بالله شوفوا التشبيه دا.واحد صاحبي رباطابي شبه الإغتراب بي شنو؟

صديق عزيز.. وأخ كريم..خوتو معاي أحسن من أخوى ود أمي..
رباطابي.. مأصل.. لايحب عنصرية القبلية.. كل القبايل عندو واحد..
مع إنو في الرباطاب ود أصول الرباطاب..وقمة التعليم..
حساس
رقيق
لايحب الظهور كثير
إمتحن في أبوحمد في الدفع القدامنا
ما إستأذنت منو.. عشان كدة مابقدر أقول إسمو لأني عارفو حساس كما النسيم العليل..
........
إنتهى عقده في الإغتراب بعد فترة طويلة..
كان في وظيفة مرموقه
........
إتصلت به.. أها ما حاولت شغل تاني..؟
قال لي:
( ما لقيتو... وماني دايرو تاني.. قفاي هناك أعوج... كفاي منها الغربة..
......
الغربة زي كوز السبيل المقدد.. مقددوا صاحبو من قعرو.عشان الشفع مايسرقوهو..أو يودوا بيهو موية بعيد من السبيل...وكمان مربوط بي خيط ما بتقدر تحركوا من محلو..زي الغربة قروشا ممحوقة ومربوطة زى كوز السبيل تكمل قبلا في محلها...وحتى كان شربتا بيهو كوز السبيل مابيرويك مقدد من تحت.. ويرشك ويملاك طين في كرعيك من تحت ويخرب نعليك وجلابيتك...)
...........
طبعاً دا سبيل في الأقاليم ياجماعة موش سبيل عاصمة.. ناس الأقاليم بيعرفوا كوز سبيل زي دا بالضبط..
..........
مع أمنياتي ودعائي لصديقي الرباطابابي بأن يوفقه ربنا ويفتح له اسباب رزق الدين والدنيا أينما حل...

صاحبك وصف وأجاد فى الوصف .............

تحياتى منصورى

Amen ya rub al almeen

dear mansorre
wain ya ragil
missed your writings
see you soon
dr mustafa

كوز السبيل يا منصوري يا أخوي بالإضافة إلى أنه مربوط ومقدود مطفوق كمان ومن أسوأ أنواع العلب ، يعني نادر ما يكون في الأصل كوز بل هو في الحقيقة علبه قديمة بتاعت أناناس أو صلصه حجم عائلي أو خوج معلب أيام أن كان الخوخ المعلب والأناناس التايلندي وجوز الهند تباع في دكاكين حلتنا ، وغالباً ما يكون الكوز ملئ بالصدأ أى مصقر زي ما بنقول أها كوز زي ده ما بنفع تشيلو البيت أو تستخدمو أى إستخدام آخر ده إذا ما جرحك وعمل ليك تتنوس.
المهم في الغربة الهدف والأهم من كده الزمن اللازم لتحقيقه وأن لا تكون الغربة غير محددة المدة ، كمان من المشاكل الكبيرة أن الوطن كما ذكر أحد أعضاء المنبر أصبح غربة لأسباب يأتي في مقدمتها الفقر.
ناس السودان بتحاول تمشي دول الخليج يتمرمطوا ويركبوا الصعاب ويدخلوا بسمات دخول لا تخولهم للعمل ومع ذلك يجازفوا لأن الأمر من مجازفتهم هو ما جبرهم على مخالفة القوانين وممارسة نوم الذئاب عين مفتوحة وعين مغمضة تحسباً لهجمة مرتده. ناس الخليج بعد أن خبروا الخليج وخبرهم وقنع معظمهم من خير فيه أصبحوا يفكرون في الهجرة إلى أوروبا وجنوب شرق آسيا ويفضلون مثل هذه المجازفات علي العودة القسرية للبلاد أها ناس أوروبا برضو بيعانوا شديد وبعاينوا للبلد وحال البلد وهم بين اعادة الكرة مرة أخرى للإغتراب في دول الخليج على إعتبار أنها أحسن من لا شئ خاصة لحملة المؤهلات والتخصصات النادرة وجوازات السفر الأوروبية أو الأمريكية والساقية لسه مدوره.
واحد صاحبنا هاجر إلى دولة من دول الخليج وفي جلسه ترحيب وإحتفاء به من شباب سودانيين قضوا سنوات طوال في مهجرهم ذاك قال ليهم والله البلد دي ما بتنفع معاي وأنا بصراحة جاي هنا عشان أعمل لي حافلة وأرجع يعني إن شاء الله ما أكمل السنة ، فقال له أحد الموجودين والله يا أبن العم أنا جيت البلد دي عشان أشتري بنطلون جينز ماركة ليفايز وأرجع أها إشتريتو بدل ما أرجع قعدت خمسه وعشرين سنه وما زلت مغترب أدفع الضرائب وأمشي إجازات وأفكها في الناس البسطاء هناك وأشكر ليهم في الغربة وألعن فيها بي سري وأرجع من الإجازة وتكون الديون راكباني وحصاد سنة كاملة يضيع في شهر ولن أصل نقطة التعادل تكون الإجازة التانيه جات وحال عليها الحول ووجبت الضرائب والإجازة وحق الهدايا إلخ ...

...

Quote: وأنا بصراحة جاي هنا عشان أعمل لي حافلة وأرجع يعني إن شاء الله ما أكمل السنة

هسّة أول الوصايا في جلسات الإستكشاف وجسّ الأوضاع دي قالوا الناس الكاسرة بتنصحك: والله ياخ الغُرْبة دي ماحارّة ولا حاجة، حارة بس في العشرة سنين الأولى!
...

الفاتح وديدي يا أخوي هو العمر فيهو كم عشرة سنين ،الواحد يمرق من البلد وفي احسن الأحوال تكون عشرتين إتحرقت وبديت في التالته أها لمن تقد عشرة سنين أولى حارة عشان تقعد تاني العشرة الباردة بتكون يا مان إتلحست ومع ذلك ممكن تجي السودان إجازه بس في قفه أو مخلايه

ما أدق الوصف
ما أصدق التوصيف

الرباطابي الألمعي اللماح الذكي الفطن
إختصرت لينا الموضوع في كلمات قليلات
ومعاني عظيمة

الغربة دى يا جماعة فخ يصعب الخروج منه وفى نفس الوقت تضحية. لكن كل تضحية تمكنك من مد يد العون إلى أهلك هي محمدة. ربنا يرد غربتكم غانمين سالمين (مع وضع خطين تحت غانمين). ده لو ما أصبحنا مغنومين.

تحياتي للأخوة المغتربين