عاصم البنّا ده غنّاي شديد ياخ ..!!

نعم إشتهرت اسرة البنا بالفن والطرب والشعر ..
طرباً يشجيني الفرجوني من هذه الاسرة العريقة ..
وإن كان اللمين البنا الأكثر ظهوراً إعلامياً وفي الحفلات إلا أنه الأقل تطريباً بالنسبة لي في هذه الأسرة فالأمين البنا زول دوباي اكثر من الغنا..
عاصم البنا واحد من افراد هذه الأسرة الفنية فهم اعمامه وخيلانه ولكن هذا العاصم هو الحوار الذي غلب شيخه ..
الولد ده فناااااااااااااااان جداً ..
لديه كل مقومات الفنان الناجح والفنان النجم ...
حضور ما عادي في اي لقاء تلفزيوني ..
ثقافة عاااااااالية جداً ..
إدراك لبواطن الأمور الفنية ..
مزاكرة وتحضير جيد قبل بداية اي حلقة يسجلها في التلفزيون زي الداخل ليهو إمتحان ..
أناقة فوق العادة مع وسامة ..
وفوق كل ذلك حس فني مرهف وصوت تطريبي جمييييييييل جداً ..
والأروع إختياره لأغانيه الخاصة وحتى الأغاني المسموعة ..
اشعر به لا يجامل في فنه رغماً عن صغر سنه الفني ..
فهو لا يقبل اي نص لا يلائمه وإن كان من اصدقائه ..
استمعت له كثيراً وفي كل مرة يزداد إعجابي يهذا الفنان ..
بالأمس استمعت له لعمل جديد كتبه الشاعر احمد فرح شادول إسمه ( ما ألمك؟)
الروعة كانت في لحن الأغنية وخلفها المايسترو عبد اللطيف خضر(ود الحاوي) ..
وصراحة اعجبني هذا اللحن الغير تقليدي في زمن تعودنا فيه على الحان الكوباني والماحي سليمان التي صارت تقليدية ومكررة ..
الاداء كالعادة قمة الروعة من الفنان عاصم البنا..
وكم تعجبني أغنية (المقدرة ) وهي على ما اظن ايضاً عمل خاص ربما للراحل حسن الزبير..

عاصم البنا مثال للفنان الذي يمشي بخطى ثابتة وواثقة نحو النجومية المطلقة دون منازع في الزمن القادم ودون ان يقف خلفه إعلامياً احد رغماً عن انه من اسرة فنية ولكن رغم ذلك دخل الإعلام من بوابة الاداء الجاد والصوت الجميل والثقافة العالية ..
ادعوكم لمشاهدة حلقة (طرب الليالي) في يوم الخميس القادم إن شاء الله على قناة النيل الأزرق معاً لتقييم هذا الفنان وموافقتي على هذا الصوت الجميل والفن الراقي..

..
..


عمر الفاروق :

كلامك صاح فعلا غناي شديد ....

انا من المعجبين بفنه وادائه الجميل وقد اخترته لاحياء حفلة زواجي وقد كان

في قمة الابداع

طبعا هو من اسرة البنا الاسرة المسكونة بالابداع

ومريخاب كمان هو انت كنت قايل الابداع ده جاي من وين ؟؟؟

والليييلة جيمس وايداهو جووووووووووكم .

...

العم عمر الفاروق

لم تترك لنا شيئاً نقله.. لقد أوفيت الرجل حقه

جيمي يا حبيب:
يا زول نحن متفقين في حاجات كتييييرة خلاص بس عيبك الوحيد إنك مريخابي ..
والله انا شي مزعلني غير مريخيتك إنت وسامي عبد الوهاب وراكوبة ماف ؟؟؟
زول بيسمع عاصم البنا وبيشجع المانيا ده قطع شك هلالابي ...

Quote: انا من المعجبين بفنه وادائه الجميل وقد اخترته لاحياء حفلة زواجي وقد كان في قمة الابداع

والله لكن يا جيمي عرست ...
احتفظ بي شريط العرس ده لأنو بعد زمن حا تجي تقول لي أولادك شوفو ابوكم راقي كيف جاب في عرسو عاصم لأنو بعد زمن عاصم حا يكون زي ناس ود اللمين وردي في زمن ناس شروق ديل ..

Quote: طبعا هو من اسرة البنا الاسرة المسكونة بالابداع ومريخاب كمان هو انت كنت قايل الابداع ده جاي من وين ؟؟؟

وانت قايلني ما بريد اللمين البنا لي شنو ؟؟
شفت من قعد يغني أشهد ودوون يا سجل البطيخ
النصر المؤزر الحققو ال عوووووووووووووووع ..
انا طوالي كرهتو


تخريمة :
الكبير كبيييييييييييييير
ولا شنو يا معتز كبير ؟؟؟؟
قال جيمس قال ؟؟؟
هو كان فيهو فايدة كان اديناكم ليهو ؟
هاك كلاتشي ده ..

Quote: وإن كان اللمين البنا الأكثر ظهوراً إعلامياً وفي الحفلات إلا أنه الأقل تطريباً بالنسبة لي في هذه الأسرة فالأمين البنا زول دوباي اكثر من الغنا.. عاصم البنا واحد من افراد هذه الأسرة الفنية فهم اعمامه وخيلانه ولكن هذا العاصم هو الحوار الذي غلب شيخه ..

هي دا رأي أنا لقيتو وين عليك الله جيبو جيبو
شكراً ليك ياخي

Quote: الكبير كبيييييييييييييير ولا شنو يا معتز كبير ؟؟؟؟ قال جيمس قال ؟؟؟ هو كان فيهو فايدة كان اديناكم ليهو ؟ هاك كلاتشي ده ..

تكتب كده وبعد المباراة بتغيب شهور من النت .. المرة دي ابقى راجل واظهر ..


خليك من الكورة وباري الفنانين عشان تبقى علوبي جديد ..


تحياتي يامحمود الكضاب 2

عمر الفاروق كيفنك

كنا أنا وتمبس في ونسة شديييييييدة ودخلنا في نفق كده حبيت أطلعوا منو وقلت ليه رأيك شنو أشغل ليك حاجة سيوبر ما حتكون سمعتها من كاسيت !!!!!!! وقد كان فأنساب صوت عاصم معاهو أمال النور (تسجيل مباشر من النيل الأزرق إلى المسجل) ورائعة الكاشف باسم الحب أقدم ليك حياتي وما كان من تمبس إلا وصرخ طرباً لهذا الأداء الأكثر من رائع لهذا الزول (السمح) في كل شي " رغم أنوحضر هذه السهرة وسمع الأغنية من التلفزيون مباشرةً أكثر من مرة ) ........
عمر الزول ده أنا بريدو عديييييييييييل كدة وعيبو بس أنو مريخابي

تحياتي ياعمر

عاصم البنا هو كما ذكرت

إن جاز لي أن أضيف شيئاً بسيطاً ، فسأقول أن عاصم يجلس على تلال تراث كبير من بديع الأغاني خلفه جده الفنان العظيم عمر البنا . وفي تقديري أن عاصم وللأسباب التي سقتها أنت هو الأنسب من أبناء البنا لنشر هذا التراث ( بروايته الصحيحة ) خصوصاً بعد غياب عمه أحمد البنا ( الفرجوني ) رد الله غربته . ذلك أنني سمعته في لقاءات كثيرة يصحح الروايات الخاطئة التي يتغنى بها بعض المطربين لأغاني عمر البنا. هذا لا يعني بحال من الأحوال إنكفاؤه على هذا التراث فقط بل ويمضي في الطريق الخاص الذي إختطه لنفسه وظني أن نشره لتراث الفنان العظيم عمر البنا سيساعده حتماً في إنتاجه الخاص من حيث إختيار المفردة وتجويد اللحن .

إضافة

عشان أصحابك الظريفين ديل ما يبعدوك من عاصم أقول لك على مسؤوليتي أن عاصم هلالابي على السكين ، وقد ورث هذا العشق من والده بابكر البنا الذي كان لاعباً بصفوف الهلال .

عمر الفاروق الرّاجل الفنّان
التّحايا والأشواق

Quote: بالأمس استمعت له لعمل جديد كتبه الشاعر احمد فرح شادول إسمه ( ما ألمك؟) الروعة كانت في لحن الأغنية وخلفها المايسترو عبد اللطيف خضر(ود الحاوي) .. وصراحة اعجبني هذا اللحن الغير تقليدي

طيّب ياخي مُش تسمّع النّاس معاك ؟؟

إنت وزوّارك ناس فنّانين ، عشان كدا أقبل منّي العمل ..
والتحيّة ليك ولعاصم الفنّان ..


ما ألّمَـك

ـــــــــــــــــــــــــــــ

وأنا في البعيـد مشتـاق لهمسة من الوطن يـا نسمة
[email protected]

ود الإمام يا نشأت :

Quote: العم عمر الفاروق لم تترك لنا شيئاً نقله.. لقد أوفيت الرجل حقه

يا زول عملتني عم عديييييل كده ؟
ولا يهمك يا خال ..
تحياتي..

بدر الدين حلا :

Quote: هي دا رأي أنا لقيتو وين عليك الله جيبو جيبو

خودك أهن دا ...
انا لقيتو واقع في زقز ناس سعدية بت اللمين وسألت ده راي منو الواقع ده وماف زول قال لي حق بدر الدين ..
بي جازك يا حلو
الدقسة فيها اللحسة ..

Quote: طرباً يشجيني الفرجوني من هذه الاسرة العريقة ..

شكرا يا أخي عمر الفاروق.

ساعلمه وتأكد بانه سيكون في غاية السرور،

فبرغم من أبتعاد الوالد عن الساحة الفنية الا انه على اتصال بابن العم عاصم

فهو متابع معه وله منذ البدايات الاولى،

وجميل جدا وباعث للأمل ان تجد مثل هكذا وفاء من عشاق الطرب الاصيل...

ابن العم عاصم...وليس لانه اين عمي أو انه من العائلة...

لكن كلمة حق...

له صوت مطرب وشجي...

وهو الان يسير نحو الدرب الصحيح وبزيادة من التركيز على الالحان واختيار الكلمات

والتحكم في صوته وادائه سيكون ذواسلوب خاص مميز ومطرب.

اشكرك

وأشكر كل من خط كلمة ثناء واعجاب ومحبة لأل البنا.


تقديري وأحترامي.


تم التعديل لتصحيح المعنى

عمو عمر الفاروق
والله عاصم غنااااي خالص، وبعجبني فيهو أكتر الذكاء الفني الذي يتمتع به، تابع معنا الخميس القادم سهرة كاملة مع عاصم البنا على قناة النيل الأزرق.
وإضغط لتستمع للحن آخر له

الاخ عمر الفاروق
الاخ Rakoba

طلب خاص

يا ريت لو قدرتو نزلوا سهرة قناة النيل الازرق على البوست دا...




مع فائق شكري وتقديري.

ود المايقوما..:
كيفنك يا الحبيب...
ومبروووووووووووووووووك درع الإنقاذ ..
ياخ والله جمهوركم يحنن ..
لمن الحكم قال لي جندي وريتشارد طرة ولا كتابة وقام جندي قال ليهو طرة والحكم قال ليهو مبروك جمهوركم كورك ونطط وهلل وكبر..
ياخ والله تحننوا

أها طرة ولا كتابة ؟

Quote: عمر الزول ده أنا بريدو عديييييييييييل كدة وعيبو بس أنو مريخابي

هو زاااااااااااااااتو بيريدك ياخ
التحية لي استاذنا عاطف عمر وهو يؤكد لنا هلالية هذا الفنان الرائع ويا جمال الصادق اها تعال قول لينا سيك وميك

والله آل البنا ديل ما في زول بيلحقهم في ( الشعر ) !!!

غناي وشديد كمان البنا ده
وراكز وعندو صوت عجيب ...

لكن الكلام كلو كملوا (عمك) الجقر الزول الفنان الكبير

عمر فاروق
قف
ذوقك رفيع وسماع غني نضيف والله..

ذوقك راقي و فعلا عاصم فنان أستمعت ليه اليوم في التلفزيون و معاه تمتام و الجقر و فعلا هو مبدع و اكيد ذلك ليس غريب على آل البنا


الحاج حمد

عمر الفاروق
تحياتي


الصديق الفنان عاصم البنا فنان بمعنى الكلمة وإنسان راقي للغاية في تعامله ومن أكثر الفنانين الشباب مقدرة على الحوار بفهم واسع عكس الكثير من الفنانين الشباب الذين يتلعثمون ويلجمون عندما يكون لديهم لقاء بالتلفزيون ..
وهو إلى جانب ذلك لديه حس فني عالي في أختيار الكلمات والألحان للأغاني التي يؤديها..