي ان تصل دراما
(الابري)...الي قمتها عند لمة (العواسة)......!!!!
ويوم العواسة انطبع في داخلتي بمقدرة وكفاءة جدتي التي كانت تدري جيدا
كيف تدير هذا المهرجان النسائي الضخم اللائي اتن طواعية للمساهمة في
(العواسة)...ففي ذلك الصباح يحتشد (دولو)..(ودولو هذا كان اسم الشهرة لمطبخ العائلة
يحتل احدي القطاطي..من ذلك البيت الكبير ).....!!
ليس كل النساء لهن المقدرة علي معالجة هذا (الابري المدهش)..فالامر يحتاج الي كفاءة وخبرة عاليةفي كمية الخلطة..والية تحريك (القرقريبة) داخل الصاج بالاضافة الي مدة بقاء (العجين)..داخل هذا(الصاج).....
وسط كل هذا كانت الحبوبة العظيمة تقف لتشرف وتوجه وتراجع....لتضمن جودة الابري
الذي سوف (يعبق) جلسات الاطفار الرمضاني ويرسل الي الذين حملتهم السفن الي
شواطي بعيدة عن مركز دولو.....
ورمضان كريم...وكل رمضان والابري لازال هناك يذكرنا بالوطن والزمن الجميل.....!!!!!!

الأخ عبد الكريم

Quote: ويرسل الي الذين حملتهم السفن الي شواطي بعيدة عن مركز دولو.....

هذا ما يسمى بآبري المغتربين

وتتم عواسته مبكراً وتكون رائحته هي الأجمل

كل سنة وانت طيب

منصوري

Quote: بعدين وزنة الكسبرة والشمار والعرديب قيهو تكون قليلة خاصة العرديب كدة ما حا يازيك

أنت داير تودر الزول ولا شنو؟؟؟ أبري الناس العندهم مشاكل في البطن دا ما بيعملوا فيه كسبرة ولا شمار ولا عرديب

حأرسل ليك عينة

تسلم

Quote: كانت جدتي –رحمها الله- إمرأة خرافية تتميز بوجه صبوح وصوت يفيض طيبة

إشراقة الحبوبة
أتاريك وارثة من خالتي نفيسة
الوجه الصبوح والطيبة واللطافة
أحكي{ يابت يا ماما } على زعمات سلمى
انا سامعك بقلبي
وروحي متابعاك
ومن هسع عطشااااااااااان
قبال مايهل هلالو

صديقي اللدود أبو ساندر

شوق شديد

السنة دي حأبرك بكرتونة آبري

وربنا يروي عطشك دا

تحياتي لرشيدة والبنات

الأخت العزيزة اشراقة

ياااااااااااااا يا بنية الحيموراب .. والله رجعتينا لأيام صفاء ونقاء سريري قلّ وندر هذه الأيام .. لكن رغم ندرته وقلته الا اننا نحن المغتربون محرومون منه .. فها انتي ايتها الساحرة تدلفي بنا الى هذا العالم الخرافي كجدتك الأنموذج (رحمها الله) ..

Quote: كان كل همنا أكل (الخرات) وهو -لمن لا يعلمون- عجينة الحلو مر الزائدة عن "الطرقة" بعد نضجها وتؤخذ من الصاج مباشرة وترش بالسكر وتؤكل ساخنة.

يا سلااااااااااااااااااااااااااااااااااااام يا اشراقة بالغتي عديل .. (صورة حية) لماضي جميل .. يا ترى يا اشراقة أموجود هذا (الجمال البرئ) في الومن الحاضر ام اندثر كبقية (الجمالات) ؟!.

بذّكر باقي الحلو مر الصباح بكون في كوز الطليس الكبير (ابيض ومندّي) .. نتلذذ به امام اعين اخوتنا الأكبر بقليل (وهم صايمين) (تضاد احساس) عجيب بيناتنا .

ياخي يا اشراقة موضوعك لذيذ والسرد فيه كتير ويفوق الخيال .. (لكن سنتلذذ به كحال الحلو مر .. بكتاباتك السلسة والممتعة وومداخلات الزملاء الأجلاء .



مودتي يا راااااائعة

أمير الأمير

كل سنة وانت طيب

هذا الجمال موجود بكل تفصيلاته صديقي

لكن قدرتنا نحن على الاستمتاع به قد أصابها الهرم

سلمت

Quote: صديقي اللدود أبو ساندر شوق شديد السنة دي حأبرك بكرتونة آبري ---------------------------- وربنا يروي عطشك دا تحياتي لرشيدة والبنات

شروقة العزيزة
الحيمورابية اللذيذة

يوم شكرك أريتو مايجيي يا شقيقة

عارفه رشود هسع وين ؟
تنطي شارع الركشات بس تلقيها هناك في الصحافة
تستعد للعودة للدوحة بتاريخ 31/8 يعني يوم الخميس
عشان كده إنعصري في البنبر وسوي عواستك الماخمج
وأضيفي عليها من نفس نفيسة ذوق و مزاج

أبو ساندرا

انا كمان بيوصوني؟؟؟

عواسة بي مزااااااج

وأحلى شيء انك تكون عطشان وتجي تلقى جردل الطلس الكبير مليان آبري بااااااارد ويلحقوك بي كوره كبيرة ولا كوز نضيييف..... طعم لا يوجد إلا في الحلو مر يوم عواسته.....

ألعزيزه اشراقه
خالص تحياتي وكل الود
لاتتركى الحبل على الغارب لسجيمان ليتعلم فيك كتابة الشعر الهابط فأنت تستحقين أجزل الشعر..أما بخصوص الحلومر فأنا أستغرب لماذا لاتهتم الرأسماليه الوطنيه بتصنيعه وتعبأته فى زجاج ليقدم على مدار السنه ويمكن لاصحاب الكافتريات تقديمه بدلا من اللغاويس التى يتفنون بها فى اذية البشر. انا شخصيا أستمتع بالحلو مر والآبرى فى غير شهر رمضان ... اقترح عواستهم خصيصا لصيفنا اللاهب .. لكن السيدات يتبرمن من اعداده حتى لزوم رمضان..الحلومرالمتلج خالص هو مشروبى المفضل في الشهر الفضيل ولااتعامل كثيرا مع شاى الترامس واللبن المقنن وتعجبنى البليله بأنواعها لتدفعنى لشرب المزيد من الحلومر.. الحلومر أنواع فيه المكلوف وفيه المكلفت ويتوقف اعدهده بشكل جيد على سيده من نساء حى الميرغنيه فى كسلا اللائى نفاخر بهن اصدقاءنا فى الاحياء الاخري(لانهن يعرفن الكفتايه فيها كم رزه ) مثلهن كثيرات فى طول وعرض الوطن الزايدين فيه السكر مع قبايل رمضان ..وكل سنه وانتى طيبه مقدما

م

أستاذنا الجنرال

سعيدة أنا بطلتك

وكل سنة وانت طيب وتصوم وتفطر على خير

الحلو مر غير ممتع إلا وهو "مكلوف" وهذه الميزة تجعل إنتاجه وتسويقه تجارياً صعبة جداً ، كما أنه حساس جدا للجو الحار ويتخمر عند ارتفاع درجة الحرارة لذلك لا يمكن

Quote: تصنيعه وتعبأته فى زجاج ليقدم على مدار السنه

Quote: ولااتعامل كثيرا مع شاى الترامس واللبن المقنن

قصدك شنو يا جنرال؟؟؟؟ يعني تاني ما نجيكم؟؟؟

مكرر

صديقي سي جي

Quote: انا من قبيلة الشلاليق.... يعني انا الشلاق ظااااااطو

أتاريك شليق كدا!!!!!!!!!!!!!!!

ريحة الحلو مر تعبق صالة مطار الرياض

شارفت العطلة الصيفية للمغتربين على الانتهاء وبداية العام الدراسي الجديد وبدأت الاسر السودانية في الرجوع الى الرياض .
أيام الرحلات القادمة من الخرطوم تأتيك ريحة الحلو مر منذ ان تدخل الى صالة استقبال القادمين وترى الاخوة السودانية وهم يستنشقون تلك الرائحة العطرة بنفس عميق ينمى كل واحد الا ينقطع ذلك النفس .. فالذين لم تسمح لهم ظروفهم بدفع قيمة الوزن الزائد تركو الحقائب التي بها ملابسهم وفضلوا ان يصلوا ومعهم كراتين الحلو مر والمنقة والجبنة المضفرة والكركدي والدكوة قائلين ان الملابس يمكن ان تصل في اي وقت ولا تتعرض للتلف ..
عرف الاخوة السعوديين والذين لهم ارتباط بالسوداتنيين كل المنتجات السودانية المحليه وتذوقوا طعم الحلو مر وأشادوا به ففي الرياض اصبح من اللافت أن كراتين الحلو مر تباع في مناطق تجمع السودانيين ... ولكن الاغلب يأتي عبر صالة المطار فكل أسرة ترى في أن عواسة بيتهم أتقن من التجاري ..
ولنورة المغربية حكاية مع الحلو مر والمنتجات السودانية سأعود اليها لاحقا .
جهزي الكرتونة يا اشراقة مع انعام .....

معقول......... ؟؟؟؟ هو نحنا لاقينكم وين

الجو هذه الأيام خريفي رائع ورزاز المطر يتساقط طوال اليوم......

رائحة الحلو مر تنتشر في الجو مضيفة للجو بعداً جميلاً

يا .... حليلكم يا المغتربين ... الله معاكم

العزيزة اشراقة

كل سنة انتي والجميع بخير

بوست توثيقي جميييييييييييييل لواحده من عاداتنا الرمضانية

والتي أأمل ان لاتندثر فبها يكون هنالك طعم خاص لرمضان





مودتي واحترامي

العزيزة إنعام عبد الحفيظ

سعيدة بجيتك

وكل رمضان وإنتي بألف خير وعافية

نلتقي

تحياتى يا إشراقة

وكل الأيام والسنين وإنتى أطيب ومليانة عافية وسعادة

يوم السبت الفات إتصلت بالسودان وكنت بتكلم مع حبيبتى آمنة

قالت لى عليك الله يا بابا ما شامى الريحة اللذيذة دى؟

قلت ليها طبعا شاميها وجايه مارقه هسه من التلفون
دى ريحتك إنتى طبعا مش؟

قالت لى وبكل براءة الدنيا

لا لا يا بابا

قاصده ليك ريحة الآبرى

من أمس النسوان ملمومات ويعوسن وأنا قلت ليهن عوسن كتير بالله عشان نرسل منه لى بابا

شفتى بالله الدنيا دى كيف يا إشراقة

عوالم من الأنس الجميل والطقوس البديعة واللمة البهية

ونحن هنا

زى ما قال صخر بن الشريد، أخو الخنساء

لا حيين فنُرجى
ولا ميتين فنُبكى

وغامر الود وجزيل التحية والتقدير ليك مجددا

صديقي أبو دُر

التيحة لك أب آمنة ولآمنة اليت تتنفس هواء الوطن النقي

Quote: عوالم من الأنس الجميل والطقوس البديعة واللمة البهية ونحن هنا لا حيين فنُرجى ولا ميتين فنُبكى

الجابركم شنو؟؟؟؟ ما ترجعوا وتستمتعوا بهذه الأشياء قبل أن ينقضي زمن المتعة؟؟؟؟؟؟؟؟؟؟

يا إشراقة إزيك وإزي أبو أهلك ،
قريت كل هذا البوست ولم أدر أين أعلق أو أين أقف وقد أهجت علينا لاعج الذكرى لأيام طيبات ، أيام الخرات والصاج والحطب والقرقريبة والمعراكة ومرسال السوق للطايوق وأشياء كثر،
تحياتي لبنتنا سلمى ،
أنا "بكّو" إن أسعفتك الذاكرة
تحيات وسأعود

صديقي (بكو)؟؟؟؟؟؟؟؟ بكو و(السفير) وقبلها (معرض العطور)؟؟؟؟؟؟؟؟؟؟

لا اصدق

ريحة الحلو مر أتتني بالجميل والكثير

كل سنة وانت طيب

إشراقة صباحك خير ،
ما ترسلي لي شوية حلو مر إن شاء الله في المسنجر

تكرار

Quote: ما ترسلي لي شوية حلو مر إن شاء الله في المسنجر

ليه بالمسنجر ؟؟؟ بالدرب العديل أرسله ليك ومعاه رقاق ...


بس أعرف أراضيك يا بكو


رمضان كريم وأهي كراماته هلت

الاخت اشراقة لك كل التحايا
عملية كر الابري عبارة عن احتفال كبير للتعارف واعطاء خبرة للفتيات علي العمل الجماعي وتحضيرهم للحياة الزوجية وفرصة لتبادل الاخبار والدردشة
هذه العملية تاخذ اسابيع في التحضير وكلنا نذكر كيف كان يتم تحديد يوم لكل منزل تحت اشراف نساء متمرسات علي ان تقدم صاحبة المنزل الاكل والمشروبات حسب مقدرتهم
اختلف الوضع الان واصبح الابري يشتري جاهز من السوق فاندثرت عادة جميلة ووضع اجتماعي راقي وتكافل وتعاضد بين الناس
ياحليل زمان وايام زمان وسنين زمان
يايمة لو تذكري

صديقي متولي

Quote: عملية كر الابري عبارة عن احتفال كبير للتعارف واعطاء خبرة للفتيات علي العمل الجماعي وتحضيرهم للحياة الزوجية

كان زمان....... الآن الفتيات لا يعرفن الكر ولا العواسة ......وحتى الأزواج لا يعتبرون هذه المعرفة ميزة مطلوبة... تغير الزمان وتغيرت المفاهيم وتغيرت حتى النظرة لهذه الأمور

أما قيمة العمل الجماعي فقد عفا عليها الزمن وبقى "كل واحد ياكل ناره" الفردية طغت على كل القيم حتى على مستوى السير في الطرقات، فأنت تستعمل الطريق بما يريحك أنت فقط دون النظر للآخرين...

خلطة من كريم البهارات،
و عجين عليه العين
كطفل مكفول الرعاية و الاهتمام.
و عواسة وصاج وطقوس.
ورائحة مميزة بقاموس هذا الشعب
المولع بالروائح الشموس.

الأخ شهاب

ألف شكر على المشاركة وكل رمضان وأنت بألف خير وعافية

اشراقة حلاة الحلومر لما تقوم الصباح وتكون جالدو وتلقى ليك جك مندى
يا الله ده احسن وقت لشراب الحلومر،،،

وضاعت الكرتونة
اترقب وبلهفة وصول كرتونة الحلو مر المجيه من السودان وأنظر في عيون الخالة ستنا بعد أن جلسنا قرابة ال4 ساعات في السلام والسؤال عن الحال وحال الاهل بالسودان ...
وبعد ان بلينا ريقنا بالشوفة وقررنا الرجوع الى المنزل كنت اترقب ان تبادر الاخت سهيل بأن تقول لكم كرتونة حلو مر مرسلة مع الوالدة ... لم تقل أي كلمة .. قلت ياخي ماتستعجل اصلو ما حا احتاج ليها اليوم ولا بكرة ... رجعنا البيت بحسرة قالت لي مواهب انو الكرتونة الموعودة ما اترسلت ... اتصلت بأنعام .. قالت انو الكرتونة سوف تصلك مع الاخ الدكتور صالح .. انتظرت مكالمة من الدكتور .. لم يتصل .. مشيت طوالي لشقتهم ..
قالوا سافر الى رفحاء .. طيب ما خلى ليكم وصية هنا لي .. قالوا بلحيل عندك كرتونة حلو مر قلت ليهم تماااااااااام .. قالو لي بس ما وصلت مع العفش !!!!! ودى الاوراق الحاتراجع بيها مكتب خدمات العفش وهم حا يتصلوا بيك ...
يعني ممكن يتصلو بعد العيد .... قلت في نفسي كده ... طيب اها الواحد يصوم كيف بدون حلو مر .. تاني قلت الا الواحد يحصل اشراقة ويطلب النجدة ...
دحين الكلام ده واضح ....
كرتونتي ضاعت ..
بترسلوها ولا ندك ... واركب مع صديق الموج في سرج واحد ....

Quote: بترسلوها ولا ندك ... واركب مع صديق الموج في سرج واحد ....

علاء الدين شوف ليك طريقة افطر بيها الحكاية دى انا كنت بعملها لما
كنت صغير..قال صديق الموج قال..اشراقة شوفو ليكم بصارة لى ود عمكم ده،،

يا سلااااام ...

وكأننا في موقع الحدث يا أشراقه


كل أسره حلومرها طعمو براهو.. للاسف أسرتنا وقّفت عمله منذ سنوات لأسباب تسويقيه (مافي أقبال من ناس البيت رغم جودته)...

انا حبيته خارج السودان ... كتّر خير رفاق الغربه.. موعوده بشوية حلومر من كم اخت (قبل أو بعد رمضان مافي مشكله)..

وعــــارفه في ناس حأرجع ليهم تـــــاني بي قرعتي

ده ما كلامك يا صديق الموج ؟؟؟
اشراقة حلاة الحلومر لما تقوم الصباح وتكون جالدو وتلقى ليك جك مندى
يا الله ده احسن وقت لشراب الحلومر،،،
يعني انت الوحيد البفضل الحلو مر في نهار رمضان ...
ياربي بتقضي بعد داك ؟؟؟؟؟

الأخت نجوان
رمضان كريم وكل سنة وإنتي طيبة

تعرفي أنا فكرت أعمل تسويق لريحته بس (Hilo Mur Perfume)الجماعة في الغربة يشتروه ويقعدوا يتذكروا السودان والعواسة وأم فتفت ولمة الجيران وأمهاتهم .... وهاك يا بكا....

(ممكن واحد تاني يستغل فكرتي ويسوق مناديل سودانية مشغولة!!!!!!!) كيف دي؟؟؟؟

Quote: الحكاية دى انا كنت بعملها لما كنت صغير..

قريبي صديق الموج

يعني قبل كم سنة كدا؟؟؟؟؟؟؟

سعيدة بوجودك وكل سنة وانت طيب

Quote: كرتونتي ضاعت ..

لا حولة ولا قوة الا بالله


اول شي كان كلمت الحاجة ... بتتوفى عديل .. لانو ما تتصور تعبت فيها قدر شنو ... يالله ...


اللهم لا نسالك رد القضاء ولكن نسالك اللطف فيه ....



غايتو نحاول تاني نعوس لانو كل العسناه رسلناه


لا حولة ..........

الأعزاء علاء وإنعام

البركة فيكم في كرتونة الحلو مر

بالله ما تتجرسوا كدا والله حارسل واحدة تانية

العزيزة / اشراقة
كل سنة وانتي طيبة
شكرا ليك يا اشراقة لكن روحة الكرتونة دي كانت عايزة رأفت ميلاد يدينا فيها ابيات منظومة ...
وكرتونتك وصلت والله يا ام سلمى وما بتقصري ...
حمدا لله على سلامة الخالة ستنا ...
تحياتي

Quote: Quote: الحكاية دى انا كنت بعملها لما كنت صغير.. قريبي صديق الموج يعني قبل كم سنة كدا؟؟؟؟؟؟؟ سعيدة بوجودك وكل سنة وانت طيب

يعنى سنتين تلاتة كده!!!!!غايتو جنس لياقة،،،
لك الود ابنة اختى،،،

Quote: رائحة الحلو مر (الآبري) تبعث في نفسي أشجاناً وتستدعي صوراً تقبع بعيداً في أعماق الذاكرة.

مضى عامان مذ رحلت أمي وغابت عني كرتونة الحلو مر فكيف لايبعث فينا الأشجان والذكرى.
كل سنه وانت طيبه

*********

Quote: *********

صديقي سي جي

انت عندك مشكلة مع الحلو مر ولا مع رمضان؟؟؟؟؟؟؟؟؟؟؟؟؟؟؟؟؟؟

نفهم بس

Quote: صديقي سي جي انت عندك مشكلة مع الحلو مر ولا مع رمضان؟؟؟؟؟؟؟؟؟؟؟؟؟؟؟؟؟؟ نفهم بس

ملعوبة.

أخي محمد المرتضى

فقد الأم ورحيلها لا يعوض ومكانها لا يمكن ملؤه
أحسن الله عزاءك وجعلك إبناً باراً يذكرها بصالح الدعاء

لنكن يا صديقي أخوة في هذه الحياة القصيرة

أرسل لي عنوانك وستصلك كرتونة مدنكلة من أختك

الاخت اشراقة

تحياتي

آمل ان يكون هذا البوست ساحة ترويجية للحلو مر حتى يمكن من خلاله استقطاب شركات محلية او اجنبية للاستثمار في الحلو مر واعداده معلبا لينافس بقية المشروبات .

لك كل الود

شيقوق

تحري رؤيه

الأخت إشراقة،
عند قراءة هذا البوست الأصيل .. تخيلت نفسي مكان الممثلة في إعلان إحدى الحلويات حين يقول الإعلان: (الطعم سيأخذك إلى هناك). وصدقيني فقد إمتلأت خياشيمي برائحة الحلومر والجو القبل رمضاني بكل تفاصيله. لكأني بك توصفي ما يحدث في منزلنا في بري، فقط الإختلاف في إسم الحبوبة والخالات، ويقيني بأن هذا ما كان يحدث في كل البيوت السودانية.

علّق على عاداتنا أحد الأخوة الخليجيين وقال: ما بالكم أيها السودانييون؟ تأكلون "المرارة" وتشربون "الحلومر"، لماذا كل موائدكم تتسم بالمرارة؟

ياااااه ...... أرى الآن أمامي الدوكة (الصاج) والقرقريبة والطايوق وجردل العجين!!!!!

تحياتي ورمضان كريم

أهو (تحري الرؤيه) أسفر عن أبوالريش
كيفك يا أبو العزايم

فـاتكم حـلو مـر رهـيب..
استمتعنـا بيـه بـااااارد في بيت شـاذلي جـعفـر أمس!
مشـتاقين ياجماعة..

مـني

حـلو مـري ضـاع مني
الشالو ما يصوم بيه
يصوم بخلافو

مش شئ جميل يا مرتضى نجتمع في جلسة الحلو مر الظريفة دي؟
ليك التحية ولكل الأخوة في مسقط.
وكتر خيرك كتير يا إشراقة