يا متحكر جمر الغربة

(1)
يا متحكر جمر الغربة
يا متحكر
جمر الغربة أللهلب وقد
فيك سنين
انفض وجعك ولملم صدعك
ويمم أقصد بيت الطين
ارفع راسك ضى نبراسك
باب السنط وسقاطتو العاشت
في ذاكرتك والتنوين.
ويا متحكر
جمر الغربة أللهلب وقد
فيك سنين
مهما التقنية لعبت فيهم
يظلوا في ذاكرة التخزين
مكان اللمبة نيون كان قاعد
الفانوس ولمبوية تنين
ومحل ديب فريزر أنا بتذكر
زيرنا قناوى وبي شوال ملفوف
ومكين
ويا متحكر
جمر الغربة أللهلب وقد
فيك سنين
أنا بتذكر لما التقنية جات الحله
ونططوا فرحوا ولاد عبد الله
وحكروا رادي كبير في السهله
وحكموا رباطو في ركن الأوضه وبي جنباتو
كانت هنا امدرمان الحاضرة
وقانعة وناضرة
إنو الرادى الخشب الأخضر
يسمِع بين النفاجين
و يا متحكر
جمر الغربة أللهلب وقد
فيك سنين
تلفزيون الحله الواحد
كان يتجمعوا فيه ميتين
في بيت أقرع وميرغنى حمزة
وعند ناس شرفي الطغيانين
ويا متحكر
جمر الغربة أللهلب وقد فيك سنين
قبل التقنية همومنا صغيره
ما أتلفتنا وجاتنا الحيرة
وكل الناس كان جل تفكيره
تسمع كوره بين تيمين
(2)
ويا متحكر
جمر الغربة أللهلب وقد
فيك سنين
ثقافة الغير بنجيب أخبارها
من شيخ حارة أو كنتين
لا مسكونا مع سمساره
ولا تابعنا حروب ودماره
لأنو الحرب الكبرى خسارة
موجهة لاستعماريين
ويا متحكر
جمر الغربة أللهلب وقد فيك سنين
ما أتحاربنا مع أخوانا ولا جيرانا ولا حبانا
كان الوطن الواحد شانا
شمالنا امتد غلق في جنوبنا
وشرقنا في غربنا لافح شالنا
و يا متحكر
جمر الغربة أللهلب وقد
فيك سنين
ثقافتنا عريضة حدوده
وكان عتبانى بروعة يقوده
السلطة الرابعة ضميرها أمين
وقبل التقنية دور المرأة
في امدرمان كان ليه تثمين
محاسن وحاجه وحواء الرائدة
ونفيسة وخالدة وبخيته أمين
وكان مفهوم التقنية فيهم
ضد الوطن يصبح شقين
ناهضوا عصر الظلم الباغض
ونادوا بوعي الأميين
و يا متحكر جمر الغربة أللهلب وقد
فيك سنين
كنا ثقافة عريقة جذوره
فنون وآداب وفقه الدين
وكنا حرائر صون مستورة
وكل حدودنا ليها عارفين
ولا بالتقنية مره نسينا
العين ما بتعلى علي الحاجبين
و يا متحكر جمر الغربة أللهلب وقد
فيك سنين
قبل التقنية رزقنا مبارك
واكل الحله يكفى البيت والجار الزين
(3)
نعجن الكسرة بزيت السمسم
وكنا نغمس باليدين
ويا ما شبعنا واتربينا
بالمفروك ما بالطاجين
وقبل التقنية تدخل بيتنا
عندنا كان مشعليب دورين
كنا نعلق فيه الحلة ليوم يومين
ونشرب بركة الوالدين
ولما يعوعى الديك وتكاكى
جدادة البيت وتبيض بيضتين
نقوم نتسابق مين الفينا
بدخل الكر قبل النايمين
وكان حبوبه وخيط المفحضه
يسائلو عود أراكك وين
لازم قبل ما تتحكر
تشيل من خشمك نفساً شين
وكان مسواكنا عطرنا أراكنا
لا كلوس أب ولا معاجين
وكان الصاج اللهبو يتاوق
بين كانون سانداه طوبتين
مشهد فكة ريقنا الحالى
وككر أو بنبر للصاحين
حليبنا كان ضرع معزتنا
لا هو الباكو البسترو شين
غذانا لباها بيه نتباهى
ونخج كنتوش اللبن الرايب
نطلع سمناً بلدي وزين
وطرقة الكسرة تمحى الحسرة
لما الطايوق في المعراكه يصحى الدوكة
نغم ولا سيمفونية بيتهوفين
يحرك في الوجدان أوتارها
ينادى الغائب ليهو سنين
و يا متحكر جمر الغربة أللهلب وقد
فيك سنين
قبل التقنية و الغسالة
كان الطشت الزنكى مباهاة
وجرد لو كنا بيه نتباهى
وكان كل حالنا يملى العين
وكنا نقنع وما نترفع
(4)
نخيط ونرقع وبي أقطانا مدفين
والمترار في يد حبوبه
في حد ذاته ثقافة لناس كان جد قانعين
وكان الوطن الإسم الأكبر
يروى يبين إننا نحنا بين الأمم يا نا العارفين
و يا متحكر جمر الغربة أللهلب وقد
فيك سنين
أمانة عليك ما بتتحسر يوم تتذكر
كيف اماتنا كانن رمز لكل تمكين
وكانت قعدة أبوي ورفاقتو
في أكليم ناسجاه اليدين
كانوا تقاوي وبعض فتاوى
ونار في خلاوى ومقتنعين
بس العيشة برضو إكانت
رضيه وناسها مرضيين
وكان السترة شعارنا وحالنا
وكان البيت الوطن الدين
لا تفرقنا ولا تشتتنا
إلا بعد التقنية جاتنا
وكشفت حال المستورين
و يا متحكر جمر الغربة أللهلب وقد
فيك سنين
إياك تقسي أو يوم تنسى
إنو الغبش أهلي الطيبين

very welcomed indeed najat
thank you very much for the poem
you can visit my site nazzar gabbani 2 and post in it any poem you like
thank you again
dr mustafa mahmoud

كــلام ســمــح بالحـيـل

ريثيـم قوي وقامـوس مليأن ومعاني واســعــة


أعجبني وقرأتــه مــرات,

لك التقديــر



أحمـد الشايقي

عمل أدبي قيّم يناقش موضوعا فلسفيّا عميقا.

سأجد متّسعا من الوقت لمناقشته بتروّ، بمشيئة الله، في يوم الأحد القادم.

ينبغي الاشارة لهذه الملحمة الشعريّة في شكل مانشيت عريض في صدر الصفحة الأولي

من منتدي النقاش.

طارق الفزاري

ود زينب